3 Yesus namanene leo' naa, boe ma Ana tui fee si dedea nasasama' esa nae, 4 “Uni' ko leo neme emi mai lahenda esa nanuu bibi-lopo natun esa. Boe ma mopo esa. Besa' ia lahenda ria muste tao ubea'? Tantu ana foa ela bibi-lopo kasio hulu sio' sira reu' mamana lino-nees, fo neu saka bibi-lopo mana mopo' ria losa' hapun. 5 Kalu hapu ni sona nasaa neni fali' ana no namaho'o. 6 Losa uma, te naloo nonoo nara, boe ma nafada nae, ‘Emi mai fo ita tamaho'o! Huu fo au hapu fali' bibi-lopo mana mopo' ka so.’ 7 Nai nusatetu-ikutema' a boe leo' naa. Kalu lahenda masala' esa saledale-tu'etei na, boe ma natafali leo Manetualain neu, sona nusatetu-ikutema' a isi na basa si ramaho'o. Ara ramaho'o raan seli nana huu lahenda esa natafali leo Manetualain neu, lena heni lahenda sio hulu sio rasoda tuka eno roo-tetu'.”

8 Yesus tui dedea nasasama' esa bali nae, “Ina' esa nanuu doi lilo fula' sanahulu.^b Te mopo esa. De besa' ia tao aon leo' bea? Tantu ana dede dedede' fo loti na basa mamana' ara, ma kakai uma ria losa buku nara lala'en, ela saka natalolole doi' ria. 9 Ana nita doi' ria, boe ma naloo uma manenea' sira lahenda nara, de nafada si nae, ‘Emi mai fo tamaho'o! Huu fo au hapu fali' doi mana mopo ka so!’ 10 Nai nusatetu-ikutema' a boe leo' naa. Kalu lahenda masala' esa saledale-tu'etei na, ma fali leo Manetualain neu, tantu eila'o-limalope rai nusatetu-ikutema' a ramaho'o raan seli.”

11 Boe ma Yesus tui dedea nasasama' feke' esa bali nae, “Ama' esa nanuu ana tou' dua. 12 Fai' esa, boe ma ana muri' a nafada papa na nae, ‘Papa! Besa' ia bati fee au hata posaka kara mai leo!’ Boe ma papa na bati hata-heto sira fee anan dua si. 13 Ta doo bea boe', te ana muri' a se'o heni nuu babati nara. Boe ma popoti na bua-loa nara, de leo nusa doo' neu. Nai naa, ana tutu'u-kakari doi-talin, ma nasosoe aon nai masoda taohiro-taohari na. 14 Nabasa doi nara, la'e nusa' ria boe hapu fai laa-roe ina' a, losa' ana to'a-taa naan seli'. 15 Boe ma ana neu saka nonoi'. Lahenda esa nai nusa' ria sipo' ana de nadenu ni hani bafi. 16 Huu no ana' ria namalaa naan seli, boe ma nahii' naa bafi sira nanaa nara. Huu fo ta hapu lahenda rahao ni.

17 Doo-doo boe ma ana afi neu-mai nae, ‘Nai au papa ka uma na, basa lahenda mana noi ra raa-rinu losa' rabete. Sekonaa te au nai ia mate oo laas a. 18 Malole lena', au fali leo papa ka uma na uu ma afada ni ae, “Papa! Au tao sala' bau-ina' neu' Manetualain ma neu' papa. 19 Au ta araa dadi papa anam so'. Leo mae papa ka sipo' au fo dadi ata nai papa ka uman dale', boe malole a!’”

20 Afi na ria, boe ma ana fali leo papa na uman neu. Bei nai doo' a te papa na nita ni, de kasian neu' ana. Ana kalua neme uma na mai, nalai neu soru' anan fo ri' fali mai ni a. Boe ma holu naan de de'in.

21 Ana' ria dedea no papa na nae, ‘Papa! Au tao sala' bau-ina' neu' Manetualain ma neu' papa ka. Au ta araa dadi papa ka anam so.’

22 Tehuu papa na pareta tuti' ata nara nae, ‘Malale! Meu hai meni badu malole fo fee ni pake. Olu rereli neu' lima u'u nara, ma sopatu neu' ei nara. 23 Meu hela ma sapi mapeta' ria tatin, fo ita tao feta bau-ina'. 24 Nana huu au ana ka sama leo' mate ni, tehuu besa' ia nasoda selu'. Mopo ni, tehuu besa' ia hapu fali' ana.’ Dedea basa nae leo' naa, boe ma ara mulai feta de ramaho'o-ratadale.

25 Fai ria, ana ulu' a ta nai uma, huu fo noi nonoi' nai oka'. Ana fali neun, bei nai doo' a te namanene me'o-labu lii', ma lahenda ra roke-foti. 26 Boe ma naloo na ata esa, de natane ni nae, ‘Tao rame ubea' ia?’

27 Ata ria nataa nae, ‘Malaka a fadi ma fali main. De papa nadenu tati sapi fo tao feta bau-ina', huu fo ana na fali main no soda-mole'.’

28 Ana ulu' a namanene na ria, boe ma namanasa. Ana ta nau leo uma dale' neu so'. De papa na lele'o ni ela maso' leo uma dale' neu.

29 Tehuu nasa na lua de nae, ‘Papa! Soba papa ka dodoo dei! Doo-naru basa ia au oi-tao fee papa ka, sota aan seli sama leo' ata. Au ta alena-laka papa ka hihii-nanaum. Leo mae leo' naa boe, tehuu papa ka bei ta parnaa fee bibi ana' esa fo au tao feta ela oo nonoo kara mamaho'o boe'. 30 Tehuu papa ka ana mana tutu'u-kakari doi-talim ria, neu namina ina' de nabasa papa ka doi mara. Besa' ia ana fali mai ni, boe ma papa ka tati sapi mapeta' fo tao feta bau-ina' fee ni.’

31 Tehuu papa na sipo' ana nae, ‘Ana susuek on! Nenene matalolole! Doo-naru basa ia o leo mo papa. Basa hata fo papa nanuu a, o nuum katema' sira. 32 Tehuu besa' ia ita muste tao feta fo tamaho'o, nana huu o fadi isem ia. Maulu na ana sama leo' mate ni, tehuu besa' ia nasoda selu'. Mopo ni, tehuu besa' ia hapu fali' ana.’”