Emi lahenda kamahere' a boso' meni toranoo kamahere feke' leo mamana naetu dedea'
6
Kalu lahenda esa napaneneo' lahenda sarani feke', ubea' taon de emi leo mamana naetu dedea' a meu nai mana ee dedea' fo ta nalela' Manetualain? Ubea' taon de bisa leo naa'? Malole lena' meu' lahenda kamahere' ara matan, fo sira si' urus emi dedea ma! 2 Nonoo' leo emi ta bubulu', neu' ko lahenda kamahere' ara raetu' basa lahenda dae-bafo' a dedea na. Ubea' taon de dedea' a noi babau ana na ri naa' boe emi ta urus malan fa? 3 Matetu na, neu' ko ita ri' taetu' Manetualain eila'o-limalopen rai nusatetu-ikutema' a dedean. De tantu emi ri' muste urus dedea bale fai' ara.a 4 Tamba neu', kalu emi lahenda kamahere' a madedea la'e-neu' hihii-nanau' aana' ara, ubea' taon de emi kolaa' dedea' sira leo mana ee dedea' fo ri' emi lahenda sarani' ara ta hada' asa?5 Besa' ia, au nau dedea hihii-nanau' esa fo muste tao na emi mae'. Leo' bea? Sama leo' ta hapu lahenda dudu'a-aafi tande' esa nai emi talada fo urus hihii-nanau' aana' ara, leo-leo' dedea' fo toda nai ita toranoo na. 6 Tehuu lahenda kamahere' esa kolaa' ria toranoon lahenda kamahere', leo mana ee dedea' a neu! Sekonaa te, mana ee dedea' ria ta namahere Manetualain!
7 Ta hapu esa la'e boe', hete? Kalu emi kolaa' toranoo lahenda kamahere mara rai mana ee dedea' ara, sona emi sala. Malole lena', kalu toranoo kamahere ma tao nasala', sona fee ampon neu' ana. Ma kalu ana namana'o emi hata-hetom, malole lena' neme' naa ela ana hai neni hata-heto sira! 8 Huu fo emi basa lahenda kamahere' bela' a, ubea' taon de emi nau tao sala' fo mamana'o emi toranoo kamahere mara hata-heton bali?
9 Emi dadi' ta bubulu' hihii-nanau' ia ra! Boso' mataa' lahenda tipu-dai emi rae tao sala' boe ta hata-hata. Nana huu lahenda fo ta nahii' tao roo-tetu', ana ta bisa dadi neu' Manetualain kileo-bobokin. Soa-neu' lahenda mana sosoa-piao, mana soko, mana hohoke, tou' sao tou', 10 lahenda na'o, mana tendetuu-dalesala', mana mafu', mamumulu lahenda, tipu-dai lahenda hata-heton. Basa lahenda rupa leo naa' ara, ta bisa dadi Manetualain lahendan!
11 Tebe maulu na emi ruma leo naa'! Tehuu Manetualain sae-safe heni emi sala-siko mara, de tao nalalao-nalalafu emi. Ma Ana soi eno', fo emi bisa malole selu' mo Ni. Ana tao basa sira, nana huu emi mabua-maesa mo ita Ramatuan Yesus Kristus, ma mabua-maesa mo Manetualain Dula-dale Na.
Kalu manea matalolole ao-paa ma, sona ria natudu nae, emi hada-horomata neu' Manetualain
12 Au anuu haak fo tao basa-basan. Tehuu basa-basan fo au tao a, bei ta tantu malole a soa-neu' au. Leo mae au anuu haak fo tao basa-basan, tehuu au ta nau hihii-nanau' tadalu' a pareta au.b 13 Conto leo-leo' lahenda rae, “Nanaa-nininu' soa-neu' tei' a, ma tei' a soa-neu' nanaa-nininu'.” Tehuu mafarerene', te neu' ko Manetualain tao nalulutu' dua si.
Conto feke' bali, ita ta tanuu ao-paa', ela ita bisa hohoke. Ita tanuu ao-paa' ela ita bisa toi-tao soa-neu' ita Ramatua na. Huu fo ita ao-paa na nana Ramatua' a nuu-enan. 14 Tepo' fo ita Ramatuan Yesus mate, Manetualain fee Ni nasoda selu'. De kalu ita mate, sona Ana nanuu kuasa fo fee ita tasoda selu'.
15 Emi ao-paa ma dadi Kristus nuu-enan, sama leo' emi nana babati' neme Yesus ao-paa Na mai. Tantu emi bubulu' hihii-nanau' ria! De kalu au pake babati' neme Kristus ao-paa Na, fo abuan no ina mana sosoa a ao-paa na, sona leo bea'? Boso'! Huu fo ria ta naraa! 16 Tantu emi bubulu', kalu lahenda hohoke ina mana sosoa leo naa', sona sira dua dadi esa'. Huu fo mana dui' nai Susura Makamoi' a nae, “Sira dua dadi esa'.”c 17 Tehuu lahenda bea nasoda dale' esa no ita Ramatua na, sona ana dadi esa' no Ni, sama leo' sira dua rabua-raesa nai dula-dale' esa.
18 Heo' ao mara meme hohoke a mai, ela boso' tuda! Lahenda tao sala-siko rupa' fo nalutu selu' asa, ma nalutu lahenda feke' boe. Tehuu lahenda fo hohoke a, tao nalutu ria ao-paa na. 19 O ao-paa ma, sama leo' Manetualain Dula-dale Malalao-malalafu Na uma mamason. Ria Dula-dale Na leo nai emi dale mara, huu fo Manetualain fee emi Ria Dula-dale Na. Huu ria naa, emi ta manuu haak, fo dadi malaka soa-neu' emi esa' ko ao-paa mara. Tehuu ubea' taon de nonoo' nae emi masoda ta bubulu' hihii-nanau' ia ra?d 20 Kristus soi-tefa na emi neni' beli' mabera. De emi muste masoda hada-horomata neu' ao-paa mara, ela matudu mae, emi boe hada-horomata neu' Manetualain.