3-4 Mes Nai' Yesus nataah sin am nak, “He tak on mee, joo? Hi ka mimnau fa ka'o Daut in reetn ee oo? Ka'o Daut nok iin ne, sin taik ein na'roton natuin sin namnahan nmaten. Onaim sin ntaman neun Uisneno In Tenar Onen ma naitin utunu' re' a'naak pirsait ein sin nana'at anrair sin neu Uisneno, ma sin nahan. Te kaah, suma a'naak pirsait ein es re' nabe'in he naah utuun ein naan. Tuaf bian sin ka bole fa. Rarit ka'o Daut sin nahan, mes ka tiit tain fa tuaf es he nasaan sin. Hi on re' ka mrees mihiin fa Uisneno In Suur Akninu'!^b

5 Amtakan hi ruikm ein he mneen mirek-reko'! Au re' ia, Mansian Batuur-batuur. Au 'mui' hak he ufeek 'ak, atoni' nabei' he nmoe' saa'-saa' anbi neno snasat.”

6 Neon gwes, nateef nok neno snasat a'teta', Nai' Yesus annao nanoni' nbi uim onen. Anbi naan, anmui' atoin es, in a'niman es ee nmaet. 7 Anbi naan amsa', anmui' tunggur agama fak-fauk ma atoni' na'kon partei pirsait Farisi re' namin raan asraak he nakreo namouf Nai' Yesus. Rarit sin nnuu' Nai' Yesus, kar-karu In nareko' atoni' naan, nateef nok neno snasat. Nok ranan naan, sin bisa ntu'iirn Ee maat-maat. 8 Mes Nai' Yesus nahiin namneo-namneo neu sin sarit naan. Es naan ate, In no'en atoni' naan nak, “Ba'e! Uum amhaek meu re' ia fe'!” Onaim in nnao ma nhake nbi naan. 9 Rarit Nai' Yesus nataan abitan re' naan am nak, “Au he utaan 'aan ki fe'. Tatuin hit atoran rais pirsait, saa' na es re' hit he tmoo' je nateef nok neno snasat ta'ko mepu? Tmoe' reko, oo? Ai', tmoe' maufinu? Tsoi tafetin tuaf, aa oo? Ai', tareu' in a'monin?” 10 Rarit Nai' Yesus ankius natef-tefan sin, ma In na'uab neu atoni' naan am nak, “Amnona' ho 'nimam naan neem!” Rarit in nsoron in a'niman naan, ma nareok nain.

11 Ankius on naan ate, tuaf-tuaf re' anmusun Nai' Yesus nek-neuk nisik. Rarit sin nmurai nareon ein rais maufinu nak, “Hit ro he tami 'tein raan a'po'i bian, he na' bisa tamouf Gwe!”

12 Ka 'roo-'roo fa ntein, Nai' Yesus ansae neu 'to'ef es ma n'onen. In n'onen anbi naan fai jes a'teme. 13 Noka' kik-kiku on naan ate, In no'en naan In atoup noin' ein. Rarit na'ko sin re' naan, in nbetis naan tuaf bo'es am nua he njarin In haef ein. Tuaf ein re' In nbetis sin naan, es re':

17 Oras ansaun neman na'ko 'to'ef naan, Nai' Yesus nok In atoup noin' ein anhaken anbin amnera'. Too mfaun ein nabua nanin anbin naan. Sin neman na'kon propinsi Yudea, kota Yerusalem, ma kota nua et tais je ninin, esan re' Tirus ma Sidon. 18 Sin neman he nnenan kuuk na'kon Nai' Yesus, ma bian he ntotin he In nareko' amenat. Onaim In nareko' sin. In nareko' aniut saes ein, ma nriu' napoitan niut reu'f ein na'kon tuaf ein naan. 19 Sekau-sekau re' anroim he nreo' ai' nasbetu haa Nai' Yesus a'kreo' gwah, anmui' kuasa npoi na'ko Na, ma nareko' sin.

20 Rarit Nai' Yesus nabani' neu In atoup noin' ein ma nanoni' sin am nak,

Onaim karu anmui' tuaf nasusab ki on naan, kais misusab hi neekm ein naan, mes amharineb hi neekm ein naan! Ma amtaikreit nok ma mmariin nok! Kais amsanmaak, natuin atoni' re' nasusab ki oras ia, sin beif-na'if sin es re' nasusab Uisneno In mafefa kniun' ein un-unu'.

27 Rarit Nai' Yesus antuta ntein In uaban am nak, “Amtakan hi ruikm ein he mneen mirek-reko'! Ho ro he mneek ho musun, ma mmoe' 'moe' reko meu tuaf-tuaf re' neekn ee nameen neu ko. 28 Am'onen meu Uisneno he In nmoe' reko neu tuaf-tuaf re' ankaas ko. Ma mtoot Je he In nmoe' 'moe' reko neu tuaf-tuaf re' nmo'-moe' ko goan. 29 Karu anmui' tuaf anpaas ho 'kinum es, mkoon ee he npaas ho 'kinum bian naan. Karu ntetak naan ho baur mainikin, mnoon ee ho baur guan amsa'. 30 Karu anmui' tuaf antoit ho baer es, mnoon ee he. Ma karu anmui' tuaf nait neik ho baer es, maut he in npaar kuun ee. Kais amtoup mufani'! 31 Ho ro he mmoe' meu biak ein, natai on re' ho mroim he sin nmoe' saa' neu ko.^f

32 Ho mrom-roim he mneek ho noont ein kuum. Naan reko. Mes in arekon anneis-neis ji, saa'? Fin amoe' maufiun ein amsa' anneek sin tuaf ein kuuk! 33 Karu ho suma mmoe' reko meu tuaf-tuaf amoe' reko neu ko, in arekon anneis-neis ji, es re' mee? Fin amoe' maufiun ein anbaras 'moe' reko on naan amsa'. 34 Karu ho mutusab roit meu tuaf-tuaf re' bisa nbaen nafani' ko ho roit ein naan, in arekon anneis-neis ji, saa'? Fin amoe' maufiun ein natuusb ein roit neu tuaf bian, asar ramu noka'-nmeu te sin ntoup nafani' sin ite, nanookb ok.

35 Mes re' reko anneis-neis ji, on nai: amneek ho musu sin! Ma mmoe' 'moe' reko meu sin. Sin nperluu saa' ate, mutusab sin. Kais mutenab mak, sin of bisa nfee nafani' ko sin, ai' kaah. Nok ranan naan, Uisneno of anbaras neu ko. Ma ho mjair Uisneno A'raat Re'uf In anah. Natuin ho mmoin on re' ho Ama' re' anroim he nmoe' reko neu tuaf-tuaf amoe' maufinu. In anmoe' 'moe' reko msa' neu tuaf-tuaf re' ka ntoit nahiin fa makasi. 36 Onaim ho ro he mukrira' rais kasian meu tuaf bian, nahuum on re' ho Ama' abit sonaf neno tunan nakrira' In rais kasian neu ko.”

37 Nai' Yesus nanoni' piut am nak, “Kais mutaib tuaf, he tuaf kais nataib neu ko msa'. Kais mukritik tuaf, fin tuaf of nakritik nafani' neu ko msa'. Amnikan main tuaf ein sin saant ein, he sin annikan nain ho saant ein amsa'. 38 Karu ho mfee meu tuaf saa' re' sin nperluu, ho of amtoup mufani' sin. Fin of Uisneno an'ator he ho mtoup mufani' sin anho-hoen. Naan nahuum on re' tuaf an'oop aknaa' neu bree-ukur, rarit anhasu' ma nneen je. Rarit n'opa' ntein' ein tar antea naheun ma nat'oop. Re' ho mtoup sin naan, nahuum on re' naan. Karu ho mfee kre'-re'o, ho mtoup mufani' sin kre'o msa'. Mes karu ho mfee kou'-ko'u, ho mtoup mufani' sin anho-hoen.”

39 Nai' Yesus nanoni' npaek uab manporin amsa'. In nareta' am nak, “Afoort ii, ka neu he nakrira' fa ranan neu aforot bian. Fin sin nua sin of anroron ntaman neu kona'!^g 40 Aan muirt ii, ka neu he nneis fa in tungguru! Mes karu in natuin rek-reko in tunggur gwe in nonin, in bisa natai nok in tungguru.^h

41 Ho mroim he mtanar tuaf-tuaf bian sin sanat aan'-ana'. Mes ho sanat re' kou'-kou' goan, ho mak, ka mnita' fa. Naan on re' ho mtae miit afu skuuk aan es anbi es in matan. Te kaah, hau tbaa kou' gwes an'eek ho maat maan, mes ho ka mnaben fa! 42 Anmoe' on mee' m'es ho mubrain he mu'uab am mak, ‘Ba'e, uum he au 'fuu upoin afu skuku' na'ko ho maatm aan fe'.’ Te kaah, ho tuam aan kuum ka miit fa saa'-saa', natuin hau tuuk kou' gwes an'toeb naan ho maatm ein naan! Hae! Ro ho batuur-batuur atoin aputa-kriut ko! Airoo! Mait imporin hau tbaat naan na'ko ho maatm ein fe'. Na' ho mkisu te nakninu', rarit na' amfuu afu skuuk ana' naan na'ko ho ba'e in matan.”

43 Nai' Yesus na'uab anteni' rais manporin es am nak, “Ka neu fa he roet reok gwi nafua fua re'uf. Ma ka neu fa he hau fua reok gwi, npoi na'ko hau re'uf. 44 Atoni' bisa ntanar, karu roet es reko, ai' kahaf, es re' na'ko hau roet naan in fuan. Sekau-sekau gwah nahinin nak, ka neu fa he atoni' nseu kaut ai' hau fua anggur, na'ko hau ma'aika'.^{i j} 45 On naan amsa', atoin neek akninu' bisa nmoe' 'moe' arekot. Mes atoin neek meis'okan, nmoe' 'moe' maufinu. Fin na'ko atoni' in uaban, in nakrira' in tuan batuur.”^k

46 Rarit Nai' Yesus antuta ntein am nak, “Hi mhaman Kau te, mak ‘Usi'’. Mes nansaa' am es hi ka mroim fa he mituin Au uab ein? 47 Atoni' re' neem ma natniin Kau, rarit anmoe' natuin Au uabak, in re' naan nahuum on re' 48 tuaf re' he nafena' uim reko ma'tain es. In nhain uim baarf ee ntaam tar napein faut putu', na' nasnaas. Rarit in nraem fanderen anbi faut putu' naan, na' in nafena' umi. Karu noe saok gwe nsae, umi' naan antaa' aah, natuin in faut fanderen naan ma'tani'. 49 Mes atoni' re' anneen nok neek ao-biaf neu Au uabak, tuaf re' naan nahuum on re' he nafena' umi' rabah. In ka nraem fa fanderen, mes na'pesib umi naan anbi auf afa' anpaumaak noe je ninin. Onaim oras noe saok gwe neem ate, nsaen ma nmemun, rarit anroi neik umi naan!”