Usif Yesus In Rais Reko
natuin
nai' Lukas in tuis
Nansaa' am es nai' Lukas antui reta' re' ia?
1
1-3 Aam Teofilusa re' mahormata'.Hoore, tua.
Tuaf amfaun ein ansoba' he ntui nitan reta' anmatoom nok rasin re' anjarin anbin hit sonak ma hit atnanak. Sin ntui rasin naan, anpaken reta' re' napniub on naba-baar aah na'ko kai neu hai nmurai na'ko oras unu', re' hai mihiin main sin na'ko Usif Yesus in tuaf ein re' anpaumaak Ee, ma na'ko tuaf bian amsa' re' nitan nok sin maatk ein kuuk. Are' reet ein naan, batuur-batuur natuin ahaa Uisneno In rais manba'an unu' naan.
Onaim au 'parikas urair sin ntea namtiis, nmurai na'ko rasi naan in uun a'ba'an. Rarit au ufeek he 'tui urek-reko' sin utuin sin a'naok ein. Nok ranan naan, ho bisa muhiin batuur-batuur saa'-saa' re' anjarin nrarin. 4 Ma ho bisa mpirsai mmak, saa' re' tuaf-tuaf sin nareet ein naan, ka rais poi fa. Rasin naan, batuur-batuur anjarin, tua!
Uisneno In ameput sonaf neno tunan, natoon nain rasi anmatoom nok nai' Yohanis Asranit
5 Reta' re' ia in uun a'baa'n ii on nai: oras usif Herodes annaa' aprenat anbi propinsi Yudea, anmui' naan atoin es, kaann ee nai' Sakarias. In re' naan, a'naak rais pirsait Yahudi tuaf es. Ma in imsa' tuaf es na'ko pukan nai' Abia in a'naak pirsait ein. Nai' Sakarias in fee je, es re' bi Elisabet. Bi Elisabet naan na'ko sufa'-ka'uf a'naak pirsait ein amsa', natuin ka'o Musa in tataf nai' Harun in sufan-ka'un.b 6 Sin nua sin nmonin natuin ahaa Uisneno In aprenat ma atoorn ein ok-oke'. Atoni' anhormaat sin imsa'. 7 Ma sin nua sin namnasin nrarin, mes ka nmu'in fa anah, natuin bi Elisabet naan, ankiu.
8 Neot es, nai' Sakarias nok in pukan Abia sin napenin tabu-mainuan he ntaman nmepun nbin Uim Onen Uuf nbin kota Yerusalem. 9 Natuin sin haart ii te, a'naak pirsait ein anheran suur ana', he nahinin nak, sekau es re' anmui' sapaaf he ntaam neu Uim Onen Uuf naan in Ke'en Akninu' nneis-neisi. Anbi naan, tuaf atamas naan ro he nout hau foo meni' anbi Uisneno In human ma In matan. Neno naan, nai' Sakarias es re' anheer naan suur ana' naan. 10 Rarit in ntaam neu Ke'en naan. Oras in nout hau foo meni' nbi Ke'en naan, too mfaun ein an'oen ein anbin kintal naan. 11 Nok askeken ate, Uisneno In ameput es neem na'ko sonaf neno tunan ma nhake nbi bare re' nout hau foo meni' naan in aon bian a'ne'u.
12 Ankius niit on naan ate, nai' Sakarias namtau nmaet, tar antea in ka nahiin fa he nmoe' saa'. 13 Mes ameput sonaf neno tunan naan na'uab am nak, “Sakarias! Kais mumtau! Fin Uisneno anneen anrair ho onen totis. Onaim ho fee jan of nahoni' ri'aan moen jes neu ko. Ho ro he mukaanb ee, nai' Yohanis. 14 Too mfaun ein of anmarinan bu'-bua' nok ki, natuin hi mihoni'. Ri'ana' re' naan, of anharineb ho nekam naan. 15 Uisneno In Asmaan Akniun' ee ankuaas naan ee, nmurai na'ko oras in nbi in ainf ee apun. In ro he nanunin are' kanan mniun mafu. Oras in na'nae neem ate, Uisneno anpaek je njair atoin ko'u.c 16 In of anfuri' too Israelas amfaun he ntebi nfanin natuin sin Usif, es re' Uisneno. 17 In a'mo'en ma taos natai on re' ka'o Elia, Uisneno In mafefa kninu' unu' naan. In neem nahunun hit Usi'. In nabanit mahoint ein he nneek sin aanh ein. Ma tuaf-tuaf re' nkoit Uisneno, in nabanit sin amsa', he sin nabain ein anfain neman, ma natuin Uisneno In romin. Nok ranan naan, in nabarab sin neek ein he ntoup Usi' In amneman.”d
18 Mes nai' Sakarias nataan ameput naan am nak, “Hee'! Naan of anjair on mee? Au 'ok au fee je mimnasi mrair jen! Au 'moe' on mee, he au bisa uhiin 'ak rasin naan of anjarin?”
19 Rarit ameput naan nataah am nak, “On nai! Au re' ia, nai' Gabrial, Uisneno In tua renu'. In neikn On anreun kau he 'uum utoon ko rais reko re' ia.e 20 Mes ho ka mpirsai fa au uabk ein re' ia. Onaim tanar re' ho mtoot je ji, on nai! Ho maam aan of ka nakbero' reko fa karu ho mroim he mu'uab. Onaim ho ka bisa mu'uab fa saa'-saa', nmurai re' oras ia, tar antea hi mihoni' ri'ana' naan. Ho mkius kuum. Saa' re' au u'uab ee re' ia of anjair, nateef nok in oras.”
21 Too mfaun ein re' an'oen ein etan mone'-mainuan, antaka'naan ein, natuin nai' Sakarias ka npoi fa fe'. 22 Oras in npoi neem ate, in ka na'uab nahiin fa saa'-saa'. Rarit in npaek in a'niman he nsenen sin. Onaim sin nahinin nak, Uisneno nakrira' nrair je rais sanmakat es anbi Ke'en Akninu' nneis-neis naan.
23 Sin tabu-mainuan naan oek' ein, onaim nai' Sakarias antebi nfain neu in umi. 24-25 Ka 'roo-'roo fa te, bi Elisabet na'apu'. Onaim in ka npo-poi niit fa na'ko sin umi tar antea funan niim. In na'uab am nak, “Pures-bo'is neu Uisneno! Aijoo! Uisneno nakrira' In nekan arekot neu kau. Karu au upein anah, biak ein ka namae kau fa gwen.”
Ameput Uisneno neem na'ko sonaf neno tunan ma nateef nok bi Maria
26 Oras bi Elisabet in aupn ee naan funan nee te, Uisneno nreek In ameput na'ko sonaf neno tunan nnao neu kuan es et propinsi Galilea. Kuan naan, kaann ee, Nasaret. Ameput naan, kaann ee nai' Gabrial. 27 Anbi kuan Nasaret anmui' ri' feot ao-'temef es, kaann ee bi Maria. Bi Maria anmanaa' nok atoin es, kaann ee nai' Yusuf. Nai' Yusuf re' naan, Usif nai' Daut in sufan-ka'un. On nai te, nai' Gabrial annao ma nateef nok bi noon Maria.f 28 In nakrira' in tuan ee neu bi nona naan am nak, “Hoore, tua! Uisneno anpiir ma nbeit naan ko, he nmoe' naan kuun rais reok gwes neu ko. Uisneno nok ko, Maria.”
29 Anneen on naan ate, bi Maria ntaka'nana', natuin ameput naan in uaban. In ka nahiin fa in a'moufn ii saa'. 30 Onaim ameput naan antuut antein am nak,
“Maria! Kais mumtau.
Fin Uisneno In sairt ii, nakrira' In nekan arekot neu ko.
31 Ka 'roo fa te, ho of mu'apu',
rarit ho of muhoni' maan ri'aan moen jes.
Ho ro he mukaanb Ee, Nai' Yesus.g
32 In of anjair Atoin a'naet.
Uisneno of anteek Ee mnak, ‘In re' naan, Au Aanh aa kuuk.’
Es re', Anah na'ko Uisneno re' A'raat Re'uf.
Uisneno of nanaib Ee he nnaa' aprenat,
nahuum on re' In beif-na'if usif nai' Daut.
33 In of es re' annaa' aprenat piut-piut neu too Israelas sin.h
Ma In aprenat naan nabar-baar.”i
34 Mes bi Maria nataan nai' Gabrial am nak, “Au ka 'tuu-tuup 'iit fa fe' 'ok atoni'! Onaim au he u'apu' on mee?”
35 Rarit nai' Gabrial nataah am nak, “On nai! Uisneno In Asmaan Akniun' ee of neem neu ko. Ma Uisneno A'raat Re'uf In kuasan naan of anniup naan ko. Nok ranan naan, Ri'ana' re' of ho muhoni' maan Ee naan, kninu' batuur-batuur, natuin In re' naan, Uisneno In Anah.
36 Kais amsanmaak! Ho nonot-asar es, kaann ee bi Elisabet, na'apu' nrari msa'. Te kaah, in namnasi nrair. Onaim biak ein nak, in ka bisa nahoni' fa. Mes oras ia, in na'apu' funan nee jen. 37 Anbi Uisneno te, saa'-saa' ii bisa njair!”j
38 Rarit bi Maria nataah am nak, “Reko, tua. Au re' ia Uisneno in ate kau, tua. Maut he are' saa'-saa' naan najairb ok natuin ho uabam naan. Au ubarab au tuak ii, he utuin ahaa Uisneno in romin, tua.”
Rarit ameput sonaf neno tunan naan, nasaitan bi Maria.
Bi Maria nnao nmakius bi Elisabet
39-40 Ankoon neno fauk ate, bi Maria naen rabah na'ko Nasaret neu nai' Sakarias in kuan et a'toe'f ein propinsi Yudea. Antea nee te, in ntaam neu nai' Sakarias in umi. Onaim in nasee ma ntaeb bi Elisabet.
41 Oras bi Elisabet anneen bi Maria in haan buseet naan, ri'ana' re' et bi Elisabet in aupn ee, natiik. Ma Uisneno In Asmaan Akniun' ee neem ma ntaam neu bi Elisabet in tuan. 42 Rarit in na'uab naher-heer am nak, “Maria! Mansian ein of nait na'ratan ho kanam naan, anneis na'ko are' kanan bifee pah-pinan ia! Sin of nait na'ratan Ri'ana' re' et ho aupm aan! 43 Au tuak ii msa' nanaib on, natuin au Usi' In ainf ii neem nateef nok kau. 44 Ho maan musee te, ri'ana' re' au u'aup ee ia, natiik, natuin in nmariin. 45 Uisneno nakrira' nrair In nekan arekot neu ko, natuin ho mpirsai mmak, In nroim he nmoe' natuin In rais manba'an.”
Bi Maria anpures ma nbo'is Uisneno
46 Bi Maria nmurai na'uab am nak,
“Na'ko au nekak nanan ia,
au 'tuna' u'ratan Uisneno!
47 Au neek ii nmariin,
natuin Uisneno nsoi nafetin naan kau!
48 In nkius ma ntae narek-reko' nrair kau,
In aan renu'-aan reka' re' ka ma'osa' fa ia.
Anmurai oras ia, are' mansian ein of na'uab ein ma nteek kau,
bifee re' n'ua reok re'uf kau,k
49 natuin Uisneno nmoe' rais sanmakat huma'-huma' neu kau.
In imsa', Akuaas Re'uf ma Kniun Re'uf.
50 Uisneno nakrira' ma natoon rais kasian neu are' too mfaun re' anhormaat ma na'bees neu Ne,
na'ko batan neu batan.
51 In npaek In kuasan,
he ntaisibub tuaf-tuaf re' na'naeb ma naikas sin tuak ein.
52 In namouf tuaf-tuaf re' anna'an kuasa,
natuin sin nabe'on ma npaas ok.
Mes In nanaib tuaf-tuaf re' neek ein ma'nura' ma ba-baun ein.l
53 In nhao ma nfait amnaahs ein tar antea namsenan,
mes In nriu' napoitan atoin amui't ein,
he sin npoin naon, ka npooh neikin fa saa'-saa'.
54 In nturun ma nbaab In too Israelas sin,
ma nakrira' In rais kasian neu sin piut-piut.
55 Unu' te, In nahake' rais manba'an nok hit be'i-na'i sin,
es re', ka'o Abraham ma in sufan-kau'n ein ok-oke'.
Oras ia, rais manba'an naan nmafutu' ma nhaek nabar-baar.”m
56 Na'uab anrair on naan ate, bi Maria natua nok bi Elisabet funan teun fe'. Rarit na' in nfain neu kuan Nasaret.
Bi Elisabet nahoni' nai' Yohanis
57 Antea in oors aa on naan ate, bi Elisabet nahoni' naan ri'aan moen jes. 58 Rasi naan nasiin on ma nabeon on neu in nonot-asar ma kuan naan in nanan, nak Uisneno nakrira' nrair In nekan arekot neu bi Elisabet, es naan ate In nfee ne ri'ana'. Onaim sin ar-arsin anmarinan amsa'.
59 Ri'ana' naan anmoin naan neno fanu te, sin na'heir ee natuin atoran harat atoin Yahudis. Sin he nakanab ri'ana' naan, nai' Sakarias, on re' in aamf ee kanan.n 60 Mes in ainf ee npeen mates nak, “Ka on fa naan, tua! In kaann ee, ro he nai' Yohanis!”
61 Mes sin nataah ee mnak, “Nansaa' am es ho mpiir kanaf Yohanis? Ka tiit tain fa tuaf es na'ko hi nonot-asar re' anpaek kanaf naan!” 62 Onaim sin nsenen nai' Sakarias he nahiin in romin, he nakanab ri'ana' naan nak sekau.
63 Nai' Sakarias ansenen sin he ntoit hau bena' he ntui. Rarit sin nnoon ee hau bena'. Onaim in ntui mnak, “In kaann ee nai' Yohanis!” Onaim too mfaun ein ansanmakan ok-oke'.
64 Nok askeken ate, nai' Sakarias in maan amates naan nakbero'. Onaim in nsii ma nbo'is na'naeb Uisneno. 65 Tuaf-tuaf re' natuan nbin bare naan, ansanmakan ma namtaun amsa'. Onaim rasi naan nasiin on ma nabeon on na'ko tuaf neu tuaf, tar antea abitan propinsi Yudea re' natuan etan a'toe'f ein nahinin ok-oke'. 66 Are' aneen rasi naan nateenb ein nak, “Naan batuur een, Uisneno In kuasan nok ri'ana' naan. In of na'nae neem ate, in taos-mo'et on re' mee?”
Nai' Sakarias anpures ma nbo'is Uisneno
67 Rarit Uisneno In Asmaan Akniun' ee neem ma ntaam nbi nai' Sakarias in tuan. Onaim in na'uab am nak,
68 “Pures-bo'is neu Uisneno, too Israelas sin Usif!
Natuin In nkoen On neem he nsoi naan In tuaf ein,
maut he sin kais on re' ate.
69 Uisneno nait ma nanaib Tuaf es, re' In kuaasn ee ma'tani',
he nsoi nafetin kit.
In re' naan, usif nai' Daut in sufan-ka'un.
70 Uisneno nba'an nain rasi ia na'ko afi unu',
anpaek In mafeef akniun' ein re' na'ki'in neu Ne.
71 Oras ia, In he nsoi nafetin kit,
na'ko hit muusn ein,
ma na'ko tuaf-tuaf re' sin neek ein namenan neu kit.
72-73 In nakrira' In nekan arekot neu hit be'i-na'i sin,
natuin In namnau piut-piut neu In rais manba'an nok sin,
re' In nfuut ma nahaek ee nok ka'o Abraham.
74 In nsoi nafetin anrair kit na'ko hit muusn ein,
he hit bisa ta'ruri' ma ta'bees teu Ne,
ma kais tamtau ttein.
75 In nsoi nafetin kit,
he hit bisa tmoni kninu' ma mne'o piut-piut atbi In human ma In matan.
76 Yohanis! Ho re' ia, au aan hoin aa, ko.
Tuaf of nahiin ko nak, ho re' ia, Uisneno A'raat Re'uf In mafefa kninu'.
Ho of amnao ma mutoon meu too mfaun ein,
he sin npira' ma nnona' sin a'niimk ein he ntoup Usi' In amneman.o
77 Ho of amnao mukrira' ma mutoon ranan meu Uisneno Iin na,
he sin nahinin nak, sin napenin saok sanat ma 'honis,
natuin Uisneno nnoes ma nporin nain sin saant am penu sin.
78-79 Natuin Uisneno neekn ee ma'nura' ma n'oeteen neu kit,
etun In nfee kit oras ma eti mainuan fe'u,
nahuum on re' maan asaet-apisar re' neik me'u ma piin fe'u.
Hit re' abitan metan-meis'okan in nanan,
ma hit re' amtaus rais nitu-'maten kit,
natuin hit ka taraem ok fa fe' tok Uisneno,
of hit tapein paku ma me'u he nnao naat kit teu raan mamut ma rame'.”p
80 Nai' Sakarias nbo'is anrair Uisneno. Onaim nai' Yohanis nmurai na'nae piut. Uisneno In Asmaan Akniun' ee nha'tain je piut. In na'nae neem on naan ate, in nnao natua nbi baer ruman na'roo na'ko kuan, tar antea oras in nmurai nait in mepu neu too Israelas sin.