Usif Yesus nareko' atoin amenat nateef nok neno snasat
3
Rarit Nai' Yesus anfani nteni' nbi uim onen. Anbi naan, In niit atoin es, re' in a'niman bian ee nmaet.
Nai' Markus 3:1-19
2 Anbi naan amsa', anmui' tuaf bian re' namin ranan piut-piut, he nasaan Nai' Yesus. Es naan ate, sin nsuntiur Gwe, he nahinin nak, In nareko' atoin amenat nok neno snasat, ai' kaah.
3 Rarit Nai' Yesus no'en atoni' re' in a'niman bian amates naan, am nak, “Ba'e! Uum he mhaek meu matan ia.”
4 Rarit In nataan sin ok-oke' mnak, “Karu tatuina' hit atoran rais pirsait, hit bole tmoe' saa' nateef nok neno snasat? He tareko', ai' tareu'? He tareko' atoin amenat, ai' he troor tisan?” Mes sin ka ntonin fa saa'-saa'.
5 Onaim Nai' Yesus In neekn ee nsuus anmaet, natuin sin npe'en sin roenk ein he npairoir sin harat anneis na'ko he npairoir atoni' 'niim amates naan. Rarit In natoo' ma In na'kena' In maatk ein neu sin. Rarit In nak atoni' naan am nak, “Ba'e! Amnona' ho 'nimam naan neem!” Onaim atoni' naan annona' in a'niman. Nok askeken ate, in a'niman nareok nain.
6 Rarit atoni' na'kon partei pirsait Farisi anpoin nnaon nasaitan uim onen naan. Ma sin annao natefan nok atoni' na'kon partei purtik Herodes, he sin bu'-bua' namin ranan he na'maet Nai' Yesus.
Usif Yesus nareko' too mfaun anbin nefo Galilea in ninin
7-8 Neot es, Nai' Yesus nok In atoup noin' ein annaon he nasnasan akre'o anbin nefo Galilea in ninin. Mes, natuin too mfaun ein anneen saa' re' In anmo'e nrair sin, es naan ate, too na'kon kuan-kuan neman he natuin Ee. Sin neman na'kon propinsi Galilea, Yudea, ma Idumea. Bian anteni' neman na'kon kota Yerusalem, Sidon, ma Tirus. Bian anteni' neman na'kon noe Yarden in panin et pasa' neon-saet. Sin aar sin namin ranan he natefan nok Ne. 9 Nai' Yesus anreek In atoup noin' ein he nami nfeen Ee koof es, natuin amneemt ein naan, sin namfaun. In nroim he na'uaba' anbi koof' ee in tunan, henati' In mamnita' ma sin neen In hanan.
10 Neon gwes ii, In nareko' niit amenat amfaun. Etun oras ia, are' amenat bian sin anmabe'un he nreo' naan Ee.a 11 Oras tuaf ein re' anniut saen sin niit Ee, sin ntoofn ok anbin Nai' Yesus In matan. Ma sin anhuun ein am nak, “Ho re' ia, batuur Uisneno In Anah!”
12 Mes In ntaar sin batuur-batuur am nak, “Kaisa' mitoon meu sekau-sekau saa'-saa' re' anmatoom nok Kau!”
Usif Yesus anpiir In atoup noni' tuaf bo'es am nua
13 Rarit Nai' Yesus ansae nbi 'toe'f es. In no'en naan atoni' fauk re' anmatoom nok In nekan, he natuin Ee. Onaim sin neem natuin Ee. 14 Rarit In nruur naan ahaa atoni' bo'es am nua. In nak sin am nak, “Au 'ruur ki he hi mituina' Kau piut-piut. Au he 'reek-haef ki he mnao mitoon Uisneno In Rais Reko meu mansian aar sin. 15 Ma Au of a'fee ki kuasat he mriu' niut reu'f ein mi'ko mansian ein.”
16-19 Atoup noni' tuaf bo'es am nua' ein naan, esan re':
nai' Simon (re' Nai' Yesus anteek ee te nak, nai' Petrus),
nai' Yakobus, nok in orif,
nai' Yohanis, (sin nua sin, nai' Sebedius in aanh ein. Nai' Yesus anteek nanesa' sin nua sin nak, ‘Boanerges’, re' neik hit uab ii te nak ‘'roots ee na'punu'’.)b
nai' Anderias,
nai' Felipus,
nai' Bertolomeos,
nai' Mateos,
nai' Tomas,
nai' Yakobus (nai' Alfius in aan mone),
nai' Tadius,
nai' Simon (atoni' na'ko partei purtik Selot),c
ma nai' Judas Iskariot (re' of he na'sosa' Nai' Yesus).
Tunggur agaam ein nasaan Usif Yesus nak, niut reu'f ein sin a'naak kou' gwe es re' anfee kuasat neu Ne
20 Rarit Nai' Yesus nok In atoup noin' ein ansanun nfanin na'kon a'to'ef naan. Ma sin ntaman anbin umi. Too mfaun ein neem nauban antein' Ee, tar Nai' Yesus sin ka napenin fa mainuan he nbukaen.
Nai' Markus 3:20-35
21 Ankius on naan ate, tuaf na'uab ein am nak, “Amkius miit Nai' Yesus. In nnika' nain In tuan, ma ka mapairori' fa.” In ba'aasr ein sin anneen uaba' naan, onaim sin neman he nok Ne nfain.
22 Oras naan, tunggur agama fauk na'kon kota Yerusalem, neman ma natonan abitan re' naan am nak, “Hi kais mituina' Nai' Yesus. Natuin niut reu'f ein sin a'naak kou' gwe, re' anteek ee te nak Balsebul, antaam anrair et In tuan, ma nfee Ne kuasat he In nriu' niut reu'f ein.”d
23 Oras Nai' Yesus anneen on naan ate, In nhaman nabuaba' sin am nak, “Rasi naan, ka matopu' reko fa, tua! Nok ranan mee, niut reu'f ein sin a'naak kou' gwe bisa nriu' nafani in tuan? 24 Karu anbi pah es, in too gwe nmatoen ma nmabanan piut, nok ranan mee henati' pah naan bisa nhaek nabaar? 25 Ma nbi uim jes in nanan, karu sin es-es ate anmanau nanan, nok ranan mee henati' sin bisa nhaek nabaran? 26 On naan amsa', karu niut reu'f ein sin anmamusun es nok es, ro sin of anbaits ok. Karu njair on naan ate, sin namre'un nmaten.
27 Karu atoin es he neem nabaak ai' nasiik bare' anbi atoin ma'tani' es in umi, in ro he nfuut naheran atoin ma'tani' naan nahuun fe'. Rarit na' in napein mainuan he nait atoni' naan in baer' ein.e
28 Onaim Au utoon 'ain ki: Uisneno nabarab ma npao he nnoes nain are' mansian ein sin saant ein. Ma karu sekau na'uab na're'uf tuaf es, Uisneno nabarab fe' he nsaok sanat naan. 29 Mes karu sekau-sekau na'uab na're'uf Uisneno In Asmaan Akninu', Uisneno ka nsaok fa in sanat naan, tar antea nabar-baar!”f
30 Nai' Yesus na'uab on naan, natuin sin na'uab na'reu'f Ee mnak, “Tuaf re' ia, anniut sae!”
Tuaf re' natuina' Uisneno In a'romin, sin re' naan esan re' anjarin Usif Yesus In nonot-asar amneot ein
31 Rarit Nai' Yesus In ainf ee nok In oirf ein sin neman neun umi naan, he natefan nok Ne. Sin nhaken nbin mone' ma anrekan tuaf he noe'n Ee. 32 Oras naan, Nai' Yesus antook ma na'uaba' nok too mfaun anbi uim je nanan. Rarit tua reek ein naan antaman ma natoon Ee mnak, “Aam! Ho aina' nok Ho oirf ein etan mone'. Sin he natefan nok Ko, tua.”
33 Mes Nai' Yesus nataah neik haan tanas am nak, “Au aina' ma Au ori'-tata' amneot, esan re' sekau?”