2 Boe ma Yesus noke nala kakana kadi'ik esa, de nambededein neu sila laladan nala. 3 Boe ma Ana nae, “Mamanene neulalau! Hataholi fo mana nau maso dadik Manetualain hataholin, na ana musi tao nasafali ndia dala dudu'an, fo dadik sama leo kakana kadi'ik ia, fo ta soso'uk nalelak aok.^b 4 Huu hataholi dale kadi'i-taidaek sama leo kakana kadi'ik ia, na ndia ndia hataholi ina-huuk nalan seli nai Manetualain matan. 5 De hataholi fo mana simbok hataholi kadi'ik sama leo kakanak ia, huu namahele Au, na hataholi ndia simbok Au so.”

6 Boe ma Yesus nafada sala bali nae, “Mete ma hambu hataholi tao nala kakana kadi'ik esa tungga dala salak, losa ta namahele Au bali, na, mata neuk baa! Malolenak hataholi mba'a batu ina-huuk esa^c neu lesuha'in, fo nabolon nai tasi laladan. 7 Memak dae-bafok ia mamana soe, huu hambu dede'ak no'uk kala tao lala hataholi tuda leni sala-singgok dale leu. Tehuu hataholi mana hambu soe manai lain seli ndia, na ndia hataholi fo mana tao nala hataholi fe'ek tao salak.

8 Mete ma o tao salak munik o limam do, o eim, na, tete henin leo! Huu malolenak o maso muni nusa sodak dalek muu, muni kada o limam seli do, o eim seli, lena heni o muni o limam ma o eim dua sala, tehuu ala mbia heni o muni ha'i naraka dalek muu.^d 9 Mete ma o tao salak munik o matam, na, edo henin leo! Huu malolenak o maso muni nusa sodak dalek muu, muni kada o matam seli, lena heni o muni o matam dua sala, tehuu ala nggali heni o muni ha'i naraka dalek muu.”^e

10 Yesus kokolak bali nae, “Mata neuk baa! Boso losak ei makadadaek kakana kadi'ik leo iak. Huu Manetualain ata nusa sodan nala lanea sala. Ma ata nusa sodak kala sila bisa maso leu sudi faik bee, fo lafada hataholi la ia dede'an neu Manetualain.

11-13 Ei dudu'a neulalau, huu Au sangga fee nakandandaak leo iak: hambu hataholi esa bi'i-lombon natun esa. Boe ma la'i esa bi'i-lombo esa la'o nasalak, de mesak kana tungga ndia dalan. Ei mae hetuk hataholi ndia musi tao hata? Neu ko ana la'o ela bi'i-lombo kasio hulu siok kala sila leu letek lain, de neu sangga bi'i-lombo esak mana mopok ndia.^f

Mete ma ana hambu falik kana so, na, dei fo ana namahoko nalan seli, huu nita ndia bi'i-lombon esak ndia, lolen lena heni ndia bi'i-lombo kasio hulu sion, fo ta mana mopok kala sila. [Au, Hataholi Isi-isik ia, mai fo asala'e ala hataholi fo mana la'o ela dala ndoos.]^g 14 Huu mae kada kakana kadi'ik esa mopon boe oo, Au Amang nai nusa sodak ta nameda malole.”

15 Yesus kokolak bali nae, “Mete ma o tolanoo kamahelem tao salak neu o, na, o musi muu matonggo muan. Mete ma kada ei dua nggei, bei fo mafada ndia salan. Mete ma ana namanene o kokolam, na, ei dua nggei malole falik ndia so.^h 16 Tehuu mete ma ana ta nau namanene o, na, muu mala o nonoom esa do dua fo miu sama-sama. Miu matonggo mia hataholi ndia, fo kokolak seluk mian. Huu nai Manetualain Susula Malalaon nana sulak nae, ‘Nai dede'ak esa, musi hambu sakasii dua do telu kokolan nala sama, na bei fo simbok sila kokolan nala ndia.’ⁱ 17 Tehuu mete ma ana bei ta nau namanene ei, na, miu mafada salanik kala. Ma mete ma ndia boe oo, ta nau simbok salanik kala kokolan nala, na, taon neu ndia sama leo hataholi ta mana malelak Manetualain. Mete ma taa, na, taon neu ndia manggalaun sama leo mana susu bea.

18 Masanenedak neulalau Au kokolang ia baa! Hata fo ei ka'in nai dae-bafok ia, na Manetualain ka'in nai nusa sodak boe. Ma hata fo ei makambo'ik kana nai dae-bafok ia, na, Manetualain nakambo'ik kana nai nusa sodak boe.^j

19 Ma Au afada seluk bali ae, mete ma hambu hataholi dua leme ei mai hule-haladoi dalek esa, na, dei fo Au Amang nai nusa sodak fee hata fo ala lokek ndia. 20 Huu mete ma hambu hataholi dua do telu lakabubua fo hule-haladoi sama-sama, huu sila ndia Au hataholing, na Au boe oo nai sila laladan.”

21 Basa boe ma Petrus mai natane Yesus nae, “Lamatuak, au sangga atane faa. Mete ma au tolanoong hataholi kamahelek tao salak taa-taa neu au, na, au musi feen ambon la'i hida? Losa la'i hitu, do?”

22 Boe ma Yesus nataa nae, “Taa! O musi fee ambon neu ndia la'i hitu la'i hitu hulu,^k losa o ta bisa hingga malan so bali.^l 23 Ei musi tao tungga leo ndiak, huu Manetualain sama leo manek hingga ndia pegawen nala hutan. 24 Ledo-eik ana mulai hingga, boe ma nadenu ndia hataholin neu noke nala pegawe esa fo mana mahutak ndia doin losa kefi-kefin.^m 25 Tehuu pegawe ndia ta bisa bae nggati nala hutan ndia. Boe ma manek palenda nae, ‘Miu se'o heni hataholi ndia no basa sao-anan nala, fo ala dadik ata. Ma se'o heni basa hatan nala, fo bae hutan nala.’

26 Pegawe ndia namanene leo ndiak, boe ma ana sendek neu manek matan, de ana kokoen nae, ‘Awii! Ama! Ama manek tulun fee au fai faa dei! Dei fo au bae falik basa au hutang.’ 27 Manek namanene leo ndiak, boe ma ana nameda kasian neu ndia. De ana koka heni tutik basa ndia pegawen hutan. Basa de ana mbo'i heni pegawe ndia.

28 Tehuu ledo-eik pegawe ndia kalua, de natonggo no nonoon esa fo nahutan doik faa.ⁿ Boe ma ana humu nala nonoon ndia, de ana kidu neu lesuha'in ma nasapalak kana nae, ‘Weih! Hatematak ia bae o hutam leo!’

29 Ndia nonoon namanene leo ndiak, boe ma ana sendek fo kokoen nae, ‘Awii! Tolanoo! Tulun fee au fai faa dei! Dei fo au bae ketu au hutang neu o.’

30 Tehuu pegawe ndia nae, ‘Taa bisa! Mae leo bee boe oo, o musi bae hatematak ia!’ Basa de nandee nonoon ndia neni bui dale neu, losa ana bae basa hutan ndia. 31 Ledo-eik manek namanene neme pegawe fe'ek fo nita hata mana dadik ndia so, boe ma dalen hedis. Basa de ala leu lafada manek.

32 Manek namanene leo ndiak, boe ma ana noke pegawe fo ta nameda nalelak aon ndia. Ana nasapalan nae, ‘Heeh, hataholi manggalauk! Huu o moke au kasian neu o, de au koka heni basa o hutam. 33 Tehuu hatina de o ta kasian neu o nonoom fo sama leo au kasian neu o?’ 34 Manek ndia manggalau, losa nadenu leu landeen neni bui dale neu, fo suek ala tao doidoson, losa ana bae ketu basa hutan.”

35 Boe ma Yesus nate'e tutuin, ma nafada nae, “Naa, Au Amang nai nusa sodak nahinggak leo ndiak boe. Dei fo Ana huku ei, mete ma ei ta mafalende heni tebe-tebe ei tolanoo kamahelem salan nala.”