Nitu 'nakaf noik Usif Yesus
4
Rarit Uisneno In Asmaan Akninu' neik Nai' Yesus neu baer ruman na'roo na'ko kuan, he nitu 'naak kou' gwe noik ma nfuir Ee.a 2 Onaim in nanaah On fai bo' haa ma neno bo' haa nbi bare naan. Rarit In namnaah anmaet. 3 Oras In namnaah on naan ate, niutn ein sin a'naak kou' gwe neem noik ma nfuir Ee mnak, “Batuur, aa oo? Ho re' ia, batuur-batuur Uisneno In Anah? Karu batuur on naan ate, muprenat fatun re' ia he njarin amnahat nai.”4 Mes Nai' Yesus nataah am nak, “Matu'i et Uisneno In Suur Akninu' mnak:
‘Mansian ii ka nmoin fa na'ko mnaaht ahaa.
Mes sin ro he nneen ma natniin Uisneno In Kabin ma Prenat amsa',
ma nmoe' natuin In romin.’”b
5 Onaim nitu 'nakaf naan neik Nai' Yesus neu kota Yerusalem, es re' Uisneno In kota kninu'. Rarit In nasaeb Nai' Yesus neu Uim Onen Uuf ee In a'pupun. 6 Onaim nitu 'nakaf naan nak, “Karu Ho batuur-batuur Uisneno In Aanh ate, am'okar miit Ho tuam aan meu 'pinan ee nai. Fin matu'i et Uisneno In Suur Akniun' ee msa', mnak:
‘Uisneno of naprenat In ameupt ein na'kon sonaf neno tunan,
he npafa' ma npanat Ko.’
Anbi Uisneno In Suur Akniun' ee msa', matu'i mnak,
‘Sin of natnaat Ko npaek sin a'niimk ein,
maut he Ho aom naan kais nameen, ma Ho kais musbeut fatu msa'.’”c
7 Mes Nai' Yesus nataah am nak, “Matu'i et Suur Akniun' ee msa' mnak,
‘Uisneno naan, ho Usi'.
Onaim ho kais amsoob Ee.’”d
8 Rarit nitu 'nakaf naan neik Nai' Yesus neu 'toe'f es, re' a'raat re'uf. Onaim in nakrira' are' kanan pah anbin pah-pinan, ma sin pina' ma kraha' sin ok-oke'. 9 Nakrira' nrair sin on naan ate, nitu 'nakaf naan na'uab am nak, “Asar Ho mu'ruri' ma mu'besan kau, au of a'fee sin ok-oke' 'eu Ko.”
10 Mes Nai' Yesus anpaes ee mnak, “Hoe nitu! Ho mu'roo nai mu'ko ia. Fin Suur Akniun' ee ntui mnak,
‘Ho ro he mu'ruri' ma mu'besan Uisneno,
ma ho ro he mmeup meu Ne nmees jah.’”e
11 Anneen on naan ate, nitu 'nakaf naan annao nasaitan Nai' Yesus. Mes Uisneno In ameupt ein na'kon sonaf neno tunan, neman ma n'urus Nai' Yesus.
Usif Yesus anmurai nanoni' nbi Galilea
12 Oras naan, usif Herodes nataam nai' Yohanis Asranit anbi bui. Oras Nai' Yesus anneen niit on naan ate, In ntebi nfain neu Galilea.f 13 In nfain neu In kuan Nasaret, rarit In nkoon natua nbi kuan Kapernaum. Kuan naan et nefo Galilea in panin, et uuf nai' Sebulon ma nai' Naftali sin auf pusaak.g 14 Nok ranan naan, In nmoe' natuin saa' re' Uisneno In mafefa kninu' nai' Yesaya antui nain je mnak,
15 “Nai' Sebulon in afu, ma nai' Naftali in afu,
re' anpaumaak nefo Galilea, et noe Yarden in panin.
Atoin sona' ka atoin Yahudis fa natua etan naan amsa'.
16 Sin nmonin nbin meis'okan,
mes oras ia sin niit anrair Me'u.
Fin oras ia, Me'u naan anmeu'-siin,
neu sekau-sekau re' ka nahiin fa Uisneno fa fe'.”h
17 Anmurai na'ko oras naan, Nai' Yesus nanoni' tuaf mnak, “Hi ro he maikoit ma misaitan main hi saant ein, he mmoni kninu' nai. Fin oras ia, sekau-sekau gwah bisa mtaam amjair Uisneno Iin na.”i
Usif Yesus no'en akiif kai ika' tuaf haa he natuin Ee
18 Neon gwes, Nai' Yesus annao npeo' nefo Galilea in ninin. In nateef atoni' tuaf nua, sin nma'ori-tatan. Es kaann ee, nai' Simon, mes biasa sin nteek ee mnak, nai' Petrus. Ma in oirf ee, kaann ee nai' Anderias. Sin nkiif kain ika' nbin nefo, natuin sin nua sin naan, akiif kai ika'. 19 Onaim Nai' Yesus no'en sin im nak, “Hae, ba'e sin. Iim he mituin Kau nai! Hi biasa maim ika', mes oras ia, Au he unoni' ki he hi mjair tuaf amnaim tuaf he njarin Uisneno Iin na.” 20 Anneen anrarin on naan ate, sin nua sin nasaitan sin jala, ma nnaon natuin nain Nai' Yesus.
21 Rarit Nai' Yesus ankono kre'o. Onaim In niit nai' Sebedius in aanh ein. Ahuunt ee, kaann ee nai' Yakobus, ma in oirf ee, kaann ee nai' Yohanis. Sin nua sin nabarab pukat anbi kofa' nok sin amaf. Onaim Nai' Yesus no'en sin nua sin he natuin Ee. 22 Anneen anrarin on naan ate, sin nasaitan sin amaf ma sin kofa' naan, ma natuin nain Nai' Yesus.
Usif Yesus nanoni' tuaf ma nareko' ameent ein
23 Rarit Nai' Yesus sin nnaon nfuun am nateef anbin propinsi Galilea, he In nanoni' tuaf anbin atoin Yahudis sin uim onen sin. In nanoni' sin anmatoom nok Uisneno In Rais Reko, ma natoon ranan he atoni' bisa natuin Uisneno In aprenat. Ma In nareko' too mfaun ein amsa' na'kon sin menas huma'-huma'.j 24 Ka 'roo fa te, rasi anmatoom nok Nai' Yesus In a'mo'en sin naan, masina' ma mabeno' anfuun am natefan propinsi Siria. Rarit too mfaun ein neman ma neik ameent ein re' namenan huma'-huma' neun Ee. Sin neikin tuaf amsa' re' anniut saen, re' namaunun a'bibi, ma abuat ein. In nareko' sin ok-oke'. 25 Oras naan, too mfaun ein neman ma natuin Ee. Sin neman na'kon propinsi Galilea, ma na'kon pah Kota Bo'es, re' sin nteek ee mnak, Dekapolis. Bian anteni' neman na'kon kota Yerusalem, na'kon propinsi Yudea, ma na'kon noe Yarden in pasa' neon-saet.