Ramatua Yesus nasoda selu'!
24
Mamaso na dulupilan ria, ina' sira reni mina maboo meni' ma rampe, fo leo Yesus rates Na reu. 2 Ara losa naa, te rita batu kabau-ina' fo mana tatana' nai rates ria bafa na, mana eso heni' nai suu' so. 3 Boe ma ara maso' leo rates dale' reu, tehuu ta rita Yesus popora Na nai naa. 4 De roi ramakokoa' a.Kekeneu te lahenda dua pake kakao-papake makadila', rapadei nai sira boboa nara. 5 Ina' sira bii raan seli, de ratele losa dae a. Boe ma lahenda kadua' sira ratane rae, “Ubea' taon emi mai saka lahenda masoda' a nai lahenda mana mate' ara mamana na? 6 Yesus ta nai ia so'! Ana nasoda selu' so. Bate emi mafarene heni hata fo Ana parnaa nafada, tepo' fo bei nai Galilea a, do? 7 Huu fo Ana nafada mema' nae, neu' ko ara se'o heni Lahenda Dae-bafo' Tetea' leo lahenda tadalu' ara neu. Boe ma paku raisa Ni nai ai kake' a. Tehuu fai binesa na, te Ana nasoda selu'.”a
8 Ara ramanene ra ria, besa' ko rafarene maulu na Yesus nafada si a. 9 De ara ralale fali, reu rafada basa-basan neu' Yesus ana mana tuka dea kasanahulu esa nara, ma lahenda feke' fo tuka Ni a. 10 (Ina' fo leo rates reu a, si' Yakobis maman Maria, ma Maria neme koro Magdala. Yohana no ina feke' hida boe. Sira si' reu tui basa-basa ia ra neu' Yesus lahenda nadedenu nara.)
11 Tehuu ana mana tuka dea ra ramanene tutui' ria, ara afi rae ina' sira dedea fufudi'.
12 Tehuu Petrus foa de nalai leo rates neu. Losa naa, de ana titiro leo rates ria dale' neu, te nita noi tema' fo poti neu' popora' a. Ana fali neun ma dodoo nai dale na nae, “Leo bea' ia so?”b
Ramatua Yesus Ana mana tuka dean dua raneta ro Ni nai eno' leo Emaus reu
13 Fai ria boe, Yesus ana mana tuka dean dua leo koro' esa reu nade Emaus. Dodoo na bate kilo sanahulu esa neme kota Yerusalem mai.c 14 Ara la'o ma ratui' la'e-neu' Yesus mamate Na. 15 Kekeneu, te Yesus nanenea' noo dua si, de la'o sama-sama no si. 16 Tehuu dua si ta ralela' ria nana Yesus, huu fo Manetualain tao ria, ela ara boso' ralela' Ana. 17 Yesus natane si nae, “Emi dua matui' ubea' ia?”
Dua si ramanene leo' naa, boe ma rapadei, ma mata-idu nara sopa. 18 Boe ma Kleopas natane Ni nae, “Papa ka, dadi' leo lahenda bebeu' de ta bubulu' bei lalai' ia hata fo dadi nai Yerusalem, do?”
19 Yesus natane nae, “Ubea' ria?”
Ara rataa rae, “Te Yesus, lahenda Nasaret! Ria tebe-tebe Manetualain mana nesi matan. Ma Manetualain fee Ni kuasa, fo tao tanda heran rupa'. Ria boe nanori-nafada nalela' lahenda. Lahenda ra ramaho'o neu' Ana. Ma Manetualain boe namaho'o neu' Ana.
20 Tehuu ami malaka agama Yahudi ma malaka nara, ma lasi' ara hopu raan. Boe ma ara feen leo gubernor a neu fo huku naisa Ni. De paku raisa Ni nai ai kake' a. 21 Masososa na ami basa mamahena mae, Ria, nana Kristus, mai po'i-tata na ami nusa ma neme mana pareta Roma fo ri' ese-rumu ami. Tehuu bei lalai' ia soda Lima na, ara raisa Ni.
22 Besa' ia, ami tamba mamakoa bali. Huu fo bisinaa' a ami ina' mara mai tui rae, balahaa anan ria ara leo rates reu. 23 Tehuu ara tui rae, Yesus popora na mopon. Ma ara rita Manetualain eila'o-limalopen neme nusatetu-ikutema' a mai nafada si nae, Yesus nasoda selu' so! 24 Ami mamanene leo' naa, boe ma ami nonoom hida ralai leo rates reu. Ara rita sama leo' ina' sira dedea na. Ara ta rita Yesus popora Na boe'.”
25 Dua si tui basa rae leo' naa, boe ma Yesus nafada si nae, “Emi ta mae pakanaa boe' ma! Ubea' taon emi ta mamahere hata fo Manetualain mana nesi mata nara rafada mema' neme ulu' mai! 26 Huu fo ara dui' rae, Kristus muste hapu doidoso rupa leo naa', besa' ko Ana sipo hada-horomata ma kuasa marela-masa'a.” 27 Boe ma Yesus nanori-nafada si, basa-basan fo Manetualain mana nesi mata nara dui' mema' la'e-neu' Kristus. Mulai neme ba'i Musa dudui na, losa mana nesi mata feke' ara nuu nara.
28 Ara saka' losa Emaus, boe ma Yesus tao uni Ana la'o naroo. 29 Tehuu dua si hule rae, “Papa! Tuli fo suku mo ami hatun ia, huu fo ledo a saka' tena ria' so.” De Yesus sama-sama no si maso' leo uma dale' reu.
30 Ara ratuu' raa-rinu, boe ma Yesus hai na roti balo' esa. Ana hule makasi neu' Manetualain, basa de Ana tetebi roti ria. Ana loo fee dua si roti ria, 31 besa' ko dua si ralela', ria nana Yesus. Tehuu kekeneu te mopo' Ana neme mata nara mai! 32 Dua si dedea-rao nara rae, “Bisinaa' a tamanene Ana tui fee ita mana nesi mata ra dudui na, ita tameda taan nonoo' nae dale' ara loa-loa.”
33 Fai ria boe, dua si fali tuti' a leo Yerusalem reu. Ara leo Yesus ana mana tuka dea kasanahulu esa nara, ma lahenda feke' fo rabua rai naa. 34 Boe ma ana mana tuka dea sira rafada dua si rae, “Tebe! Ramatua Yesus nasoda selu'! Bisinaa' a natudu ao-ina Na neu' a'a Petrus.”d
35 Lahenda sira dua boe tui basa-basan fo dadi nai eno', losa' sira dua bisa ralela' Yesus, fai fo Ana tetebi roti a.
Ramatua Yesus natudu ao-ina Na neu' ana mana tuka dea nara
36 Fai ria ara bei ratui' leo naa', kekeneu te Yesus napadei nai sira talada. Ana nahara nae, “Soda-mole'!”
37 Tehuu ara kekes ara ma bii' huu fo raendobuko nitu ria.
38 Tehuu Yesus dedea nae, “Ubea' taon de emi bii'? Emi ta mamahere Au ia fo ri' asoda selu' a, do? 39 Soba mete Au lima-ei kara, Au ia. Loo' lima mara mai fo mafaroe mata'! Ela emi mamahere mae, Au ia, ta nitu. Huu fo nitu a ta nanuu ao-paa', tehuu emi basa bisa mita Au ao-paa Ka, hete?!”
40 Bei dea-dea leo' naa, Ana natudu si pii' fo nai lima-ei nara. 41 Ara ramaho'o raan seli, huu fo Yesus nasoda selu'. Ara roi ramakokoa' a, nana huu ara ta bisa bubulu' ubea' taon, de bisa dadi leo' naa. Yesus natane si nae, “Emi mia ubea' nai ia boe?” 42 Ara loo fee Ni ika mana tunu' bibia' esa. 43 Yesus sipo na ika' ria, de naa neu' sira matan.
44 Boe ma Ana dedea nae, “Leo' bea? Emi bei mafarene maulu na, tepo' fo Au sama-sama oo emi a? Fai ria Au afada ae, basa-basan fo Manetualain mana nesi mata nara dui' la'e-neu' Au, muste dadi. Ri', neme ba'i Musa, mana nesi mata feke' ara, ma susura Sosoda I'io-o'oa ara.”
45 Boe ma Ana buka sira dudu'a-aafin ela ara bubulu' matetu' Susura Makamoi' a sosoa-raraan. 46 Ana dedea tamba nae, “Manetualain mana nesi mata nara dui' rae, Kristus fo ri' Manetualain feen mai a, muste hapu doidoso rupa', ma Ana mate. Tehuu fai binesa na, te Ana nasoda selu'. Huu fo basa sira mana dui' mema'! 47 Besa' ia Au fee kuasa fo emi meni Tutui Malole ia leo basa lahenda nusa' ara, mulai neme Yerusalem ia' mai. Mafada si mae, lahenda fo manaku sala na, ma ratafali leo Manetualain reu, neu' ko Manetualain sae-safe heni sala-siko nara. 48 Emi muste dadi mana sakasii fo tui mae, Au hapu doidoso ma mate, tehuu asoda selu'. 49 Dula-dale Malalao-malalafu', fo Au Papa Ka helu a, neu' ko Au fee ni mai. Tehuu emi muste mahani' kota Yerusalem ia, losa' sipo kuasa neme nusatetu-ikutema' a mai.”e
Ramatua Yesus hene-ae leo nusatetu-ikutema' a neu
50 Fai esa, boe ma Yesus noo si leo kota dea' reu, losa' ranenea' koro Betania. Boe ma Ana lalaa lima Na fo dedea fee si ua-nale'.f 51 Ana bei dedea fee ua-nale', te Ana hene-ae leo nusatetu-ikutema' a neu. 52 Basa si rita leo' naa, boe ma sunda' undulaka nara do'o-tabe Ni. Basa de ara fali leo Yerusalem reu no namaho'o-natadale'. 53 Tuka-tuka fai' ara rabua nai Uma Mamaso Yahudi Ina a fo io-oa Manetualain.
Papa Teofilus! Au tutui ka te'e ada' ia.
Soda-mole',
Lukas