Usif Yesus in
Haef ein sin Reta'
Uisneno nba'an he nfee In Asmaan Akninu'
1
1-3 Ama' Teofilus.a Tetus ao-mina' na'ko kau, nai' Lukas.Anbi surat ahunut, au 'tui 'rair are' saa'-saa' re' anmatoom nok Usif Yesus In a'monin. Esan re' saa'-saa' re' In anmoe' sin, ma saa'-saa' re' In nanoni' nrair sin na'ko un-unu'. In npiri nrair In haef ein. Maski atoni' sin nasuusb Ee ma nha'mui' Je tar antea na'maet Je, mes Uisneno namonib nafain' Ee. Ma oras In nmoni nfani te, In nakriir On neu In haef ein. Sin niit Ee fani-fani tar neno bo' haa, onaim sin nahinin nak In nmoni nfain batuur-batuur. In na'uab neu sin am nak, Uisneno on re' Usif re' nnaa' aprenat. In nreek haefan sin neik Uisneno In Asmaan Akniun' ee In kuasa. Tar antea In nsae nfain neu sonaf neno tunan.
Are' rasin re' ia ok-oke', re' au 'tui 'iit sin.
4-5 Neot es, oras Nai' Yesus nabua nok In haef ein nbin a'to'ef Saitun, In nfeen sin prenat am nak,
“Mimnau! Nahunu te nai' Yohanis nasrain neik oe, mes karu hi mpao mteni' neno fauk amnemat, Uisneno of anmo'e nneis neu ki, natuin In nfee In Asmaan Akniun' ee neu ki. Onaim nati' hi kaisa' mnao misaitan kota Yerusalem. Hi mpao mbi ia, tar Au Ama' nfee In Asmaan Akniun' ee neu ki, on re' In nba'an anrari. Ma hi mneen mirair mi'ko Kau.”b
Usif Yesus na'ait On neu sonaf neno tunan
6 Oras Nai' Yesus nabua nok In haef ein, sin nataan Ee mnak, “Aam! Hai he mitaan miit on nai: Ho muhiin un-unu' te, pah Isra'el in napreent on kuun. Oras ia, Ho he mufetin kai mi'ko anaa' aprenat sona', ai' hai he mpao mtein?”
7 Rarit Nai' Yesus nataah sin am nak, “Hi kaisa' mitaan nok in oras naan fe'. Suma Au Ama' neikn On es an'ator in oras. 8 Onaim karu Uisneno In Asmaan Akniun' ee neem antaam neu ki, of hi mipein 'be'if ma ma'tanif. Rarit hi ro he mnao mitoon meu are' mansian ii ok-oke' anmatoom nok Kau. Mitoon meu abitan kota Yerusalem, abitan propinsi Yudea ma propinsi Samaria, tar antea pah-pinan ia nfuun am nateef.”c 9 Na'uab anrair on naan ate, Nai' Yesus na'ait On neu sonaf neno tunan anbi sin maatk ein. In na'ait On tar antea noep je n'aum naan Ee, ma sin ka niit antein' Ee fa.d
10 Oras sin anbaisenun fe', nok askeken tuaf nua nhaek nakeit-ketin nok sin, sin npaken tai muit sene. 11 Tua nua' ein naan na'uab ein am nak, “Atoin Galileas aar ki! Nansaa' am es hi msanmaak ma mbaiseun piut meu neon gwe tnanan? Fe'e na hi miit Nai' Yesus na'ait On neu neon gwe tunan tar antea noep je n'aum naan Ee. Hi miit meik hi maatm ein oras In nsae neu neon gwe tunan. In nsae on re' mee te, In of anfain neem on re' naan amsa'.”
Sin namin tuaf he nseka' nai' Judas
12 Rarit Nai' Yesus In haef ein nsanun na'ko 'to'ef Saitun, ma ntebin nfanin neun kota Yerusalem. A'to'ef Saitun naan in a'roon ii na'ko kota of oni' kiur gwes.e
13 Antean kota naan ate, sin ntaman neun umi re' sin natuan nbin naa. Rarit sin nsaen neu ke'en abit fafon. Sin kaank ein, esan re':
nai' Petrus,
nai' Yohanis,
nai' Yakobus,
nai' Anderias,
nai' Felipus,
nai' Tomas,
nai' Bertolomeos,
nai' Mateos,
nai' Yakobus (nai' Alfeus in anah),
nai' Simon (na'ko partei purtik Selot),f
ma nai' Judas (nai' Yakobus in anah).g
14 Sin aar sin nabuan nekaf mese' fani-fani ma n'oen ein. Sin n'oen ein nabuan nok ain Maria, Nai' Yesus In ainaf, nok bifee bian ma nok Nai' Yesus In oirf ein.
15 Neot es, sin nabuan nfanin, of oni' sin tuaf nautn es bo' nua. Rarit nai' Petrus anfeen anhaek ma na'uab am nak, 16 “Aina'-ama' aar kit oke'! Of oni' hi mimnau nai' Judas fe', re' neon gwes ii, in nok tuaf puukn es sin neman ma nheek Nai' Yesus. Saa'-saa' re' anboor neu nai' Judas ro he njair on re' naan. Fin nahunu te, Uisneno In Asmaan Akniun' ee npaek usif nai' Daut he ntui nain anmatoom nok nai' Judas on re' naan. 17 In re' naan, hit ja, ma nmeup nabu-bua nok kit.”
18 (Mes oras nai' Judas na'sosa' nrair Nai' Yesus ate, in nait roit naan ma annao nsoos afu piis es. Rarit in nmate nbi bare naan, natuin in nmouf anteinb on ma in tain ee mpee' ma taif ein anroron npoin oke'. 19 Oras naan, biak ein nmurai na'uab naktaur ein ma naktuut ein na'ko es neu es, tar abitan kota Yerusalem nahinin rek-reko nmatoom nok nai' Judas in a'maten. Es naan ate, sin nakanab bare naan neik sin uab Aram nak ‘Hakeldama’, re' neik hit uab ii te nak ‘Poo' Naa'’.)h
20 Nai' Petrus na'uab ankono mnak, “Unu' te, usif nai' Daut antui rasi naan et Surat Pures-Bo'is sin. In ntui mnak,
‘Maut he in bare 'tua-haa' naan ruman;
kais anmui' tuaf re' he natua nteni' anbi naan.’
Ma in ntui nteni' mnak,
‘Maut he in meup gwe, nanaa't ee neu tua 'teta'.’i
21-22 Onaim hit ro he taim tuaf he nsenu' nai' Judas. Hit taim taan tuaf es, re' nabua nok kit sero 'roo gwen. In ro he es re' atoni' re' nhaumaakb on nok Nai' Yesus oras In nnao nbi mee-mee, anmurai na'ko nai' Yohanis nasrain Nai' Yesus. In ro he niit nok in matan nak Nai' Yesus anmoni nfain na'ko In a'maten, tar na'ait On anfain neu sonaf neno tunan.”j
23 Oras nai' Petrus na'uab anrair on naan ate, sin aar sin nataam kanaf nua. Tuaf es, es re' nai' Matias, ma es anteni' es re' nai' Yusuf, (re' fe'-fe'e te, sin nteek ee te nak nai' Barsabas; ma sin nteek ee nai' Yustus amsa'). 24-25 Rarit sin n'oen ein bu'-bua' am nak, “Ama' abit sonaf neno tunan! Ho muhiin murek-reko' main tuaf mese'-mese' in nekan. Nai' Judas anmate nporin in mepu. Onaim Ho meikn Om amruur ma mreek tuaf es na'ko sin nua sin re' ia, he nseka' nai' Judas, he hai mait je njair Usif Yesus In haef.” 26 Rarit sin nheran suur ana' neu tua nua' ein naan. Ma sin nheer antoom nai' Matias in kanan. Es naan ate, sin nait je njair Usif Yesus In haef nabua nok tuaf bo'es am mees ein naan.