Lahenda dae-bafo' a tao sira atoran fo kati neu' Manetualain pareta Na
15
Fai' esa, boe ma lahenda Farisi ma mesen agama bubua' esa reme Yerusalem mai raneta ro Yesus. 2 Lahenda Farisi ra homu rahere hadas Yahudi nara. Ara ramanene rae, Yesus ana mana tuka dea nara raa-rinu ta tao tuka hadas a fo safe lima nara, de ete' ao nara. Ara sale Yesus rae, “Ubea' taon, de O ana mana tuka dea mara raa-rinu, tehuu ta tao tuka hadas a fo safe lima nara? Ria ralena laka neu' ita bei-ba'in hadan!”3 Tehuu Yesus nataa si nae, “Emi nana, tebe lahenda fo ri' dedea feke' ma tao feke'! Emi malena-laka malela' Manetualain pareta Na, fo tuka noi bei-ba'i mara hadan. 4 Huu fo Manetualain pareta nae, ‘Fee hada-horomata neu' ina-ama mara,’ Ma tamba bali nae, ‘Kalu lahenda esa do'i ina-aman, muste huku maisa ni.’a 5-6 Manetualain nanori-nafada leo naa', tehuu emi manori-mafada feke' bali. Huu fo emi mae, ‘Kalu lahenda esa helu saka' fee hata esa leo Manetualain neu, sona leo mae ina-aman doidoso raan seli boe, ana ta tulu-fali si pake hata sira.’ Tehuu no emi manori-mafada leo naa', emi tu'u-tapa heni Manetualain pareta Na, fo katin meni' emi atoran mara. 7 Huu ria naa, bisinaa' a Au afada ae, emi nana, lahenda fo dedea feke' ma tao feke'! Ria naraa no hata fo Manetualain mana nesi matan Yesaya dui' mema' neme ulu' mai la'e-neu' emi! Huu fo Manetualain pake ni fo dui' nae,
8 ‘Lahenda io-oa Au,
noi nai bafa-doo peda na, tehuu dale' ta'a.
9 Leo mae ara tao leo naa' boe, mana dadi taa'.
Ara ta tao dale' neu' Au,
huu fo ara tao dale' noi neu' lahenda dae-bafo' a atoran na.’”b
Hata tadalu' a kalua neme lahenda dale na mai
10 Boe ma Yesus naloo na lahenda feke' rai naa, de nanori-nafada si nae, “Pasa' matalolole ridoo mara, ela emi bisa bubulu'! 11 Hata fo maso' leo lahenda bafan dale' neu, ria ta tao nakekeo-nakakanu lahenda. Tehuu hata fo kalua neme lahenda bafan dale' mai, ria ri' tao nakekeo-nakakanu.”
12 Yesus ana mana tuka dea nara mai rafada Ni rae, “Papa bubulu', do? Lahenda Farisi ra dale nara hanas a, nana huu ramanene Papa dedea-nafadam ria.”
13 Tehuu Yesus nataa nae, “Au Papa Ka nai nusatetu-ikutema' a neu' ko tu'u-tapa heni lahenda fo ta nanori-nafada tuka Ria hihii-nanaun. Ria sama leo' lahenda fe'a heni parusa fo ri' ana ta selen fa. 14 De boso' tao dale' neu' lahenda Farisi ra! Huu fo sira sama leo' lahenda poke' natudu lahenda poke' a eno'. Neu' ko ara rame-rame tuda rala bolo' dale'.”c
15 Boe ma Petrus dedea nae, “Papa, mafada fee ami dedea nasasama' bisinaa' a sosoa-raraan dei!”
16 Yesus nataa nae, “Emi bei ta bubulu' boe'? 17 Sosoa-raraan leo ia': Hata fo ita taa-tinun, maso' nesi' bafa' ara, naroo leo tei' ara dale' neu, boe ma kalua leo kakus dale' neu. 18 Tehuu hata fo kalua neme bafa' ara mai, ria ri' tao nakekeo-nakakanu lahenda, losa' Manetualain nahia' ana, ma ta nau sipo' ana.d 19 Huu fo hata tadalu' dodou' kalua neme lahenda dale na mai! Sama leo': du'a-afi tadalu', naisa lahenda, hohoke, namana'o, sakasii pepeko', ma dedea namumulu lahenda. 20 Hihii-nanau' leo naa' ara, si' tao rakekeo-rakakanu lahenda. Tehuu kalu noi ri' lahenda naa-ninu ma ta tao tuka hadas fo safe lima' a, ria sala' ta'a.”
Ramatua Yesus tulu-fali ina' esa fo ta lahenda Yahudi
21 Boe ma Yesus foa ela mamana' ria, de leo nusa' fo ri' nanenea' no kota Tirus ma kota Sidon. 22 Ina' esa nai naa, neme nusa' ria mai. Ria ta lahenda Yahudi. Fai ria namanene Yesus nai naa, boe ma ana mai hule tetea' nae, “Mane' Daud tititi-nonosin! Kasian neu' au dei! Huu fo au ana feto ka nitu ra heke raan, kasian, ana doidoso naan seli.”
23 Tehuu Yesus nenee', ma ta nataa hata-hata esa boe'. Boe ma ana mana tuka dea nara rafada Ni rae, “Papa, ina' ia bou-bou tao tasibu'. Malole lena' Papa mafadan naheo' neme ia' mai!”
24 Yesus nataa si nae, “Manetualain nadenu Au mai tulu-fali ita lahenda Yahudi nara, nana huu ara la'o sala, sama leo' bibi-lopo manasala-manamopo'. Ana ta nadenu Au uu tulu-fali lahenda feke'.”
25 Tehuu ina' ria nanenea' leo Yesus mai. Ana sunda' undulaka na, ma hule tutulu-fafali' nae, “Ramatua'! Tulu-fali au dei.”
26 Tehuu Yesus tu'u dedea' nae, “Ta naraa hai ana' ara nanaa-nininun, fo tu'u fee busa ra.” [Maksud na bei nafuni' nae, Yesus muste tulu-fali Ria lahenda Yahudi nara dei, besa' ko bisa tulu-fali lahenda feke'.]
27 Tehuu ina' ria balas nae, “Tebe, Papa! Tehuu busa ra rahani nai mei a fiki dale na. Sira boe raa hata fo ri' tuda neme' ana' ara bika nara mai.” [Ma maksud na nae, fai' fo ana' ara raa, busa a boe naa. Leo mae Yesus tulu-fali Ria lahenda nara, tehuu Ria boe muste relu-natanae lahenda feke'.]
28 Yesus namanene leo' naa, boe ma nafada nae, “Mama namahere tebe-tebe neu' Au! De mama fali leo, te hata fo mama hule a, dadi mema' so!” Boe ma ana fali, te nita ana na te'e na aon so.
Ramatua Yesus puli na lahenda dodou'
29 Basa de Yesus no ana mana tuka dea nara foa ela mamana' ria, ara la'o tuka dano Galilea a suu na. Ara ae leo lete' esa lain reu, de Yesus natuu' fo nanori-nafada si. 30 Boe ma lahenda dodou' leo Ria mai. Ara roo lahenda ei hela', lahenda poke', lahenda luku', lahenda pakanaa' ma lahenda kamahedis feke' boe. Ara ranenea' lahenda kamahedis sira reu' Yesus ei Na, de Ana puli naa si. 31 Lahenda makadoto' sira rita leo' naa, boe ma ara heran. Ara beidea rae, “Kahere' naan seli, oo! Lahenda ei hela', bisa la'o natetu. Lahenda poke' bisa nita dae. Lahenda luku' bisa la'o. Ma lahenda pakanaa' bisa dedea! Tantu Manetualain nonoi-tataon ia. Ria nana, Ramatua' fo ri' neme fai a ulu na mai, ita bei-ba'in do'o-tabe Ni a.”
Ramatua Yesus nahao lahenda rifun haa
32 Basa fai' hida, boe ma Yesus naloo na ana mana tuka dea nara de nae, “Au kasian neu' basa lahenda makadoto' ia ra. Ruma reme dae doo' mai, na te ara rabua fai' telu ian, de nanaa' ta'a so. Malole lena' ara boso' fali no tei rou'. Boso' losa ara saparao rai eno talada'.”
33 Tehuu Yesus ana mana tuka dea nara rataa rae, “Papa! Mamana' ia lino-nees, doo' a neme koro' a mai. Tao leo' bea boe, ita ta bisa tahao lahenda makadoto' ia ra.”
34 Tehuu Yesus natane si nae, “Emi manuu roti hida?”
Ara rataa rae, “Hitu' a! Ma ika' bai'!”
35 Yesus nadenu basa lahenda sira ratuu' reu' dae a. 36 Ana hai na roti kahitu' ara ma ika' sira, boe ma hule makasi neu' Manetualain. Ana tetebi si, de fee si reu' ana mana tuka dea nara, fo babati fee basa lahenda sira. 37 Ara raa losa' rabete. Basa de rabubua ra nanaa lena' sira henu lapaneu hitu. 38 Basa lahenda mana naa' sira, bate tou' rifun haa. Bei ta reke' ina' ma ana' ara. 39 Basa de Yesus nadenu lahenda makadoto' sira fali. Boe ma Ana sa'e ofa' fo ara leo nusa Magadan reu.e