Sin nheek naan Usif Yesus
18
Oras Nai' Yesus an'onen anrair on naan ate, In npoi nabu-bua nok In atoup noin' ein. Sin nnaon neun poo'n es anbi noe Kitron in panin. Onaim sin antaam anbin naan.2-3 Oras naan, a'naak rais pirsait Yahudi sin a'naakt ein, ma atoni' na'ko partei pirsait Farisi sin nfeen nrarin neu nai' Judas, soraurs ein ma apaot tuaf fauk. Fin in he na'sosa' Nai' Yesus. Nai' Judas nahiin po'on naan amsa', natuin Nai' Yesus nabua fani-fani nbi bare naan nok In atoup noin' ein. Rarit nai' Judas sin annaon neun po'on naan, neikin obor, pauk lantera, ma suni'-kenat.
4 Te kaah, Nai' Yesus nahini nrair are' saa' ein ok-oke' re' of anjair neu Ne. Rarit In nnao neu sin, onaim nataan sin im nak, “Hi maim sekau?”
5 Onaim sin nataah am nak, “Hai maim tuaf es, kaann ee Nai' Yesus, atoin Nasaretas.”
Rarit Nai' Yesus natoon am nak, ‘Es re' Au re' ia.’ Oras naan, nai' Judas anhaek nabu-bua nok sin. In es re' na'sosa' Nai' Yesus. 6 Oras Nai' Yesus na'uab am nak, “Es re' Au re' ia.” Onaim atoin ein naan antet-kotin, ma antaikobin.
7 Onaim Nai' Yesus nataan antein sin im nak, “Hi maim sekau?”
Rarit sin natahan am nak, “Nai' Yesus, na'ko kuan Nasaret.”
8 Nai' Yesus na'uab am nak, “Au utoon a'rair fe'e na 'ak, In re' naan, es re' Au re' ia. Onaim karu hi maim Kau, kais amheek re' biak ein. Amkonan sin he sin nnaon.” 9 (In na'uab on naan he najarib saa' re' In na'uab niit nak, “Aam Honi'. Mansian ii aar sin re' Ho mnona' ma mfee mrair Kau sin, ka nmui' fa tuaf es, re' namneuk.”)
10 Oras naan, nai' Simon Petrus neik been tuuk es. Rarit in nfaik benas naan, he n'oet. Nok askeken, in nsaip namouf atoin es in rukin a'ne'u. (Atoni' naan, kaann ee nai' Malkus. In re' naan, es re' a'naak rais pirsait Yahudi sin a'naak ko'u in aan renu'.) 11 Onaim Nai' Yesus anreun nai' Petrus am nak, “Hoe, Pe'u! Mutaap mufani' ho beens aan neu in tapan. Fin Au Ama' na'uab anrair nak, Au ro he upein ha'mu'it human on re' ia. Onaim anbain kuun nai! Naan on re' In nfee Kau kraas es, re' in aafn ee menu'. Maut he Au 'iun 'ani.”a
Sin neik Usif Yesus an'ain a'naak rais pirsait Yahudi sin a'naak ko'u
12 Rarit soraurs ein nok sin a'nakat, ma atoin Yahudis sin apaot ein, anheek naan Nai' Yesus, onaim anfuut Gwe. 13 Rarit sin neik Je nahuun neu nai' Anas fe'. Nai' Anas re' naan, es re' nai' Kayafas in aam babaf. Toon naan, nai' Kayafas es re' anjair a'naak rais pirsait Yahudi sin a'naak ko'u. 14 Nai' Kayafas re' ia, es re' nfaineek niit atoin Yahudis sin a'naet ma kaes kou'n ein am nak, “Reko nneis neu ki, karu suma tuaf mees' aah, es re' anmaet neu too mfaun ein.”b
Nai' Petrus nasuan nak, in ka nahiin fa Usif Yesus
15 Nai' Simon Petrus nnao natuin Nai' Yesus anbi koit, nabu-bua nok Nai' Yesus In atoup noni' tuaf es antein, es re' au, nai' Yohanis. A'naak rais pirsait Yahudi sin a'naak ko'u nahiin kau. Es naan ate, au bisa 'taam 'eu in kintal naan, ubu-bua 'ok Nai' Yesus. 16 Mes nai' Petrus anhake nbi mone', npaumaak nok baahk ee enon. Rarit au 'poi, onaim au u'uab 'ok bifee jes re' anpao nbi naan, maut he au bisa 'eik nai' Petrus antaam anbi nanan. 17 Onaim bifee naan nataan nai' Petrus am nak, “Hoe! Ho re' ia, Atoni' naan In atoup noni' tuaf es, ai'?”
Mes nai' Petrus nataah am nak, “Kaah fa, tua!”
18 Oras naan, mainikin. Es naan ate, apaot ein ma tua reun ein, sin anhaken he nraran ai. Onaim nai' Petrus anpaumaak, he nraar ai nabu-bua nok sin.
A'naak rais pirsait Yahudi sin a'naak kou' gwe nparikas Usif Yesus
19 Oras naan amsa', a'naak rais pirsait Yahudi sin a'naak ko'u mnasi' anparikas Nai' Yesus anmatoom nok In nonin, ma nmatoom nok In atoup noin' ein.
20 Nai' Yesus natoon am nak, “Au u'uab maat-maat, maut he too mfaun ein bisa nnenan ma natninan. Au unoni' piut a'bi bare re' hit atoin Yahudis biasa tabua, es re' hit uim oen ein, ma Uim Onen Uuf. Au ka u'uab 'iit fa 'bi koti-koti. 21 Nansaa' am es ho mutaan Kau? Mutaan meu tuaf-tuaf re' nneen Au uab ein naan. Fin sin nahinin batuur saa' re' Au u'uab a'rair sin naan.”
22 Oras sin na'uab ein on naan ate, apaot es, re' anhake nbi naan anpaas Nai' Yesus, rarit nak, “Ho kais mu'uab on naan meu a'naak ko'u!”
23 Onaim Nai' Yesus natoon ee mnak, “Karu Au u'uab a'saan, mururu' ma mukrira' sanat naan, es re' mee. Mes karu Au u'uab batuur, nansaa' am es ho mpaas Kau?”
24 Rarit nai' Anas anreun sin he sin neik Je neu nai' Kayafas, re' njair a'naak pirsait Yahudi sin a'naak ko'u. Oras sin nnaon naat Ee naan, In mafutu' fe'.
Nai' Petrus nasuan Usif Yesus antein
25 Oras naan, nai' Simon Petrus anhaek fe' he nraar ai. Onaim atoni' bian re' nbin naan sin nataan ee mnak, “Ho re' ia, In atoup noni' tuaf es, ai'?”
Mes nai' Petrus nataah am nak, “Kaah fa, tua!”
26 Anbi naan amsa' anmui' ate tuaf es na'ko pirsait Yahudi sin a'naak ko'u. In re' naan, nonot-asar na'ko atoni' re' nai' Petrus ansaip in rukin. Rarit in nataan am nak, “Hoe! Fe'e na ho mbi po'on naan, ai'? Au 'kius 'iit ko mbi naan!”
27 Mes nai' Petrus nasuan antein, nateef oras naan ate, maun gwe nkokre'o nrair.
Usif Yesus anbi gubernur Pilatus in human ma in matan
28 Rarit kik-kiku te, sin neik Nai' Yesus na'ko nai' Kayafas in umi. Sin nnaon neun gubernur ee in uim jabatan, anbi sorarus Roma sin benteng.c Atoin Yahudis sin kuuk ka ntaman fa nbin atoin Romas sin bare naan, natuin rasi naan an'oemetab sin tuak ein, he sin ka bisa nbukaen fa fesat Paska. 29 Rarit gubernur Pilatus anpoi nateef nok atoin Yahudis sin. Onaim in nataan, am nak. “Hi misaeb sanat saa' meu Atoni' re' ia?”
30 Onaim sin natahan am nak, “On nai, tua. Karu In re' ia, ka atoin maufinu fa te, hai ka iim he misein ko fa, tua. Saa' antein, hai mnona' ma mfee Je meu ho 'nimam, tua.”
31 Rarit gubernur ee na'uab neu sin im nak, “On nai. Maut he hi kiim es re' am'urus In rasi, mituin hi atoin Yahudis in atoran.”
Onaim atoin Yahudis sin a'naet ein natoon am nak, “Ka bisa fa, tua. Hai atoin Yahudis ka mmui' fa hak antein he mifeek hukun a'maten. Naan suma nbi prenat Roma, es re' nmui' hak on re' naan.” 32 (Oras sin na'uab ein on naan, rasi re' Nai' Yesus na'uab niit ee, anjari nrair. Fin In natoon anrair Iin na nak, In of anmaet natuin prenat Roma sin cara, es re' nkuus na'maet Je nbi hau nehe.)d
33 Onaim gubernur ee ntaam anfani nbi soraurs ein sin benteng. Rarit in anhaman naan Nai' Yesus, onaim nataan Ee mnak, “On mee? Ho re' ia, atoin Yahudis sin uisf, aa oo?”
34 Onaim Nai' Yesus nataan nafain' ee mnak, “Ho kuum es re' mutaan on naan, aa oo, ai' anmui' tuaf bian es re' natoon ko nmatoom nok Kau, tua?”
35 Onaim gubernur ee nataah am nak, “Hae! Au re' ia, ka atoin Yahudis fa, joo? Ho nggwin esan re' annona' naan ko meu ia. Saa' antein a'naak rais pirsait ein sin a'naakt ein. Te ho re' ia, mmoe' saa'? Mutoon miit kau fe'!”
36 Onaim Nai' Yesus natoon am nak, “Au ka uisf es fa u'ko pah-pinan ia. Fin karu Au 'jair usif on re' naan, Au nggwin ro he ntaisibun he atoin Yahudis sin ka nheek Kau fa. Batuur Au 'jair Usif. Mes ka nmui' fa tuaf es anbi pah-pinan ia, re' naikas Kau on naan.”
37 Rarit gubernur ee nataan nafain' Ee mnak, “Onaim ho re' ia usif, aa oo?”
Onaim Nai' Yesus nataah am nak, “Ho kuum es re' mak Au 'jair Usif. Amneon ii, Au 'uum a'bi pah-pinan ia, ma Au 'moin he 'jair Usif, maut he Au utoon anmatoom nok rasin re' batuur. Mansian ii aar sin re' nnaa' naheran rasin re' amneot ma amnonot, sin re' naan annenan ma natniin Kau.”
38a Rarit gubernur nataan Ee mnak, “Rais amneot ma amnoont ii, saa'?”
Sin nafeek hukun a'maten neu Usif Yesus
38b Oras gubernur Pilatus na'uab anrair on naan ate, in npoi nfani nbi atoin Yahudis sin. In na'uab am nak, “Au 'parikas urair Je, mes au ka upein fa In sanat mese' msa'.
39 Mes hi biasa, toon-toon anbi fesat Paska, au ro he ufetin atoin bui es 'eu ki. Onaim toon ia, hi mroim he au ufetin atoin Yahudis hi usif, ai' on mee?”
40 Sin aar sin anhuun ein ok-oke' mnak, “Kais mufetin Tuaf ia! Mufetin meu nai' Barabas, tua!” Te kaah, nai' Barabas naan, atoin maufinu 'maten.e