Sin na'uab ein on naan, natuin anmeu te, atoin Yahudis sin nateef nok neon ko'u ‘Paska’, ma ‘Fesat Utunu' ka Maseor Muur fa’. Anbin nenon re' naan, sin feest ein he namnau nafani' oras ahunut, re' Uisneno napoitan sin be'i-na'i sin na'kon pah Masir.^a

3 Anbi kuan Betania, anmui' atoin es, kaann ee nai' Simon. Nahunu te, atoni' anmai'niisn ee, natuin in ameen nui-atroki'. Mes oras ia, in nareko nrair.

Onaim oras neon kou' gwi ka ntea fa fe', Nai' Yesus sin annaon ma nbukaen anbin nai' Simon in umi. Oras sin nbukaen, bifee jes neem nateef nok Nai' Yesus. In nnaa' neik boot faut gwes, re' narai je nok miin foo meni' re' ma'osa'.^b Rarit bifee naan an'ipu nporin botor naan in neon. Ma in naronib akre'o-kre'o neu Nai' Yesus In a'nakan he anjair tanar nak in nhormaat Nai' Yesus.

4 Mes anbi naan, anmui' atoni' fauk re' anbukaen nokan amsa'. Oras sin niit bifee naan anmoe' on re' naan, sin nato'on ma na'uab ein nok haan be'o mnak, “Huu! Bifee saa' na es re' ia, es na' in nporin nareu' miin foo meni' ma'osa' re' ia!? 5 Reko nneis in na'sosa' mina' re' naan! Rarit in nbait roit ein naan neu ama'mui't ein! Natuin miin foo meni' naan in oosn ii namnees nok kai tuaf es anbi toon es.” Rarit sin nakain ee nok ma'tani'.

6 Mes Nai' Yesus nataah sin am nak, “Hi kais misusab bifee re' ia! Amkonan! Au 'mariin, natuin in n'oop anrair miin foo meni' neu Au aok. 7 Ama'mui't ein nok ki neno-neno. Onaim hi bisa mturun ma mbaab sin ansuun oras. Mes ka 'roo fa te, Au ka neu he ubua 'teni' fa 'ok ki.^c 8 Au 'moink ii ka 'roo fa gwen. Ma bifee re' naronib mina' neu Kau, in npairoir nain Au aok ii, on re' in nkaki' nain fubona' neu Au aok-ta'uk. 9 Mimnau mirek-reko'! Uisneno In Rais Reko of nanaob on anbi mee-mee nbi pah-pinan ia, ma tuaf of nareta' anmatoom nok bifee ia in a'mo'en arekot. Maut he are' mansian ein namnau gwe.”

10 Rarit anmui' tuaf es na'ko atoup noni' tuaf bo'es am nua, kaann ee nai' Judas Iskariot. In npoi nnao ma naim a'naak rais pirsait Yahudi sin a'naakt ein, he na'sosa' Nai' Yesus neu sin. Oras in nateef nok sin, in nateaba' in sarit. 11 Oras a'naakt ein anneen nai' Judas in uaban naan, sin nmarinan nmaten. Ma sin nbaasn ee mnak, “Karu ho he mu'sosa' Nai' Yesus meu kai, hai of ambaen ko.” Rarit nai' Judas anpoi ma nmurai naim ranan he nana'at Nai' Yesus neu sin.

12 Neno naan, neon ahunut na'ko neon ko'un atoin Yahudis sin. Anbi neno naan, sin biasa ntunun utunu' re' ka mamuur fa, ma sin nroron 'bib-kase msa'. Onaim Nai' Yesus In atoup noin' ein neman ma nataan Ee mnak, “Aam! Neno ia, hit neon ko'u Paska. Onaim Ho roim ii he hai mnao mibarab baer fesat Paska meu mee?”

13 Rarit Nai' Yesus anreun In atoup noni' tuaf nua mnak, “Hi mnao mihuun nai meu kota. Anbi naan, of hi miteef mok atoin es re' nasaah oe nbi kuis aan es. Hi mnao mituin ee. 14 Karu in nnao ntaam neu umi mee te, hi mtaam mituin ee. Rarit hi mitoon meu uim tuaf naan am mak, ‘Aam! Hai Tungguur gwe ntoit bare he nmoe' fesat Paska nok In atoup noin' ein.’ 15 Fin atoni' naan of naruru' ki ke'en mainuan es, et umi ktuta' naan in fafon. In nkikin anrair ke'en naan. Onaim hi nua ki mibarab bukaet ambi naan.”

16 Rarit sin nua sin annaon neun kota. Anbi naan, sin nateef nok are' saa'-saa' re' Nai' Yesus natoon anrair sin. Onaim sin nabarab he Nai' Yesus sin nbukaen fesat Paska anbi naan. Rarit sin nua sin annao naskau Nai' Yesus nok In atoup noni' bian.

17 Oras maans ii he noi nmouf, Nai' Yesus nok In atoup noni' bo'es am nua nnaon ntaman neun bare naan.

18 Anbin bare naan, sin ntokon ma nbukaen nabu-buan. Oras sin nbukaen, Nai' Yesus na'uab am nak, “Hi mneen! Anmui' tuaf es na'ko ki re' of na'sosa' Kau neu atoin sona'.”^d

19 Oras sin nnenan on naan ate, sin neek ein na'uun ein. Rarit sin es-es ate nataan Nai' Yesus am nak, “Aam! Re' Ho mteek ee naan, ka au fa, oo?”

20 Nai' Yesus nataah am nak, “Tuaf re' narepa' utunu' nok Kau nbi 'pik-oef ia, of in es re' na'sosa' Kau. 21 Mimnau, joo! Au, Mansian Batuur-Batuur re' ia, ro he 'maet, on re' matu'i nrair et Uisneno In Suur Akninu'. Onaim ampaant om! Atoni' re' na'sosa' Kau naan, of in nsutai kuun in amre'un! Reko nneis bait in ainf ee kais nahoins ee.”

22 Oras sin nbukaen, Nai' Yesus nait naan utunu' fua es, ma ntoit makasi neu Uisneno. Rarit In nteib utunu' naan pisa'-pisa', ma nfee sin neu In atoup noin' ein. Rarit In na'uab am nak, “Utunu' re' ia, Au aok. Mait ma mbukae nai, tua.”

23 Rarit In nait naan kraa mninut re' matua' tua min-kase. Ma In ntoit makasi neu Uisneno. Rarit In nnona' kraas naan neu In atoup noin' ein, he sin nbukaen. 24 Ma In na'uab am nak, “Tua min-kase ia, Au naa'. In of nat'oop he nsoi nafetin too mfaun. Naa' re' ia, anjair tanar re' namnaub kit nak, saa' re' Uisneno nba'an anrair sin naan, anjarin esan re' ia. Mait ma mbukaen nai.^e 25 Amneen mirek-reko'! Anmurai mabe' ia, Au ka neu he 'bukae 'teni' fa tua min-kase on re' ia. Tar Au 'ok Au Ama' amtuun Om ma miprenat mibu-bua mbi sonaf neno tunan, na' Au 'bukae 'teni'.”

26 Rarit sin nsii siit es, he nbo'is Uisneno. Rarit sin npoin oras fai, ma nnaon neun a'to'ef Saitun.

27 Oras sin nnaon nabuan naan, Nai' Yesus natoon nanin sin am nak, “Mabe' ia, hi aar ki of maen misaitan Kau. Fin matu'i nrair et Uisneno In Suur Akninu' nak,

28 Namneo, Au ro he 'maet. Mes oras Au 'moni 'fain jen ate, Au of a'nao uhunun ki 'eu propinsi Galilea.”^g

29 Rarit nai' Petrus anprotees am nak, “Aam! Maski sin naen nasaitan Ko, mes au ka neu fa he 'aen, tua!”

30 Nai' Yesus nataah am nak, “Pe'u! Nati' mumnau! Mabe' ia, nahuun na'ko maun ii nkokre'on hana' nua, ho musuan amrair Kau era' teun gwen mak, ho ka muhiin Kau fa!”

31 Mes nai' Petrus haan ii nsae mnak, “Kaah fa, tua! Karu Ho mmate te, au 'maet 'ok. Au ka neu fa he usuan Ko ma 'aen usaitan Ko, tua!”

Nai' Petrus in aok-bian sin es-es ate na'uab on naan amsa'.

32 Rarit Nai' Yesus nok sin annaon nkonon ma ntean poo'n es et a'to'ef Saitun, kaann ee ‘Getsemani’. Onaim Nai' Yesus na'uab neu sin am nak, “Amtoko mpao Kau mbi re' ia. Au he 'nao 'onen 'eu re' nee.”

33 Ma In nhaman neik nai' Petrus, nai' Yakobus, ma nai' Yohanis, he nnao nabua nok Ne. Anmurai na'ko oras naan, In neekn ii nsuus ma ka ntainina' fa. 34 In na'uab neu sin am nak, “Au neek ii nsuus anmaet! Au 'naben ate Au he 'maet jen. Hi mtook ma mpao mbi re' ia.”

35-36 Rarit In nnao nteni' kre'o, rarit anri'tuu ma n'onen am nak, “Ama' amanekat! Karu Ho mromi te, Au kais a'sutai nana'renat naan tar a'tea he 'maet on re' ia. Au uhiin urair 'ak, ka tiit tain fa saa' re' Ho ka bisa mmoe' maan ee fa. Onaim karu reko te, Ho mait mu'roba' rais ha'mu'it re' ia na'ko Kau. Mes kaisa' mutuin Au romik; maut nai he mutuin Ho romim, tua.”

37 Rarit In nfain neu In atoup noni' tua teun ein naan, mes sin ntupan nfinin. Onaim In npoo' na'fena' sin, ma na'uab neu nai' Petrus am nak, “Hoe! Pe'u!^h Ho mtuup kuum, oo? Au 'bi nee rabah. Mes hi he mpao kre'o msa', hi ka mibei' fa! 38 Mumeu maatm ein naan fe'. Rarit amfeen he mpao mok Kau! Hi neekm ein anromin he hi mmoe' rais reko, mes hi aom ein an'oren. Onaim reko nneis hi m'onen, he karu 'suu' te neem ate, kais niis ki.”ⁱ

39 Rarit Nai' Yesus annao n'onen anteni' haef es. In ntoit antein he Uisneno nait na'roba' rais ha'mu'it re' naan na'ko In tuan. 40 Rarit In nfain neem neu In atoup noni' tua teun ein naan. Mes sin ntupan nfinin, fin sin maatk ein nma'fenan re'-re'uf. Onaim In npoo' nafena' ntein sin. Mes sin ka nahini ntein-tein' ein fa, he nataah Ee nak saa'.

41 Rarit Nai' Yesus annao nasaitan sin he n'onen hae' teun ii. Rarit In nfain neem, ma anpoo' nafena' antein sin. In na'uab am nak, “Airoo! Hi mtuup-tuup fe', oo? Noo gwah nai! Amfeen nai! Fin atoni' re' na'sosa' Kau, Mansian Batuur-Batuur re' ia, anpaumaak een. Oras ia, sin he nheek ma nnona' Kau neu atoin amoe' saant ein. 42 Amfeen nai ma mkius nai! Atoni' re' na'sosa' Kau, neem een. Iim he tnao tateef tok sin!”

43 Oras Nai' Yesus na'uab on naan fe'e te, nok askeken nai' Judas nok atoni mfaun ein neman. Sin neik suin tuka' nok hau tuka', he nheek Nai' Yesus. Sin nmoe' rasi naan, fin sin napenin aprenat na'ko atoin Yahudis sin a'naakt ein. Sin aar sin esan re' a'nakat rasi pirsait Yahudi sin a'naakt ein, tunggur agaam ein, ma mnais harat Yahudi sin. 44 Nai' Judas ansenen nain sin am nak, “Amkius mirek-reko'! Au 'neek sekau te, mheek Je nai! In es re' hi mam-mami!”

45 Onaim oras nai' Judas nok sin antean bare naan, in neem anhake nbi Nai' Yesus In matan. Ma in nasee Je mnak, “Aam Tungguru!” Onaim nai' Judas anhoo ma nneek Ee. 46 Rarit too mfaun ein neman he nheek Nai' Yesus.

47 Mes Nai' Yesus In atoup noni' tuaf es anfaik in benas, ma nsaip namouf atoin es in rukin noon. Atoin ruik papa' naan, a'naak rais pirsait Yahudi sin a'naak kou' gwe in ate. 48 Rarit Nai' Yesus na'uab nok tuaf ein re' he nheek Je naan am nak, “On mee? Hi mak Au re' ia, atoin aburarut Kau, oo? Es na' hi iim he mheek Kau meik suni' ma hau tuka'? 49 Neno-neno te, Au unoni' ki a'bi Uisneno In Uim Onen Uuf, mes ka tiit fa tuaf es, re' neem he nheek Kau. Iim he mheek Kau nai! Fin rasi naan matu'i nrair na'ko unu' et Uisneno In Suur Akninu'.”^j

50 Nai' Yesus In atoup noin' ein namtau nmaten. Onaim sin naen nasaitn Ee nmees.

51 Anbi naan, anmui' atoin muinf es, annao natuina' Nai' Yesus. In tainuus tai tuuk es. Atoni mfaun sin he nheek je msa', 52 mes sin nnaa' naan ahaa in tais. Onaim in naen aaf-aaf aah, natuin in namtau nmaet.

53 Rarit sin neik Nai' Yesus annao neu a'naak rais pirsait Yahudi sin a'naak kou' gwe in umi. Anbi naan, kaes kou'n ein nabuan nrarin. Sin aar sin esan re' a'naak rais pirsait Yahudi sin a'naakt ein, tunggur agaam ein, ma atoni mnais harat Yahudi sin.

54 Oras sin nheek neik Nai' Yesus ate, nai' Petrus natuin nok a'kor-koro', tar antea a'naak rais pirsait Yahudi sin a'naak kou' gwe in umi. In ntaam anbi umi naan in kintal, ma in ntook nok apaot ein ma nraar ai.

55 Anbi umi naan in nanan, a'naak rais pirsait Yahudi sin a'naakt ein na'uab ein nok afeek rais pirsait ein. Sin aar sin namin bukti he nasaan Nai' Yesus, fin sin he nhukun na'maet Je. Mes sin ka napenin fa bukti saa'-saa'. 56 Rarit sin no'en saksii namfau, he namouf Nai' Yesus. Mes sin uabk ein nasurin es nok es.

57 Rarit anmui' saksii bian re' anfeen anhaken ma na'uab ein puta-kriu mnak, 58 “Hai mneen atoni' ia na'uab am nak, ‘Au of useer Uim Onen Uuf, re' nafeen ee neik 'nimaf mansian. Ma neno tenu nteni' te, Au ufena ufani' Umi naan, mes ka 'paek fa 'nimaf mansian.’”^k 59 Mes sin uabk ein nasurin es nok es.

60 Rarit a'naak rais pirsait Yahudi sin a'naak kou' gwe nfeen anhaek anbi are' afeek rasin naan sin maatk ein. In nataan Nai' Yesus am nak, “Too mfaun ii natraak Ko. Mes nansaa' am es Ho mtaa' kuum?”

61 Mes Nai' Yesus ka ntoin fa fefa' mese msa'. Onaim a'naak rais pirsait Yahudi sin a'naak kou' gwe nataan Ee mnak, “Ho mutoon miit! In amneon ii, Ho re' ia, batuur-batuur Kristus, Uisneno In Anah re' In nba'an nain Je na'ko un-unu'?”

62 Nai' Yesus nataah am nak, “Namneo! In es re' Au re' ia. Hi aar ki of miit Kau, Mansian Batuur-Batuur re' ia, a'toko 'bi sonaf neno tunan, a'bi Uisneno In abnapan a'ne'u. Uisneno anmui' kuasat ma'tani' nneis! Au of 'ok Ne mnaa' aprenat mibu-bua. Namuni te, Au 'saun 'uum a'bi nope u'ko sonaf neno tunan.”^l

63 Anneen Nai' Yesus In uaban naan ate, a'naak rais pirsait Yahudi sin a'naak kou' gwe natoo' ma'tani', tar antea in npius nakrati' in baru mnanu'. Rarit in nkoa' ma na'uab neu are' afeek raisn ein am nak, “Hit kais taim atteni' saksii! 64 Hi mneen meik hi ruikm ein kiim. In es neikn on na'uab on naan. In nait In tuan ii njair Uisneno in Anah. In na'uab na're'uf Uisneno! Tatuin hit atoran rais pirsait, karu tuaf es nanees on nok Uisneno, in ro he nmaet! Onaim oras ia, hi he mifeek mak saa'?”

Onaim sin nafekan ok-oke' mnak, “Namneo, atoni' ia nsaan! Onaim ro he thukun tiis ne!”^m

65 Rarit tuaf fauk neiki ntaman ma naroon Nai' Yesus. Sin n'aum naan In maatk ein, rarit sin nbeos Gwe. Onaim sin nataan Ee mnak, “Ho mtakseer miit, sekau es re' antuuf ko?” Rarit sin no'en apao Uim Onen Uuf ein, he neem ma neik Nai' Yesus. Oras sin neik Je nnao, sin npaas nafan-fain' Ee.

66-67 Oras naan, nai' Petrus antoko nbi kintal fe'. Rarit aet bifee tuaf es na'ko a'naak rais pirsait Yahudi sin a'naak kou' gwe, neem niit nai' Petrus anraar ai. In nnano' narek-reko' nai' Petrus in human, ma in na'uab am nak, “Fe'e na, ho mubua mok Nai' Yesus, atoin Nasaretas naan. Tebe, oo?”

68 Mes nai' Petrus nataah am nak, “Kaah fa, tua! Nansaa' am es ho mutaan on naan? Au ka uhiin Je fa!” Rarit nai' Petrus anpoi ma nhaek anbi eno' 'kono'. [Nateef oras naan, maun gwe ankokreo'.]ⁿ

69 Rarit ate naan niit anteni' nai' Petrus. Ma in natonan atoni mfaun nbin naan am nak, “In re' ia, tuaf es na'ko sin amsa'.”

70 Mes nai' Petrus anprotees am nak, “Of oni' ho mumaun! Au ka uhiin Je fa!”

Ka 'roo fa te, tua 'teta' es, re' anhake nbi naan na'uab anteni' nai' Petrus am nak, “Hoe! Ho he mputa-kriu mak ho ka mubua mok sin fa! Hi aar ki atoin Galileas!”

71 Mes nai' Petrus anraban ma'tani' am nak, “Au 'suup a'paek Uisneno in kanan! Au ka uhiin fa atoni' naan, tua!”

72 Nateef oras in na'uab on naan ate, maun gwe nkokreo' no nua. Onaim nai' Petrus namnau niit Nai' Yesus In uaban fe'e na nak, “Nahuun na'ko maun ii ankokre'on no nua te, ho musuan Kau era' teun gwen.”

Oras namnau niit on naan ate, nai' Petrus ankae nme'-me'ur.