Masoda no nasue-nalai ao' ma lalao-lalafu'
5
Emi nana Manetualain ana susuen. Huu ria naa, emi muste masoda tuka Ria hihii-nanaun. 2 Ma emi muste masue-malai ao esa no esa, sama leo' Kristus sue-lai emi. Ana fee heni ao-ina Na, fo mate kati ita. No ria naa, Ana dadi tutunu-hohotu maboo meni', ela tao namaho'o Manetualain.a3 Emi boe Manetualain lahenda lalao-lalafun. De boso' masoda nai makakeo-makakanu'! Afi hihii-nanau' makakeo-makakanu' boe, boso'! Boso' hohoke! Boso' tendetuu-dalesala! 4 Boso' dedea tadalu'! Ma boso' dedea mafarara'u! Huu fo Manetualain lahendan, sona ta naraa dedea leo naa'. Malole lena' emi dedea noi malole a, ma hule makasi neu' Manetualain. 5 Mafarerene' matalolole! Huu fo Manetualain ta sipo' lahenda fo nasoda makakeo-makakanu', ma lahenda mana hohoke! Sira ta bisa dadi Kristus lahendan, ma Manetualain ta dadi sira Mane na. Manetualain boe, ta sipo' lahenda mana tendetuu-dalesala', nana huu sira seti heni Ni ma radedema hihii-nanau' feke' ara.
Masoda nai makaledo' dale'
6 Boso' fee lahenda tipu-dai rala' emi reni' dedea fufudi' fo ri' rae, “Ta parluu masoda lalao-lalafu'!” Manetualain tantu namanasa no lahenda fo ta nasoda tuka Ria hihii-nanaun. 7 Huu ria naa, emi boso' mabua mo lahenda rupa leo naa'. 8 Fai a ulu na, emi sama leo' lahenda fo nasoda nai maiu' dale', nana huu emi ta malela' Manetualain. Tehuu besa' ia, Ana naonda makaledo Na, de tao na emi dadi Ria ana Nara. Huu ria naa, emi muste masoda nai Ria makaledon dale'. 9 Lahenda fo nasoda naroo nai makaledo' a dale', ana tao hihii-nanau' malole, nasoda roo-tetu' ma dedea no matetu'. 10 Saka eno' fo tao namaho'o Manetualain dale Na, huu fo Ria nanuu haak pareta ita. 11 Boso' mabua mo lahenda fo nasoda nai maiu' dale'. Huu fo sira nonoi-tataon ta nanuu sosoa-raraa' hata esa boe'. De emi muste masa'ai si, ma matudu sira sala nara. 12 Hata fo ara taon no nafufuni', nakekeo naan seli' losa' ita nau dedea ni boe mae'. 13 Au fee conto leo ia': kalu lahenda fee makaledo' neu' hata-heto fo rai maiu' dale', tantu lahenda rita hata-heto sira no makaledo'. 14 Leo' naa boe, kalu ita fee makaledo' neu' hihii-nanau' tadalu' fo lahenda taon, ana bisa bubulu' hihii-nanau' fo ri' ana tao a, tadalu'. Sosoda' esa nae,
“Mana suku' emin, foa leo!
Mana mate' emin, masoda selu' leo!
Neu' ko Kristus fee emi makaledo' a.”
Masoda dale' esa mo Manetualain Dula-dale Na
15 Huu ria naa, mete matalolole emi masoda mara, ela boso' emi sama leo' lahenda koa-pakanaa'. Malole lena' pake dudu'a-aafi malole neme Manetualain mai. 16 Besa' ia, lahenda dodou' tao hihii-nanau' tadalu' la'o naroo. De kalu hapu ledo-fai tao hihii-nanau' malole, sona tao leo. Boso' mahani bali!b 17 Afi matalolole fo malela' ita Ramatua na hihii-nanaun, ela emi boso' pakanaa'.
18 Boso' mafu', huu fo nininu' sira si' ator emi, de emi tao hihii-nanau' ta malole ra. Tehuu buka dale mara, ela Manetualain Dula-dale Malalao-malalafu Na ator emi. 19 No ria naa, neu' ko emi esa dedea mo esa pake dedea' neme Manetualain Susura Makamoi Na, neme sosoda i'io-o'oa', ma neme sosoda' fo emi hapu neme Ria Dula-dale Malalao-malalafu Na mai. Ma kalu soda, sona boso' noi nai bafa-doo peda' a. Tehuu io-oa Manetualain neme emi dale mara. 20 Yesus Kristus dadi ita Ramatuan, ma Ama' Manetualain tao hihii-nanau' dodou' fee ita. Huu ria naa, ita hule makasi taroo neu' Ana.c
Basa lahenda kamahere' ara muste tiadea-radaara ma namania-namanene esa no esa
21 Emi basa muste tiadea-radaara ma namania-namanene esa no esa. No ria naa, emi matudu hada-horomata' ma bii-mamata'u neu' Yesus Kristus.
Conto leo-leo': saoina-saotou'
22 Sao ina' ara! Emi muste tiadea-radaara ma mamania-mamanene neu' sao tou mara, sama leo' emi tiadea-radaara ma mamania-mamanene neu' emi Ramatuam Yesus Kristus. 23 Huu fo sao tou' a nana sao ina' a malaka na. Ma Kristus boe dadi Malaka neu' Ria lahenda Nara. Huu fo Ria ri' soi eno', de ara hapu popo'i-tatata'.d 24 Huu ria naa, Kristus lahenda nara muste tiadea-radaara ma ramania-ramanene neu' Ana. Leo' naa boe, sao ina' ara muste tiadea-radaara ma ramania-ramanene neu' sao nara nai basa hihii-nanau' dale'.
25 Leo' naa boe, sao tou' ara! Emi muste sue-lai sao mara, sama leo' Kristus sue-lai lahenda nara, losa' Ana fee heni ao-ina Na, mate kati si.e 26 Ana tao leo naa', ela ara dadi lalao-lalafu' nai Manetualain matan, nana huu ara tuka Ria Hara-dasin ma ara sarani. 27 Yesus Kristus lahenda nara, sama leo' baroit ina' a kakao-papake natalolole na aon, nana huu baroit tou' a saka' mai nala ni. Leo' naa boe, Kristus saka' mai nala lahenda nara. Huu ria naa, sira muste rasoda balaroe-balanau' ma lalao-lalafu', losa' ta hapu sala' bai' boe'.
28 Leo' naa boe, sao tou' ara! Emi muste sue-lai sao mara, sama leo' sue-lai ao-ina heheli mara. Kalu sao tou' a sue-lai sao na, ria sosoa na nae, ana sue-lai ao-ina heheli na. 29 Ta hapu lahenda ete' ao na no ao-ina heheli na. Tehuu ana urus ma naboi natalololen, sama leo' Kristus urus natalolole Ria lahenda Nara, 30 huu fo ita sama leo' Ria ao-ina Na. 31 Nai Manetualain Susura Makamoi Na mana dui' nae, “Huu ria naa, tou' a muste foa ela ina-aman fo neu nasoda dale' esa no sao na, nana huu sira dua dadi esa'.”f 32 Manetualain Hara-dasi sosoa-raraa bau-inan ria, natudu mema' neme fai a ulu na, la'e-neu' saoina-saotou' a nasue-nalai aon. Tehuu besa' ia ita bubulu' Hara-dasi' ria ratudu la'e-neu' Kristus susue-lalain neu' Ria lahenda Nara. 33 De sao tou' a muste sue-lai sao na sama leo' ria sue-lai ao-ina heheli na. Ma sao ina' a muste hada' neu' sao na.