Bi Maria n'oop miin foo meni' nbi Usif Yesus In haen
12
Rarit neno nee fe'e te, na' oras neon Paska ntea, Nai' Yesus sin neman nbin kuan Betania. Nai' Lasarus sin natuan nbin naan. Nai' Lasarus naan, es re' amates re' Nai' Yesus namonib nafain' ee. 2 Rarit sin nahanan, he Nai' Yesus anbukae oras fai nok sin. Bi Marta es antuthae nbi mei. Nai' Lasarus antoko nbi mei nabu-bua nok Nai' Yesus. 3 Rarit bi Maria nait miin foo meni' asli bootr es, re' ma'osa'. Onaim in n'oop mina' naan anbi Nai' Yesus In haen. Rarit in npaek in a'naak fuun ein he nnoes Nai' Yesus In haen. Onaim umi naan in nanan foo meni' oke'.a b4 Mes Nai' Yesus In atoup noin es, kaann ee nai' Judas Iskariot, re' of na'sosa' Nai' Yesus, anprotees am nak, 5 “Hoe! Nansaa' am es in ka na'sosa' fa miin foo meni' ia? Fin in osan on re' tuukn es in kai toon es. Reko nneis in na'sosa', he nfee roit ein neu atoin ama'mui't ein!”c 6 Te kaah, nai' Judas na'uab on naan ka natuin fa in nneek atoin ama'mui't ein. Mes natuin in re' naan, abakat. In njair Nai' Yesus sin anaa' roit, mes in nakpo'e roit na'ko kas.
7 Mes Nai' Yesus nataah am nak, “Amkonan bifee re' ia. Natuin in natunu' nain miin foo meni' ia, he nabarab Au aok amates he sin nsuub Kau. 8 Atoin ama'mui't ein etan hi tnaanm ein piut. Mes Au of ka ubu-bua 'ok ki fa piut.”d
A'naak rais pirsait Yahudi sin a'naakt ein namin ranan he na'maet nai' Lasarus
9 Rarit atoin Yahudis amfaun nahinin nak, Nai' Yesus et kuan Betania. Sin neman he nkius Gwe. Sin neman he nkius nai' Lasarus amsa'. Fin sin annenan am nak, Nai' Yesus namonib nafani' nai' Lasarus na'ko in a'maten. 10 Mes a'naak pirsait ein sin a'naakt ein nabuan he namin ranan he na'maet nai' Lasarus amsa'. 11 Fin tuaf amfaun na'kon atoin Yahudis sin anneen anmatoom nok nai' Lasarus in retan, rarit sin npirsain Nai' Yesus. Sin ka nromin fa he natniin atoin Yahudis sin a'naet ma kaes kou'n ein antein.
Usif Yesus antaam anbi kota Yerusalem on re' kaes ko'u
12 Noka' on naan ate, too mfaun ein re' neem he nok anbin fesat Paska nbin kota Yerusalem naan, annenan am nak, Nai' Yesus he neem neu naan amsa'. 13 Rarit sin annao n'oten hau noo peta, he npaek sin he nseun Nai' Yesus In amneman, nahuum on re' In re' naan kaes ko'u. Onaim sin aar sin anhunun ma nsakanan ok-oke' mnak,
“Hosana! Hai mpures ma mbo'is Uisneno!
Fin Uisneno naruru' ma nakrira' In nekan arekot neu Isra'el in Usif,
re' neem neik Uisneno In kanan!”e
14 Rarit Nai' Yesus napein bikaes keledai feu' gwes, onaim In nsae. Naan on re' matu'i nbi Uisneno In Suur Akninu' mnak,
15 “Hi abit kota Yerusalem, kais mimtau!
Hi abit kota ‘Sion’ re' ia, amkius meu ne fe'!f
Fin hi Uisf ee neem!
In neem ansae bikaes keledai feu' gwes.”g
16 Oras naan, Nai' Yesus In atoup noin' ein ka nahinin fa rasin naan in sairt ii saa'. Mes oras In nmoni nfain na'ko In a'maten, ma Uisneno nait na'rat-raatn Ee, na' sin namnau niit rasin re' Uisneno In Suur Akninu' ntui nmatoom nok Ne. Sin namnau atoni mfaun ein sin rais hormaat neun Ee msa'.
17 Oras Nai' Yesus namonib nafani' nai' Lasarus na'ko in a'maten, rarit anhaman naan ee npoi na'ko nopu naan, anmui' too mfaun nabu-buan nok Nai' Yesus. Onaim oras ia, sin nareta' neu-mneman anmatoom nok saa' re' unu' te, sin nkius nitan kuuk. 18 Es naan ate, too mfaun ein neem anseun Nai' Yesus anpaumak-maak kota Yerusalem, natuin sin nnenan nak, In nmo'e nrair rais sanmakat naan. 19 Rarit atoin Farisis sin na'uab ein am nak, “Phue'! Amkius fe'! Mansian ii ok-oke' abit pah-pinan ia antaisibun he natuin Ee! Of in amsoupn ii, hit es re' asusat! Karu on naan ate, hit he tmoe' on mee ttein?”
Anmui' atoin Yunanis tuaf fauk re' nroim he nateef nok Usif Yesus
20 Anmui' tuaf fauk na'ko atoin Yunanis re' ka Yahudis fa, re' neem anbi kota Yerusalem nabu-bua nok atoni' bian sin, he nokan nbin fesat Paska nbin naan. Sin he na'besan neun Uisneno msa'. 21 Onaim sin nateef nok nai' Felipus, na'ko kuan Betsaida nbi propinsi Galilea. Sin ntotin am nak, “Ba'e! Hai he miteef mok Nai' Yesus.”
22 Rarit nai' Felipus annao natoon nai' Anderias. Onaim sin nua sin annao na'uab nok Nai' Yesus. 23-24 Rarit Nai' Yesus natonan sin im nak, “Au oors ii ntea nrair. Onaim Au ro he 'maet fe', na' Uisneno nait na'rat-ratan Kau. Batuur on naan! Hit tataib nok fini. Karu hit tseen maak fini, in ro he nreu' anbi auf gwe fe', na' in nmoin, he in bisa napoitan afa mfa-faun. Fin karu ka on fa naan, in fe' nabaar maka' fua' mees' aah. 25 Tuaf re' ka nfairoir ma ntoe fa Uisneno In romin, natuin in nneek naan in a'monin anbi pah-pinan ia, of a'monin naan namre'u nkoon. Mes tuaf re' nroim he nnona' ma nkonan in a'monin anbi pah-pinan ia, of napeni 'monit re' amneot ma amnonot re' ka natfeek niit fa.h 26 Tuaf re' he ntuthae Kau, in ro he nok Kau piut. Es naan ate, Au 'bi mee te, Au ameupt ein anbin naan amsa'. Fin karu nmui' tuaf re' ntuthae Kau, of Au Ama' abit sonaf neno tunan anhormaat ee.”
Usif Yesus natoon nain anmatoom nok In a'maten
27 Nai' Yesus antuut antein am nak, “Au 'suus a'maet. Mes Au he 'ak on mee 'tein? Au ro 'toit 'ak, ‘Aam! Mufetin Kau, maut he Au kais a'maet oras ia,’ ai'? Kaah fa, tua! Au ka 'toit fa on naan, natuin In anhaefan Kau 'uum, maut he Au 'maet. 28 Onaim re' Au 'toit ji, on nai: ‘Aam. Maut he Au utuin Ama' Ho roim aan, tua, maut he mansian ii ok-oke' naikas na'rat-ratan Ama' Ho kanam naan, tua.’”
Onaim anmui' hanaf es na'ko neon gwe tnanan nak “Au 'aikas u'rat-ratan Au kanak. Ma Au he 'aikas u'rat-ratan ufani' 'tein' ee msa'.”
29 Ma too mfaun ein re' anhaken nbin naan, anneen hanaf naan, ma sin nak, “Hae! Anmu'i 'rotos!”
Bian antein na'uab ein am nak, “Kahaf! Uisneno In ameupt es na'ko sonaf neno tunan na'uab nok Ne.”
30 Mes Nai' Yesus na'uab am nak, “Hanaf fe'e na neu ki, ka neu Kau fa. 31 Oras ia, mansian pah-pinan ro he nbaisenun n'anin Uisneno, he In nafeek sin rasin. In ro he nriu' napoit Amoe' Maufinu msa', re' annaa' aprenat anbi pah-pinan ia. 32 Oras atoni' nakfirit Kau nbi hau nehe, Au of a'heer mansian ii ok-oke' he sin anpirsai Kau.” 33 (In na'uab on naan, he naruru' ma nakrira' In a'maten nok ranan on mee.)
34 Rarit atoin ein anbin naan, anmaktaan ein am nak, “Hai mneen miit mi'ko Uisneno In Atoran nak, of Kristus anmoin nabar-baar. Kristus nok Mansian Batuur-Batuur re' naan, huma' mese', oo? Onaim nansaa' am es Ho mak, ‘Sin of nakfirit Mansian Batuur-Batuur anbi hau nehe?’ Te Mansian Batuur-Batuur re' naan, sekau?”i
35 Nai' Yesus nataah am nak, “Ka 'roo fa ntein, me'u na'ko Kau ka ntana' ki fa gwen. Onaim oras Au 'bi ia fe', hi ro he mmoin mimneo ma mimnoon, maut he maufinu re' nbi hi neekm ein, kais an'eek naan me'u naan. Fin tuaf re' nnao nbi meis'okan, ka nahiin fa in he nnao neu mee. 36 Oras me'u na'ko Kau nmui' fe', hi ro he mpirsai Kau, maut he hi mjair tuaf re' mmoni mbi me'u, he mihiin im mak, hi he mnao meu mee.”
Nai' Yesus na'uab anrair on naan ate, In antet-koit na'ko too mfaun ein, maut he In bisa nmees kuun.
Atoin Yahudis sin ka npirsai fa Usif Yesus
37 Maski Nai' Yesus anmoe' rais sanmakat amfaun anbi too mfaun ein sin humak ma sin matak, mes sin ka nromin fa he npirsai Je. 38 Naan on re' Uisneno In mafefa kninu', nai' Yesaya, natoon nani mnak,
“Usi', oo! Ka nmui' fa tuaf re' npirsai hai uab ein!
Fin maski Ho mururu' ma mukrira' mrair Ho kuasam,
mes mansian ii nforon nmaten, tua!”j
39 Es naan ate, atoin Yahudis bian sin ka bisa npirsai fa Uisneno oras ia, on re' nai' Yesaya ntui nbi bare bian am nak,
40 “Uisneno nmoe' sin neek ein on re' nforon,
maut he sin ka bisa nkisu ntenin fa.
In nkonan sin neek ein anjari fatu,
he sin kais nahinin nok reko.
Amkonan sin on re' naan,
he sin kais antebi nfain neman he naim Kau,
ma Au kais ureko' sin.”k
41 Nai' Yesaya na'uab on naan, natuin in nkisu nrair Nai' Yesus In pinan ma krahan, rarit in nareta' nain anmatoom nok Nai' Yesus.
42 Maski on naan amsa', mes too mfaun ein anpirsain Nai' Yesus. Ka suma atoin biasa fa nmees, mes anmui' atoin Yahudis sin a'naet ma kaes kou'n ein bian re' npirsai Je msa'. Mes sin ka nmanaku' fa Nai' Yesus anbi too mfaun ein sin humak ma sin matak, natuin sin namtaun, of atoin Farisis sin anriu' napoitan sin na'kon uim onen. 43 A'naet ein sin ka nfairoir ma ntoe fa karu Uisneno es anbo'is sin, natuin sin nroim nanesib he napenin bo'is na'ko mansian.
Usif Yesus In Kabin ma Prenat naruru' ma nakrira' atoni' in baturan
44 Rarit Nai' Yesus na'uab nok haan ma'tani' mnak, “Tuaf re' npirsai Kau naan, in ka npirsai Kau fa 'mees jah, mes in npirsai Tuaf re' nhaefan Kau msa'. 45 Fin karu atoni' niit Kau, in niit Tuaf re' nhaefan Kau msa'. 46 Au 'uum he 'jair on re' me'u 'bi pah-pinan ia. Maut he mansian ii aar sin re' npirsai Kau, ka nmonin fa nbin meis'okan. 47 Karu nmui' tuaf re' nneen ma natniin Au Uab ein, mes ka nmoe' natuin sin fa, Au ka ufeek fa in hukun. Fin Au sairt ii Au 'uum a'bi pah-pinan ia, ka he ufeek fa mansian ii in hukun, mes Au he 'soi ufetin sin na'ko sin sanat ma penu sin. 48 Mes mansian ii aar sin re' ntorak Kau ma ka ntoup fa Au Uab ein, anmui' in afeek rasi. Fin oras neon amsoupt ee neem, Uab ein re' Au u'uab 'iit sin, of es re' nafeek atoni' humaf on re' naan in hukun. 49 Natuin Au ka u'uab 'iit fa 'eik Au kaank aa kuuk. Mes Au u'uab 'eik Au Ama' abit sonaf neno tunan In kanan. Fin In re' naan es re' anhaefan Kau. Ma in es re' naprenat Kau nak, Au ro he u'uab 'ak saa'. 50 Au uhini msa' 'ak, In aprenat naan neiki 'monit re' amneot ma amnonot re' ka natfeek niit fa. Es naan ate, Au u'uab utuin ahaa saa' re' Au Ama' nreun he Au u'uab.”