3 Na'ko Nai' Yesus In atoup noni' tuaf bo'es am nua' ein re' naan, es kaann ee nai' Judas Iskariot. Oras a'naak rais pirsait Yahudi sin a'naakt ein namin ranan he nroor na'maet Nai' Yesus, nitu 'naakf ee ntaam anbi nai' Judas in nekan. 4 Rarit nai' Judas anpoi nnao naim a'naak rais pirsait Yahudi sin a'naakt ein ma a'naak paot Uim Onen Uuf. In he nneka' bua nok sin, he na'sosa' Nai' Yesus neu sin. 5 Oras a'naet ein naan annenan nai' Judas in reona' naan on naan ate, sin nmariin anmaten. Sin nba'an nai' Judas am nak, “Reko! Karu ho mroim he mu'sosa' kai Nai' Yesus ate, hai mbaen.” 6 Nai' Judas anroim natuin sin. Onaim in naim asraak he na'sosa' Nai' Yesus amninu'-mninu' neu sin, he too mfaun ein kais nahinin.

7 Onaim atoin Yahudis sin neon ko'u naan antea, ma sin nroron 'bib-kaes ana' he nmo'en fesat Paska. 8 Rarit Nai' Yesus anreun nai' Petrus ma nai' Yohanis am nak, “Hi nua ki mnao mihuun he mibarab bukaet, he hit tbukae tbi fesat Paska bu'-bua'.”

9 Onaim sin natanan am nak, “Aam! Hai he mnao mibarab bukaet on mee?”

10 In nataah am nak, “Karu hi mtaam meu kota Yerusalem, hi of miteef mok atoin es nasaah a'huun oe aan es. Hi mituin ee mtea in umi. 11 Mitoon meu uim tuaf naan am mak, ‘Hai Aam Tungguru ntoit naan ke'en es et ho umi, he nmoe' fesat Paska nok In atoup noin' ein. Bisa, oo?’ 12 Onaim uim tuaf naan of nakrira' ki ke'en re' mainuan es et umi ktuta' naan. In nkikin anrair bare naan. Suma hi nua ki mibaarb ahaa bukaet.”

13 Rarit sin nua sin annaon. Onaim sin niit saa'-saa' natai on re' Nai' Yesus natoon sin neu sin. Onaim sin nabaarb ein bukaet Paska nbin naan.

14 Oras barab bukaet ein rekon anrarin te, Nai' Yesus sin neman ntean. In nok In haef ein ntokon he nbukaen bu'-bua'. 15 Onaim Nai' Yesus na'uab neu sin am nak, “Au 'mariin a'maet he 'took ma 'bukae fesat Paska 'ok ki, nahuun na'ko Au 'ma'ne'at. 16 Amtanar mirek-reko' re' ia. Tarair re' ia te, Au ka 'took he 'bukae 'tein fa fesat Paska 'ok ki. Neno mee te, oras mansian ein nitan maat fu-fua gwah nak, Ama' annaa' aprenat te, na' Au 'bukae 'tein.”

17 Rarit In nait i'kraas re' matua' tua min-kase. Rarit in ntoit makasi neu Uisneno, ma nnona' kraas naan neu sin. Rarit In na'uab am nak, “Amtoupu kraas re' ia, he mbukae tuaf mese'-mese'. 18 Mimnau! Anmurai mabe' ia, Au ka 'inu 'tein fa tua min-kase. Neno mee te, oras mansian ein nitan maat fu-fua gwah nak, Ama annaa' aprenat te, na' Au 'inu 'tein.”

19 Rarit In nait utunu' fua' es, ma ntoit makasi neu Uisneno. Rarit In nteib utunu' naan, ma nnona' sin. In na'uab am nak, “Utunu' re' ia, Au aok re' Au 'nona' 'eu ki aar ki. Ansuun oras hi mbukae utunu' on re' ia te, hi ro he mimnau Kau.” 20 Oras sin nbukae nrarin ate, In nait i'kraas matua' tua min-kase. Rarit In na'uab antein am nak, “Tua min-kase re' ia, Au naa' aa. Au naa' re' ia nat'oop ma nsai he nsoi nafetin naan ki. Uisneno npaek naa' re' ia he nahake' rais manba'an fe'u neu ki.^b

21 Mes ampanat, natuin anmui' tuaf re' antook nok kit es mei re' ia, of na'sosa' Kau.^c 22 Batuur! Au, Mansian Batuur-Batuur re' ia, ro he 'maet utuin Uisneno In romin. Mes mukeo! Tuaf re' na'sosa' Kau naan, in of nasaah kuun in rais siraak!”

23 Annenan on naan ate, Nai' Yesus In atoup noin' ein anmurai nmaktaan ein am nak, “Onaim sekau es re' he nmaufiun neu Ne?”

24 Onaim Nai' Yesus In atoup noin' ein anmurai nmatoen nak, sekau es re' ko'u nneis ji.^d 25 Mes Nai' Yesus nakain sin am nak, “Anbi pah-pah re' ka nahinin naan fa Uisneno, uisf ein naprenat too nggwin baineisi. Te kaah, sin nromin he too nggui anteek sin itnak, ‘Ama re' aturun too’. 26 Mes hi kais on naan. Tuaf re' he njair kaes kou' gwi, in a'moin ii batuur-batuur ro he on re' tua a'baut he ntuthae are' too mfaun. Tuaf re' he njair a'naet, ro he ntuthae are' too mfaun, on re' aan renu'-aan reka'.^e 27 Hi mitenab miit, a'naet ii es re' mee? Tuaf re' antoko nbi mei, ai' tua atuthaes? Atokos mei jaan, in es re' kou' gwi, ai'? Te kaah, Au ka 'moe' fa Au tuak ii on naan. Au 'uum he 'tuthae ki.^f

28 Hi ar-arki re' ia, es re' mok-mook Kau oras Au upein ma'ne'at. 29 Au Ama' nanaib Kau he 'naa' aprenat a'bi In pah. Onaim oras ia, Au unaiba' ki msa', 30 he hi mtoko ma mbukae mok Kau mei mese' mbi sonaf neno tunan. Au 'fee ki kuasa msa', he hi miprenat uuf bo'es am nua mbi pah Isra'el.”^g

31 Rarit Nai' Yesus natoon neu nai' Petrus am nak, “Petrus! Nitu 'naakf ee nsoba' he nbatis ki na'ko Kau, on re' takrai mneas.^h 32 Mes Au 'onen ma 'teek ko, he ho mpirsai Kau piut-piut. Oras ho mfain uum een meu Kau te, ho ro he mha'tain ho aom-bian ein sin neek ein.”

33 Onaim Nai' Petrus nataah am nak, “Kaah fa, tua! Au ka neu he 'aen usaitan Ko fa, tua. Maski au 'taam bui ma 'maet 'ok Ko msa', reko tua.”

34 Mes Nai' Yesus nataah am nak, “Petrus! Amneen murek-reko'. Mabe' ia, maun ee ka nkokre'on fa fe'e te, ho musuan Kau no teun gwen mak, ho ka muhiin Kau fa.”

35 Rarit Nai' Yesus na'uab neu sin am nak, “Neon gwes ii, oras Au 'reek haefan ki he mnao mitoon Au Rais Reko mbi mee-mee, Au 'taar ki he kais meik roit, tas, ma 'pein-haef. Oras naan, hi mkuran saa'?”

Onaim sin natahan bu'-bua' am nak, “Neon gwes ii, hai ka mkuran fa saa'-saa', tua.”ⁱ

36 Rarit In na'uab antein am nak, “Mes oras ia, 'teta'. Karu hi mmui' roit, henat meik. Karu mmui' tas, henat meik. Karu ka mmui' fa suni', mi'sosa' hi baur gwes he msoos. 37 Natuin atoin Yahudis sin naan Kau on re' atoin maufinu. Kreo' gwes anteni' te, sin neman he nheek Kau. Naan natai nok saa' re' ka'o Yesaya antui nain je, mnak:

38 Sin natonan am nak, “Aam! Hai meik benas nua.”

Rarit Nai' Yesus nataah am nak, “Noo gwah nai. Kais mi'uab naan antein!”

39 Anbukaen nrarin Paska te, Nai' Yesus nok In atoup noin' ein anpoin nnaon neu 'to'ef Saitun, on re' nati'-nati' sin nmoo' je ji. 40 Antean naan ate, In na'uab neu sin am nak, “Hi m'onen he hi kais am'oer oras hi mipein furit ma 'takaf.”

41 Rarit In nnao na'roo kre'o na'ko sin. In nri'tuu ma n'onen am nak, 42 “Aam! Karu Ho mromi te, mait mu'roba' ma'ne'at ia na'ko Kau. Mes kais mutuin Au romik, maut he mutuin Ho roim aan kuum.” 43 [Rarit Uisneno In ameupt es na'ko sonaf neno tunan neem ma nha'tain In nekan. 44 Fin In ma'ne'at naan ma'tain besi, tar antea In puus ee nsai on re' naa'.]^k

45 An'onen anrair on naan ate, In nhaek ma nnao nfain neu In atoup noin' ein. Mes sin ntupan, natuin sin nhaen nmaten, ma nsusan amsa'. 46 Rarit Nai' Yesus nataan sin am nak, “Hee'! Hi mtuup neu saa'? Reko nneis hi m'onen he a'suu't ee nema te, hi kais ammouf.”

47 Nai' Yesus na'uab fe' on naan ate, nai' Judas (tuaf es na'ko atoup noni' bo'es am nua' ein naan) neem nok too mfaun. In neem anpaumak-maak Nai' Yesus he nhoo ma neek Ee. 48 Mes Nai' Yesus nakain ee mnak, “Hoe, Judas! Ho he mu'sosa' Mansian Batuur-Batuur re' ia, mpaek tabes ma maneek-panaf, oo?”

49 Oras Nai' Yesus In atoup noin' ein nahinin nrair nai' Judas in roen maufinu naan ate, sin natanan neu Nai' Yesus am nak, “Aam! Hai mbaan sin, aa oo? Hai meik benas.” 50 Onaim tuaf es anfaik benas, rarit ansaip namouf atoin es in rukin a'ne'u. Atoni' naan, a'naak rais pirsait Yahudi sin a'naak kou' gwe in ate.

51 Mes Nai' Yesus na'uab am nak, “Noo gwah nai! Kais amraban sin!” Onaim In nasbeut atoni' naan in rukin, ma nareok' ee.

52 Too mfaun ein re' neman ma nheek Nai' Yesus naan sin esan re': a'naak rais pirsait Yahudi sin a'naakt ein, atoni mnais haart ein, ma apaot Uim Onen Uuf, ma tuaf bian antein. Nai' Yesus nataan sin am nak, “On mee? Hi mitenab mak Au re' ia atoin maufinu, es hi iim amheek Kau meik suni' ma hau tuka'? 53 Neno-neno te Au unoni' 'bi Uim Onen Uuf, mes ka tiit fa tuaf es he nheek Kau. Mes nbain nai! Hi oras. Oras ia, nitu 'naakf ee in kuasan!”^l

54 Rarit sin nheek neik Nai' Yesus, ma nheer neik Je neu a'naak rais pirsait Yahudis sin a'naak kou' gwe in umi. Nai' Petrus nnao na'kor-koro' nbi sin koitk ein. 55 Anbi umi naan in kintal, biak ein anraran ai. Nai' Petrus annao nraar nok ai msa'. 56 Anmui' bifee ate es, ankius niit Nai' Petrus antoko ma nraar nok ai. In nkius narek-reko' nai' Petrus in human, rarit in natoon neu biak ein am nak, “Hoe! Atoni' re' ia msa', nati' te in nok Nai' Yesus!”

57 Mes nai' Petrus nasuan am nak, “Kaah fa, tua! Au ka uhiin fa Atoni' naan. Ho muhiin saa'?”

58 Ka 'roo fa te, tuaf es nait matan ma nkius niit nai' Petrus. Rarit na'uab am nak, “Tebe, haa! Ho re' ia tuaf es na'ko Nai' Yesus Iin na, ai'?”

Mes nai' Petrus anprotees ma'tani' mnak, “Hee'! Kahaf! Ho na' mpeo tafi'-tafi'!”

59 Of oni' jam es ankono te, tuaf es anteni' na'uab am nak, “Hoe! Au uhiin, tuaf re' ia Nai' Yesus In atoup noin es, natuin in atoin Galileas!”

60 Mes nai' Petrus anpeen nmates nak, “Mupoi nai!” Nateef in na'uab on naan ate, maun gwe ankokreo'.

61 Onaim Nai' Yesus anniik ma nkius nai' Petrus. Rarit nai' Petrus namnau uab ein re' Nai' Yesus na'uab sin am nak, “Mabe' re' ia, maun ein ka nkokre'on fa fe'e te, ho musuan ma mutotan amrair Kau no teun.” 62 Namnau niit on naan ate, nai' Petrus anpoi na'ko kintal naan, ma nnao nkae npin-pinus.

63 Rarit atoin ein re' antiut Nai' Yesus naan anmurai nakre'et, ma nbeos nafan-fain' Ee. 64 Sin npooh In maatk ein npaken tais, rarit nataan Ee mnak, “Hae! Karu Ho mjair Uisneno In mafefa kniun es ate, ho mteek miit! Sekau es antuuf ko re' ia?” 65 Rarit sin naseku' niis Ne.

66 Kik-kiuk ana' te, a'naak rais pirsait Yahudi sin a'naakt ein, tunggur agaam ein, ma atoni mnais haart ein, nabuan nrarin he n'urus Nai' Yesus In rasi. Rarit sin nrenun he nheer neik Nai' Yesus neem neu bare re' he nafekan rais pirsait. 67 Oras In ntaam anrair, sin natanan neu Ne mnak, “Ho mutoon miit kai! Ho re' ia, batuur-batuur Kristus, aa oo?”

In nataah am nak, “Maski Au utaah batuur-batuur amsa', hi ka mpirsai fa. 68 Rarit karu Au utaan ki haan tanas mese' msa', hi ka mitaah Kau fa. 69 Ka 'roo fa te, Uisneno anpaek In kuasa ma'tain ee, he nanaib Kau, Mansian Batuur-Batuur re' ia. Rarit Au 'toko 'bi In aon bian a'ne'u he uprenat 'ok Ne.”^m

70 Annenan on naan ate, sin aar sin natanan am nak, “Karu on naan ate, ho mutenab am mak, ho re' ia Uisneno In Aanh, aa oo?”

Onaim Nai' Yesus nataah am nak, “Batuur, hi mi'uab naan, namneo.”

71 Onaim atoin a'aa' rasin naan na'uab ein am nak, “Hit aar kit atneen kuuk, ai'? In nanaib kuun in tuan anjair Uisneno In Anah. Re' ia, rasi m'akan! Tatuin hit atoran pirsait, karu atoni' nataib on, on re' Uisneno, atoni' naan ro he nmaet. Onaim on mee? Hit kais atperluu saksii ntein. Athukun ta'maet Je nai!”