Sin neik Usif Yesus he nateef nok gubernur Pilatus
15
Neis noi nmeu te, afeek raisn ein sin nneek mesen he na'maet Nai' Yesus. Onaim sin nfuut neik Je he nateef nok gubernur Pilatus.
Nai' Markus 15:1-32
2 Oras sin ntean gubernur ee, in nataan Nai' Yesus am nak, “On mee? Namneo ho re' ia atoin Yahudis sin Usif?”
Nai' Yesus nataah am nak, “Batuur! Ama' gubernur ho uabam naan, batuur.”
3 Rarit a'naak rais pirsait Yahudi sin a'naakt ein na'uab ein nok gubernur ee mnak, “Atoni' ia In saant ii mfau re'uf!” Onaim sin nsoi' In saant ein mese'-mese'.
4 Rarit gubernur naan nataan antein Nai' Yesus am nak, “Ho ka mneen fa sin uabk ein naan, aa oo? Sin nasaeb ko sanat amfaun. Bait ho mutaah miit fe'!”
5 Mes Nai' Yesus ka ntoin fa fefa' mese' amsa', tar antea gubernur ee nsanmaak.
Gubernur Pilatus nafeek hukun a'maten neu Usif Yesus
6 Toon-toon ate, karu atoin Yahudis sin anmo'en fesat Paska, biasa too mfaun ein anpiir naan atoin bui tuaf es, he gubernur ee nafeitn ee na'ko bui. 7 Oras naan, anmui' atoin bui tuaf es, kaann ee nai' Barabas. Nahunu te, sin nheek je nok in aok-biak ein, natuin in nraban anaa' aprenat pah Roma, ma in nroor atoni' msa'. 8 Natuin fesat Paska naan anpaumaak een, es na' atoni mfaun ein nnaon neun gubernur Pilatus ma nhuun ein am nak, “Ama' gubernur! Neon ko'u Paska anpaumaak een. Karu reko te, mufetin atoin bui tuaf es, on re' toon-toon.”
9 Rarit gubernur ee ntoin sin am nak, “On naan ate, au he ufetin ki sekau? Karu au ufetin ki atoin Yahudis sin Usif re' ia te, hi mromi, oo?” 10 Gubernur ee na'uab on naan, amneon ii in nahiin anrair nak, a'naak rais pirsait Yahudi sin a'naakt ein neik Nai' Yesus neu ne, natuin sin neek ein namenan nmaten neu Nai' Yesus.
11 Mes are' a'naak rais pirsait Yahudi sin a'naakt ein anhuitan too mfaun ein he sin ntoit neu gubernur ee mnak, “Hai ka mrom-roim main Je fa! Mufetin kai nai' Barabas, tua!”
12 Rarit gubernur ee nataan anteni' sin am nak, “Karu on naan ate, au he 'moe' saa' 'eu Nai' Yesus, re' sin nteek nain Je mnak ‘atoin Yahudis sin Usif’ ia?”
13 Onaim sin nhuun ein ok-oke' am nak, “Mu'mate He! Amkuus mu'peit Ee meu hau neeh je, tua!”
14 Rarit gubernur ee nataan am nak, “In saant ii saa'? Au uprikas urair Je, mes au ka upein fa sanat mese' msa'!”
Mes sin aar sin anhuun ein naher-heran ntein' ein am nak, “Mu'mate He! Amkuus Ee nai meu hau neeh je, tua!”
15 Natuin gubernur ee he nharineb too mfaun ein sin neek ein, onaim in nafetin nai' Barabas natuin sin roimk ein. Rarit in naprenat atoin apaot ein he sin nnao nbeosa Nai' Yesus anpaken a'kauboe. Anbeso nrair Je te, soraurs ein neik Nai' Yesus anpoi nnaon he nkuus niis Ne nbi hau nehe.
Soraurs ein anbeos nafan-fani' Usif Yesus
16 Rarit soraurs ein anheer neik Nai' Yesus neu sin koat ee in kintal.b Anbi naan, sin no'en nabuab sorarus puukn es, of oni' tuaf natun niim. 17 Ma sin nabaur Nai' Yesus neik baru mnanu' masnaa mee-umub, on re' uisf ein biasa npake. Rarit sin nait noon ma'aika' ma sin nrii' 'soeb es. Ma sin ntuma'nii' nataam 'soeb ma'aika' naan neu Nai' Yesus In a'nakan, he sin na'raur ein on re' he nasaeba' 'piru'-baru neu uis feu' gwes.
18 Rarit sin na'ruir ein ma na'besan, rarit nakree't Ee mnak, “Tabe, Aam Usi' Yahudi!” 19 Ma sin na'ruir ein napo-poin anbi Nai' Yesus In matan. Ma sin npuurn ein hape fani-fani neu In human. Rarit sin ntee' nafan-faink Ee neikin hau. 20 Sin nakre'et narair Je on naan ate, sin npuu' nain baru mnanu' naan. Ma sin napakeb nafani' In paken. Rarit sin neik Je npoi na'ko kota Yerusalem, he nkuus na'peit Ee nbi hau nehe tar anmaet.
Sin nkuus na'peti' Usif Yesus anbi hau nehe
21 Oras sin npoin nnaon na'kon Yerusalem, sin nateef nok atoin es anbi raan atnana'. Atoni' naan na'ko kota Kirene, kaann ee nai' Simon. In re' naan, nai' Aleksander ma nai' Rufus sin amaf. In fe' he ntaam neu kota Yerusalem ate, soraurs ein anheer naan ee, ma na'seek ee he nasaah Nai' Yesus In hau nehe.c 22 Sin nheer neik Nai' Yesus antea baer jes, kaann ee Golgota. (In a'moufn ii ‘bare 'naak nuif’.) 23 Anbi naan, sin he na'inu' Nai' Yesus neik raur mai'ninu' maseor re'u, he In bisa naran menas. Mes In ka nroim fa he niun. 24-25 Rarit sin nkuus natneneb Nai' Yesus anbi hau nehe. Onaim sin nahake' hau nehe naan, of oni' fe' anreuk seo. Rarit soraurs ein anheran suur ana' he napara' sekau es re' napein Nai' Yesus In paken.d 26 Rarit sin ntuin anbi hau pisa' es am nak:
“Atoni' ia, atoin Yahudis sin Usif”
Rarit sin nkuus hau pisa' naan, anbi hau nehe neis faof, anhaumaak Nai' Yesus In a'nakan. Sin npaek rais matu'i naan he nhuukn Ee. 27 Anbi naan, sin nkuus na'maet aburarut tuaf nua msa'. Es anbi Nai' Yesus In abnapan a'ne'u, ma es antein anbi 'rii. 28 [Nok rasi naan ate, sin natuin saa' re' matu'i nain anbi Uisneno In Suur Akninu' re' nak, “Sin nmoo' Je nahuum on re' atoin amoe' re'uf.”]e f
29 Are' atoni mfaun ein re' annaon natuin ranan naan, niit Nai' Yesus makfiri' anbi hau nehe. Onaim sin nkiu'n ein ma nakre'et Nai' Yesus am nak, “Hoe! Ho es re' mak, Ho he mpukai mureu' Uisneno In Uim Onen Uuf, rarit mufena' mufain' ee anbi neno teun in nanan.g 30 Maut he Ho msaun mu'ko hau nehe naan, he mufetin Ho tuam aan nai! Karu Ho mmoe' on naan ate, na' hai mpirsai mmak Ho re' ia Uisneno In Anah.”
31 A'naak rais pirsait Yahudi sin a'naakt ein nok tunggur agaam ein nakre'et Nai' Yesus amsa' am nak, “In nsoi nafetin biak ein, mes In ka bisa nafetin naan fa In tuan. 32 In nteek In tuan ii nak ‘Kristus’, Atoni' re' Uisneno anba'an nain Je na'ko un-unu'. Bian nak, In re' naan atoin Israelas sin Usif. Karu namneo on naan ate, maut he In nsaun na'ko hau nehe he hai miit fe'. Rarit hai mpirsai meu Ne.”
Tua nua' ein re' na'peti' sin bu'-bua' nok Nai' Yesus anbi sin hau nehe mese'-mese', sin nakre'et Nai' Yesus amsa'.
Usif Yesus anmaet
33 Rarit meis'ookn ii n'aum naan bare naan, na'ko maans ii na'puup tar antea nreuk teun maans ii nmaeb.
Nai' Markus 15:33-47
34 Oras anreuk teun on naan ate, Nai' Yesus anhunun neik uab Aram am nak, “Eloi! Eloi! Lema sabaktani?” (Re' neik hit uab ii te nak, “Koi, Au Usi'! Koi, Au Uisneno! Nansaa' am es Ho mparakan Kau on re' ia?”)h
35 Tuaf fauk re' anhaumakan anbin naan, sin nnenan neu Nai' Yesus In hanan naan. Onaim sin na'uab ein am nak, “Hoe! Hi mneen fe'! In nkoa' ka'o Elia, Uisneno In mafefa kninu' un-unu'.” 36 Rarit tuaf es naen nait ani'-tei meto' ma nateep ee nbi raur mai'ninu'. Rarit napuunk ee nbi hau gwes in tunan, ma naramib Nai' Yesus he nmuis. Rarit atoni' naan na'uab am nak, “Ampao he hit kius tiit! Kais-kaisa' ka'o Elia neem ma nasaunt Ee na'ko hau nehe.”i
37 Rarit Nai' Yesus anhunun anteni', ma In nmaet.
38 Anbi Uim Onen Uuf ee, anmui' naan tai eon kou' gwes, nakfiir' ee he nakiin Uisneno In Ke'en Akninu'. Oras Nai' Yesus snaasn ii natfeek, tai eon ko'u naan natpisu' nbait nua na'ko faof tar antea 'piin.j
39 Anbi Golgota, atoin a'naak paot es anhake nhaumaak Nai' Yesus In hau nehe. Oras in niit Nai' Yesus In a'maten, in naskeek. Rarit in na'uab am nak, “Ai joo! Atoni' ia namneo-namneo Uisneno in Anah!”
40-41 Anmui' naan bifee fauk re' napeen Nai' Yesus In a'maten na'kon a'roo. Sin esan re' nahunu te antuthaen Nai' Yesus sin anbin pah Galilea. Sin esan re' ain Salome, bi Maria na'ko kuan Makdala, nok ain Maria (re' nai' Yakobus muni' nok nai' Yosesk sin ainaf), ma bifee mfaun bian anteni' re' neem nabu-buan nok Nai' Yesus neun Yerusalem.l
Sin nsuub Usif Yesus In ta'un neu noup fatu
42-43 Rarit atoin es naim ranan he nasanut Nai' Yesus In aon-ta'un amates na'ko hau nehe. Atoni' naan kaann ee, nai' Yusuf. In na'ko kota Arimatea. In re' naan tuaf es na'ko pukan afeek rais pirsait Yahudi. In neekn ee reko. In anpao-pao prenat Uisneno re' he neem.
Nai' Yesus anmaet nok neon nima'. Noka' te nateef nok atoin Yahudis sin neon onen. Es naan ate, anbi neon nima' naan, nai' Yusuf he nasanut nahunun Nai' Yesus In aon. Nai' Yusuf anha'tain in nekan, ma nnao nbaiseun gubernur Pilatus he nasanut Nai' Yesus In aon amates naan. 44 Oras gubernur ee anneen nai' Yusuf in haan totis naan ate, in nsanmaak. Onaim in na'uab am nak, “Ai joo! Atoni' naan anmaet rabah, oo! Anbi au teenb ii te, au 'ak oni' ka fe'.”
Rarit in nreun tuaf he no'en a'naak paot. Oras in neem antea te, gubernur ee nataan am nak, “On mee? Nai' Yesus anmate nrari oo, ai' kaah fe'?”
45 A'naak sorarus naan nataah am nak, “Namneo! In nmaet jen, tua.” Oras gubernur ee nneen on naan ate, in nfee mainuan neu nai' Yusuf he nnao nasanut Nai' Yesus In aon-ta'un naan.
46 Oke te nai' Yusuf annao nsoos tais amnaun fe'u re' ma'osa'. Rarit nai' Yusuf annao neu Golgota. Ma in nasanut Nai' Yesus In aon na'ko hau nehe. In n'aum uismina' naan neik tai fe'u re' ma'osa'. Neot naan, sin fe' anpahat anrair noup fatu es anbi kneet fatu. Rarit sin nsorot nataam uismina' naan neu noup fatu. Onaim sin naritu' faut been kou' gwes, he na'eek na'maet noup fatu naan. Rarit nai' Yusuf sin anfanin.
47 Oras naan, bi Maria na'ko Makdala, ma ain Maria (nai' Yoses in ainaf), sin nokan anbin naan amsa'. Sin nua sin ankius narek-reko' bare re' sin natunu' Nai' Yesus In aon-ta'un naan.