Manetualain natudu Lamatuak Yesus nula-nambun
17
Seli faik nee, boe ma Yesus noke nala Petrus, Yakobis no fadin Yohanis, de ala sama-sama nda'e leni lete madema esa lain leu, fo kada mesak kasa lai ndia. 2 Losa lain, boe ma lita Yesus namata-ao fe'e so. Matan nasa'a leo ledo, ma Ndia balo'an dadik fula manggahadok. 3 Kada nggengge neuk, lita Ana nakokola no ba'i Musa ma ba'i Elia. 4 Boe ma Petrus mopo dudu'an, losa ana kokolak nadabak nae, “Ama aa! Ita malole hiak nai ia maa! De malolenak ai tao mala laa anak telu. Esa soa-neu Ama, esa neu ba'i Musa, ma esa bali neu ba'i Elia.”5 Ledo-eik Petrus bei kokolak leo ndiak, boe ma kada nggengge neuk ko'as konda de mboti nala sala. Boe ma ala heran lalan seli lamanene halak esa kalua neme ko'as ndia mai nae, “Mamanene baa! Yesus ia Au Ana susueng. Ana tao namahoko Au daleng taa-taa. Mamanene neulalau neu Ndia baa!”a
6 Ndia ana mana tunggan nala sila lamanene leo ndiak, boe ma ala bii lalan seli, losa ala tu'u latotonok. 7 Tehuu Yesus mai nafofo'a sala, boe ma Ana nae, “Wei! Ei fo'a leo. Boso bii!” 8 Boe ma ala botik matan nala, tehuu ta lita esa boe nai ndia. Huu kada Yesus mesak kana.
9 Basa boe ma ala mulai konda leme letek ndia mai. Boe ma Yesus ka'i sala nae, “Boso mafada sudi see, hata fo isinaak ei mitak ndia baa! Huu Au, Hataholi Isi-isik ia, musi mate dei. Basa, na dei fo neu faik fo Au asoda fali so, bei fo ei mafada hataholi.”
10 Boe ma ala latane Ndia lae, “Ama ia memak Karistus, tehuu ba'i Elia nai bee? Huu mese anggama la sila fee nanonolik lae, ba'i Elia musi mai nakahuluk, bei fo Karistus mai. Tehuu tungga Ama, na leo bee?”b
11 Yesus nataa nae, “Memak tetebes. Ba'i Elia musi mai nakahuluk, fo soi dalak fee Karistus. 12 Tehuu mamanene neulalau baa! Ba'i Elia mai so, tehuu hataholi ta lalelak kana. Ala lakatoto'ak kana tungga sila hihiin. Leo ndiak boe, dei fo ala tao Au, Hataholi Isi-isik ia.”c
13 Ala lamanene basa leo ndiak, bei fo ala bubuluk lae, ba'i Elia fo Yesus kokolak ndia, na ndia Yohanis Mana Salanik.
Lamatuak Yesus tao nahai kakana nitu nalak esa
14 Boe ma ledo-eik Yesus asa fali so, latonggo lo hataholi no'uk lahani sala. Boe ma touk esa mai sendek fo noke tulun 15 nae, “Lamatuak! Kasian neu au anang dei! Huu ana hambu hedi mulu bi'ik, ma ana doidoso nalan seli. Mete ma hedis ndia foe, na, nasi'a tuda neni oe dale neu do, ha'i dale neu. Tulun dei, Lamatuak! 16 Au uan neni Lamatuak ana mana tunggan nala neu so, tehuu ta bisa tao lahain.”
17 Yesus namanene leo ndiak, boe ma Ana nasapalak ana mana tunggan nala nae, “Heeh! Ei ia, ana seli maa! Au anoli ei taa-taa so, tehuu ei ta malelak neulalau. Ma ei ta mamahele tebe-tebe neu Au! Au musi nggale loak neu ei losa fai hida bali? Mua kakanak ndia mai leo!”
18 Ala loo kakanak ndia neu Ndia, boe ma Ana husi kalua heni nitu neme kakanak ndia mai. Boe ma nitu ndia kalua la'o ela kakanak ndia, de ana hai tutik.
19 Basa boe ma ledo-eik Yesus mesak kana no ana mana tunggan nala, ala latane Ndia lae, “Ama! Hatina de isinaak ai ta bisa husi kalua heni nitu ndia?”
20 Yesus nataa sala nae, “Ei ta bisa husi heni nitu ndia, huu ei ta mamahele tebe-tebe. Masanenedak baa! Mete ma ei mamahele tebe-tebe neu Au, fo mae kada faa anak boe oo, sama leo ai de'e kadi'i anak esa,d na, ei bisa palenda letek esa mae, ‘Heeh letek! Lali muni ele muu!’ Neu ko ana lali. De ei bisa tao sudi hata, sadi ei mamahele tebe-tebe neu Lamatuak.e 21 [Tehuu mamanene baa! Nitu mata leo iak kala, memak manggalaun ana seli. Mete ma ei ta hule-haladoi ma puasa fo moke tulu-falik neme Lamatuak mai, na, ei ta bisa husi nitu mata leo ndiak kala.”]f
Lamatuak Yesus kokolak kala'i duan la'e-neu Ndia mamaten
(Markus 9:30-32; Lukas 9:43b-45)
22 Boe ma la'i esa, Yesus no ana mana tunggan nala lakabubua lai propensi Galelea. Ana nafada sala nae, “Ta dook bali, te ala sangga se'o heni Au neu hataholi fe'ek. 23 Boe ma ala tao lisa Au, Hataholi Isi-isik ia. Memak Au mate, tehuu dei fo neu binesan, Au asoda fali.”
Ndia ana mana tunggan nala lamanene Ndia kokolan leo ndiak, boe ma ala dale hedi lalan seli.
Lamatuak Yesus kokolak la'e-neu uma huhule-haladoik bean
24 Neu faik fo Yesus no ana mana tunggan nala leni Kapernaum leu, boe ma mana susu bea la mai latane Petrus lae, “Ei Mesem bae Uma Ina Huhule-haladoik bean, do taa?”g
25 Boe ma Petrus nataa nae, “Bae maa!”
Ledo-eik ana fali, boe ma Yesus nafada nakahuluk ndia nae, “Wei Simon! O dudu'a sudik. Manek kala lai dae-bafok ia ha'i bea neme see mai? Neme sila ana hehelin nala do, neme hataholi fe'ek mai?”
26 Petrus nataa nae, “Neme hataholi fe'ek mai!”
Yesus tuti bali nae, “Mete ma leo ndiak, na, manek ana hehelin ta paluu bae, hetu? 27 Leo ndiak boe no Uma Ina Huhule-haladoik bean. Tehuu boso ita tao tala mana susu bea la luli. De malolenak, kada o muu dolu i'ak nai dano dale leo. O mala i'a makasososak, na hu'a bafan. Dei fo o hambu doi lilo fulak esa nai ndia. Basa na o pake doik ndia, fo muu bae ita dua nggata bean. Huu ndia dai ita dua nggata bean so.”h