Atoni' nakritik Usif Yesus anmatoom nok neno snasat
12
Neot es, nateef nok atoin Yahudis sin neno snasat, Nai' Yesus nok In atoup noin' ein annaon npe'on biak ein sin rene. In atoup noin' ein namnahan, es naan ate sin nhetun maak-gandum in punin ma nahan oras sin nnaon.a 2 Anbi naan, anmui' naan tuaf fauk na'kon partei pirsait Farisi re' annaa' naher-heran harat Yahudi. Ankius nitan Nai' Yesus In atoup noin' ein anmo'en on naan ate, sin nakain Ee mnak, “Ho atoup noin' ein anhetun maak-gandum nateef nok neno snasat! Kais on naan! Fin re' naan antanhai nrair hit atoran.”3-4 Mes Nai' Yesus nataah am nak, “On mee? Hi ka mimnau fa ka'o Daut in reta'? Ka'o Daut nok iin na sin taik ein na'roton natuin sin namnahan nmaten. Onaim in ntaam neu Uisneno In Tenar Onen. Rarit in nait utunu' re' a'naak pirsait ein anfee nrair sin neun Uisneno he sin nbukaen. Te kaah, utuun ein re' naan suma a'naak pirsait ein esan re' nmu'in hak he nbukae sin. A'teta' na'ko naan ate, ka bole fa. Rarit ka'o Daut sin anbukaen, mes ka tiit fa tuaf es he nasaan sin. Hi on re' ka mrees mihiin fa Uisneno In Suur Akninu'!b 5 Fin anbi Suur Akninu' naan, matu'i nmatoom nok a'naak rais pirsait ein sin mepu, es re' he ntuthaen anbin uim onen nateef nok neno snasat. Mes sin ka nsanan fa saa'-saa'.c 6 Amneen! Unu' fe', uim onen ro pentiing, mes oras ia rais jes pentiing anneis. Es re' Au, Mansian Batuur-Batuur re' ia. 7 Anbi Suur Akninu', Uisneno na'uab am nak, ‘Au roimk ii on nai: Au nggwin ro he nakrira' rais kasian, es nok es. Karu sin ka nmo'en fa on naan ate, sin mu'i-'turu' re' sin neik sin ma na'turu' sin neun Kau naan, ka ma'upan fa saa'-saa'.’ Onaim karu hi mihiin mirek-reko' Uisneno In Kabin ma Prenat naan ate, bait hi ka mikuu fa Au atoup noin' ein mak sin nsanan. On nai te sin ka nsanan fa te!d 8 Fin Au re' ia, Mansian Batuur-Batuur. Au 'mui' hak he ufeek 'ak, mansian ii bole nmeup saa' nateef nok neno snasat.”
Usif Yesus nareko' tuaf nateef nok neno snasat
9 Rarit Nai' Yesus annao nasaitan bare naan, he ntaam neu sin uim onen. 10 Anbi bare naan, atoin es in a'niman anmaet ao-biaf. Atoin Farisis sin namin ranan he nasaan Nai' Yesus, kar-karu In nareko' atoni' naan nateef nok neno snasat. Rarit sin nataan Ee mnak, “Tatuin hit atoran rais pirsait, atoni' bole nareko' tuaf nateef nok neno snasat, ai' kaah?”
11 Rarit Nai' Yesus nataah am nak, “Karu tuaf es in a'bib-kase es anmoufu ntaam anbi kona' nateef nok neno snasat, 'bib-kase naan in tuan ee ro he napoitn ee, ai' kaah?e 12 Onaim Uisneno anneek mansian, anneis na'ko tuaf re' anneek in a'bib-kase naan. Nok ranan naan, atoni' bole nmoe' rais reko nateef nok neno snasat.”
13 Onaim In na'uab neu atoni' re' in a'niman bian ee nmaet naan am nak, “Ba'e! Amnona' ho 'nimam naan neem!” Rarit in nnona' in a'niman amates naan, onaim nareok nain oras naan, on re' in a'niman bian.
14 Ankius nitan on naan ate, atoin Farisis sin nek-neuk nisik. Onaim sin nfeen annaon nasaitan uim onen naan. Sin nnao nma'akoran am nak, “Hit ro he taim ranan he ta'maet Ee!”
Uisneno es re' anpiir naan Nai' Yesus he nmeup neu Ne
15 Mes Nai' Yesus nahiin sin reon maufinu naan, es naan ate, In nnao neu bare bian. Too mfaun ii natuin Ee, rarit In nareko' ameent ein ok-oke'. 16 Mes In ntaar sin im nak, “Hi kais mitoon meu tuaf bian anmatoom nok Kau.” 17 In nmoe' on re' naan, natuin saa' re' Uisneno natoon nain neu In mafefa kninu' nai' Yesaya mnak,
18 “Amkius miit! In re' ia, Au tua renu' tua reka' re' Au 'piir 'ain Je.
Au 'neek Ee,
ma Au neek ii nmariin piut neu Ne.
Au of a'fee ma 'nona' Au Smanak 'eu Ne,
he In nnao nanoni' mansian am tuaf et uuf am pah,
anmatoom nok Au raan a'honis amneot am amnonot.
19 In ka npaas fa In a'basan.
In ka naikas ma na'ratan fa In tuan.
20 In neekn ee reko.
In ka nasusab fa es.
Hau re' he noi nat'iup ma natrii', In ka n'iup gwe fa.
Pauk piin marak aan'-ana', In ka nfukar niis ne fa.
In nanoni' piut, tar uuf am pah sin nahinin he natuin Uisneno In raan a'honis amneot ma amnonot.
21 Mansian na'ko uuf am pah of anpirsai Je, natuin sin nahinin nak, In re' naan, sekau.”f
Tunggur agaam ein nakuu Usif Yesus am nak, nitu 'nakaf es re' anfee Ne kuasa
22 Neot es, anmui' tuaf neik neu Nai' Yesus tuaf es, re' anniut sae tar antea in nfoor ma nmuu nmaet. Onaim Nai' Yesus nriu' napoitan nitu naan, ma nareok' ee. Rarit atoni' naan bisa niit ma bisa na'uab oras naan amsa'. 23 Ankius nitan on naan ate, too mfaun ein ansanmakan. Sin na'uab ein am nak, “Of oni' In re' ia, nai' Daut in sufan, re' mafefa kninu' Uisneno sin antui nain je na'ko afi unu'. In re' ia, oni' Tuaf re' hit tpa-pao!”
24 Mes oras atoin Farisis sin annenan on naan ate, sin ka ntoupun reko fa. Rarit sin na'uab ein am nak, “Hoe! Atoni' re' ia bisa nriu' nitu, natuin nitu 'nakaf Balsebul es re' anfee Ne kuasa.”g
25 Mes Nai' Yesus nahiin atoin Farisis sin uab ein naan. Onaim In natoon neu sin im nak, “Hi uab ein naan, tateenb ee te, ka nnao fa! Karu anbi pah es, in too gwi anmabanan nmafan-faink ein, ka neu fa he pah re' naan bisa nhaek nabar-baar. On naan amsa' anbi kota es in nanan, ai' anbi uim jes in nanan, es ankataas es, sin ro of anpe'en ma nbaits ok. 26 Onaim karu niutn ein anmamusun ma anmari'un es nok es ate, sin a'naakt ee ka bisa nnaa' fa prenat naan a'roo. 27 Mimnau! Hi nggwin anriu' nahinin nitu msa'. Sin npaek kuasa na'ko nitu, oo? Kahaf! Onaim hi kais mi'uab tafi'-tafi' mmak, Au 'paek nitu he 'riu' kuasa na'ko nitu. Hi nggwin kiim of esan re' nafekan am nak, saa' re' hi mikuku' sin meu Kau naan, ansaan. 28 Mes karu Au 'riu' nitu 'paek Uisneno In Asmaan ee In kuasan, naan nakrira' nak, Uisneno naan, batuur-batuur Usif re' anhake nrair et hi humam ma hi matam.
29 Karu abaakt ii he ntaam nabaak anbi atoin ma'tain es in umi, in ro he nfuut nahunun uim tuaf naan mates fe'. Rarit na' in nait neik bare' na'ko umi naan.h
30 Mimnau mirek-reko'. Tuaf re' ka nkua'noon fa nok Kau, in re' naan anmamuus nok Kau. Ma tuaf re' ka nturun ma nbaab Kau fa nbi Au mepu, in re' naan suma nareu' gwah.i 31 Onaim amneen mirek-reko' Au uabak re' ia! Uisneno nabarab he nnoes nain mansian ein sin sanat. Ma karu atoni' na'uab ka reko fa neu biak ein, Uisneno nabarab he nfee saok sanat neu ne. Mes karu anmui' tuaf nabrain he na'uab na're'uf Uisneno In Asmaan Akninu', Uisneno ka nsaok nain fa in sanat naan. 32 Karu atoni' na'uab re'uf neu Kau, Mansian Batuur-Batuur re' ia, Uisneno nabarab he nsaok nain in sanat. Mes karu atoni' na'uab na're'uf ma nraban Uisneno In Asmaan Akninu', Uisneno ka nsaok nain fa sanat naan tar antea nabar-baar amsa'!”j
Hau roet ma in fuan
33 Rarit Nai' Yesus na'uab piut neu atoin Farisis sin im nak, “Mitenab mirek-reko'! Hau roet arekot, nafua fua reko. Mes hau re'uf, nafua fua re'uf. Fin, na'ko roet ii in fuan, atoni' bisa nahini mnak, hau roet naan reko, ai' kaah.k 34 Mes hi on re' kaun aputa-kriut! Hi ka bisa mi'uab fa rais reko. Natuin saa' re' et atoni' in nekan, naan es re' of anpoi npeo' in fefan.l 35 Atoin neek arekot, in of na'uab reko, natuin anmui' rais reko ma tenab reko et in nekan. Mes amaufinut, ro tebes na'uab maufinu, natuin anmui' rais maufinu et in nekan.
36 Ampirsai Kau! Oras pah-pinan ia namsoup, Uisneno anparikas mansian ein ok-oke' sin rasin. Oras naan, es-es ate ro he nataah kuun in uaban re' ka ma'upan fa. 37 Onaim ampaant om! Fin Uisneno of antai hi uab ein, ma nafeek am nak, hi mipein hukun, ai' kaah.”
Atoni' ntoit he Usif Yesus nakrira' bukti
38 Anneen Nai' Yesus na'uab on naan ate, tunggur agama fauk ma atoin Farisis sin ntoot Je mnak, “Aam Tungguru! Hai mtoit he hai miit Ko mmoe' rais sanmakat, he njair bukti mnak, Ho kuasam naan batuur-batuur amneemn ii na'ko Uisneno.”m
39 Mes Nai' Yesus naskarak sin im nak, “Hoe! Mansian oras ia ka nroim fa he nneen ma natniin Uisneno! Suma nahini haa he nmo'en kuuk maufinu! Maski hi mtoit rais sanmakat, mes Au ka 'moe' utuin ki fa. Natuin unu' te, Uisneno nfee nrair rais sanmakat anpaek In mafefa kninu' nai' Yunus. Naan nanokab anrair!n 40 Nai' Yunus natua neno teun ma fai teun anbi iik kou' gwes in tain. On naan amsa' Au, Mansian Batuur-Batuur re' ia. Au of utua neno teun ma fai tenu 'bi nua fatu, bare 'maten.o 41 Oras neon amsoput, Uisneno njair afeek rasi, abitan Niniwe sin nhaken njarin saksii he nakuu ki mnak, ‘Hi aar ki re' ia, amonot!’ Unu' te, abitan Niniwe sin nnenan ma natniin Uisneno In mafefa kninu' nai' Yunus, onaim sin na'pisan ma nasaitan sin saant am penu sin. Mes hi te, kahaf! Te kaah, oras ia, Tuaf re' et hi tnaanm ein, ma'tani nneis na'ko nai' Yunus. Tuaf re' naan, es re' Au re' ia. Mes hi ka mroim fa he mfairoir Kau kre'o msa'.p 42 Oras neon amsoput, Uisneno njair afeek rasi, uis bifee bi Seba na'ko pasa' haa'-nua, anhake njair saksii. In nakuu ki ar-arki re' amonit oras ia mnak, ‘Hi ar-arki re' ia, amonot!’ Unu' te, uis bifee naan neem na'ko bare 'roo-'roo he niit nok in matan usif Soleman in mahinin. Te kaah, oras ia Tuaf re' et hi tnaanm ein, ma'tani nneis na'ko usif Soleman. Tuaf re' naan, es re' Au re' ia. Mes hi ka mroim fa he mfairoir Kau kre'o msa'.”q
Nitu re' anfani nteni' neu tuaf re' in natua niit anbi naa
43 “Karu niut gwi nriu' napoitn ee na'ko tuaf es, nitu naan annao neu baer ruman he nasnaas. Mes in ka napein fa bare he natua. 44 Onaim in natenab am nak, ‘Ahh! Au ka upein fa bare on nai te, reko nneis au 'fain he utua 'bi tuaf re' neno na au utua gwi.’ Rarit in ntebi nfain, onaim in niit bare naan nakninu' nrair, ma ankikin narek-reko' nrair bare naan. 45 Rarit nitu naan annao nhaman in partei nggwin tuaf hiut re' maufinu nneis na'ko ne. Onaim sin nnaon natuan nbin atoni' naan, onaim sin nauban naan ee. Onaim oras ia, atoni' naan in a'moin ii nre'u nneis. On naan amsa' anmatoom nok mansian oras ia.”r
Usif Yesus In nonot-asar re' batuur-batuur ein
46 Oras naan, Nai' Yesus na'uab nok too mfaun ein fe'. Onaim In ainaf ma In oirf ein neman he nateef nok Ne. Sin nhaken nbin mone', ma nreun tuaf he no'en. 47 Onaim anmui' tuaf neem natoon Ee mnak, “Aam! Ho aina' ma sin Ho ori' etan mone'. Sin he nateef nok Ko, tua.”s
48 Rarit Nai' Yesus nataah am nak, “Au aina' re' batuur ii, sekau? Ma au orif-tataf re' batuur ii, sekau?” 49 Onaim In nruur neu too mfaun ein re' natuin Ee, ma na'uab am nak, “Amkius kiim, sin ar-arsin re' ia, Au aina' ma Au orif-tataf sin. 50 Fin tuaf re' nmoe' natuin Au Ama' abit sonaf neno tunan In romin, naan sin Au nonot-asar sin re' batuur.”