3 Au anori-afada emi hihii-nanau' fo ri' penting naan seli, ri' maulu na parnaa lahenda ranori-rafadan neu' au. Ri': Kristus, fo Manetualain feen mai a, Ana mate ela po'i-tata na ita teme sala-siko' ara, natetu na mana dui' mema' neme ulu' mai nai Manetualain Susura Makamoi Na.^a 4 Boe ma ara ratoi Ni. Nai fai binesa na, Manetualain feen nasoda selu', natetu na mana dui' mema' neme ulu' mai nai Manetualain Susura Makamoi Na.^b 5 Kristus natudu ao-ina Na neu' Petrus.^c Ana natudu ao-ina Na neu' ana mana tuka dean lahenda kasanahulu dua' ara boe.^d 6 Lai' esa de lahenda kamahere' natun lima lena' rita Ni, huu fo Ana natudu ao-ina Na neu' asa! Neme sira mai, kadodou na bei rasoda. Mate noi baiana'. 7 Ana natudu ao-ina Na neu' a'a Yakobis. Ana natudu ao-ina Na neu' basa lahenda nadedenu nara boe.

8 Au ri' ita Ni mate'e oe'. Huu fo au sama leo' ana mate'a tei-susu', de bokin nesi' bui'.^e 9 Ramatua' a lahenda nadedenu feke nara, basa si penting lena reme au mai. Kalu tuka matetu na, ta naraa au dadi Ria lahenda nadedenun. Huu fo maulu na, au ri' tao doidoso ma ese-rumu Manetualain lahenda nara rai basa mamana' ain.^f 10 Tehuu Manetualain natudu Ria dale malole na neu' au. Ria ri' tao na au dadi sama leo' besa' ia. Tepo' fo Ana tao hihii-nanau' malole soa-neu' au, Ana ta tutu'u hihii' ledo-fai. Mate'e na au ri' oi-tao mela-maku lena neme basa-basan! Sekonaa te, ta oi-tao pake au bebe'i-baraai ki, tehuu Manetualain dale malole Na ri' noi-tao nai au masoda ka.

11 De kalu au ri' anori-afada, do lahenda nadedenu feke' ara si' ranori-rafada, ria ta penting. Huu fo ami basa manori-mafada bela' hihii-nanau' esa' a. Ami tui-beka maroo fee lahenda la'e-neu' Manetualain Tutui Malole Na. Huu ria naa, emi mamahere Tutui Malole ria.

12 Ami biasa manori-mafada mae, Kristus fo ri' Manetualain feen mai, Ana nasoda selu' neme mamate Na mai. Ubea' taon de emi ruma mae, “Lahenda mana mate' ara ta rasoda selu'”? Ria dasar na ri' ubea'? 13 Uni' ko leo lahenda mana mate' a ta nasoda selu', ria sosoa na nae, Kristus boe ta nasoda selu'! 14 Ma kalu Kristus ta nasoda selu', sona basa-basan fo ami mafadan neu' lahenda ra, sosoa-raraa' ta'a. Ma emi namahere ma neu' Ana, mana dadi taa'! 15-16 Ma kalu tebe lahenda mana mate' a ta nasoda selu', ami boe dadi sakasii pepeko' la'e-neu' Manetualain. Huu fo ami manori-mafada mae, “Manetualain fee Kristus nasoda selu'!” Tebe ami mafada mae leo' naa. Tehuu uni' ko leo lahenda mana mate' a ta nasoda selu', ria sosoa na nae, Manetualain ta parnaa fee Kristus nasoda selu'. 17 Dodoo masudi hihii-nanau' ia: kalu Kristus ta nasoda selu', sona emi namahere ma neu' Manetualain nana mana dadi taa'! Huu fo emi bei lepa-masaa sala-siko mara! 18 Ta noi ria, te fai a ulu na basa lahenda mana mate' fo rabua-raesa ro Kristus, kalu Kristus ta parnaa nasoda selu', sira boe mate ma doo' a reme Manetualain mai. 19 Ita tamahena-tabani neu' Kristus tae, neu' ko Ana saka' tao malole soa-neu' ita. Tehuu uni' ko leo ita namahena na, dadi noi nai dae-bafo' a, sona ria mana dadi taa'! Ma ita dadi kasian lena neme basa-basan mai!

20 Sekonaa te ta leo naa', hete? Matetu na, ri': Kristus, fo ri' Manetualain feen mai, nasoda selu' neme mamate na mai! Ma ta noi Ria mesa' ana, te neu' ko lahenda kamahere' fo mate si a, rasoda selu'. Kristus sama leo' puleulu-boasosa', de natudu nae, neu' ko mana mate' ara rasoda selu' tuka Ni. 21 Fai a ulu na, noi lahenda esa ri' Adam, nalena-laka Manetualain pareta Na. De ria huhuku na, ri' mamates. Huhuku' ria boe tuda la'e ita lahenda dae-bafo' a katema'. Tehuu besa' ia, lahenda esa bali, ri' Kristus fo nasoda tuka Manetualain pareta Na. Huu no Ria dale malole Na, de lahenda mana mate' ara bisa rasoda selu'! 22 Basa lahenda fo ralena laka Manetualain pareta Na, hapu huhuku mamates, sama leo' Adam. Leo' naa boe, basa lahenda fo rabua-raesa ro Kristus, neu' ko Manetualain fee si rasoda selu'.

23 Tehuu esa-esa' ko no' ledo-fain. Kristus dadi lahenda masososa' fo ri' nasoda selu', sama leo' bisinaa' a puleulu'-boasosa'. Ma kalu Ana natafali leo dae-bafo' ia mai, besa' ko Ria lahenda Nara rasoda selu'. 24 Basa ria, besa' ko dae-bafo' a noe. Tepo' ria, te Kristus dadi Mane' fo tao nalulutu' basa kuasa, basa pareta, ma basa mana kuasa maiu-mahatu' fo ri' musu ro Manetualain. Kristus boe dadi Mane' fo fee fali' Ria haak pareta Na neu' Manetualain, Ria Aman.

25 Ana muste homu naroo pareta a, losa' Manetualain naseki basa-basan fo ri' soa' Kristus, ela ara roi rae' Ana.^g 26 Hihii-nanau' esa bali musu-noo ita lahenda dae-bafo' a, ri' ita muste mate. Tehuu mate'e na, Manetualain naseki mamates a kuasa na. Ana tao leo naa', de ta hapu lahenda mate so'. 27 Nai Manetualain Susura Makamoi Na mana dui' nae, “Manetualain naseki basa-basan ela raloe-radae ao nara reu' Lahenda fo ri' Ana helu feen mai.” Tehuu Manetualain ta naloe-nadae ao neu' Ana. Huu fo Manetualain so'u naan dadi Ramatua' soa-neu' basa-basan.^h 28 Kalu basa-basan nai Manetualain Ana Na kuasan, neu' ko Ana' ria fee heni basa-basan reu' Aman fo ri' so'u naan dadi Ramatua' soa-neu' basa-basan. Boe ma Manetualain pareta naroo basa lahenda ra, nai basa hihii-nanau' dale'.

29 Lahenda ruma nau sarani ela kati lahenda mana mate' fo bei ta sarani. Tehuu kalu lahenda mana mate' a ta nasoda selu', ubea' taon de sira nau sarani soa-neu' lahenda mana mate'?ⁱ 30 Ma kalu lahenda mana mate' a ta nasoda selu', ubea' taon de ami mataa' ao mara maroo nai soe-sala' a dale'? 31 Huu fo tuka-tuka fai' kura bai' au mate! Tehuu toranoo susue kara! Au soo-supa, uni' ko leo au mate boe, ta hata-hata. Au bisa boti' laka ka, nana huu emi mabua-maesa maroo mo ita Ramatuan Yesus Kristus fo ri' Manetualain feen mai. 32 Fai fo au bei nai kota Efesus, au asii-ao oo lahenda sira sama leo' banda fui ma'aa'. Tehuu kalu au ahuu-alena soa noi au ao-ina ka, ta soa-neu' Manetualain, sona ria mana dadi taa'. Sosoa-raraa' ta'a! Kalu lahenda mana mate' a ta nasoda selu', malole lena' ita toi tuka-tuka' lahenda dedean nae,

33 Emi boso' nana tipu' fo afi leo naa'! Huu fo dedea' a nae,

34 Boso' tao tadalu' bali! Hahae leo! Ator o masoda ma! Tao noi roo-tetu'! Matetu na emi muste mae', huu fo nai emi talada, bei hapu lahenda ta nalela' Manetualain.

35 Lahenda ra hii' rae ta ramahere de ara ratane, “Kalu lahenda mana mate' a nasoda selu', neu' ko eno na leo bea'? Ma sira ao-ina na dadi leo bea'?”

36 Koa-pakanaa'! Kalu sele-tande bini-kee, sona bini-kee ria muste purun nai dae dale' dei, besa' ko ana bisa mori. 37 Ma bini-kee fo ita sele-tanden, ria rupa na ta sama leo' hata fo nanupu ma nadoo. Ria bini-kee, leo-leo' hade gandum, hade, do bini-kee feke'. 38 Esa' ko no' rupa na, tuka Manetualain hihii-nanaun. Ria ri' naetu' fo sele-tande esa' ko rupan.

39 Banda ma lahenda dae-bafo' a boe leo naa'. Esa' ko no' ria rupa-lolen, tuka Manetualain hihii-nanaun. Lahenda dae-bafo' a ao-ina na tuka lahenda dae-bafo' a rupa-lolen. Banda ra ao-ina na, esa' ko no' ria rupa-lolen. Manupui' a no ria nuun. Ika' a no ria nuun. Ma feke' ara ro sira nuun.

40 Hapu hata rai lalai, ma hapu hata rai dae-ina' a. Rai lalai a, ranuu lole-napu'. Tehuu lole-napu' ria, feke' neme hata fo rai dae-ina' a. Rai dae-ina' a boe ranuu lole-napu'. Tehuu lole-napu' ria, feke' neme hata fo rai lalai. 41 Nai lalai, ledo a lole-napun feke'; bula' a lole-napun feke'; ma ruu' ara esa' ko lole-napun. Esa' ko no' rupa-lolen. Esa' ko no' ria lole-napun. De basa si ranuu lole-napu', hete?

42 Kalu lahenda mana mate' a nasoda selu', ria sama leo' bisinaa' a bini-kee. Kalu natoi heni mana mate' a, sona popora na puru ni, hete? Tehuu kalu nasoda selu', ana ta sama leo' maulu na so'. Kalu nasoda selu', sona ana ta mate so'. 43 Fai fo ita tatoi lahenda mana mate', tameda taan popora' ria makekeo-makakanu'. Tehuu kalu lahenda ria nasoda selu', sona ria marela-masa'a naan seli! Huu fo ana dadi malalao-malalafu'! Fai fo lahenda ratoi heni lahenda mana mate' a, sona ana ta bisa tao hata-hata esa boe'. Tehuu tepo' fo ana nasoda selu', sona ria bara'ai na seli! 44 Tepo' fo lahenda bei nasoda nai dae-bafo' a, ana nasoda nai ao-paa' dale'. Tehuu fai bea ma ana mate ma nasoda selu', sona ana hapu soda' fo ri' Manetualain Dula-dale Malalao-Malalafu Na fee ni. De ana ta sama leo' maulu na so'.

45 Lahenda dae-bafo' masososa' fo sama leo' ita a, ri' Adam. Tuka Manetualain Susura Makamoi Na mana dui' nae, “ana dadi lahenda dae-bafo' masoda', fo nasoda nai ao-paa' dale'.” Tehuu lahenda dae-bafo' fo nai lain naan seli rupa-lolen leo' Adam a, nana ri' Kristus. Ria ri' fee lahenda nasoda nai Dula-dale Malalao-malalafu' a dale'.^k 46 Masososa na, ri' lahenda fo nasoda nai ao-paa' dale', ma ao-paa na bisa mate. Tehuu kalu nasoda selu', sona nasoda nai Dula-dale Malalao-malalafu' a dale'. 47 Lahenda dae-bafo' masososa' nai dae-ina' a, nana taon neme dae a mai. Tehuu lahenda kadua a, ri' Kristus, neme lalai mai. 48 Ita fo ri' tasoda nai dae-ina' a, tanuu ao-paa sama leo' lahenda dae-bafo' masososa' fo ri' Manetualain adun neme dae a. Tehuu lahenda fo nabua-naesa no Manetualain nai lalai, rupa-lolen sama leo' Kristus neme lalai mai. 49 Ita besa' ia rupa-lole' ara sama leo' Adam fo ri' Manetualain adun neme dae a. Tehuu neu' ko ita kati rupa-lole bebeu', sama leo' Kristus fo ri' neme lalai mai.

50 Toranoo susue kara! Au afada emi leo ia': ita fo dadi lahenda dae-bafo' rupa-lole masososa', ita ao-paa na neme daa ma dui' a. Ao-paa leo naa' ta bisa sipo posaka fo dadi Manetualain anan nai nusatetu-ikutema' a. Ta bisa fa! Huu fo ao-paa leo naa' a, noe henin de ta bisa sipo posaka mana basa taa' a.

51 De nenene matalolole! Au saka' tui fee emi neu' loan, hihii-nanau' nino esa. Neu' ko lahenda kamahere' ruma ta mate. Tehuu neu' ko ita basa kati rupa-lole bebeu'. 52 Tepo' fo saki a lii mate'e oe na, basa ia ra dadi no keke-kaiboi'. Lalai' lena neme o hatemata ma. Tepo' fo saki a nalii, fai ria boe lahenda mana mate' ara rasoda selu'. Ma kalu ara rasoda selu', sona ara ta mate ma ta puru selu' so'. Leo' naa boe soa-neu' ita fo ri' bei tasoda. Ita basa dadi rupa-lole bebeu'.^l 53-54 Ita ao-inan fo ri' besa' ia bisa puru ni, narali dadi rupa-lole' fo ta bisa puru ni! Ma ita fo besa' ia bisa mate, tarali dadi rupa-lole' fo ta bisa mate! Ria tao tuka hata fo mana dui' mema' nai Susura Makamoi' a nae,

56 Ubea' taon, de mamates a neni fee ita lahenda dae-bafo' a tameda hedis? Ria nana huu ita tao sala'. Ubea' taon, de ita sala-sikon nanuu kuasa leo' naa? Ria nana huu Manetualain Atoran Na natudu nae, ita sala-sikon nalena-laka neu' Ria Pareta Na. 57 Tehuu besa' ia, basa-basan dadi feke' so! Ita basa hule makasi dodou' neu' Manetualain. Huu fo Ria tao na ita taseki hihii-nanau' tadalu' ara, nesi' ita Ramatuan Yesus Kristus nonoi-tataon. Ma tebe Kristus ri' naseki!

58 De toranoo susue kara! Manenete mahere! Boso' keke-boi'! Emi nonoi-tataom soa-neu' Manetualain muste tamba malole, ma tamba dodou'. Huu fo emi bubulu' emi moi-tao sota maan seli soa-neu' ita Ramatua na, ta sota hihii'.