Sin npukat naan ika' mfa-faun
5
Neot es, Nai' Yesus nanoni' tuaf amfaun anbi nefo Galilea in ninin.a Too mfaun ein neman ma nromin he natniin Uisneno In Kabin ma Prenat. Sin namfa-faun tar antea sin nmasiitr ein ma nmabe'un. Onaim sin he noi nsaen Nai' Yesus. 2 Anpaumaak bare naan, anmui' naan akiif kai ika' nakninu' sin pukat nbin meto'. Onaim Nai' Yesus niit kofa' nua ruum ein anhaken nbin naan. 3 Es na'ko koof nua' ein naan, nai' Simon iin ja. Rarit Nai' Yesus ansae neu nai' Simon in kofa', ma na'uab neu nai' Simon he ntorak kofa' naan neu oe je kre'o. Onaim In ntoko ma nmurai nanoni' neu too mfaun ein naan.b4 Nanoni' nrari te, In na'uab neu nai' Simon am nak, “Simon! Meik ho kofa' ia meu neof gwe tnaan ee kre'o, he ho musanut ho pukat ia meu naan. Hi of mipein ika' mfa-faun.”
5 Mes nai' Simon nataah am nak, “Usi' msa', Ho es-es! Hai mmeup fai jes a'teme-'teme, mes ika' fua' mese' msa' hai ka mipenif! Mes neu Aam, Ho es mu'uab on naan, maut he au 'soba' 'iit!”c 6 Onaim sin nasanut pukat naan. Rarit sin he nheer nafain' ee, mes pukat naan nahenu nrair nok ika' tuunb es, tar antea pukat naan anmurai natkai.d 7 Onaim nai' Simon ankoa' in partein nggwin na'kon kofa' bian he neman ntuurn ee. Rarit sin nnaun ika' ma nkuab ein neu kofa' nua tar antea nahenun, onaim ara kre'o te anreman. 8-10 Nai' Simon in partein akiif kai ika' sin, nai' Yakobus ma nai' Yohanis, aam Sebedius in aanh ein, anbin naan amsa'. Sin nsanmakan amsa', natuin sin napenin ika' mfa-faun naan. Oras nai' Simon Petrus niit saa' re' anjari nbi naan, in naen neem ma nri'tuu nbi Nai' Yesus In matan, ma na'uab am nak, “Au re' ia, tuaf es re' anmo'e nsaan amfau-rutu. Onaim reko nneis Usi' kais ampaumaak kau ntein.”e
Mes Nai' Yesus nataah am nak, “Kais mutenab naan kou'-ko'u. Au 'roim he 'paek ki. Hi aar ki re' ia, atoin amnaim ika'. Mes oras ia, Au he unoni' ki he maim tuaf he natuin Kau!”
11 Rarit sin nheer sin koof' ein ntean meto'. Onaim sin nnaon nasaitan are' saa'-saa', ma natuin Nai' Yesus.
Usif Yesus nareko' tuaf es, re' napein meen nui-atroki'
12 Anbi kuan es, Nai' Yesus nateef nok tuaf es, re' in aon ee no mes-mese' nameen nui-atroki'. Oras in niit Nai' Yesus, in nnao nri'tuu ma na'ruri' ntea afu nbi Nai' Yesus In matan. Onaim in nak, “Aam! Amturun maan kau fe', tua! Au uhiin 'ak, Ho bisa muneuk main au menas re' ia, he reko te, biak ein kais anmai'nisin kau. Asar Ho mroim, tua.”
13 Rarit Nai' Yesus ansoron In a'niman ma nreo' gwe. Onaim In na'uab am nak, “Au 'roim! Mureok nai!” Na'uab anrair on naan ate, menas naan namneuk nain. 14 Onaim Nai' Yesus namnaub ee mnak, “Mumnau murek-reko'! Ho mureok gwen, mes kais mutoon meu sekau-sekau! Ho ro he mutuin ka'o Musa in aprenat unu' naan. Onaim ho mnao meu a'naak rais pirsait, he in nparikas ho aom aan, he in nahiin nak, ho menas naan namneuk batuur-batuur, ai' kaah. Rarit ho mseun bain meik fua'-turu', he too mfaun ein nahinin batuur nak, ho mureok gwen.”f
15 Maski Nai' Yesus antaar ee on naan amsa', reta' anmatoom nok In kuasan naan, nasiin on ma nabeon on na'ko tuaf neu tuaf anbi mee-mee. Onaim too mfaun ein sin amneemk ein nasain on noe. Sin nmarinan he nneen In noin' ein. Rarit In nareko' tuaf amfaun na'kon sin menas huma'-huma'. 16 Mes Nai' Yesus nati' te nroim he napaisb On na'ko too mfaun ein, he nnao n'onen anbi baer ruman ma'koro'.
Usif Yesus nareko' ameen bua' tuaf es
17 Neot es, Nai' Yesus nanoni' tuaf anbi uim jes. Oras naan anmui' tuaf na'ko pukan partei pirsait Farisi ma tunggur agama tuaf fauk neman ma nokan nnenan neu Ne. Sin neman na'kon kuan-kuan anbin propinsi Galilea, propinsi Yudea, ma na'kon kota Yerusalem. Uisneno nfee kuasat neu Nai' Yesus he nareko' ameent ein. 18-19 Oras naan, anmui' naan tuaf fauk na'taeb neik tuaf es nameen bua' anbi 'boki'. Sin n'usaha ma'tani' he neik amenat naan, he Nai' Yesus nareok' ee. Mes umi naan na'keek mates nok mansian, tar antea he na'seek ok he ntaman amsa' ka bisa fa. Onaim sin neik amenat naan neu uim je porata' pakan. Rarit sin npukai porata' pakan naan, ma sin nasanut amenat naan nok nain in a'boki'. Sin nasaunt ee anbi too mfaun ein sin atnaank ein, nbi nain Nai' Yesus In matan. 20 Ankius on naan ate, Nai' Yesus nahiin neu sin npirsain nak, In bisa nareko' sin partei amenat naan. Onaim In na'uab neu ameen bua' naan am nak, “Ba'e! Au 'nose 'rair ho saant ein naan.”
21 Anneen Nai' Yesus na'uab on naan ate, atoin Farisis ma tunggur agaam ein nmurai nmaktaan ein am nak, “Hee'! Suma Uisneno Kuun es re' anmui' hak he nnoes nain sanat mansian. On nai te, in re' ia, sekau, tar antea nmoe' jon on re' Uisneno! Rasi ia, man'akan ma'tani'!”
22 Mes Nai' Yesus nahini ntea sin nekak nanan. Rarit In na'uab neu sin am nak, “Nansaa' am es hi mitenab mak Au re' ia u'uab rais man'akan? 23-24 Au re' ia, Mansian Batuur-Batuur. Ma Au 'mui' hak he 'fee ampon 'eu sanat mansian. Karu Au suma utoon 'eu ameen bua' ia m'ak, ‘Au 'ampon urair ho sanat,’ hi ka miit fa Au kuasat anbi pah-pinan ia. Mes karu Au 'ak, ‘Amfeen nai! Mait ho 'boik aan, ma mfain nai.’ Karu in nfeen nain oras naan, na' hi miit Au kuasat. Es naan ate, Au he ureko' ameen bua' ia, maut he hi mihini msa' mak, Au 'mui' hak he 'ampon sanat mansian.”
Onaim In nabani' nfain neu ameen bua' naan. Rarit na'uab neu ne mnak, “Ba'e! Amhaek nai! Mait ho 'boik aan, ma mnao nai!”
25 Nok askeken ate, amenat naan anfeen anhaek anbi too mfaun ein sin maatk ein. Rarit in nasaah naan kuun in a'boki'. Onaim in anpoi nnao nfain, ma nbo'is Uisneno. 26 Nitan on naan ate, sin ar-arsin ansanmakan. Rarit sin nanaib Uisneno In kaann ee na'rat-raat am nak, “Uisneno mapina'-makraha', joo! Neno ia hit tiit kuuk rais sanmakat es, teik hit maatk aa kuuk!”
Usif Yesus no'en nai' Lewi he natuin Ee
27 Ka 'roo fa te, Nai' Yesus anpoi na'ko umi naan, ma In nateef nok tua ahoik beo gwes, antoko nbi baer beos beo. Tuaf naan, kaann ee nai' Lewi.g Rarit Nai' Yesus nak ee mnak, “Uum he mutuin Kau!” 28 Anneen on naan ate, nai' Lewi anfeen nain oras naan, ma nnao nasaitan are' saa'-saa' anbin bare naan ok-oke', ma natuin Nai' Yesus.
29 Rarit nai' Lewi nmoe' fesat ko'u ma naskau Nai' Yesus neem nok anbi in umi. In naskau in partei ahoik beo nggwin ma tamu bian amsa', he sin nokan anbin fesat naan. 30 Mes anmui' tuaf fak-fauk na'ko partei pirsait Farisi, ma tunggur agaam ein, na'mua' ein anbin Nai' Yesus In atoup noin' ein am nak, “Nansaa' am es hi mtoko mmiah mibua mok atoin ka mapaek ein fa, on re' ahoik beo ma atoin reu'f ein? Atoin reok gwi kais amseor gom mok tuaf on re' sin!”h
31 Mes Nai' Yesus natonan sin am nak, “Ameent ein ro nperluun apairoir menas. Mes ao-miin ein ka nperluu gwe fa. 32 Au 'uum he 'urus tuaf-tuaf re' ka mapaek ein fa. Mes Au ka 'uum fa, he 'urus tuaf-tuaf re' annaben in tuan ee te, reko!”
Tunggur agaam ein anmatoen nok Usif Yesus anmatoom nok rasi tanaah ok
33 Rarit tuaf-tuaf na'ko partei pirsait Farisi ma tunggur agaam ein na'mua' ein neun Nai' Yesus am nak, “On nai, Aam! Nai' Yohanis Asranit in atoup noin' ein biasa nanaah ok ma n'oen ein. Atoin Farisis sin atoup noin' ein on naan amsa'. Mes nansaa' am es ho atoup noin' ein naah-niun piut-piut on naan? Sin ka nanaah nahiin jok fa. Neu saa'?”
34 Mes Nai' Yesus nataah sin neik uab manporin am nak, “Hi mihini mrair, karu anmui' fesat kabin, taumn ee ka nanaah ok fa, mes sin nbukaen tar namsenan. Karu baroit atoin ee nbi naan fe', sin ro he nbukaen bu'-bua' tar namsenan. 35 Mes of neot es, karu tuaf bian nheek neik baroit atoin aan fe', na' in partein nggwin ansusan. Oras naan sin nanaah ok.”
36 Rarit Nai' Yesus anfee uab manporin es antein, nak, “Ka tiit fa tuaf re' nait tai fe'u ma npaap ee neu baru kroe atpisu'. Fin karu tsaef baru naan ate, tai fe'u re' fe' anpaap ee naan, of annuun gon, ma baru kroe atpisu' naan of natpisu' nkoon. 37-38 On naan amsa' atoni' ka narai fa tua min-kaes fe'u neu 'saap rapu'. Fin a'sapa' naan of anpee', onaim tua min-kase naan nsai ruum-ruum. Onaim tua min-kaes fe'u ro he tarai je neu 'saap fe'u.i [Nok ranan naan, Nai' Yesus nanoni' sin am nak, In noin fe'u kais amseor gwe nok atoin Farisis sin noni' mnaa'.] 39 Atoni' re' niun niit tua min-kase re' natuun ee 'roo, ka nroim fa he niun tua min-kaes fe'u, natuin in nahini mnak, ‘Tua min-kase mnaa' naan, es re' aminat anneis-neisi!’”