Ia rais reko anmatoom nok Uisneno In Anah.^a In kaann ne Yesus Kristus, re' Uisneno nruur ma nreek nain Je na'ko un-unu'. In retan ia, na'uub on on nai:

2 Nahuun na'ko Nai' Yesus nait In mepu, Uisneno anreek haefan atoin es neem nahuun. Atoni' re' naan, kaann ne nai' Yohanis. Nai' Yohanis re' ia, ro he neem nahuun he nfei ranan neu Nai' Yesus. Mes nahuun na'ko nai' Yohanis he neem, Uisneno ansonu' nahunun In mafefa kninu' tuaf es, kaann ee nai' Yesaya. Na'ko afi ahunut, nai' Yesaya antui nrair, nak on nai:

4-6 Sin biasa nteek nai' Yohanis ate, nak ‘Asrain Atoni'’. In natua nbi baer ruman. In paekn ee anmoo' je na'ko bikaes unta in funun. In pasu 'futu' nmoo' je na'ko pasu. In naah sisi knamat ma niun oin hau. [Nai' Yohanis in a'moin ii, nahuum on re' mafefa kninu' ka'o nai' Elia afi unu'.]^d

Oras naan, too mfaun na'kon kota Yerusalem, ma propinsi Yudea in afan nanan, sin neman ma natefan nok nai' Yohanis anbi in baran. Sin neman he nitan nok sin maatk ein ma annenan nok sin ruik ein noni'-taru' na'ko nai' Yohanis. In nsaksii ma natoon neu sin am nak, “Hi ro he mmanaku' ma misaitan hi sanat ma penu sin ok-oke', maut he Uisneno nnoes nain hi saant ein naan. Rarit hi ro he misrain fe', he anjair tanar am nak, hi mmarame' mfaim jen mok Uisneno.”

Oras sin nneen anrarin on naan ate, sin nmanaku' sin saant ein, rarit sin nana'at sin tuak ein neun nai' Yohanis, ma in nasrain sin anbin noe Yarden.

7 In na'uab neu sin am nak, “Noka'-nmeu te, Atoin es of he neem. In ma'tani' nneis na'ko kau. Au ka maso'ik kau fa, maski bait au 'jari haa In aan renu ma aan reka', au ka umnees 'ok Ne fa.^e 8 Au 'manoek ii suma es re' he usrain ki 'paek oe, mes Atoni' naan of anmo'e nneis na'ko kau. Fin In of natuab ma namonib ki nok Uisneno In Asmaan Akninu'.”

9 Neot es ate, Nai' Yesus neem na'ko kuan Nasaret et pah Galilea, he nateef nok nai' Yohanis. Ma nai' Yohanis nasrain Je anbi noe Yarden. 10 Ma oras Nai' Yesus anpoi na'ko oe, nok askeken ate, neon gwe natfe'i. Rarit Uisneno In Asmaan Akniun' ee ansaun neem neu Ne, mamnita' on re' kor-kefi. 11 Ma hanaf Uisneno npoi neem na'ko neon gwe mnak,

12 Rarit Uisneno In Asmaan ee nheer neik Nai' Yesus neu baer ruman. 13 Anbi bare naan, anmui' kaun fui sin. Nai' Yesus natua nbi bare naan fai bo' haa ma neno bo' haa. Anbi bare naan amsa', niut reu'f ein sin a'naak ko'u neem ma nsoba' Usif Yesus he natuin in uaban, mes ka nabei' Je fa. Rarit Uisneno In ameput na'ko sonaf neno tunan neem he natuta' ma nabhae' neu Ne nbi rasi aof ma smanaf.

14 Anbi oors es, re' sin nataam anrair nai' Yohanis Asranit anbi bui, Nai' Yesus annao neu propinsi Galilea, he natoon Rais Reko na'ko Uisneno anbi naan.

15 In na'uab am nak,

16 Neot es, Nai' Yesus annao nreuk nefo Galilea in ninin. In niit atoni' nua. Es in kaann ee nai' Simon, nok in oirf ee nai' Anderias. Sin nua sin an'ookr ein jala he nheken ika'. Mepu naan, sin meup gwe neno-neno. 17 Nai' Yesus no'en sin am nak, “Hoe, ba'e sin! Iim he mituina' Kau nai! Hi amnaim ika' ki, mes anbi oras ia, Au he unoni' ki he mjair amnaim tuaf meu pukan Uisneno.” 18 Anneen anrarin on naan ate, sin nua sin nasaitan jala naan, ma annao natuin nain Je.

19 Rarit Nai' Yesus annao nkono kre'o. In niit nai' Sebedius in aanh ein tuaf nua. Aan unu in kaann ee nai' Yakobus, ma in oirf ee, kaann ee nai' Yohanis. Sin nua sin nabarab sin pukat anbi koof es in nanan. 20 Nai' Yesus no'en sin am nak, “Hoe, ba'e sin! Iim he mituina' Kau nai!” Onaim sin nua sin annao nasaitan sin amaf nok in ameupt ein anbin kofa' naan, ma sin natuin nain Je.

21 Rarit Nai' Yesus nok tua haa' ein naan, sin neman ntean kota Kapernaum. Neno naan nateef nok atoin Yahudis sin neon onen.^h Onaim Nai' Yesus antaam anbi uim onen ma nanoni' tuaf anbi naan. 22 Oras sin nneen In uaban naan, sin nsanmakan, fin In nahiin batuur-batuur noni' naan in afan. Naan a'teta' na'ko atoin Yahudis sin tunggur agaam ein.ⁱ

23 Oras naan, anmui' atoin es, re' anniut sae. In ntaam nok anbi uim onen amsa'. Rarit nitu re' anbi atoni' naan anhunun 24 am nak, “Hoe! Yesus, atoin Nasaretas! Ho uum he msero' saa' mok kai? Ho uum he mureu' kai, ai'? Hai mihiin Ko. Ho re' ia, Atoni' re' Uisneno anba'an nain je he nreek Ee neem na'ko un-unu'. Ho re' ia, Uisneno In Atoni Kninu' re' ka mmui' fa sanat.”

25 Mes Nai' Yesus naskara' atoni' naan am nak, “Kaisa' mufeef! Ho mpoi nai mu'ko atoni' ia!”

26 Rarit niut re'uf naan, anhasu' atoni' naan naher-heer. Ma in npoi na'ko atoni' naan nok haan hunun. 27 Onaim abitan uim onen naan ansanmakan. Rarit sin na'uab ein am nak, “Amoo! Saa' na es re' ia! In naprenat niut re'uf ein he npoin, ma sin nneen Ee ma natuin In uaban. Ia noin fe'u, ai'? A'naef ee na'uab ate ro ma'tani'!”

28 Onaim sin nmurain nsaksiin ma natonan 'mo'et na'ko Nai' Yesus, na'ko kuan neu kuan annono mnateef anbi propinsi Galilea.

29 Oras sin npoin na'kon uim onen naan, Nai' Yesus annao neu nai' Simon ma nai' Anderias sin umi. Nai' Yakobus nok nai' Yohanis nokan amsa'. 30 Nai' Simon in ain baabf ee anmaniin, ma antuup anbi harak. Oras Nai' Yesus nok In atoup noin' ein antaman nbin umi naan, atoin es neem ma natonan nai' Simon am nak, “Ho ain baba' anmainiin.”

31 Onaim Nai' Yesus annao nasneku' bifee mnais amaininit naan. In nnaa' in a'niman, ma anfiit nafeen ee. Oras naan, in nareok nain. Rarit bifee mnasi' naan, anpoi ma ntuthae sin.

32 Oras maans ii he noi nmouf, too mfaun ein neikin are' amenat, ma are' tuaf re' anniut saen. Sin neik sin neun Nai' Yesus ma antotin turun-babat he nareko' sin. 33 Are' too mfaun anbin kota naan neman ma nauban naan anbin uim jaan in enon. 34 Too mfaun ein naan, amenat huma'-huma', ma Nai' Yesus nareko' sin ok-oke'. Ma In nriu' napoitan niut re'uf amfaun. Mes In ka nfee fa mainuan neu niut reu'f ein na'uab ein, natuin sin nahiin Je.

35 Neis noi nmeu re' meis'okan, Nai' Yesus anfeen ma annao nasaitan umi naan. In nnao neu baer ruman ma ma'koro', he n'onen ma na'uab nok Uisneno. 36 Oras nai' Simon nok in aok-bian ein anfenan, sin ka niit fa Nai' Yesus. Onaim sin nnao naim Je. 37 Oras sin nateef nok Ne te, sin na'uab neu Ne mnak, “Aam! Too mfaun ein naim Ko. Atkoen ok he tfain nai, tua.”

38 Mes In nataah am nak, “Reko msa'. Mes reko nneis, hit tnao teu kuan bian anteni' fe', re' anpaumakan etan re' ia. Au he utoon Rais Reko 'eu sin imsa'. Natuin Au meup uuf ii, es re' naan.”

39 Rarit In nnao nfuun am nateef anbi propinsi Galilea, he nsaksii ma natoon Rais Reko na'ko Uisneno anbi uim oen ein mese'-mese'. Anbi naan amsa', In nriu' napoitan are' kanan niut reu'f ein na'kon ameent ein.^j

40 Oras naan, anmui' atoin ameen nui-atroki'^k tuaf es neem neu Nai' Yesus. In nri'tuu ma antoit turun-babat na'ko Nai' Yesus am nak, “Aam! Ambaab maan kau, tua! Au uhiin 'ak Ho bisa mureko' au menas, henati' atoni' kaisa' nmai'nisin anteni' kau. Asar Ho mroim, tua.”

41 Ma Nai' Yesus ankasian atoni' naan, onaim In annona' In a'niman ma nreo' gwe. In na'uab am nak, “Au 'roim! Onaim Au ureko' ko nai!” 42 Nok askeken ate, menas naan namneuk nain, ma in nareko nfain anbi oras re' naan. 43 Rarit Nai' Yesus anreun atoni' naan he nfain, ma namnaub ee, 44 mnak, “Amneen murek-reko'! Au he 'ba'an ko! Ho mureko mfain jen, mes ka nabei' fa he mutoon meu sekau-sekau. Ho ro he mutuin ka'o Musa in aprenat. Onaim ho mnao muhuun meu a'naak rais pirsait Yahudi henati' in nparikas ho aom, he in nahiin batuur-batuur nak, ho mureko mfain jen, ai' kaah? Rarit ho meik fua'-turu' he anjair tanar nak, ho mtoit makasi, hena' too mfaun ein nahinin am nak ho mureko mfain batuur-batuur een.”^l

45 Mes atoni' naan anpoi nnao ma nsaksii na'ko baer jes neu baer jes anbi mee-mee. Es naan ate, too mfaun ein namin ranan he natefan nok Nai' Yesus, tar antea In ka bisa nakrira' fa In tuan ee anbi kota. Onaim In natua nbi bare-bare re' ruman ma ma'koro', re' na'roo na'ko kota. Ma too mfaun ein na'kon mee-mee, neman ma naim Je he nateef nok Ne.