Lahenda dae-bafo' ta nau ramanene Manetualain
3
Neme basa banda fo MANETUALAIN adu naa si rai dae-bafo' ia, meke a malela napuputa na seli. Lai' esa de, meke a natane ina' ria nae, “Tebe, do? Manetualain horo nae, ‘Emi ta bole mia ai boa' neme ai huu' fo rai oka' ia, hete?’” 2-3 Ina' ria balas nae, “Ta'a! Ami bole mia! Tehuu noi ai huu' esa nai oka' a talada, ri' Manetualain horo ami boso' mia ni. Ana nae ami ta bole mia ni ma ta bole tototo la'e boa na, ta'a sona ami mate.”
4 Tehuu meke ria nataa nae, “Ria ta la'e fa! Emi ta mate! 5 Manetualain horo leo naa', nana huu Ana bubulu' kalu emi mia ai boa' ria, sona emi malela' sama leo' Ria. Neu' ko emi bubulu' bea ri' malole ma bea ri' tadalu'.”
6 Ina' a mete te, ai huu' ria malole a, ma boa na nonoo' nae malada na seli. Ana afi nae, “Kalu au ua ai boa' ia, tantu au dadi malela'.” Boe ma ana etu na ai boa' ria, de naa. Basa de neni fee sao na, fo naa. 7 Dua si raa basa, boe ma besa' ko bubulu' sira po'irao'. Huu ria naa, ara nato ai doo ra fo ra'eo'.
8 Ledo-leodae', boe ma ramanene MANETUALAIN la'o-la'o nai oka' ria dale'. De ara tama' nai ai huu' ara, ela MANETUALAIN boso' nita si. 9 Tehuu MANETUALAIN naloo tou' ria nae, “Adam, o nai bea?”
10 Tou' ria nataa nae, “Au amanene Manetualain haraoe Ma. Tehuu au mae', huu fo au po'irao'. Huu ria naa, au tama'.”
11 Manetualain nae, “Bea nafada nae, o poi'rao'? Leo' bea? Tantu o mua ai boa' fo Au horo a, hete?”
12 Ana nataa nae, “Ina' fo ri' Manetualain fee ela sama-sama no au, ria neni ai boa' a de au ua!”
13 Boe ma MANETUALAIN dedea no ina' a nae, “Ubea' taon de o tao leo naa'?”
Ina' a nataa nae, “Te meke a edi-fule nala' au! Huu ria naa, au ua ai boa' ria.”
Manetualain kutuk asa
14 Boe ma MANETUALAIN kutuk meke a nae,
“Huu no o nonoi-tataom ia, Au huku o. Neme basa banda feke' ara, noi o ri' hapu kutuk leo ia'. Mulai neme besa' ia losa o mate, o lodo muni' ara dale ma, ma o malela' noi mua nai dae a. 15 Au tao o mo ina' ia, emi mamusu ao la'o naroo. Ma emi dua tititi-nonosi mara boe, leo naa'. O tititi-nonosim neu' ko aa lahenda a ei tika na. Tehuu ria tititi-nonosin esa neu' ko tutu nasosopu' o laka ma.”
16 Boe ma Manetualain nafada ina' a nae,
“Neu' ko Au tamba fee o susa fai fo mairu, ma tamba hedis fai' fo o boki. Tehuu leo mae leo' naa boe, o dale ma bei nahii' naroo neu' sao ma. Ma ria ri' ator o.”
17 Manetualain nafada tou' a nae,
“O ta tuka Au pareta Ka, tehuu tuka sao ma hihii-nanaun, losa' o mua ai boa' fo ri' Au horo ni. Huu ria naa, o boe hapu huhuku'. Ma dae a boe hapu huhuku'. Mulai besa' ia losa' o mate, o muste moi-tao foi dae sota maan seli, ela o hapu nanaa'. O moi-tao leo naa', besa' ko masoda. 18 Leo mae o sele-tande rupa', tehuu dae a namomori' noi kou-kau' ma matema'. 19 O muste moi-tao sota maan seli, besa' ko dae a fee o mua. O muste moi-tao puse ma titi leo' naa losa' mate. Au adu o neme dae a, de o mate, o dadi dae selu'.”
20 Adama foi sao na, nade ‘Hawa’ (sosoa na nae, ‘masoda'’), huu fo ria nana basa lahenda fo rasoda a mama na.
21 MANETUALAIN tao kakao-papake' neme banda rou', fo fee dua si pake.
Manetualain usi heni Adam no Hawa
22 Boe ma MANETUALAIN dedea nae, “Besa' ia lahenda ia ra bubulu' bea ri' malole ma bea ri' tadalu', sama leo' Ita. Boso' losa sira raa ai boa' fo fee si rasoda losa doo na neu.” 23 Boe ma Ana usi heni si reme oka Eden a mai, de ara leo mamana feke' reu, fo raue-raosa ela rasoda neme dae a buna-boan. 24 Manetualain usi heni si, boe ma Ana nadenu eila'o-limalope madilan rai nusatetu-ikutema' a,b ranea rai oka' ria poo' dulu. Ara hopu tafa' ma lalae' ana neu-mai, pila loa-loa sama leo' ai-pila'. Manetualain nadenu si ena etu eno' fo ri' leo oka' dale' neu, huu fo Ana ta nau lahenda ra etu ai boa' fo ri' fee si rasoda losa doo na neu.