Usif Yesus an'onen neu In tuan ee kuun
17
1-2 Nai' Yesus na'uab anrair on naan ate, In nkisu n'ain neon gwe tnanan, rarit an'onen, am nak:“Aam Honi'. Au oors ii antea gwen, he Ho mait mu'rat-ratan Kau. Au re' ia, Ho Anah. Ho mfee mrair Kau hak he 'ator mansian pah-pinan ia ok-oke'. Ho mfee hak naan, maut he Au 'fee 'monit re' amneot ma amnonot re' ka natfeek niit fa, neu are' tuaf re' Ho mnona' ma mfee sin anjarin Au nggwin. Onaim oras ia, Au 'toit he Ho mait mu'rat-ratan Kau, maut he Au bisa ururu' ma ukrira' Ho pinam ma kraham. 3 In ranan re' he tuaf napeni 'monit re' amneot ma amnonot re' nabar-baar naan, on nai: tuaf ro he nahiin Au Ama', es re' Uisneno re' batuur. Ka nmui' fa es ntein. Sin ro he nahiin Kau msa', es re' Yesus Kristus, re' Ho mhaefan amrair Je, he neem neu pah-pinan ia. 4 Au ururu' ma ukrira' 'rair Ho pinam ma kraham a'bi pah-pinan ia. Au unaob a'rair mepu re' Ho mfee Kau gwe. 5 Unu' te, oras Hit ka tmoe' pah-pinan ia fa fe', Au ubu-bua 'ok Ko, tua. Oras naan, Au pinak ma krahak nahuum on re' Ho pinam ma kraham. Oras ia, Au he 'fain 'eit 'eu Ko. Onaim Au 'toit he Ho mait mu'rat-ratan Kau, maut he Au pinak ma krahak anfain on re' unu' naan, tua.”
Usif Yesus an'onen anteek In atoup noin' ein [/s2]
6 Nai' Yesus antuut In onen am nak, “Aam Honi'. Ho mfee mrair mansian pah-pinan ia he njarin Au nggwin. Au unoni' 'rair sin, he sin nahiin Ko, tua. Sin njarin Ho nggwin na, rarit Ho mnona' sin he njarin Au nggwin amsa'. Rarit sin nmoe' natuin Ho Kabin ma Prenat. 7 Oras ia sin nahinin nak, are' rasi re' Ho mnona' ma mfee Kau sin re' naan, sin na'uun am na'ba'an na'kon Ko, tua. 8 Fin Au unoni' sin, Kabin ma Prenat ok-oke' re' Aam mutoon miit Kau sin. Sin ntoup Kabin ma Preent ein naan amsa'. Sin nahinin imsa' am nak, Au 'uum u'ko Ko, tua. Ma sin npirsain nak, Ho es re' amhaefan Kau 'uum a'bi pah-pinan ia.
9 Au 'onen ma 'teek sin. Au ka 'onen ma 'teek 'fa mansian ii aar sin abitan pah-pinan ia. Mes Au 'onen ma 'teek 'eu tuaf re' Ho mnona' ma mfee mrair sin meu Kau, fin sin re' naan Ho nggwin, tua. 10 Fin are' saa' ii ok-oke' re' njarin Au nggwin, anjair Ho nggwin amsa'. Ma are' saa' ii ok-oke' re' njarin Ho nggwin, anjarin Au nggwin amsa'. Rarit Au nggwin naan, esan re' nait na'rat-ratan Kau. 11 Au ka utua u'baar a'tein fa 'bi pah-pinan ia, natuin ka 'roo fa ntein ate, Au he 'fain 'eit 'eu Ko. Mes atoin ein re' ia, ro he natua nabaran nbin pah-pinan ia. Aam, Ho kninu' teeb. Onaim Au 'toit he Ho mpafa' ma mpanat sin, ampaek Ho kuasam re' Ho mfee mrair je meu Kau. Au 'toti msa' he sin nmafutun njarin mese', on re' Au 'mafutu 'jair mese' 'ok Ko, tua. 12 Oras Au 'bi pah-pinan ia 'ok sin, Au 'pijaar sin natuin sin njarin Ho nggwin een. Au 'panat urek-reko' sin, maut he sin anmafutun piut nok Ko, tua. Ka tiit fa tuaf es, re' namneuk. Suma nai' Judas kuun es re' napasib in tuan, natuin saa' re' Ho Suur Akninu' ntui nain je na'ko unu'.a
13 Oras ia, Au he 'fain 'eit 'eu Ko, tua. Au utoon rasin ia oras Au fe'e 'bi pah-pinan ia. Nok ranan naan, Au nggwin sin neek ein bisa nmarinan piut, on re' Au neek ii nmariin. 14 Au utoon a'rair Ho Kabin ma Preent ein 'eu sin. Atoni' bian na'kon pah-pinan ia nsaken Au nggwin, natuin Au nggwin ka nmonin fa huma' mese' on re' sin. Au on naan amsa', fin Au ka 'moin fa on re' biak ein anbin pah-pinan ia. 15 Karu Au 'onen, Au ka 'toit fa he Ho mfaki mporin sin na'kon pah-pinan ia. Kaah fa, tua! Mes Au 'toit he Ho mpafa' ma mpanat sin, he sin na'roon na'kon maufinu. 16 Sin ka huma' mese' fa on re' biak ein re' na'kon pah-pinan ia, on re' Au msa' ka huma' mese' fa 'ok biak ein re' na'kon pah-pinan ia.
17 Ampaek rasi re' amneot ma amnonot he mmoe' sin neek ein kniun' ein. Fin Ho Kabin ma Prenat, ro batuur. 18 Ho es re' amhaefan Kau 'uum a'bi pah-pinan ia. Rarit Au 'haefan sin on naan amsa', maut he sin nmonin narisin nbin pah-pinan ia in a'tnaank ein. 19 Au 'panat Au tuak ii he kninu' piut 'eu Ko, tua. On naan amsa', Au nggwin anpanat sin tuak ein amsa', he kniun' ein piut neu Ko, tua. Fin Ho Kabin ma Prenat re' batuur, es re' anmoe' sin he nnona' ma nfee sin tuak ein a'teme-'teme neu Ko, tua.”
Usif Yesus an'onen ma nteek atoin apirsait ein aar sin [/s2]
20 Nai' Yesus antuut In onen am nak, “Aam Honi'. Au 'onen ma 'teek ka 'eu fa sin re' suma et oras ia gwah. Mes Au 'onen ma 'teek amsa' 'eu tuaf re' of anpirsai Kau, natuin tuaf ein ia sin uabk ein.
21 Au 'toit he sin aar sin bisa nmafutun njarin mese', on re' Hit tmafutu tjair mese'. Au 'roim he sin nmafutun njarin mese' nok Kit, maut he biak ein na'kon pah-pinan ia bisa npirsain nak, Ho kuum es re' amhaefan Kau. 22 Ho mururu' ma mukrira' mrair Au pinak ma krahak meu mansian ein. Rarit Au 'aikas u'rat-ratan a'rair sin, on re' Au. Nok ranan naan, sin nmafutun njarin mese', on re' Hit tmafutu tjair mese' msa'. 23 Au 'mafuut 'ok sin. Ho mmafuut mok Kau msa'. Sin ro he nmafutun njarin mese' on re' naan, tar antea sin nmonin nekaf mese' batuur. Fin karu sin nmonin nekaf mese' on re' naan, biak ein na'kon pah-pinan ia nahinin nak, Ho mneek sin, on re' Ho mneek Kau, tua. Nok ranan naan, sin nahinin amsa' nak, Ho es re' amhaefan Kau, tua.
24 Aam Honi'. Au 'roim he mansian ii aar sin re' Ho mnona' ma mfee Kau sin re' naan, nabu-buan nok Kau. Fin Au 'roim he sin bisa nkius niit nak, Ho maikas mu'rat-ratan Kau. Fin Ho mneek main Kau, oras Hit ka tmoe' pah-pinan ia fa fe'.
25 Aam Honi'. Ho neek amneot am amnonot Ko, tua. Mes mansian abitan pah-pinan ia ka nahiin Ko fa, tua. Ma Au nggwin nahinin amsa' nak, Ho es re' amhaefan Kau 'uum a'bi pah-pinan ia. 26 Au utoon a'rair sin 'ak, Ho re' naan, Sekau. Ma Au of utoon 'eu sin piut on re' naan, natuin Au 'roim he sin bisa nnaben batuur Ho manekam. Fin manekat re' sin nnaben naan ee ji, huma' mese' on re' Ho manekam re' Ho mfee je meu Kau. Maut he Au 'mafuut piut 'ok sin, tua.”