Sin neik Usif Yesus annaon neu gubernur Pilatus
23
Mes, a'aa' rais pirsait Yahudi sin ka nmu'in fa hak he nhukun na'maet atoni'. Es naan ate, sin neik Nai' Yesus an'ain gubernur na'ko prenat pah Roma anbi naan, es re' nai' Pilatus. Sin nromin he gubernur ee nhuukn Ee. 2 Onaim antean gubernur ee in matan, sin nteek Nai' Yesus In saant ein am nak, “Atoni' re' ia, anraban anaa' aprenat Roma. In nanoni' mnak, kais ambaen beo neu prenat. Ma In nanaib in tuan nak, Kristus, atoin Yahudis sin usif.”3 Anneen on naan ate, gubernur ee nataan Nai' Yesus am nak, “Batuur, aa oo? Ho re' ia atoin Yahudis sin uisf, aa oo?”
Onaim Nai' Yesus nataah am nak, “Batuur. On re' ho mu'uab ee naan.”
4 Anparikas anrair Je on naan ate, gubernur ee nait matan ma na'uab neu a'naak rais pirsait Yahudi sin a'naakt ein ma too mfaun ein. Rarit na'uab am nak, “On nai! Au ka 'tae 'iit fa Atoni' ia In sanat kre'-re'o msa'!”
5 Mes sin npenan am nak, “Kaah fa, aam! Atoni' re' ia, annao nanoni' anbi mee-mee jah, ma in nfuaruut too gwi he nraban aprenat. In nmoe' taisibu, nmurai na'ko propinsi Galilea tar antea kota Yerusalem ia.”
Gubernur anreun he neik Usif Yesus neu usif Herodes
6 Anneen on naan ate, gubernur ee nataan sin am nak, “Karu on naan ate, in re' ia, atoin Galileas, ai'?”
Onaim sin natahan am nak, “Batuur, tua. In na'ko Galilea!” 7 Nahiin on naan ate, gubernur ee nreun sin he neik Nai' Yesus an'ain usif Herodes, re' annaa' aprenat et propinsi Galilea. Oras naan, in nbi kota Yerusalem. 8 On nai te, usif Herodes naan anneen anrair beno anmatoom nok Nai' Yesus, ma in anroim he niit Nai' Yesus a'roo-'roo gwen amsa'. In nhar-harap he bisa niit Nai' Yesus nakrira' naan rais sanmakat esa'-nua. Etun oras sin neik Nai' Yesus neu nee te, in nmariin. 9 Onaim In nataan rasi huma'-huma' neu Nai' Yesus, mes ka tiit fa haan tahas. 10 Nai' Herodes na'uab nok Nai' Yesus fe', mes a'naak rais pirsait Yahudi sin a'naakt ein ma tunggur agaam ein, anmurai ntu'iran antein Nai' Yesus nok In saant ein huma'-huma'. 11 Rarit usif Herodes nok in soraurs ein nmurai nok nakre'et ma nkana'paar Nai' Yesus. Onaim sin napaekb Ee baru mnaun reok gwes on re' uisf ee baru, ma sin nakree't Ee piut. Rarit sin nrenun ma neik Je nfain neu gubernur Pilatus. 12 Unu' te, gubernur ma usif Herodes anmamusun. Mes anmurai neno naan, sin nua sin anmasoob rekon.
Gubernur ee nafeek hukun a'maten neu Usif Yesus
13 Rarit gubernur Pilatus no'en a'naak rais pirsait Yahudi sin a'naakt ein, atoni mnais harat Yahudi bian sin, ma too mfaun ein, he nabuan. Rarit in natoon rais ji in atfekan. 14 In na'uab am nak, “Hi meik Nai' Yesus neem neu kau, ma mtu'iirn Ee mmak In nfuaruut too gwi he nraban prenat pah Roma. Au 'parikas a'rair Je namnutu 'bi hi maatm ein, mes au ka 'tae 'iit fa In sanat mese' msa'. 15 Usif Herodes anparikas anrair Je, mes ka ntae niit fa in sanat mese' msa'. Es naan ate, in nreun tuaf he neik Je nfain neem neu kau. Atoni' re' ia, ka nsaan fa saa'-saa', onaim au ka bisa ufeek fa he 'hukun u'mate. 16 Onaim au ufeek 'ak, on nai: Au uprenat he mbeso, rarit au ufetin.”
17-18 Annenan on naan ate, sin aar sin anmurai nkoa' ein ma anhuun ein am nak, “Ka bisa fa, tua! Mu'mate! Mufetin kai nai' Barabas.”
[Sin nkoa' ein on naan, natuin toon-toon ate, atoin Yahudis sin oras fesat Paska te, gubernur ee nafetin atoin hukun tuaf es, natuin atoin Yahudis sin roimk ein.]a 19 (Nai' Barabas re' ia, antaam bui natuin in afuarutus neu too, araban anaa' aprenat pah Roma nbi kota Yerusalem, ma in aroor atoni' amsa'.)
20 Mes gubernur ee he nafetin Nai' Yesus. Onaim in nataan nafani' too mfaun ein naan am nak, “On mee, karu au ufetin 'eu Nai' Yesus re' ia?”
21 Mes sin aar sin ankoa' ein bu'-bua' am nak, “Ka bisa fa! Amkuus mu'peit Ee nbi hau nehe! Amkuus mu'peit Ee nbi hau nehe!”
22 Mes gubernur naan annaben ate, naan ka batuur fa, rarit in nataan antein anfain no teun nak, “Nansaa' am es au ro he 'kuus u'peti' atoni' ia on re' naan? In maufiun ii saa'? Au ka 'tae 'iit fa tu'in mese' he 'hukun u'maet atoni' ia. Onaim au he 'reun he nbeos Gwe, rarit nafetin.”
23 Mes too mfaun ein ar-arsin ankoa' ein naheran antein' ein, he na'seke' gubernur ee he nkuus na'peti' Nai' Yesus. Onaim gubernur ee ka bisa ntahan naan fa gwen, 24 es naan ate in nafeek natuin too mfaun ein sin roimk ein. 25 Rarit in nafetin nai' Barabas, re' araban aprenat, ma aroor atoni'. Mes in nana'at Nai' Yesus neu sin, he sin nmoo' Je natuin sin roimk ein kuuk.
Sin nkuus nakfirit Usif Yesus anbi hau nehe
26 Rarit soraur Romas sin anheer neik Nai' Yesus anpoi na'ko kota Yerusalem. Anbi raan atnana' te, sin nateef atoin es na'ko kota Kirene. In fe' he ntaam neu kota. In kaann ee, nai' Simon. Sin na'seke' nai' Simon he ntoup Nai' Yesus In hau nehe, rarit nasaah ee ma nnao natuin anbi In kotin.
27 Neno naan, too mfau-rutu neman ma annonton Nai' Yesus. Bifee bian ankaen npin-piuns ein neu Ne. 28 Anneen sin ankaen on naan ate, Nai' Yesus anniik sin am na'uab am nak, “Airoo, bifeen Yerusalem. Kais amkaena' Kau. Reko nneis hi mkaena' hi tuam ein naan kiim, ma hi aanh ein kiim. 29 Fin noka'-nmeu te, susat kou' gwe ntaam neem, tar antea atoni' na'uab am nak, ‘Bifee re' n'ua reok re'uf, es re' bifee re' ka nahoni' niit fa, ma ka nasuus niit fa ri'ana kru'uf.’ 30 Oras susat ko'u naan antaam neem, mansian ein anha'mui' jok ma'tani', tar antea sin ntotin am nak, ‘Reko nneis a'toe'f ein antaikobin he nkuub niis kit nai!’ Sin na'uab ein amsa' am nak, ‘Atha'mui' jok on re' ia, reko nneis kneet ein ankefan he nkuub naneuk kai nai!’b 31 Karu atoni' nmoe' ha'mu'it on re' ia neu tuaf re' ka nsaan niit fa, saa' antein neu atoin maufinu?”c
32 Oras soraurs ein neik Nai' Yesus, sin nheer neik atoin maufinu tuaf nua he nhukun sin bu'-bua' nok Nai' Yesus. 33 Sin ntean baer jes, in kaann ee ‘Bare 'Naak-Nuif’. Onaim sin nkuus Nai' Yesus ma atoin nua' ein naan, es-es ate anbi in hau nehe. Rarit sin nahake' hau nehen naan. Sin nakfirit atoin maufinu es anbi Nai' Yesus in abnapan a'ne'u, es anteni' anbi In abnapan a'rii.
34 [Oras naan, Nai' Yesus an'onen am nak, “Aam! Kais mumnau mtein atoin ein re' ia sin saant ein, natuin sin ka nahinin fa saa' re' sin nmoe' sin.”]d Rarit soraurs ein anheran suur ana' he napara' Nai' Yesus In paken.e
35 Too mfaun ein neman ma annonton anbin bare naan. Atoin Yahudis sin a'naakt ein neman ma nakre'et Nai' Yesus am nak, “In nsoi naan kuun biak ein, mes In ka bisa nsoi naan fa In tuan. Karu In re' ia, batuur-batuur Kristus, Atoni' re' Uisneno anpiir nain Je, maut he In nsaun neem kuun na'ko hau nehe re' ia nai.”f
36 Soraurs ein naan nakree't Ee msa'. Sin na'iun Ee raur mai'ninu',g 37 ma ankoa' nakree't Ee mnak, “Karu ho batuur-batuur atoin Yahudis sin usif, henat amsoi maan om nai!” 38 Sin ntuin nbin hau piis es nak,
“Atoin Yahudis sin usif.”
Onaim sin nkuus hau pisa' naan anbi Nai' Yesus In hau neeh je tunan, antoom faof, he njair tu'in neu saa' es In napein hukun naan.
39 Atoin maufinu tuaf es re' ankuus nakfiirt ee nbi Nai' Yesus In abnapan, nakre'et nok am nak, “Ho Kristus Ko, batuur, ai'? Karu on naan ate, msoi maan kit aar kit nai!”
40 Mes amaufinut tuaf es ee nakain ee mnak, “Hoe! Ho ka mumtausan fa Uisneno, oo? Ho mupein hukun a'maten on re' In imsa'. 41 Hit nua kit tapein hukun natai nok hit maufinu. Mes Atoni' re' ia ka nmaufiun kuun fa saa'-saa'.” 42 Onaim in na'uab antein am nak, “Koi, Yesus! Karu Ho mtaam meu Ho pah, mumnau kau, tua!”
43 Nai' Yesus nataah am nak, “Au 'basan 'ain ko! Neno ia, ho mtaam am'ain sonaf neno tunan mok Kau msa'.”
Usif Yesus anmaet
44-45 Oras naan, maans ee natetab rek-reko. Mes manas naan ka ntana' fa pah-pinan. Rarit meis'ookn ii n'aum naan bare naan tar antea nreuk teun maans ee nmaeb. Anbi Uim Onen Uuf anmui' naan tai eon kou' gwes nakfiir' ee he n'eek Uisneno In Ke'en Akninu' anneis-neisi. Nok askeken ate, tai eno' naan natkai nbatis nua.h
46 Anbi bare ‘'Naak Nuif’ naan, Nai' Yesus ankoa' am nak, “Aam! Oras ia, Au una'at au smaank ii 'eu Ho 'nimam.” In na'uab anrair on naan ate, In natfeek.i
47 A'naak soraur Romas tuaf es anhake npaumak-maak anbi Nai' Yesus In hau neeh je uun. Oras in niit Nai' Yesus In a'maten naan ate, in nanaib na'ratan Uisneno mnak, “Hoe! Atoni' re' ia batuur-batuur neek amne'o, joo!”j
48 Oras too mfaun ein re' anhaken nbin naan, niit Nai' Yesus In a'maetn ee on naan ate, sin nmei' jok, ma ntebi nfanin nok neek susat. 49 Mes Nai' Yesus Iin na, nhaken nbin a'roo, ma nkius In a'maten naan. Bifeen re' natuin Nai' Yesus na'kon Galilea tar antean Yerusalem, anhaken nbin naan amsa'.k
Sin nsuub Usif Yesus
50-51 Oras Nai' Yesus anmaet on nai te, anmui' atoin es naim ranan he nasanut Nai' Yesus In aon amates naan na'ko hau nehe, he nsuub Ee nok rek-reko. Atoni' naan, kaann ee nai' Yusuf, na'ko kota Arimatea. In neekn ee reko, namneo, ma nmoe' rais reko mfaun. In nmpa-pao msa' he Uisneno nakrira' am nak, In nnaa' aprenat. In tuaf es na'ko tuaf-tuaf re' afeek rais pirsait Yahudi. Mes in ka nroim natuin fa sin rasi tfeka' he nhukun na'maet Nai' Yesus. 52 Natuin in he nasanut Nai' Yesus In aon amates naan na'ko hau nehe, onaim in nnao nbaiseun gubernur Pilatus, he ntoit parmisi he in n'urus amates naan. 53 Napein mainuan on naan ate, in nnao nasanut Nai' Yesus In aon amates naan. Rarit in n'aum narek-reok' Ee nok tai ma'osa'. Rarit annao neik Je ma nataam Ee neu noup fatu, re' atoni' fe' anpahat anrari. Noup fatu naan, es ka npaek niit ee fa fe'. 54 Nai' Yesus In a'maten naan nateef nok neon nima'. Oras nai' Yusuf sin ansuub anrair Je naan, maans ee nmaeb jen. Karu maans ee nmouf gwen, atoin Yahudis sin neon onen antaam ein.
55 Bifeen re' neman nabu-buan nok Nai' Yesus na'kon Galilea naan, sin nnaon natuin nai' Yusuf he nitan nak, in ntao amates naan et nopu mee. 56 Sin nkius narek-reko' nopu naan in baran. Rarit sin ntebi nfanin ma nabaarb ein bonak ma miin fubona'. Oras maans ee nmouf, sin nasnasan na'kon mepu, natuin atoin Yahudis sin atoran neon onen. Sin npaon oras neon onen naan ankoon, na' sin he nnaon nkaik ein fubona' neu Nai' Yesus In aon-ta'un amates.l