3 Yesus namanene leo ndiak, boe ma Ana tui fee sala nakandandaak ia nae, 4 “Leo neme ei mai, hambu hataholi esa naena bi'i-lombo natun esa. Boe ma mopo esa. Hatematak ia, hataholi ndia musi tao hata? Neu ko ana la'o ela bi'i-lombo kasio hulu siok sila leu mamana linok, boe ma neu sangga losa natonggo bi'i-lombo mana mopok ndia. 5 Mete ma ana natonggo no bi'i-lombo ndia so, na, ana lu'a neni falik kana no namahokok. 6 Losa uma, boe ma ana noke nonoon nala, de nafada sala nae, ‘Wei! Ei mai fo mamahoko mia au dei! Huu au hambu falik au bi'i-lombo mana mopong so.’ 7 Nai nusa sodak leo ndiak boe. Mete ma hambu hataholi kasalak esa hondak, boe ma fali neni Manetualain neu, na, basa nusa sodak isin nala lamahoko. Ala lamahoko lalan seli, huu hataholi esa fali neni Manetualain neu, lena heni hataholi kasio hulu siok kala mai, fo mana masoda ndoos, ma ta sala dalak.”

8 Basa de Yesus tui nakandandaak fe'ek esa bali nae, “Hambu inak esa doi lilo fulan sanahulu.^b Naa te mopo esa. Hatematak ia, ana sangga tao hata? Neu ko ana neu dede banduk, de loti sudi nai bee, ma sasapu uma ndia losa basa bu'un nala, fo sangga neulalau doik ndia. 9 Neu faik fo ana hambu falik doik ndia, boe ma ana noke nala hataholi uma tia-tain nala, de nafada nae, ‘Wei! Ei mai fo mamahoko sama-sama mia au dei! Huu au hambu falik au doi mana mopong ndia so!’ 10 Nai nusa sodak leo ndiak boe. Mete ma hambu hataholi kasalak esa hondak, de fali neni Manetualain neu, na, neu ko basa ata nusa sodak kala lamahoko lalan seli.”

11 Basa boe ma Yesus tuti tutuin no nakandandaak fe'ek esa bali nae, “Hambu touk esa no ana tou anan dua. 12 La'i esa, kakana mate'a teisusuk nafada aman nae, ‘Ama! Ba'e fee au hata-heto hatematak ia leo!’ Boe ma aman ba'e hata-heto sila neu anan dua sala. 13 Ta dook boe ma, kakana mate'a teisusuk ndia se'o heni ndia baba'en. Basa de ana mbomboti nala ndia balo'an, de ana la'o neni nusa dook neu. Nai ndia, ana ngganggali heni doin nala ma nasoda no namahokok. 14 Neu faik fo ndia doin basan, boe ma ndoes ana seli la'e nusak ndia, losa ana to'a-taa. 15 Boe ma ana neu sangga ues. Hataholi esa nai nusak ndia, simbo nalan, de feen hani bafi. 16 Huu kakanak ndia, ta nakatataka nala ndoes bali, boe ma sadia na'a bafi la nana'an. Huu ta hambu hataholi, fo nau feen na'a.

17 Doo-doo boe ma ana mulai dudu'a neu-mai nae, ‘Nai au amang uman, na, basa hataholi mana tao ues sala la'a losa lakabete. Naa te au nai ia, sangga mate ua ndoes ia so. 18 Malolenak, kada au fali uni au amang uu. Boe ma au afadan ae, “Ama! Au tao sala ina-huuk neu Manetualain ma ama so. 19 Au ta andaa dadik ama anan so bali. Mae ama simbok au dadik kada ata nai ama uman boe oo, malole!”’

20 Ana dudu'a nate'e leo ndiak, boe ma ana fo'a, de fali neni aman uman neu. Bei nai dook, tou lasik nitan so, boe ma ana tuda kasian neun. Ana konda neme uma mai, de nalaik neu soluk anan fo mana falik ndia so. Basa de tou lasik holu nalan ma idun.

21 Boe ma kakanak ndia kokolak no aman nae, ‘Ama! Au tao sala ina-huuk neu Manetualain ma ama so. Au ta andaa dadik ama anan so bali.’

22 Tehuu aman palenda tutik hataholi mana tao uen nala nae, ‘Wei! Lai-lai, dei! Miu ha'i mala badu fo neulaun seli, fo papaken. Tao ndeli neu lima ku'un, ma sapatu neu ein. 23 Miu hela mala sapi ma'ao ndia fo tatin, huu ita sangga tao feta takasoe. 24 Huu au anang ia, sama leo maten so, tehuu hatematak ia nasoda fali so. Ndia mopo, tehuu hatematak ia au hambu falik kana so.’ Kokolak basa leo ndiak, boe ma ala mulai feta lakasoe.

25 Faik ndia, kakana ka'ak ta nai uma, huu ana tao ues nai osi. Ledo-eik ana fali, neme dook mai namanene hataholi lakaminak musiik, ma foti-longge. 26 Boe ma ana noke nala hataholi mana tao ues esa, de natanen nae, ‘Wei! Tao nakasoe hatak ia?’

27 Hataholi mana tao ues ndia nataa nae, ‘Malanggan fadim fali so. De ama nadenu tati sapi, fo tao feta ina-huuk, huu ndia anan fali no sodak so.’

28 Kakana ka'ak namanene leo ndiak, boe ma ana luli. Ana ta nau maso neni uma dale neu so bali. Boe ma aman neu kokoen fo ana maso neni uma dale neu.

29 Tehuu ana manggalau nae, ‘Ama! Dudu'a sudik kana dei! Doo basa ia, au tao ues mbilu-mbuse sota mate, sama leo ata fee ama. Au ta la'o lena itak ama hihiin. Mae leo ndiak boe oo, tehuu ama bei ta fee nitak au bi'i-aek ana esa, fo au tao feta akasoe ua au nonoo nggala. 30 Tehuu ta bubuluk te ama anan fo mana ngganggali doik ia, neu nakaminak inak fo tao nabasa ama doin. Hatematak ia ana fali main, boe ma ama tati sapi ma'ao nalan seli, fo tao feta ina-huuk fee ndia.’

31 Tehuu aman nataa nae, ‘Ana susueng! Mamanene neulalau! Doo basa ia, o leo sama-sama mua ama. Basa hata fo ama enan, basa ndia o enam boe. 32 Tehuu hatematak ia, ita musi feta takasoe, huu o fadim esa ia. Makahulun, sama leo maten so, tehuu hatematak ia ana nasoda fali so. Ana mopo, tehuu hatematak ia hambu falik kana so.”’