Ramatua Yesus nanori-nafada la'e-neu' lahenda mana tao sala', ma mana hule ampon
17
Yesus nafada ana mana tuka dea nara nae, “Kadodou na lahenda tuda rala sala' dale, huu no lahenda feke' a popode-eedon. Tehuu lahenda mana popode-eedo' ria hapu soe bau-ina'. 2 Kalu lahenda popode-eedo', losa ana aana' a ta namahere Au, neu' ko Manetualain huku ni bera' a. Heke batu bau-ina' esa neu' bolii na, fo tu'un leo tasi' dale' neu boe, ria bei kafa'. 3 De manea matalolole ao mara, ela emi boso' tao ma lahenda tuda nala sala' dale'. Tehuu kalu o toranoo ma tao sala', sona masa'ai ni. Kalu ana saledale-tu'etei na, ma ana hule ampon, sona mafarene heni sala na.a4 Kalu nai fai' esa dalen toranoo ma tao sala' lai' hitu, boe ma saledale-tu'etei na, de ana mai hule ampon lai' hitu, sona o muste mafarene heni ria sala na lai' hitu boe.”
Lahenda muste ramahere Manetualain kuasa Na
5 Fai' esa, boe ma Yesus ana mana tuka dea narab mai rasare raan de hule rae, “Papa Mesen! Ami dale namahere ma ta tea' a. De tao matetea tamba ami namahere ma dei.”
6 Yesus nataa nae, “Kalu emi mamahere Manetualain kuasa Na, leo mae noi baiana' boe, emi bisa pareta ai huu ina' ia mae, ‘Nanafa'u, fo marali tasi' dale' muu!’ Neu' ko ai huu' ria tuka tuti' emi pareta ma.”
Lahenda mananoi-manatao malole a, tuka malaka na hihii-nanaun
7 Boe ma Yesus dedea bali nae, “Hai conto. Ata fo foi dae nai oka', do nanea bibi-lopo nai moo' a. Boe ma ata ria fali uma neu. Leo mae leo' bea boe, malaka na ta bisa nafada ni nae,‘Mai fo ita dua taa-tinu sama-sama leo!’ 8 Ta'a! Naraa na, ri' malaka na nae, ‘Peda ma mei a fo au ua dei! Basa, sona besa' ko o mua-minu.’ 9 Kalu ata ria tao tuka malaka na hihii-nanaun, emi bate mae neu' ko malaka ria hule makasi neu' ana, do? Ta'a! 10 Emi leo' naa boe. Kalu emi moi-tao ma basa-basan fo Manetualain pareta a, sona emi mafada mae, ‘Ami nana ata, fo ri' ta naraa sipo hata. Ami ta saka i'io. Ami malala'o noi ami nonoi-laka ma.’”
Ramatua Yesus puli na lahenda kamahedis kusta sanahulu
11 Fai fo Yesus asa leo Yerusalem reu, ara losa propensi Galilea no propensi Samaria too na. 12 Ara saka' maso' leo koro' esa reu nai naa, lahenda kamahedis kusta sanahulu leo Yesus mai. Ara rapadei nai doo' a. 13 Ara raloo bela' a rae, “Yesus! Ramatua'! Kasian neu' ami dei!”
14 Yesus nita si, boe ma Ana nadenu nae, “Emi meu matudu ao-ina mara nai malaka agama ra, ela ara parisa' rae, emi hedis kusta mara mopo si, do bei'.” Ramanene leo' naa, boe ma ara reu. Tehuu nai eno talada', kekeneu te, basa si ao-ina nara makamoi' a.c
15 Ara la'o raroo no dale namaho'o. Tehuu sira esa fali selu' leo Yesus neu. Ana nahara nae, “Io-oa neu' Manetualain! Huu fo au ao-ina ka makamoi' a so!” 16 Ana sunda' undulaka na, fo hule makasi neu' Yesus. (Sekonaa te ria ta lahenda Yahudi. Ria lahenda Samaria fo ri' radedea ro lahenda Yahudi ra la'o naroo.)
17 Boe ma Yesus dedea no basa lahenda fo ri' tuka Ni a nae, “Bisinaa' a Au puli a lahenda sanahulu, hete? Tehuu sio rai bea? 18 Ubea' taon de noi lahenda mana mai ia ri' natafali mai, hule makasi neu' Manetualain, ma io-oa neu' Ana?”
19 Boe ma Ana nafada lahenda ria nae, “Huu no mamahere tebe-tebe neu' Au, de o te'e ma aom. Foa fo fali no soda-mole'!”
Ramatua Yesus tui la'e-neu' dae-bafo' a nonoe na, ma Ria natafali mai Na
20-21 Fai' esa, boe ma lahenda Farisi hida mai ratane Yesus rae, “Papa Mesen! Soba mafada dei! Fai hida' Manetualain mai pareta nai dae-bafo' a?”
Yesus nataa nae, “Leo ia'! Manetualain pareta nai dae-bafo' a, ta mulai neni' tanda fo lahenda bisa ritan. Boe ma lahenda ta bisa natudu buti nae, ‘Mita', Manetualain pareta nai ia, do nai ele!’ Huu fo Ana pareta nai emi talada nai lahenda dae-bafo' a dalen.”
22 Yesus nafada ana mana tuka dea nara nae, “Ta doo' a so', te Au, Lahenda Dae-bafo' Tetea', ta sama-sama oo emi so'. Neu' ko fai susa-lela a, te emi mahii' mita Au fai mamai Ka. Tehuu Au bei ta mai fa. 23 Kalu lahenda rafada rae, ‘Kristus nai ia!’, do, ‘Kristus nai ele!’ sona boso' kalua meu masaka', huu fo ara dedea fufudi' ria. 24 Neu' ko Lahenda Dae-bafo' Tetea' a natafali mai, tanda na sama leo' relas a narela nahaa-nakaledo nai lalai bukun haas. 25 Tehuu masososa na Ana lepa-nasaa doidoso rupa' dei. Ma lahenda besa' ia tipa-tola' Ana. 26 Tehuu kalu Ana natafali mai, lahenda ra masoda nara sama leo' nai Noh tepo na.d 27 Noh tepo na nana lahenda ta nau ramanene, raa-rinu ma sao ana, losa Noh maso' ofa dale' neu. Boe ma faa ina a mai, de namate basa si.e
28 Ria sama leo' nai Lot tepo na boe, lahenda ta nau ramanene. Ara raa-rinu, se'o-asa, sele-tande ma rafoa uma. 29 Tehuu fai fo Lot kalua ela Sodom, boe ma uda ai-pila' ma balerang onda neme lalai mai, de naa heni lai' esa' asa.f
30 De emi besa-besa! Boso' losa fai fo Lahenda Dae-bafo' Tetea' a natafali mai, lahenda ra masoda nara leo-leo' naa. Tehuu kekeneu te Ana toda mai. 31 Fai ria, lahenda fo nai teras, boso' boe uma dale' neu nafafau bali. Lahenda mana noi nai oka-tine, boso' boe fali uma hai hata-nuun bali.g 32 Mafarene hata fo maulu na dadi neu' Lot sao na a. Ana mate, nana huu nafarene hata-nuun nai uma.h
33 Lahenda fo ta nau tuka Au, huu no sue ao-ina na, neu' ko soda na mana dadi taa'. Tehuu lahenda fo nau tuka Au losa' fee heni ria ao-ina na nana huu sue-lai Au, neu' ko ana hapu popo'i-tatata', ma nasoda naroo no Manetualain.i 34 Au afada mema'! Tepo' fo Lahenda Dae-bafo' Tetea' a natafali mai, kalu lahenda dua suku rabua rai mamana susuku' esa, kekeneu te Manetualain no esa, ma foa ela esa. 35 Kalu ina' dua rapau sama-sama, neu' ko Manetualain no esa, ma foa ela feke' a. 36 [Kalu lahenda dua roi nonoi-tatao' sama-sama nai oka-tine, neu' ko Manetualain no esa, ma foa ela feke' a.]”j
37 Yesus ana mana tuka dea nara ramanene leo' naa, boe ma ara ratane Ni rae, “Papa Mesen! Neu' ko basa sira dadi rai bea?”
Yesus tu'u dedea' nae, “Leo ia'. Kalu emi mita manupui mana naa banda mates ara laa rabua rai bea, emi bubulu' tanda ria nae, tantu ara raa banda mates rai mamana' ria.” [Ma maksud mana mafuni', neu' ko Kristus natafali mai, ria tanda na ledo-ledo, kalu lahenda lees ralela'.]