Usif Yesus In Rais Reko
natuin
nai' Yohanis in tuis
Nai' Yesus naan, sekau?
1
Nahunu te, Uisneno In Kabin ma Prenat nmu'i nrair.Uisneno In Kabin ma Prenat naan, huma' mese' on re' Tuaf es.
Tuaf naan nok Uisneno.
Ma In es re' Uisneno msa'.
2 Oras neon gwe tunan ma pah-pinan ka njair fa fe',
Tuaf naan nok nain Uisneno.
3 Uisneno nmoe' are' saa' ii njair, npaek In Kabin ma Prenat naan.
Ka nmui' fa baer es, re' njari msa', karu Tuaf naan ka es re' anmoo' je fa.
4 In re' naan, oe je matan ma hau gwe uun na'ko 'monit.
Onaim atoni' re' napein 'monit re' namneo ma namnoon,
sin napein je na'ko Na.
In huma' mese' on re' Meu'-sine' re' npiin amsa',
he tuaf-tuaf re' anmonin nbin Meu'-sine' naan,
bisa nkisun, nahinin ma nakeon.
5 Meu'-sine' naan, npiin ma ntana' ntaam antea meis'okan;
ma meis'okan naan ka bisa ntahan naan Ee fa.
Fin Meu'-sine' naan anpiin ma ntana' piut.
6 Anmui' tuaf es antein, kaann ee nai' Yohanis. Uisneno nreek haefn ee msa',a 7 he njair saksii re' natoon anmatoom nok Meu'-sine' naan. Maut he are' mansian ii, sin aar sin bisa npirsain neun Uisneno, natuin nai' Yohanis in uaban naan.
8 Nai' Yohanis re' ia, ka Meu'-sine' naan fa. Mes Uisneno nreek haefn ee, he natoon anmatoom nok Meu'-sine' naan. 9 Fin Tuaf re' anjair Meu'-sine' batuur aan, he ntaam neem neu pah-pinan ia. Meu'-sine' naan anmoe' are' kanan rais amneot ma amnonot, mamnita' neun mansian ein ok-oke'.
10 Maski In nmo'e nrair are' saa' ii re' nbi pah-pinan ia, mes mansian re' abit pah-pinan ia ka nahiin naan Ee fa, oras In neem natua nbi ia. 11 Maski In neem natua nok Iin na kuun, mes sin ka nromin fa he ntoup Gwe. 12 Maski on naan amsa', mes are' mansian ii re' antoup Gwe ma npirsai Je, In nfeen sin hak he njarin Uisneno In aanh ein. 13 Naan nahuumb ok on re' nahoni' nafani' sin. Mes nahoni' na'fe'u sin re' naan, ka huma' mese' fa nok bifee nahoni' ri'ana'. Ma ka na'ko fa atoin es, re' nroim he napein sufa'-ka'uf. Fin sin njarin Uisneno In aanh ein, natuin Uisneno es anfeen sin a'moin fe'u naan.
14 Rarit ‘Uisneno In Kabin ma Prenat’ naan,
nmoni njair mansian.
In nmoin et hit sonak ma hit atnaank ii.
Hit tkius ma tiit In pinan ma krahan.
In npiin ma nakraah on re' naan, natuin In re' naan, Uisneno In Anah fua' mese'.
In nroim he naruru' ma nakrira' In nekan arekot neu kit,
natuin In amneikn ee, on re' naan.
Ma are' saa' ii ok-oke' re' In natoon sin anmatoom nok Uisneno, ro batuur.
15 Nai' Yohanis naan, es re' natoon anmatoom nok Tuaf re' ia. In nhunun ma nkoa' am nak, “Amneen ma mitniin, oo! Tuaf re' ia, es re' au ureta' 'rair Je 'ak, ‘Tuaf es of he nkoen On neem. In re' naan, ko'u nneis na'ko kau. Fin oras ka nahoni' kau fa fe', In nmoin nahunu nrair!’”
16 Nai' Yohanis na'uab on re' naan, natuin Tuaf naan anroim he naruru' ma nakrira' In nekan arekot. Ma fani-fani In nmoe' on re' naan neu kit aar kit. 17 Un-unu' te, ka'o Musa es re' antoup Uisneno In Atoran ma nasaunt Ee neu hit be'i-na'i sin. Mes oras ia, Tuaf naan, es re' Yesus Kristus, In es re' naruru' ma nakrira' Uisneno In nekan arekot neu kit. Ma are' saa' ii ok-oke', re' In natoon sin anmatoom nok Uisneno, ro batuur on naan. 18 Ka tiit tiit fa tuaf es, re' ankius niit Uisneno. Mes In Anah fua' mese' re' In nneek Ee naan, es re' naruru' ma nakrira' neu kit Uisneno In nekan. Ri'ana' naan, et In Aamf ee aon-bian. Fin In re' naan, es re' Uisneno msa'.
Nai' Yohanis Asranit naruru' ma nakrira' Usif Yesus
19 Neot es, atoin Yahudis sin a'naet ma kaes kou'n ein abitan Yerusalem anreek haefan a'naak rais pirsait tuaf fauk, ma tuaf fauk na'kon uuf nai' Lewi re' biasa ntuthaen anbin Uim Onen Uuf. Sin annaon neun noe Yarden in panin,b he nataan nai' Yohanis Asranit am nak, “Ho re' ia, Kristus re' Uisneno nba'an he nreek Ee neem, aa oo?”
Rarit in natoon neu sin am nak, in re' naan sekau. 20 In nmanaku' maat-maat am nak, “Kaah fa, tua. Au re' ia, ka Kristus fa, tua.”
21 Onaim sin nataan antein' ein am nak, “Karu on naan ate, ho re' ia, sekau? Ka'o Elia, oo?”
In nataah am nak, “Kaah fa msa', tua.”
Rarit sin nataan antein' ein am nak, “Kais-kaisa' ho re' ia, Uisneno In mafefa kniun aan, aa oo?”
In nataah am nak, “Kaah fa msa', tua.”c
22 Rarit sin nataan antein' ein am nak, “Karu on re' naan ate, ho re' ia, sekau? Mutoon kai fe'! Natuin hai he mfain he mitoon meu a'naet ein re' nreek haefan kai. Amturun ma mbaab maan kai, tua!”
23 Onaim in na'uab natuin saa' re' ka'o Yesaya ntui nain je mnak,
“Au re' ia, es re' tuaf re' anhunun ma nkoa' anbi bare 'roo ma ma'koro' mnak,
‘Hi ar-arki ro he mraip ma mi'sona' ranan,
he mseun ma mtoup Usi' In amneman!
Am'oop ma mnae ranan he mseun Gwe.’”d
24 Anbi tuaf ein re' neman na'kon kota Yerusalem sin atnaank ein naan, anmui' tuaf fauk na'kon partei pirsait Farisi msa'. 25 Rarit sin nataan nai' Yohanis am nak, “On nai, tua. Karu ho ka Kristus ko fa, ka ka'o Elia ko fa, ma ka Uisneno In mafefa kniun aan ko fa te, nansaa' am es na' ho musrain tuaf? Ho mupein hak mu'ko mee?”
26 Onaim nai' Yohanis nataah am nak, “Au re' ia, au usrain tuaf suma 'pake haa oe. Mes anmui' Tuaf es, et hi tnaanm ein re' hi ka mihiin Je fa. 27 In re' naan, ko'u nneis na'ko kau, maski au es unoni' atoni' uhuun. Maski au 'jari haa In aan renu'-aan reka' amsa', au ka umnees 'ok Ne fa, tua.”e
28 Rasin re' ia ok-oke' njarin nbin Betania, nbi noe Yarden in panin. Nai' Yohanis nok in atoup noin' ein nasranin tuaf anbin naan.f
Usif Yesus naan, on re' Uisneno In A'bib-kaes Ana'
29 Noka' on naan ate, nai' Yohanis ankius niit Nai' Yesus annao neem an'ain na. Onaim In na'uab am nak, “Amkius miit Atoni' nee, tua! In re' naan, Uisneno In A'bib-kaes Ana' re' njair fua'-turu' he nsaok nain mansian pah-pinan ia sin saant ein. 30 Atoni' re' ia, es re' au utoon Ee 'eu ki afi naa m'ak, ‘Of anmui' Tuaf es, re' npoi ma nboor neem. In re' naan, ko'u nneis na'ko kau, natuin In nahuun nain na'ko kau.’ 31 Unu' te, au ka uhiin fa 'ak, In re' naan, Kristus. Maski on naan amsa', mes au uhini 'rair. Onaim au ro he utoon 'eu atoin Israelas sin anmatoom nok Ne. Natuin rasi naan, au 'uum ma usrain tuaf a'paek oe.
32-33 Uisneno nhaefan kau he usrain tuaf a'paek oe. In natoon kau msa' am nak, ‘Of Tuaf es he neem neu ko. Rarit Au Smanak ansanu ntoko nbi Na. Tuaf naan of es re' neik Au Smaan Akninu', he nfee kuasa neu Au nggwin.’ Oras Tuaf naan neem, au ka uhiin 'ain Je fa. Mes oras au 'kius Uisneno In Asmanan ansaun neem na'ko neon gwe tunan, nahuum on re' kor-kefi ma ntoko nbi Na, na' au uhiin Je m'ak, ‘Tuaf re' naan, In es re' naan!’ 34 Au 'kius 'iit rasin naan nok au matak fuak ein kuuk. Rarit au utoon ki m'ak, ‘Tua amnemat naan, es re' Uisneno In Anah!’”
Usif Yesus anpiir naan kuun In a'toup noni' ahuunt ein
35 Noka' on naan ate, nai' Yohanis anhaek nok in atoup noni' tuaf nua. 36 Oras nai' Yohanis ankius niit Nai' Yesus annao npeo' naan, in na'uab am nak, “Amkius miit! In re' naan, Uisneno In A'bib-kase re' of anjair fua'-turu'!”
37 Rarit nai' Yohanis in atoup noni' tua nua' ein re' nneen in uab naan, nnao nasaitn ee, he natuin Nai' Yesus. 38 Onaim Nai' Yesus anniik, rarit In nkius niit sin natuin Ee. Onaim In nataan sin am nak, “On mee, tua? Hi mperluu Kau, oo?”
Sin nataan nafain' Ee mnak, “Rabi, Ho mutua et mee?” (Neik sin uab Aram, ‘Rabi’ in oten nak, ‘Aam Tungguru’.)
39 Rarit Nai' Yesus nataah am nak, “Iim he mkius kiim.” Onaim sin natuin Ee, rarit sin nkius In bare 'tua-ha'. Oras sin ntean, oni' nreuk haa maans ee nmaeb. Rarit sin nok Ne, tar antea maans ee nmouf.
40 Na'ko tua nua' ein naan re' anneen nai' Yohanis In uaban, rarit natuin Nai' Yesus naan, tuaf es, kaann ee nai' Anderias. In re' naan, nai' Simon Petrus in orif. 41 Anfain neem antea te, nai' Anderias annao naim in tataf nai' Simon am nak, “Taat! Hai miteef amrair mok Mesias!” (Neik sin uab, ‘Mesias’ in oten nak, ‘Kristus, Tuaf re' Uisneno nba'an nain Je na'ko unu' he nreek haefn Ee ntaam neem.’) 42 Rarit in annao naat In taatf ee neu Nai' Yesus.
Onaim Nai' Yesus ankius gwe, ma natoon ee mnak, “Ho re' ia, nai' Simon. Ho ama', es re' nai' Yohanis. Anmurai oras ia, atoni' anhaman ko nak, ‘Kefas’” (In oten huma mese' nok ‘Petrus’, es re' ‘fatu’.)g
Usif Yesus no'en nai' Felipus ma nai' Nitanel
43-44 Anbi naan amsa', anmui' tuaf es, kaann ee nai' Felipus. In kuan ee, et Betsaida. Nai' Petrus ma nai' Anderias na'kon naan amsa'.
Noka' on naan ate, Nai' Yesus nafeek he nnao neu propinsi Galilea. In nnao nateef nai' Felipus, rarit In no'en am nak, “Uum mutuin Kau, he mjair Au nggwin!”
45 Rarit nai' Felipus annao naim nai' Nitanel, onaim natoon ee mnak, “Ba'e! Hai miteef Tuaf re' ka'o Musa antui nain Je nbi Uisneno In Atoran. Uisneno In mafefa kniun' ein un-unu' ntui nmatoom nok Tuaf re' ia msa'. In kaann ee Nai' Yesus, na'ko kuan Nasaret. In aamf ee nai' Yusuf.”
46 Mes nai' Nitanel nataah am nak, “Atoin Nasaret!? Ka nmui' fa rais reok gwes re' anpoi ma nboor na'ko naan, oo!”
Onaim nai' Felipus nataah am nak, “Hoe! Kais on re' naan. Uum he mnao mkius kuum!”
47 Oras nai' Nitanel neem, Nai' Yesus niit nain je, onaim In nak, “In re' ia, atoin neek amneot ma amnonot! Fin anbi in nekan ka nmui' fa puta-kriut. In re' ia, atoin Israelas batuur-batuur!”h
48 Nai' Nitanel nataan am nak, “On mee m'es Ho muhiin kau, tua?”
Nai' Yesus nataah am nak, “On nai. Au 'iit a'rair ko oras ho mbi hau gwe mafon.i Oras naan, nai' Felipus ka neit no'en ko fa fe'.”
49 Rarit nai' Nitanel anmanaku' mnak, “Aam Tungguru re' ia, ro batuur Uisneno In Anah! Ma Ho amsa', of hit atoin Israelas sin Usif!”
50 Nai' Yesus nataan ee mnak, “Ho re' ia, mpirsai Kau natuin Au 'ak, ‘Au 'iit a'rair ko oras ho mbi hau gwe mafon naan’? Mumnau, fin ho bisa mkius are' rasi re' ma'tani' nneisi ntein!
51 Batuur! Au utoon 'ain ki. Hi of amkius neon gwe natfe'i. Onaim Uisneno In ameupt ein abitan sonaf neno tunan ansae-nsanun nbin Au aok-bian. Ma Au re' ia, Mansian Batuur-Batuur.”j