Usif Yesus anpiir naan In atoup noni' tuaf bo'es am nua
10
Rarit Nai' Yesus no'en In atoup noin' ein he neem nabuan. Onaim In nfeen sin kuasa he nri'un nitu ma nareko' amenat huma'-huma'. 2 Atoup noni' tuaf bo'es am nua re' In nreek haefan sin naan, esan re':Ahunut, in kaann ee nai' Simon (re' biasa sin nteek ee nak, ‘Petrus’),
rarit in orif, kaann ee nai' Anderias,
rarit nai' Yakobus,
ma in orif, kaann ee nai' Yohanis (sin nua sin naan, aam Sebedius in aanh ein).
3 Nai' Felipus,
nai' Bertolomeos,
nai' Tomas,
nai' Mateos (ahoik beo),
nai' Yakobus (aam Alfius in anah),
nai' Tadius,
4 nai' Simon (atuina' partei purtik Selot),a
ma nai' Judas Iskariot (re' of na'sosa' Nai' Yesus).
Usif Yesus anreek haefan In atoup noin' ein
5-6 Rarit Nai' Yesus anreek haefan In atoup noni' tuaf bo'es am nua, ma In naprenat sin im nak, “Au 'reek haefan ki mnao meu hit atoin Yahudis sin, natuin tuaf amfaun na'ko hit ni, ka natuin fa batuur anbi Uisneno In ranan. Sin re' naan, on re' 'bib-kase re' anseek. Es naan ate, hi kais amnao meu tuaf re' ka Yahudi sin fa, nahuum on re' atoin Samarias sin. 7 Amnao mitoon meu hit atoin Israelas sin im mak, ‘Antea in oors aa gwen he are' tuaf ein aar sin bisa njarin Uisneno Iin na.’ 8 Amnao mireko' amenat, mimonib mifani' amates, mireko' ameen nui-atroki', ma mriu' mipoitan nitu. Uisneno nathoeb anfee ki, mes In ka ntoit fa saa'-saa' he njair seun baran. Onaim oras ia, hi ro he mnao mithoeb meu biak ein, mes hi kais amtoit mifani' saa'-saa' na'ko sin. 9 Amnao nai ruum-ruum aah, joo. Kais meik roit, 10 oe-beti', pake-nose, a'pein haef, ai' teas. Fin atoni' ro he nfee neu ameput, saa' re' natai nok saa' re' he sin bisa nmonin.b
11 Karu hi mtaam meu kota es, ai' kuan es ate, hi maim tuaf re' he ntoup ki. Rarit mitua mbi naan, tar antea hi misaitan bare naan. 12 Karu hi mtaam meu tuaf es in umi te, mi'uab am mak, ‘Hoore tua! Saloom! Tetus ma ao-mina' na'ko Uisneno neu ki.’ 13 Karu uim tuaf aan antoup ki nok rek-reko, hi mtoit he Uisneno nfee tetus-athoen neu sin. Mes karu sin ka ntoup ki fa te, Uisneno ka nfee fa tetus-athoen neu sin imsa'. 14 Karu atoni' ka nroim fa he nneen ma natniin ki te, mpoi mi'ko umi naan, ai' kota naan, rarit mtekar askuku' na'ko hi haem ein, he njair tanar nak, sin ka nromin fa he nnenan ma natninan ki te, sin nasahan ma natahan kuuk.c 15 Noka'-nmeu te, oras Uisneno he nfee hukun neu mansian pah-pinan ia, In of nasanut hukun ma'fena' neu atoin Sodom ma Gomoras re' unu' fe'e te maufiun re'uf. Mes mimnau, joo! Fin In of anfee hukun ma'fena' nneisi nteni' neu tuaf-tuaf re' ka nromin fa he ntoup ki!”d
Usif Yesus natoon neu In atoup noin' ein am nak, sin of napenin susat ma ha'mu'it
16 “Mimnau! Au 'reek haefan ki nahuum on re' Au 'sonu' 'bib-kase ntaam neu aus fui apisut sin baark ein. Etun hi ro he mpaek ronef on re' kaun anonok. Ma hi neekm ein ro he namnonon on re' koor kefi re' ka naim nahiin fa rasi msa'.e 17 Mes ampaant om! Atoni' of anha'mui' ki nahuum on re' asu anrau ma npius na'maet 'bib-kase. Sin of anheer neik ki meu bare re' he nafekan rais pirsait. Ma sin of anbeos ki anbi sin uim oen ein. 18 Sin of anheer neik ki mnao meu gubernur ai' usif, natuin hi mituin Kau. Mes hi ro he mpaek oras re' naan he mitoon Au Rais Reko meu sin. Nok ranan naan, atoni' re' ka nahiin fa Uisneno, anneen rasi nmatoom nok Kau. 19 Mes karu sin nheer neik ki on naan ate, hi kais mimtau mmak, ‘Au he u'uab 'ak saa'?’ ai' ‘Au he utaah 'ak saa'?’ Kais mitenab on naan, fin antea in oras on naan ate, hi Ama' abit sonaf neno tunan natoon neu ki saa' re' hi ro he mi'uab. 20 Oras naan, saa' re' hi mi'uab ee jaan ka na'uu ma na'baa' fa na'ko hi tuam ein kiim, fin In Asmaan Akniun' ee es re' nanoni' ki he hi mi'uab saa'-saa'.f
21 Hi mkius kiim, fin anbi uim jes in nanan, karu anmui' tuaf anpirsai Kau, of in aok-bian aa kuun es re' naim ranan he na'maet ee. Rarit karu in aanh ee es re' apirsait, in aamf ee of es re' na'maet ee. Karu ainaf-amaf es re' apirsait, of sin aanh ein esan re' na'maet sin.g 22 Amkius kiim, of tuaf amfaun sin ok-oke' nsaken mates neu ki, natuin hi mituin Kau. Mes tuaf re' naran ma ntahan tar antea namsoup, Uisneno of ansoi nafetin naan ee.h 23 Karu atoni' anha'mui' ki anbi kota es ate, mfeen maen meu kota bian. Ro tebes! Au re' ia, Mansian Batuur-Batuur. Hi of ka mnao misoup maan fa kota anbi Isra'el sin ok-oke', mes Au 'tebi 'fain 'uum een.
24 Mansian ein biasa nhormaat neun tungguru tuaf es, anneis na'ko in atoup noin' ein. Ma sin anhormaat aam usi' es, anneis na'ko in ameupt ein.i 25 Karu atoup noin ii nanoni' ma nahiin on re' in tungguru, in nnaben ate, nanokab. Ma karu ameput nanoni' ma nahiin on re' in usin ate, in nnaben ate, nanokab amsa'.
Onaim mimnau! Karu tuaf no'en uim tuaf am nak, ‘Ho re' ia Balsebul, es re' nitu 'nakaf’ te, in uim je naan ee msa' napein kanaf re' ka reko fa ntein.”j
Kais mimtausan mansian, fin Uisneno npafa' ma npanat ki
26 “Onaim hi kais mimtausan tuaf-tuaf re' anraban ki. Fin saa' re' atoni' nmoo' je nbi baer ma'nifa'-ma'koro', of mamnita'.k 27 Saa' re' au unoni' ki sin ammees-mees, hi ro he mnao mitoon meu too mfaun. Ma saa' re' Au utoon ee mninu'-mninu' ro he mnao mitoon ee nfuun am nateef meu are' bare-bare. 28 Kais mimtausan mansian, fin sin suma na'mate haa mansian ii in aon, mes sin ka bisa fa he nare'u tuaf in asmanan. Onaim hi ro he mimtausan meu Uisneno, fin In kuun es re' anmui' kuasa he nporin nataam aof-ta'uf ma smanaf neu ai abar-barat. 29 Onaim amha'tain hi neekm ein naan. Atoni' na'sosa' koor maka' anbi 'masa' oosn ii ma'kaaf aah. Mes ka tiit tain fa es he nmoufun nmaet, karu hi Ama' abit sonaf neno tunan ka nfee fa mainuan. 30 Hi Ama' abit sonaf neno tunan antae niit ki tar antea saa' re' aan'-ana' krisi'. Hi 'naak fuun ein amfauk ein amsa', In nahiin sin. 31 Onaim hi kais mimtau! Natuin Uisneno naan ki ma'osa' nneis na'ko koor maak ein ok-oke'.”
Ammanaku' Usif Yesus ate, kais mimaeb om
32 Rarit Nai' Yesus na'uab anteni' mnak, “Tuaf re' nabrain he nmanaku' Kau nbi too mfaun ein sin humak ma sin maatk ein anbi pah-pinan ia, Au of a'manaku' ma uhiin je msa' 'bi Au Ama' abit sonaf neno tunan am 'ak, ‘Tuaf re' ia, Au Iin ja, tua.’ 33 Mes tuaf re' nasuan ma natotan kau nbi too mfaun ein sin humak ma sin maatk ein am nak, in ka nahiin Kau fa, Au msa' of utoon 'eu Au Ama' abit sonaf neno tunan am 'ak, ‘Au ka uhiin fa tuaf ia, tua.’”l
Usif Yesus antaam neem ma nmoe' mansian ein anmaraabn ein, ka naraem ok fa
34 “Hi kais mitenab am mak, Au 'uum he 'eik rais rame' 'eu pah-pinan ia. Fin Au 'uum he 'moe' mansian ein anmaraban es nok es. 35 Au 'uum a'bi pah-pinan ia, utuin saa' re' mafefa kninu' Uisneno na'uab anrari mnak,
‘Aan mone of anraban in amaf,
aan feto of anraban in ainaf,
ma aan nanef of anraban in ain babaf,
36 fin uim jes in nanan anmamusun es nok es.’m
37 Onaim tuaf re' batuur-batuur anroim he natuin Kau, in ro he nneek Kau nneis na'ko are' saa'-saa' ii ok-oke', anneis na'ko in ainaf-amaf, ma anneis na'ko in aanh ein. Fin karu kaah fa te, tuaf re' naan ka pantas fa he njair Au nggwin. 38 Fin tuaf re' anroim he natuin Kau, mes ka nroim fa he nasaah ha'mu'it, in ka pantas fa he njair Au nggwin.n 39 Tuaf re' nabarab ma naroitan in tuan he nmaet, natuin in natuin Kau, in of napeni 'honis piut-piut nok Uisneno. Mes tuaf-tuaf re' suma nroim he nmoin arahaa neu in tuan aa kuun, of in a'monin naan, namneuk on ahaa re' naan!”o
Uisneno of anbaras saa' re' atoni' anmo'e
40 “Tuaf re' antoup ki nok rek-reko, in ntoup Kau msa'. Ma tuaf re' ntoup Kau, in antoup Uisneno msa' re' anreek haefan Kau.p 41 Tuaf re' ntoup mafefa kninu' Uisneno, natuin mafefa kninu' naan na'uab rasi nmatoom nok Uisneno, Uisneno of anbaras neu ne on re' Uisneno nbaras neu mafefa kninu' es. Ma tuaf re' ntoup tuaf es, re' neek amne'o, natuin tuaf re' naan batuur-batuur natuin Uisneno In romin, Uisneno of anbaras neu ne on re' Uisneno nbaras neu tuaf es, re' in neekn ee mne'o. 42 Tuaf re' antoup tuaf es, re' aan ba-baun re'-re'uf, natuin in natuin Kau, ro tebes Uisneno of anbaras neu ne. Maski suma atoni' anfee oe ruum-ruum, Uisneno of ka nnikan ma niahan fa tuaf naan.”