2 Es naan ate, too mfaun ein neman na'kon mee-mee. Sin nauban naan Ee tar antea umi naan na'keek nok too. Ma umi naan in eon' ee ma'eka' nok too msa'. Anbi naan ate, Nai' Yesus natonan sin Uisneno In Kabin ma Prenat.

3 Oras In na'uab fe'e te, anmui' atoni' haa nroi neik atoin abuat es, he neik je neu Nai' Yesus. 4 Mes, natuin too mfaun ein naan, sin ka bisa neik fa atoni' naan ntea Nai' Yesus In matan. Onaim sin nsaen neun uim je tunan, ma sin npukai umi naan in tefin, nataib on anbi Nai' Yesus In a'nakan. Oras sin npukai narair uim naan in teifn ate, na' sin nasanut abuat naan nok nain in a'nahek.^a 5 Oras Nai' Yesus niit sin nmo'en on naan ate, In nahiin nak, sin npirsain batuur-batuur neu Ne. Onaim In nak neu abuat naan am nak, “Ba'e! Ho saant ein masako' nrair.”

6 Anbi naan, tunggur agama rais pirsait Yahudi tuaf fauk nok antokon. Oras sin nneen Nai' Yesus In uaban naan, sin nnaben ate ka reko fa. 7 Rarit sin na'uab ein es nok es am nak, “Airoo. Atoni' ia, ro In nabrain he na'uab on re' nee, joo! Suma Uisneno es re' bisa nsaok atoni' sin sanat. Mes atoni' ia In uabn ii naiks on, on re' In es re' Uisneno. In na'akan Uisneno es re' nee!”

8 Mes Nai' Yesus nahini nrair sin neek ein. Rarit In nak sin am nak, “Hi kais mitenab on re' naan, tua! 9-10 Mee es ma'kafa' nneis ji? Karu Au 'ak 'eu atoin abuat re' ia m'ak, ‘Ho saant ein masako' nrair,’ hi ka mihiin fa neu he njari oo, ai' kaah? Mes karu Au 'ak ‘Amfeen nai! Mait ho 'nahek ma mfain nai!’ Karu in nfeen oras naan ate, of na' hi miit ma mihini mmak, Au es re' Mansian Batuur-Batuur. Fin Au 'mui' kuasat ma hak he 'saok sanat.”

Rarit Nai' Yesus nak neu atoin abuat naan am nak, 11 “Amneen, oo! Oras ia, ho mureok gwen! Onaim amfeen nai, mait ho 'naehk aan ma mfain nai.”

12 Anneen on naan ate, abuat naan anfeen nain. In nnuun ma nait in a'naehk ee, rarit anpoi nnao. Are' too mfaun ein re' nitan nok sin maatk ein, ansanmakan, onaim na'uab ein am nak, “Amoo! Hit fe' tiit rasi re' ia, joo! Uisneno ro mapina'-makraha'!”

13 Rarit Nai' Yesus annao nfani ntein neu nefo Galilea in ninin. Too mfaun ein neman ma natefan nok Ne, ma In nanoni' sin anmatoom nok Uisneno In Kabin ma Prenat.

14 Anbi bare naan, anmui' tuaf es, kaann ee nai' Lewi, nai' Alfius in aan mone. In meupn ii es re' he nhoik beo he nfee je neu anaa' aprenat pah Roma. Oras Nai' Yesus annao npeo' naan ate, In niit nai' Lewi. Onaim In nak ee mnak, “Ba'e! Uum he mutuina' Kau nai!”

Anneen on naan ate, nai' Lewi anfeen am natuina' nain Je.

15 Rarit Nai' Yesus sin antokon ma nbukaen nbin nai' Lewi in umi, nabua nok nai' Lewi in partei ahoik beo nggwin. Anbi naan amsa', anmui' tuaf bian re' atoin Yahudis nakan sin atoin amoe' re'uf, nok anbukaen. Too mfaun ein re' antokon ma nbukaen nbin naan, anromin he nnenan Nai' Yesus In uaban.

16 Oras naan, tunggur agama tuaf fauk na'kon partei pirsait Farisi, sin niit Nai' Yesus antook ma anbukae nok ahoik beo nggwin, ma are' amoe' reu'f ein. Onaim sin nataan In atoup noin' ein am nak, “Nansaa' am es hi Tunggur gwe naah-niun nabua nok ahoik beo nggwin ma amoe' reu'f ein?”

17 Mes Nai' Yesus anneen sin haan tanas naan, rarit In nataah sin am nak, “Atoin amenat naim areko' menas, mes atoin ao-mina' ka naim fa areko' menas. Au 'uum he 'pairoir atoni' re' namreu'. Mes Au ka 'uum fa he 'pairoir atoni' re' annaben in tuan ii te, namneo.”

18 Neot es, tuaf na'kon partei pirsait Farisi, sin nanaah ok. Sin niit nai' Yohanis asranit in atoup noin' ein nanaah ok amsa'. Mes sin ka niit nitan fa Nai' Yesus in atoup noin' ein nanaah ok on re' sin. Es naan ate, tuaf bian na'ko sin, neman ma natefan nok Nai' Yesus, he natanan am nak, “Aam! Hai minaah om. Nai' Yohanis in atoup noin' ein nanaah ok amsa'. Mes nansaa' am es Ho atoup noin' ein ka nanaah ok fa?”

19 Nai' Yesus nataah sin am nak, “Hi mihini mrair, karu anmui' fesat kabin, taumn ein sin ka nanaah ok fa, mes sin nbukaen tar namsenan. Karu nai moen ji nbi naan fe', sin of anbukaen bu'-bua'. 20 Mes anbi oors es, karu tuaf nabaak neik nai mone naan ate, in aok-bian sin neek ein ansusan, na' sin nanaah ok.”

21 Rarit Nai' Yesus nareta' uab manporin es, am nak, “Ka tiit fa tuaf es he npaap sii fe'u neu baru mnaa'. Fin karu tsaef baru naan, sii fe'u naan of an'uuk gon am anpisu nteni' baru mnaa' naan. 22 On naan amsa', ka tiit fa es, re' narai tua miin fe'u neu 'saap arapu'. Natuin a'sapa' naan of natboor, ma tua mina' naan of nasturun npoi oke'. Onaim tua miin fe'u, ro he tarai je neu 'saap fe'u.”^b [Nok uaba' naan, Nai' Yesus nanoni' sin am nak, In noni'-taru' fe'u, kaisa' sin nseor gwe nok atoin Farisis sin noni' amnaa'.]

23 Neot es, nateef nok atoin Yahudis sin neon onen, Nai' Yesus sin nnaon npe'-pe'on reen ein sin niink ein. Ma In atoup noin' ein anhetun maak-gandum he sin nnahan.^c 24 Atoin Farisis niit sin nmo'en on naan ate, sin nak neu Nai' Yesus am nak, “Nansaa' am es Ho atoup noin' ein antanhai hit atoran rais pirsait? Sin nhetun maak-gandum nateef nok neno snasat! Ka nabei' fa he hi mmoe' on re' naan!”

25-26 In nataah am nak, “On mee? Hi ka mimnau fa reta' na'ko nai'-ka'o nai' Daut? Oras naan, nai' Abiatar anjair a'naak pirsait Yahudi sin a'naak ko'u. Nai' Daut nok in tuaf ein sin taik ein na'roton tar namnahan nmaten. Onaim sin ntaman anbin Uisneno In Tenar Onen, ma nait utunu' re' a'naak pirsait ein nafuat ma nana'at anrair sin neun Uisneno, ma sin nbukaen. Te kaah, amneon ii, suma a'naak pirsait ein esan re' bisa nbukae sin, mes tua 'teta' na'ko naan ate, ka bole fa. Rarit nai' Daut sin nbukae utuun ein naan, mes ka tiit fa es, re' nakaina' sin.”^d

27 Rarit Nai' Yesus na'uab neu sin antein am nak, “Nati' kaisa' mnikan, mak Uisneno napara' neno snasat he nfee arekot re' he nturun ma nbaab mansian aar kit. Mes In ka nmoe' fa mansian ii he natuin ahaa neno snasat in atoorn ein. 28 Au re' ia, Mansian Batuur-Batuur. Au 'mui' hak he 'reek mansian he bisa nmeup saa'-saa' anbi neno snasat. Ma Au 'mui' hak amsa' he 'penan mansian he kaisa' nmeup saa'-saa' anbi neno snasat.”