2
No ria naa, Manetualain adu naa lalai ma dae-ina' a no basa oe-isin.2 Ana noi-tao nabasa si, balahaa' la'e fai kahitu na, boe ma Ana hahae aon. 3 No ria naa, Ana tao fai kahitu a neu' fai bau-ina' neme fai feke' ara. Ana ator leo naa', nana huu Ana noi-tao nabasa nonoi-tataon, fai kahitu a boe ma Ana hahae aon. 4a Manetualain adu lalai ma dae-ina' a, tutui na leo naa'.
Manetualain adu tou' ma ina'
4b Tepo' fo MANETUALAIN besa' ko mulai adu lalai ma dae-ina' a, 5-6 bei ta hapu huu mana rerebi' ma doo mana sesepe' esa boe', nana huu Ana bei ta naonda uda. Tepo' ria, noi masu' neme dae a mai naoe dae-ina' a. Ma lahenda dae-bafo' bei ta'a fo tao oka-tine. 7 Boe ma MANETUALAIN hai naa dae bai', de tao naan dadi lahenda dae-bafo'. Ana fuu ani hahae' leo idu bolon dale' neu, de lahenda dae-bafo' ria nasoda tuti' a.
8 Boe ma MANETUALAIN buka oka' esa nai dae Eden poo' dulu. Ana fee lahenda dae-bafo' a leo neu' oka' ria. 9 Nai oka' ria dale', Ana namomori' ai huu' malole rupa', fo lahenda bisa raa mina-malada. Ana namomori' ai huu' rupa' dua rai oka' ria talada. Kalu lahenda naa ai huu' sira esa boa na, ana nasoda naroo. Tehuu kalu lahenda naa ai huu' esa boa na bali, sona ana bisa bubulu' bea ri' malole ma bea ri' tadalu'.
10 Lee esa nai naa, faa kalua neme oka' ria mai. Lee ria nanuu ba'e haa. 11 Ba'e masososa' a, nade Pison. Ba'e ria rule-feo basa dae Hawila. Nai naa, lilo pilas dodou'. 12 Nai naa, lilo pilas isi', ai huu' fo nana na naboo meni ma batu makarela'. 13 Lee ria ba'e kadua na, nade Gihon. Ba'e ria rule-feo basa dae Kus.a 14 Ba'e katelu na, nade Tigris. Ba'e ia ri' dadi too nai dae Asyur,b poo' dulu. Ba'e kahaa na, nade Efrat.
15 MANETUALAIN fee lahenda dae-bafo' ria leo nai Eden, ela ana urus natalolole oka' ria. 16 Ana pareta lahenda dae-bafo' ria nae, “O bole mua sudi la'e ai boa ubea' neme ai huu' rai oka' ia dale'. 17 Tehuu esa nai naa, o ta bole muan. Ri' ai huu' fo bisa tao naa lahenda bubulu' malole ma tadalu'. Kalu mua ni, sona tantu o mate.”
18 MANETUALAIN dedea bali nae, “Kalu lahenda dae-bafo' ia nasoda mesa' ana, sona ta malole a. De Au adu fee ni, nonoo' fo teiesa-daleesa noon.”
19-20 MANETUALAIN hai na dae, de tao naa banda rupa' ma manupui'. Boe ma Ana neni banda ra, ma manupui' ara leo lahenda ria neu, ela ana foi nade nara. De lahenda ria foi banda ra ma manupui' ara esa' ko no' naden. Tehuu ria sona bei ta hapu nonoo' fo teiesa-daleesa noon.
21 Boe ma MANETUALAIN tao na lahenda ria suku namanee. Fai fo ana suku, Manetualain hai na dui ai-usun esa, basa de napoti fali' hina' ria. 22 Neme dui' ria mai, Ana adu na ina' esa. Basa de Ana fee ina' a leo lahenda ria neu. 23 Lahenda a nita ina' ria, boe ma nae,
“Ia dei! Ia besa' ko la'e au dale ka!
Dui na sama leo' au dui ka,
ma ao-paa na, sama leo' au ao-paa ka.
Huu no ana dadi neme tou' a mai, de au foi ni, nade ‘ina'’.”c
24 Huu ria naa, tou' a muste foa ela ina-ama nara,
nasoda dale' esa no sao na,
huu fo sira dua nana heke' dadi esa'.
25 Tepo' ria, dua si bei po'irao', tehuu ara ta mae'.