Lamatuak Yesus nasoda fali!
24
Sosoda ina lole mbilan, inak kala sila leni mina kaboo menik ma bungga, fo leni Yesus laten leu. 2 Ledo-eik ala losa, boe ma lita batu ina-huuk fo ala pake neu kena lates lelesun ndia, nana loli henik neni lates bifin neu so. 3 Boe ma ala leni lates dale leu, tehuu ta lita Yesus mbombolan nai ndia. 4 De ala lasapangga. Kada nggengge neuk, hataholi dua pake balo'a manggahadok, mai lambadeik leu sila boboan. 5 Inak kala sila bii lalan seli, boe ma lakaluku-lakatele losa dae. Basa de hataholi kaduak sila latane lae, “Hatina de ei mai sangga hataholi kasodak nai hataholi kamates mamanan? 6 Yesus ta nai ia so! Ana nasoda fali so. Naa fo ei mafalende henin hata fo Ana nafada nitak so, neu faik fo bei nai Galelea, do? 7 Huu Ana nafada memak nae, dei fo ala se'o heni Hataholi Isi-isik ia, neu hataholi manggalauk liman. Basa de ala mbaku lisan nai ai ngganggek. Tehuu neu binesan, Ana nasoda fali so.”a8 Ala lamanene leo ndiak, bei fo lasaneda Yesus kokola makahulun ndia. 9 Boe ma ala fali lai-lai, fo leu lafada basa Yesus ana mana tungga kasanahulu esan nala, ma hataholi fe'ek kala mana tungga Ndia. 10 (Inak kala mana leni lates ndia leu, ndia Yakobis inan Maria, ma Maria maneme nggolo Magdala mai. Hambu Yohana ma ina fe'ek hida boe. Sila ndia leu tui basa ia neu Yesus nadedenun nala.)
11 Tehuu neu faik fo Yesus ana mana tunggan nala lamanene tutuik ndia, ala dudu'a lae inak kala sila kada pepeko.
12 Tehuu Petrus fo'a de nalaik neni lates neu. Losa ele, ana titilo neni lates dale neu, tehuu nita kada tema mboti mamate. Boe ma ana fali, ma dudu'a nae, “Ia leo beek ia so?”b
Lamatuak Yesus ana mana tunggan dua, latonggo lo Ndia neme dalak neni Emaus neu
13 Faik ndia boe, Yesus ana mana tunggan dua, leni nggolok esa leu, nade Emaus. Ndia doon meda kilo sanahulu esa neme Yerusalem mai.c 14 Ala la'ok ma lakokola la'e-neu Yesus mamaten. 15 Kada nggengge neuk, Yesus mesak kana deka-deka no dua sala, boe ma la'ok sama-sama no sala. 16 Tehuu ala ta lalelak lae, Ndia Yesus, huu Lamatuak tao fo ala boso lalelan. 17 Boe ma Yesus natane sala nae, “Ei dua nggei mambue kokolak hata ia?”
Dua sala lamanene leo ndiak, boe ma lambadeik. Matan nala nonook leo dale hedi lalan seli. 18 Boe ma manade Kleopas natane Ndia nae, “Ama ia, nonook leo hataholi beuk, de ta bubuluk hata-hata, fo fai lai-laik ia dadi nai Yerusalem, do?”
19 Boe ma Yesus natane nae, “Hata ndia?”
Ala lataa lae, “Yesus, maneme Nasaret ndia mai! Ndia tebe-tebe Manetualain mana kokolan. Ma Manetualain fee Ndia koasa, fo tao tanda heran mata-matak. Ndia boe oo malelan seli nanoli hataholi. Basa hataholi la lamahoko lo Ndia. Manetualain boe oo namahoko no Ndia.
20 Tehuu ta bubuluk te ai malangga anggama Yahudi malanggan nala, ma lasi hadak kala humu lalan. Boe ma ala feen neu nggubenol, fo huku nisan. Boe ma ala mbaku lisan nai ai ngganggek. 21 Sososan, ai basa nggai mamahena mae, Ndia ndia, Karistus. Ana mai fo mbo'i heni ai nusan, neme hataholi mana to'u palenda Roma mana tuni-ndenin. Tehuu fai Lima lai-laik ia, ala tao lisan so.
22 Hatematak ia, ai boe oo masapangga. Huu isinaak ai inan nala mai lafada lae, fafai anak ala leni lates leu. 23 Tehuu ala tui lae, Yesus mbombolan mopon so. Boe ma ala lita Manetualain ata nusa sodan mai nafada sala nae, Yesus nasoda fali so! 24 Ai nonoon hida lamanene leo ndiak, boe ma ala lalai leni lates leu. De ala lita sama leo inak kala kokolan ndia boe. Ala ta lita Yesus mbombolan boe.”
25 Dua sala tui late'e leo ndiak, boe ma Yesus nafada sala nae, “Ei nggoam dei! Hatina de ei ta nau mamahele hata fo Manetualain mana kokolan nala lafada memak neme makahulun mai so! 26 Ala sulak lae, Karistus ndia, musi hambu doidosok mata leo ndiak, bei fo Ana simbo hada-holomata ma koasa fo ana seli.” 27 Boe ma Yesus nanoli sala, basa hata fo Manetualain mana kokolan nala sulak memak la'e-neu Karistus so. Mulai neme ba'i Musa susulan mai, losa mana kokola fe'ek kala enan.
28 Ledo-eik ala sangga losa Emaus, boe ma Yesus taok nonook leo Ana sangga la'ok nakandoo. 29 Tehuu dua sala loke lae, “Ama! Leo tataak mia ai le'odaen ia, huu ledo sangga tesa ia so.” Boe ma Yesus maso sama-sama no sala leni uma dale leu.
30 Ledo-eik ala langgatuuk la'a, boe ma Yesus ha'i nala loti balok esa. De Ana hule-haladoi noke makasi neu Manetualain, boe ma Ana bibi'i loti ndia. Ledo-eik Ana loo loti ndia neu dua sala, 31 bei fo dua sala lalelak lae, ndia Yesus. Tehuu nggengge neuk mopon neme dua sala matan mai. 32 De dua sala lakokola lae, “Awii! Ledo-eik tamanene Ndia kokolak tao manggaleledo Lamatuak mana kokolan nala susulan isinaak, ita tameda nonook leo ita dalen mbila lo'a-lo'a.”
33 Faik ndia boe oo, dua sala fo'a de fali tutik leni Yerusalem leu. Ala latonggo lo Yesus ana mana tungga kasanahulu esan nala, ma hataholi fe'ek kala fo mana makabubuak lai ndia. 34 Boe ma ana mana tunggak kala lafada dua sala lae, “Memak tetebes! Lamatuak Yesus nasoda fali so! Isinaak Ana natudu aon neu ka'a Petrus.”d
35 Basa de hataholi kaduak sila, tui basa hata mana dadik nai dalak, losa dua sala bisa lalelak Yesus neu faik fo Ana bibi'i loti.
Lamatuak Yesus natudu mata-aon neu ana mana tunggan nala
36 Ledo-eik ala bei tui leo ndiak, kada nggengge neuk, Yesus nambadeik nai sila laladan nala so. Ana fee hadak neu sala nae, “Soda-molek!”
37 Tehuu ala nggengge ma bii, huu lae hetuk nitu ndia.
38 Tehuu Yesus kokolak nae, “Hatina de ei bii leo iak? Ei ta mamahele mae, Au asoda fali so, do? 39 Mete sudik Au limang, ma eing. Ia Au. Look limak mai fo mafaloe aon! Suek ei mamahele mae, Au ia, ta nitu. Huu nitu aon taa, tehuu ei basa nggei bisa mita Au aong, hetu?!”
40 Ana bei kokolak leo ndiak, boe ma natudu sala mbiik manai Ndia liman ma ein. 41 Ala lamahoko lalan seli, huu Yesus nasoda fali so. Kada ala lasapangga, huu ala ta bisa bubuluk talo bee fo bisa dadi leo ndiak. Boe ma Yesus natane sala nae, “Ei mi'a hata nai ia, bae? 42 Boe ma ala loo fee Ndia i'a nana tunuk bibiak esa. 43 Yesus simbo nala i'ak ndia, boe ma Ana na'a neu matan nala.
44 Boe ma Ana kokolak nae, “Talo bee? Ei bei masaneda makahulun neu faik fo Au sama-sama ua ei? Fai maneuk Au afada ae, basa hata fo Manetualain mana kokolan nala sulak la'e-neu Au ndia, musi dadi. Fo ndia, neme ba'i Musa, mana kokola fe'ek kala, ma neme susula Sosoda Koa-kiok kala mai.”
45 Basa boe ma Ana buka tao manggaledo, fo ala lalelak tebe-tebe Manetualain Susula Malalaon ndandaan. 46 Ana kokolak nakadaik nae, “Manetualain mana kokolan nala sulak so lae, Karistus fo Manetualain nadenun mai ndia, musi hambu doidosok mata-matak, boe ma Ana mate. Tehuu dei fo neu binesan, Ana nasoda fali. Huu ala sulak basan so! 47 Hatematak ia, Au fee koasa fo ei mini Hala Malole ia neni basa nusak kala miu, mulai neme Yerusalem ia mai. Mafada sala mae, hataholi fo manaku salan, ma fali neni Manetualain neu, na, dei fo Manetualain koka heni basa salan nala. 48 Ei musi dadik sakasii fo tui mae, Au hambu doidosok, boe ma Au mate, basa de Au asoda fali. 49 Dei fo Au haitua Dula-dale Malalaok fo Au Amang heluk so. Tehuu ei musi kada mahani nai kota Yerusalem ia, losa ei simbo koasa neme nusa sodak mai.”e
Lamatuak Yesus nana so'uk neni nusa sodak neu
50 Faik esa, Yesus noo sala leni kota deak leu. Neu faik fo ala dekak lo nggolo Betania, Ana so'uk liman fo kokolak fee baba'e-babatik neu sala.f 51 Ana bei kokolak fee baba'e-babatik leo ndiak, boe ma Ndia nana so'uk neni nusa sodak neu. 52 Ala lita leo ndiak, boe ma ala sendek fo lakaluku-lakatele neu Ndia. Basa de ala fali leni Yerusalem leu no dale namahokok nalan seli. 53 Tungga faik, ala lakabubua lai Uma Ina Huhule-haladoik, fo so'uk koa-kiok neu Manetualain.
Ama Teofilus! Au tutuing hondak ia dei.
Soda-molek,
Lukas