Hataholi tao sila heti-heun fo nggati Manetualain palendan
15
Faik esa, hataholi Farisi bubuak esa lo mese anggama leme Yerusalem mai fo latonggo lo Yesus. 2 Hataholi Farisi la to'u lahele sila hada Yahudin. Ledo-eik lamanene lae, Yesus ana mana tunggan nala la'a, ta lafui oe tungga hadak hihiin, de ala luli. Boe ma ala mai soli salak neu Yesus lae, “Hatina de o ana mana tunggam mala la'a, tehuu ta lafui oe dei? Ndia laban ita bei-ba'in nala hadan ndia so!”3 Tehuu Yesus nataa nae, “Ei ia, memak hataholi mana kokolak fe'ek, tehuu tao fe'ek! Ei malelam laban Manetualain palendan, fo kada tungga ei bei-ba'im mala hadan. 4 Manetualain palenda so nae, ‘Fee hadak neu ei ina-amam mala.’ Ma tamba bali nae, ‘Mete ma hataholi esa a'ali inan do aman, na, musi huku nisan.’a 5-6 Manetualain fee nanonolik leo ndiak, tehuu ei fee nanonoli fe'ek bali. Huu ei mae, ‘Mete ma hataholi esa helu so, fo fee ndia buan neu Manetualain, na, ana ta paluu tulu-fali ndia ina-aman, nenik ndia buan ndia, mae ala doidoso lalan seli.’ Tehuu no ei nanonolim leo ndiak, na, ei nggali heni Manetualain palendan, fo nggatin neu ei heti-heu hehelim mala. 7 Huu ndia de isinaak Au afada so ae, ei ia, hataholi mana kokolak fe'ek, tehuu tao fe'ek! Ndia nandaa no hata fo Manetualain mana kokolan Yesaya sulak memak kana la'e-neu ei neme makahulun ele mai so! Manetualain pake ndia fo sulak nae,
8 ‘Hambu hataholi fo koa-kio Au,
nenik kada bafan, tehuu ta no dalen.
9 Mae ala tao leo ndiak boe oo, sosoan taa.
Ala ta mbali Au,
kada ala mbali hataholi heti-heun.”’b
Dede'a manggalauk kalua neme hataholi dalen mai
10 Basa boe ma Yesus noke nala hataholi fe'ek kala lai ndia, de nanoli sala nae, “Pasa neulalau ndi'i dook fo ei bisa malelak! 11 Hata fo maso neni hataholi bafan neu, ndia ta tao nanggenggeo hataholi. Tehuu hata fo kalua neme hataholi bafan mai, ndia tao manggenggeok.”
12 Basa boe ma Yesus ana mana tunggan nala mai lafada Ndia lae, “Ama bubuluk, do? Hataholi Farisi la luli lamanene Ama kokolam.”
13 Tehuu Yesus nataa nae, “Dei fo Au Amang nai nusa sodak fe'a heni hataholi fo ta mana fee nanonolik tungga Ndia hihiin. Ndia sama leo hataholi tofa heni basa seselek fo ana ta sele sala. 14 De boso mbali hataholi Farisi la sila! Huu sila ndia, sama leo hataholi mbokek, mana matudu dalak neu hataholi mbokek. Dei fo ala tuda no'u leni bolok dale leu.”c
15 Basa de Petrus kokolak nae, “Ama, tulun mafada ai nakandandaak isinaak ndia ndandaan dei!”
16 Yesus nataa nae, “Naa! Ei boe oo bei ta malelak kana, do? 17 Ndia maksut leo iak: hata fo ita ta'a, maso nesik bafak, boe ma nakandoo neni teik dale neu, de basa na kalua bali neni mamana tei-moes neu. 18 Tehuu hata fo kalua neme bafak mai, na ndia ndia tao nanggenggeo hataholi, losa Manetualain nunuten, de ta nau simbok kana.d 19 Dede'a manggalauk no'uk kalua leme hataholi dalen mai! Sama leo: dudu'a manggalauk, tao nisa hataholi, hohongge, tao eok no hataholi fo ta ndia saon, namana'o, sakasii pepekok, ma kokolak naboboo hataholi naden. 20 Dede'a leo ndiak ndia tao nanggenggeo hataholi. Tehuu mete ma hataholi kada na'a fo ta lafui oe tungga hadak hihiin, na, ndia ta dadi dede'ak.”
Lamatuak Yesus tulu-fali nala inak ta Yahudi esa
21 Basa boe ma Yesus la'o ela mamanak ndia, fo neni dae baba'ek mana dekak no kota Tirus ma kota Sidon. 22 Nai ndia hambu inak esa neme dae baba'ek ndia mai. Ndia ta hataholi Yahudi. Ledo-eik namanene Yesus nai ndia so, boe ma neu noke tebe-tebe Yesus nae, “Mane Dauk numbu-sadun! Kasian neu au dei, huu au ana fe'ong nitu nalan. Awii, kasian! Huu ana doidoso so.”
23 Tehuu Yesus kada nee-nee, de ta nataa faa boe. Boe ma Ndia ana mana tunggan nala mai lafadan lae, “Ama aa, inak ia kada nambue nanggou tao nanggilok. Malolenak Ama madenun nalai heok neme ia mai leo.”
24 Boe ma Yesus nataa nae, “Manetualain nadenu Au mai fo tulu-fali hataholi Yahudi, huu ala la'o lasalak, sama leo bi'i-lombo ladabak. Ana ta fee Au uu tulu-fali hataholi fe'ek.”
25 Tehuu inak ndia mai deka-deka bali no Yesus. Ana sendek de noke tulun nae, “Lamatuak! Fali mala au dei.”
26 Tehuu Yesus ngganggali kokolak nae, “Ta nandaa ha'i nala kakanak kala nana'an, fo nggalin neu busa.” [No maksut nana nafunik nae, Yesus musi tulu-fali Ndia hataholi Yahudin dei, bei fo bisa tulu-fali hataholi fe'ek.]
27 Tehuu inak ndia bala nae, “Tetebes Ama! Tehuu busa la mana mahanik lai mei sosolon. Sila boe oo la'a hata fo mana tudak neme kakanak kala pinggan mai.” [No maksut nae, neu faik fo kakanak kala la'a, na, busa boe oo hambu nana'ak. Mae Yesus tulu-fali Ndia hataholin, tehuu Ndia boe oo musi tulu-fali hataholi fe'ek.]
28 Yesus namanene leo ndiak, boe ma nafada nae, “Awii! Ina mamahele tebe-tebe neu Au maa! De ina fali leo, huu hata fo ina nokek ndia, dadi tutik so!” Boe ma ana fali, de nita anan hai memak so.
Lamatuak Yesus tao nahai hataholi no'uk kala
29 Basa boe ma Yesus no ana mana tunggan nala la'o ela mamanak ndia, boe ma ala la'ok tungga-tungga dano Galelea bifin. De ala nda'e leni letek esa leu, boe ma Yesus nanggatuuk fo nanoli sala. 30 Boe ma hataholi makadotok kala leni Ndia leu. Ala loo hataholi ei helak, hataholi mbokek, hataholi lu'uk, hataholi ta bisa kokolak, ma hataholi kamahedi fe'ek boe. Ala tao hataholi kamahedik kala deka-deka leu Yesus ein. Basa de Ana tao nahai sala. 31 Hataholi no'uk kala sila lita leo ndiak, boe ma ala heran. Ala lakokola lae, “Wei! Ana seli maa! Hataholi ei helak, bisa la'ok no malole. Ma hataholi mbokek, bisa nita. Hataholi lu'uk, bisa la'ok. Ma hataholi ta bisa kokolak, bisa kokolak so! Tetebes Manetualain tataon ia. Ndia ndia, Manetualain fo ita bei-ba'in nala lakaluku-lakatele neun neme makahulun ele mai.”
Lamatuak Yesus fee hataholi lifun haa la'a
32 Basa faik hida, boe ma Yesus noke nala Ndia ana mana tunggan nala, de nae, “Au ameda kasian neu hataholi makadotok kala ia so. Hambu leme dook mai so, ma lakabubua faik telu ia so, losak nana'an nala ta so. Malolenak ala boso fali lo sila tei loun. Huu boso losak ala bengge lai dala laladak.”
33 Tehuu Yesus ana mana tunggan nala lataa lae, “Ama! Mamana nees ia, dook neme nggolok mai. Ita ta bisa fee hataholi makadotok kala ia la'a.”
34 Tehuu Yesus natane sala nae, “Ei lotim hida?”
Ala lataa lae, “Kada hitu, ma i'ak faak!”
35 Boe ma Yesus nadenu basa hataholi la sila langgatuuk leu dae. 36 Boe ma Ana ha'i nala loti kahituk kala ma i'ak, de noke makasi neu Manetualain. Basa de Ana bibi'i sala, de Ana fee sala leu ana mana tunggan nala, suek ala baba'e fee basa hataholi la. 37 Boe ma basa sala la'a losa lakabete. Basa de lakaduduluk lala nana'a elak kala, henu lembeneu hitu. 38 Basa hataholi mana na'ak sila, meda touk lifun haa. Bei ta hingga tamba inak ma kakanak kala. 39 Basa boe ma Yesus nadenu hataholi makadotok kala sila fali. Boe ma Ana sa'e ofak fo neni dae baba'ek Magadan neu.e