3 Neno naan, a'naak pirsait Yahudi sin a'naakt ein, ma atoni mnais haart ein nabuan nbin nai' Kayafas in umi. Nai' Kayafas naan, es re' a'naak pirsait Yahudi sin a'naak ko'u. 4 Sin namin ranan he nheek Nai' Yesus amninu'-mninu', he na'maet Je. 5 Mes sin n'ator asraak am nak, “Amtahan fe'! Hit kais atmanaap he theek Je, natuin neon ko'u gwe npaumaak een. Kais-kaisa' too mfaun ein re' anroim Je, napoit ein taisibu.”

6 Anbi kuan Betania, anmui' tuaf es, kaann ee nai' Simon. Unu' te, atoni' nmai'niis ne, natuin in nameen meen nui-atroki'. Mes oras ia, in nareko nrair. Oras neon ko'u naan ka ntea fa fe', Nai' Yesus sin annaon nbukaen nbin nai' Simon in umi. 7 Oras sin anbukaen ate, anmui' bifee jes neem nateef nok Nai' Yesus. In nnaa' bootr es, re' anmoo' je na'ko faut ma'osa'.^b Botor naan narai miin foo meni' re' ma'oos re'uf. Rarit bifee naan ntuut nareu' bootr ee toben. Onaim in n'oop mina' naan akre'o-kre'o neu Nai' Yesus In a'nakan, he njair tanar am nak, in nhormaat Nai' Yesus.

8 Mes oras Nai' Yesus In atoup noin' ein ankius bifee naan anmoe' on naan ate, sin nato'on ma na'uab ein am nak, “Hoe! In kais anporin miin foo meni' re' ma'oos re'uf ia! 9 Reko nneis in na'sosa' miin foo meni' ia, maut he in roit ein, in nfee sin neun ama'mui't ein!”

10 Mes Nai' Yesus nahiin sin teenb ein naan, onaim In na'uab am nak, “Hi kais misusab bifee ia! Maut he in nmoe' on re' naan! Au 'mariin, natuin in n'oop miin foo meni' ia neu Au aok ii. 11 Ama'mui't ein et hi sonam ma hi tnanam piut-piut. Mes ka 'roo fa te, Au re' ia, ka ubua 'ok ki fa heen.^c 12 Nok ranan re' bifee ia na'peeh Kau npaek miin foo meni' re' ia, in nabarab anrair Au aok ii, he nkaki' nain fubona' neu Au aok amates. Fin Au 'moink ii ka 'roo fa heen. 13 Mimnau mirek-reko', joo! Anbi bare mee-mee jah, oras Uisneno In Rais Reko nanaob on anfuun am nateef anbi pah-pinan ia, sin of nareta' anmatoom nok bifee re' ia in arekon! Maut he mansian ii ok-oke' namnau gwe.”

14 Anmui' tuaf es na'ko Nai' Yesus In atoup noni' tuaf bo'es am nua' ein re' naan, kaann ee nai' Judas Iskariot. Neno naan, in anpoi nnao naim a'naak pirsait Yahudi sin a'naakt ein, he nnona' Nai' Yesus neu sin. 15 Antea on naan ate, in nataan am nak, “Sin ama' aar ki! Karu au 'turun ki he hi mheek Nai' Yesus naan, hi mfee kau saa'?”

Onaim sin natahan am nak, “Karu ho mroim he mu'sosa' Nai' Yesus meu kai te, hai mbaen.” Rarit sin nso'in roi muti' fua bo' teun ma nnona' sin neun nai' Judas.^d 16 Rarit nai' Judas anpoi, onaim in naim ranan he nnona' Nai' Yesus neu sin.

17 Toon bani' toon, atoin Yahudis sin anmui' neon ko'u re' a'roon ii neno hiut. Sin nteek neon ko'u naan nak, ‘Fesat Utunu' ka Mamuur fa’.^e Oras fesat naan he nmurai jen, Nai' Yesus In atoup noin' ein neman ma nataan Ee mnak, “Aam! Mabe' ia, hit ro he tmurai tanaob hit neon ko'un ia. Onaim Ho mroim he hai mroro 'bib-kase ma mibarab baer fesat Paska on mee, tua?”

18 Rarit In nataah am nak, “Hi mtaam meu kota, hi of miteef mok atoin es. Mitoon ee mak on nai, ‘Ba'e! Hai Aam Tungguru annaben neu ka 'roo fa ntein ate In he nmaet jen. Onaim In ntoit bare nbi ho umi, he In npaek je he ntao fesat Paska nok In atoup noin' ein.’”

19 Annenan on naan ate, In atoup noin' ein annaon nmo'en natuin In uaban naan. Rarit sin nabaarb ein bukae fesat Paska nbin naan.

20 Oras fai te, Nai' Yesus nok In atoup noni' tuaf bo'es am nua' ein naan antokon ma nbukaen fesat. 21 Oras sin nbukaen, In na'uab am nak, “Hi mneen, oo! Anmui' tuaf es na'ko ki, of es re' na'sosa' Kau neu biak ein.”

22 Annenan on naan ate, sin neek ein ka ntainiin ein fa. Onaim sin es-es ate nataan kuun Nai' Yesus am nak, “Tuaf re' Ho mu'uab ee naan, ka au fa, oo?”

23 Onaim In nataah am nak, “Tuaf re' narepa' utunu' nbi 'pik-oef nok Kau, in es re' na'sosa' Kau.^f 24 Mimnau! Au, Mansian Batuur-Batuur re' ia, ro he 'maet on re' sin ntui nain je nbi Uisneno In Suur Akninu'. Mes mikeo! Tuaf re' na'sosa' Kau naan, in of nasaah kuun in siraak! Reko nneis in ainf ee kais nahoins ee!”

25 Rarit nai' Judas nataan amsa' am nak, “Tuaf re' Ho mu'uab ee naan, ka au fa, oo?”

Onaim Nai' Yesus nataah am nak, “Ho kuum es mu'uab on naan. He sekau ntein?”

26 Oras sin nbukaen fe', Nai' Yesus nait utunu' fua' es, ma ntoit makasi neu Uisneno. Rarit In nteib utunu' naan, ma nnona' neu In atoup noin' ein, ma na'uab am nak, “Utunu' re' ia, Au aok. Mait he mbukae nai, tua!”

27 Rarit In nait ikraas es naheun nok tua min-kase, ma ntoit makasi neu Uisneno. Rarit In nnona' neu In atoup noin' ein, ma na'uab am nak, “Hi aar ki mait he mbukae nai, tua. 28 Fin tua min-kase ia, Au naa'. Au of a'maet, Au naa' ii nat'oop ma nsai he nsoi naan too mfaun ein sin saant ein. Naa' re' ia njair tanar he mimnau mak, saa' re' Uisneno nba'an anrair je, oras ia njair teb-tebe. Mait he mbukae nai, tua!^g 29 Mes amneen mirek-reko'! Anmurai na'ko mabe' ia, Au ka 'inu 'tein fa tua min-kase. Of oras Au 'ok Au Ama' mtook ma mnaa' aprenat ambi sonaf neno tunan, na' Au 'bukae 'tein 'ok ki.”

30 Rarit sin nsiin siit es he npures ma nbo'is Uisneno. Rarit mabe' naan amsa', sin anpoi nnaon neun a'to'ef Saitun.

31 Oras sin annaon ate, Nai' Yesus natoon nain In atoup noin' ein am nak, “Mabe' ia, hi aar ki of maen misaitan Kau. Fin matu'i nain et Uisneno In Suur Akninu' mnak,

32 Au 'maet batuur. Mes oras Au 'moni 'fain, Au 'nao uhunun ki 'eu propinsi Galilea.”ⁱ

33 Mes nai' Petrus anprotees am nak, “Aam! Maski tuaf bian naen nasaitan Ko, mes au kaah fa, tua!”

34 Onaim Nai' Yesus nataah am nak, “Tebe, oo, Pe'u? Ampirsai Kau! Mabe' ia, maun gwe ka nkokreo' fa fe'e te, ho musuan Kau no teun gwen mak, ho ka muhiin Kau fa!”

35 Mes nai' Petrus naheer am nak, “Kaah fa, tua! Karu Ho mmaet, au 'maet 'ok Ko msa'. Fin au ka 'eu fa he 'aen usaitan Ko, tua!” Nai' Petrus in partein nggwin na'uab ein on re' naan amsa'.

36 Rarit Nai' Yesus sin annao nkonon neun a'to'ef Saitun, antean nbin po'on es, kaann ee Getsemani.^j Anbi naan In natoon neu In atoup noin' ein am nak, “Hi mtook mtahan ambi ia, Au he 'nao 'onen 'eu re' nee.” 37 Mes In nhaman neik nai' Petrus, nai' Yakobus, ma nai' Yohanis, he sin teun sin nok Ne. Anmurai na'ko oras naan, In neekn ee nsuus ma ka ntainina' fa. 38 Sin fe' nnao naan a'kre'o, In na'uab neu sin im nak, “Au neek ii nsuus anmaet! Au 'naben ate on re' he 'maet een. Hi mtook ma mpao mok Kau mbi re' ia fe'.”

39 Rarit In nnao na'roo kre'o, onaim In nri'tuu ma n'onen am nak, “Aam Honi'! Karu Ho mromi te, Au kais usaah ma'ne'at re' ia. Mes kais mutuin Au romik, maut he mutuin Ho roim aan kuum, tua.”

40 An'onen anrair on naan ate, In nnao nfain neu In atoup noni' tua teun ein naan. Mes sin ntupan nfinin. Rarit In npoo' nafena' sin, ma In na'uab nok nai' Petrus am nak, “Hae Pe'u! Hi mtuup neu saa'? Au 'bi nee rabah, mes hi ka bisa fa he mpao kre'o msa'! 41 Mimeu maatm ein naan fe'. Rarit amfeen he mpao mok Kau! Fin hi neekm ein amroim he mmoe' rais reko, mes hi aom ein an'oren. Onaim reko nneis hi m'onen, he karu mipein furit ate, hi bisa maran ma mtahan.”

42 Rarit In nnao n'onen antein am nak, “Usi'! Karu ro Au es re' he usaah ma'ne'at ia, maut he mutuin Ho roim aan kuum, tua.” 43 An'onen anrair on naan ate, In ntebi nfain neu In atoup noni' tua teun ein naan. Mes sin ntupan nfanin, natuin sin maatk ein ma'feen ein.

44 Rarit In nfain he n'onen antein no gwes. In ntoti ntein neu In Amaf, he kais nasaah ma'ne'at naan, mes maut he natuin In Aamf ee In romin. 45 An'onen anrair on naan ate, In ntebi nfain he npoo' nafena' In atoup noin' ein. In na'uab am nak, “Hi mtuup kiim fe'e, oo? Amfeen nai! Natuin tuaf re' he na'sosa' Kau, Mansian Batuur-Batuur re' ia, anpaumaak een. Oras re' ia, sin he nheek Kau gwen, he nnona' Kau neu atoin maufiun ein. 46 Amfeen nai! Amfei maatm ein he mkius meu nee! Tuaf re' na'sosa' Kau naan, neem een.”

47 Oras Nai' Yesus na'uab on naan fe'e te, nai' Judas neem nok too mfaun ein. Sin neman neikin suni' ma hau tuka' he nheek Ee. Sin nmo'en on naan, natuin prenat na'ko a'naak pirsait Yahudi sin a'naakt ein ma atoni mnais haart ein. 48 Nai' Judas ansenen nain sin im nak, “Amkius mirek-reko', oo! Tuaf re' au 'hoo ma 'neek Ee naan, hi mheek Je nai! Fin tuaf re' naan, es re' tuaf re' hi mam-mami.”

49 Oras sin antean Nai' Yesus, nai' Judas nnao nhake nbi Nai' Yesus In matan am nak, “Saloom, Aam Tungguru!” Onaim nai' Judas anhoo ma nneek Ee.

50 Rarit Nai' Yesus nataan ee mnak, “Hae, Judas! Ho uum re' ia, meik sairt ii es re' ia, oo?” Onaim too mfaun ein naan neman, he nheek Nai' Yesus.

51 Mes nok askeken, Nai' Yesus In tuaf es anfaik benas, ma nsaip namouf atoin es in rukin noon es. (Atoni' naan, es re' pirsait Yahudi sin a'naak kou' gwe in ate.) 52 Ankius on naan ate, Nai' Yesus natoon ee mnak, “Mu'taap mufani' ho benas naan. Fin tuaf re' nmoni nbi 'bae suni', in of anmaet nok suni'. 53 Ho ka muhiin fa, oo? Au bisa 'toit Au Ama' he nreek In ameupt ein nifun-nifun^k na'kon sonaf neno tunan, he neman nturun Kau. 54 Mes noo gwah nai. Anbain he tuaf ein re' ia nheek Kau. Natuin saa' re' matu'i nain et Uisneno In Suur Akninu' nmatoom nok Kau naan, ro he njarin.”

55 Rarit Nai' Yesus na'uab neu too mfaun ein re' neman nheek Je mnak, “Hi mitenab mak, Au re' ia atoin maufinu, oo? Nansaa' am es hi iim amheek Kau meik suni' ma hau tuka'? Te kaah, neno-neno te Au unoni' ki 'bi Uim Onen Uuf, mes ka tiit fa tuaf es, he nmoe' saa'-saa' neu Kau.^l 56 Mes anbain nai! Iim amheek Kau nai! Natuin re' ia matu'i nain na'ko unu' et Uisneno In Suur Akninu'.”

Ankisun on naan ate, Nai' Yesus In atoup noin' ein namtau nmaten. Onaim sin naenan ma nasaitan Nai' Yesus.

57 Rarit tuaf ein re' nheek Nai' Yesus, sin neik Je neu a'naak pirsait Yahudis sin a'naak ko'u, nai' Kayafas in umi, natuin a'naakt ein nabuan nbin naan. Abuat ein naan, sin esan re': a'naak pirsait Yahudi sin a'naakt ein, tunggur agaam ein, atoni mnais haart ein. 58 Oras sin neik Je te, nai' Petrus nnao na'kor-koro' nbi sin koitk ein, antea a'naak kou' gwe in umi. Nai' Petrus antaam nok anbi kintal amsa' he ntook nabua nok tuaf ein abitan naan. Fin in he nahiin saa' re' of he njair. 59 Anbi umi naan in nanan a'naak pirsait Yahudi sin a'naakt ein na'uab ein nok tuaf ein re' afeek rais pirsait. Sin namin bukti he napenin ranan he nafeek hukun a'maten neu Nai' Yesus. 60 Maski sin nataman saksii poi mfaun, mes sin ka napenin fa bukti saa'-saa' he npaek sin. Namuni te, sin napenin saksii tuaf nua. 61 Tua nua' ein naan ansaksii am nak, “Hai mneen miit Atoni' ia na'uab am nak, ‘Au of useer Uim Onen Uuf. Mes Au of ufena' ufani' Umi naan neno teun gwah.’”^m

62 Rarit a'naak pirsait Yahudis sin a'naak kou' gwe nfeen anhake nbi too mfaun ein sin maatk ein re' ntokon nbin naan. Onaim in nataan Nai' Yesus am nak, “Ho mneen amrair too mfaun ein nakuu Ko. Mes nansaa' am es Ho mninu'-mninu'?” 63 Mes Nai' Yesus ka nataah fa saa'-saa'. Onaim a'naak kou' gwe nataan antein am nak, “Au he utaan Ko! Mes Ho ro he mutaah batuur-batuur, nahuum on re' Ho mutaah meu Uisneno re' nmoin et sonaf neno tunan. Anmui' tuaf nak, Ho re' ia, Kristus, Uisneno In Anah re' In nba'an nain Je na'ko unu'. Batuur, aa oo?”

64 Rarit Nai' Yesus nataah am nak, “Batuur, on re' ho mu'uab naan. Mes, mimnau! Hi ar-arki of miit Kau, Mansian Batuur-Batuur re' ia. Au of a'toko 'bi sonaf neno tunan 'bi Uisneno In abnapan a'ne'u, he 'naa' aprenat 'ok Ne re' akuaas re'uf. Rarit Au 'sanu 'fain 'uum a'bi nope.”ⁿ

65 Anneen Nai' Yesus na'uab on naan ate, a'naak kou' gwe natoo' ma'tani', tar antea in npius nakrati' in baru mnanu'. Rarit in nkoa' ma natoon neu atooks ein naan ok-oke' mnak, “Hit ka tperluu fa saksii ttein! Hi mneen kiim meik hi rukim, In uab naan. In nanaib kuun In tuan anjair Uisneno In Anah. Re' ia rasi m'akan! Hi mihiin ok-oke' mak, tatuin hit atoran pirsait, karu atoni' nataib on, on re' Uisneno, atoni' naan ro he nmaet! 66 Onaim oras ia, hi he mifeek mak saa'?”

Onaim sin nsakanan ok-oke' mnak, “Batuur atoni' ia nsaan! Onaim In ro he napein hukun a'maten!”^o

67 Rarit tuaf fauk antaman ma naroon Nai' Yesus. Sin nbeos Gwe ma npaas Ee msa'.^p 68 Rarit sin nakree't Ee mnak, “Hoe! Ho re' ia Kristus, aa oo? Ho mteek miit! Sekau es antuuf Ko re' ia?”

69 Oras naan, nai' Petrus antoko nbi kintal fe'. Rarit anmui' bifee ate es, neem na'uab nok nai' Petrus am nak, “Fe'e na, ho uum mok Nai' Yesus, atoin Nasaretas naan, ai'?”

70 Mes in nprotees anbi too mfaun ein sin maatk ein am nak, “Kaah fa, tua! Nansaa' am es ho mutaan on naan! Au ka uhiin Je fa.” 71 Rarit nai' Petrus anpoi nhake nbi eno' 'tamas.

Onaim anmui' bifee jes anteni' re' nkius niit ee nbi naan. In natoon neu atoin ein re' nbin naan am nak, “Au 'iit atoni' ia nok Nai' Yesus, atoin Nasaretas naan.”

72 Onaim nai' Petrus anprotees am nak, “Ho mumaunu, oo! Au ka uhiin fa atoni' naan! Au 'suup!”

73 Ka 'roo fa te, tuaf bian sin re' ntokon nbin naan na'uab antein' ein neu ne, mnak “Hae! Ho kais mupoi kai mak, ho ka mok fa Atoni' naan! Fin hai mneen ho mu'uab ate, huma' mese on re' atoin Galileas sin!”

74 Mes in nmurai naseku', onaim in anraban am nak, “Hoe! Au 'suup a'paek Uisneno In kanan! Au ka uhiin fa Atoni' naan!” Nateef in na'uab on naan ate, maun gwe nkokreo'.

75 Anneen maun gwe nkokreo', nai' Petrus namnau Nai' Yesus In uaban fe'e na, re' nak, “Maun gwe ka nkokreo' fa fe'e te, ho musuan amrair Kau no teun gwen am mak, ho ka muhiin Kau fa.” Namnau niit on naan ate, in naen anpoi ma nkae npin-pinus.