4 Mete ma o tolanoom tao salak la'i hitu nai faik esa, boe ma ana hondak, de mai noke ambon la'i hitu, na, o musi mafalende heni salan la'i hitu.”

5 Faik esa, Yesus ana mana tunggan nala^b mai lasale Ndia, fo loke lae, “Ama Mesen! Ai namahehelen ta matea. Tulun tao tamba matea ai namahehelen dei!”

6 Boe ma Yesus nataa nae, “Mete ma ei mamahele neu Manetualain koasan, na, mae kada faak, tehuu ei bisa palenda ai ina-huuk ia mae, ‘Fe'a, fo lali muni tasi dale muu!’ Dei fo ai ndia tungga ei palendam tutik.”

7 Basa boe ma Yesus kokolak bali nae, “Ha'i conto. Hambu ata esa tati dae nai osi, do nanea bi'i-lombo nai mook. Ata ndia tao ues nate'e, boe ma ana fali uma neu. Ta bisa ndia malanggan kokolak nae, ‘Mai fo ita dua nggata tanggatuuk ta'a sama-sama leo!’ 8 Taa! Mandaan ndia, na, ndia malanggan palendan nae, ‘Muu tao nana'a-nininuk fee au dei. Basa na, bei fo o mu'a-minu nai dea.’ 9 Mete ma ata ndia tao tungga malanggan hihiin so, na, ei mae hetuk malanggan ndia, dei fo noke makasi neu ndia, do? Taa! 10 Ei leo ndiak boe. Mete ma ei tao mate'e basa ues, fo Manetualain palendak so, na, ei kokolak mae, ‘Ai kada ata, fo ta mandaa simbok hata-hata. Ai ta sangga kokoak. Kada ai makalala'ok ues.”’

11 Neu faik fo Yesus asa la'o leni Yerusalem leu, ala losa propensi Galelea ma propensi Samaria toon. 12 Neu faik fo ala sangga maso leni nggolok esa nai ndia leu, hambu hataholi kamahedi kusta sanahulu mai fo nau latonggo lo Yesus. Ala lambadeik lai dook. 13 Basa de ala langgou landaa lae, “Yesus! Lamatuak! Kasian neu ai dei!”

14 Ledo-eik Yesus nita sala, boe ma nadenu nae, “Ei miu matudu ei aom neu malangga anggama dei, fo suek ala palisak lae, ei hedi kustam ndia mopon so, do beik.” Ala lamanene leo ndiak, boe ma leu. Tehuu nai dala laladak, kada nggengge neuk basa sala hai tutik.^c

15 Ala la'ok lakandoo no namahokok. Tehuu esa fali neni Yesus neu. Ana eki nae, “Koa-kio Manetualain! Huu au hai so!” 16 Boe ma ana sendek fo noke makasi no'uk neu Yesus. (Naa te ndia ndia ta hataholi Yahudi. Ndia hataholi Samaria, fo ladede'a lakandoo lo hataholi Yahudi la.)

17 Boe ma Yesus natane hataholi la fo mana tungga Ndia nae, “Talo bee, bae? Isinaak Au tao ahai hataholi sanahulu, hetu? Kasiok kala, lai bee? 18 Hatina de kada hataholi nusa dea ia fali main, fo noke makasi neu Manetualain, ma ana koa-kio neu Ndia?”

19 Boe ma Ana nafada hataholi ndia nae, “O hai so, huu o mamahele tebe-tebe neu Au. De fo'a fo fali mua sodak leo.”

20-21 Faik esa, hambu hataholi Farisi hida mai latane Yesus lae, “Ama Mesen! Mafada sudik ai dei! Faik bee Manetualain mulai nakalala'ok Ndia toto'u palendan?”

Boe ma Yesus nataa nae, “Leo iak! Lamatuak ta nakalala'ok Ndia toto'u palendan nenik tanda mata-matak kala nai dae-bafok ia, fo hataholi bisa nita no ndia matan. Hataholi ta hambu buti lae, ‘Mete sudik ia! Huu Manetualain nakalala'ok Ndia toto'u palendan nai ia!’, do ‘Nai ele!’ Taa! Huu Ana nakalala'ok Ndia toto'u palendan nai ei laladam mala, fo nai hataholi la dalen.”

22 Basa de Yesus nafada ana mana tunggan nala nae, “Ta dook bali te Au, Hataholi Isi-isik ia, ta sama-sama ua ei so bali. Dei fo neu fai toto'ak kala, na ei dokodoe nau mita Au fafali maing. Tehuu Au bei ta mai. 23 Mete ma hataholi la mai lafada lae, ‘Karistus nai ia!’ do, ‘Karistus nai ele!’ na, ei boso masambute masanggak miu-mai, huu sila kokolan ndia pepekok. 24 Huu mete ma Hataholi Isi-isik tebe-tebe fali main, na, dei fo ndia tandan manggaledok nalan seli, sama leo manggahadok fo nasa'a tao manggaledo lalai, neme mbedak seli mai, neni mbedak seli neu. 25 Tehuu Ndia boe oo musi tanggon doidoso mata-matak dei. Ma hataholi hatematak ia ta nau lamanene, ma sangga timba heni Ndia. 26 Tehuu mete ma Ana nau fali main, na, dei fo hataholi la kada lasoda manggalauk sama leo basa faik, sama leo nai Noh lelen.^d 27 Faik ndia, ala la'a-linu, tao feta kabin, losa neu faik fo Noh maso neni ofak dale neu. Tehuu hataholi la sila boe oo ta nau lamanene. Boe ma kada nggengge neuk, faa ina-huuk nggangga mai, de tao nakalulutu basa sala.^e

28 Ndia sama leo hataholi la fo mana lasoda manggalauk nai Lot lelen boe. Faik ndia, kada ala la'a-linu, danggan, tao osi, lambadedei uma, ma lasoda manggalauk leo basa faik. 29 Tehuu hataholi la boe oo ta nau lamanene. Boe ma fafain ndia Lot nalai la'o ela kota Sodom, kada nggengge neuk uda ha'ik ma balerang tuda leme lalai mai, de na'a heni sila basa sala.^f

30 De ei musi mata neuk, baa! Boso losak mete ma Hataholi Isi-isik sangga fali main, dei fo hataholi la kada lasoda leo basa faik boe. Tehuu kada nggengge neuk te Ana sadu mai. 31 Faik ndia, hataholi manai uma matan ndia, boso maso uma dale miu fo mbembeda bali. Hataholi mana tao ues nai osi, boso fali uma miu ha'i buas bali.^g 32 Masanenedak hata fo dadi neu Lot saon nai makahulun. Ana mate, huu nasaneda ndia buan nai uma.^h

33 Hataholi ta nau tungga Au, huu ana sue ao-inan, na dei fo sodan sosoan taa. Tehuu hataholi fo mana nau tungga Au losa ana fee sodan, huu ana sue Au, dei fo ana hambu nasalala'ek, ma nasoda nakandondoo henin no Manetualain.ⁱ 34 Au afada memak! Neu faik fo Hataholi Isi-isik fali main, mete ma hambu hataholi dua sunggu lai koi esa, nggengge neuk Lamatuak so'u nala esa, ma ela esa. 35 Mete ma hambu inak dua mbau hade sama-sama, na, dei fo Lamatuak so'u nala esa, tehuu ela fe'ek. 36 [Mete ma hambu hataholi dua tao ues sama-sama lai osi, na, dei fo Lamatuak so'u nala esa, ma ela fe'ek.]”^j

37 Yesus ana mana tunggan nala lamanene leo ndiak, boe ma ala latane Ndia lae, “Ama Mesen! Dei fo basa sila dadi lai bee?”

Boe ma Yesus kada nggali kokolak nae, “Leo iak. Mete ma ei mita mbuik mana'a banda kamates sala laa lakabubua leni bee leu, na, ei bubuluk ndia dadik tanda so nae, neu ko leu la'a banda kamates nai mamanak ndia.” [No maksut nana nafunik, mete ma Karistus fali main, na, dei fo ndia tandan nala manggaledok nalan seli, mete ma hataholi lees nalelak.]