2 Mamaso na, bei balahaa ana', te telu si leo rates ria reu. 3-4 Ara dedea-rao nara rai eno talada' rae', “Mai te bea ri' tulu-fali ita fo eso heni batu kaba'u-ina ria neme rates a bafa na mai? Ita telu boe tantu ta bolen, te batu ria bau' basa na!”

Tehuu ara losa naa, te rita batu a nanaeso' so. 5 De ara maso' leo rates ria dale' reu. Tehuu ara kekes ara, nana huu rita lahenda tate ana' esa natuu' nai sira poo ona na, pake kakao-papake fula makadila'. 6 Lahenda tate ana' ria nafada si nae, “Emi boso' bii! Au bubulu' emi mai saka Yesus lahenda Nasaret, fo ri' ara raisan nai ai kake'. Ana ta nai ia so', nasoda selu' so. Mai mita mata' mamana' fo ara rapeu' Yesus popora Na, rou' so. 7 Emi malale fali leo! Meu mafada Petrus asa mae, Yesus nasoda selu' so. Ana naulu' leo Galilea neu. Neu' ko ara raneta ro Yesus nai naa, sama leo' maulu na Ana nafada si a. Emi fali leo!”^a

8 Fai ria ina' ara rita mamana' a rou', boe ma kekes ara. De ralai fali' leo dea' reu. Ara ralale fali reu si. Ara ta tutui esa nai eno' boe', nana huu ara bii raan seli.

9 Mamaso na balahaan ria, Yesus natudu naulu' ao-ina Na neu' Maria neme Magdala, fo ri' maulu na parnaa Yesus usi heni nitu hitu reme ao-ina na mai. 10 Ana nita basa Yesus, boe ma ana fali neu nafada basa lahenda fo ri' maulun ria tuka Yesus a. Ara bei rabua ao nara no dale hedi', ma luu nara tuda nana huu rafarene Yesus mamate Na. 11 Maria nafada si nae, “Ubea' taon de emi bei dale hedi bali? Boso' boe dale hedi, huu fo Yesus nasoda selu' so! Bisinaa' a, au aneta oo Ni!”

Tehuu basa si rataa rae, “O fufudi' ria!”

12 Boe ma Yesus ana mana tuka dean dua lala'o leo koro' esa reu. Losa eno talada', boe ma Yesus natudu ao-ina Na neu' dua si. Tehuu Ana dadi feke'. Tehuu ta doo bea boe', te ara ralela' Ana. 13 Boe ma dua si fali reu rafada nonoo nara rae, “Emi nenene dei! Bisinaa' a, ami maneta mo Yesus nai eno'!”

Tehuu basa nonoo nara rataa rae, “Emi boso' dedea fufudi' leo naa'!”

14 Boe ma Yesus natudu ao-ina Na neu' ana mana tuka dea kasanahulu esa nara, fai fo ara raa-rinu. Ana nafada si nae, “Emi laka batu mara seli! Lahenda rafada emi rae, ara rita mata' Au, tehuu emi ta mamahere! Emi mae, sira basa fufudi'! Besa' ia Au mai mata Ki ria'. Au mate tebe, tehuu besa' ia Au asoda selu'! Emi mita mata' leo.

15 De besa' ia emi muste la'o rule-feo dae-bafo' ia, fo tui-beka fee lahenda ra Au Tutui Malole Ki ia.^c 16 Lahenda fo namahere Au, ma ana sarani, neu' ko Manetualain po'i-tata naan, fo ana leo naroo no Manetualain nai nusatetu-ikutema' a. Tehuu lahenda fo ta namahere, neu' ko hapu huhuku', ma Manetualain ta sipo' ana nai nusatetu-ikutema'. 17 Ma lahenda fo ramahere Au, neu' ko ara tao tanda heran rupa', ela basa lahenda bubulu' sira kuasan ria, tebe neme' Manetualain mai. Conto leo-leo', ara bisa usi nitu pake Au nade Ka. Neu' ko Manetualain tao naa si, bisa dedea pake dedea feke' fo ri' ara ta ralela' ana. 18 Ma kalu ara hopu la'e meke manuu raso', do ara rinu roi raso, ara ta soe. Boe ma kalu ara fua lima nara neu' lahenda kamahedis ara, neu' ko lahenda sira te'e ra ao nara.”

19 Yesus dedea basa no ana mana tuka dea nara, boe ma Manetualain nahene-naae' Ana leo nusatetu-ikutema' a neu. Nai naa, Ana dadi Manetualain lima ona Na, huu fo dua si pareta bela' a.^d

20 Ana mana tuka dea nara tuka Ria pareta Na. Ara leo basa mamana' ain reu tui-beka Yesus Tutui Malole Na fee basa lahenda. Manetualain fee si kuasa, fo ara tao basa tanda heran fo ri' Yesus nafada si a. Boe ma lahenda dodou-ina' ramahere Yesus, huu fo ara bubulu' Tutui Malole ria, mema' tebe.

9 Fai fo ina' katelu' sira losa Petrus asa, boe ma ara tui basa-basan la'e-neu' tou muri-ana' fo ri' dedea nai rates a. 10 Yesus pareta ana mana tuka dea nara, reu tui-beka Ria Tutui Malole Na nai basa mamana' ain, losa dae-bafo' a bukun haas. Tutui Malole ia natudu eno' fo Manetualain po'i-tata na lahenda reme sala-siko nara mai, ela hapu soda' mana basa taa'.

Tutui Malole ia, mema' tebe. Huu ria naa ana nanenete naroo, losa doo na neu.