Usif Yesus natoon nain anmatoom nok Uisneno In Uim Onen Uuf ee in atseran
13
Rarit Nai' Yesus nok In atoup noin' ein he npoin na'kon Uim Onen Uuf. Oras sin he npoin, In atoup noni' tuaf es naruur Ee Uim Onen Uuf naan, ma na'uab am nak, “Bait Ho mkius miit ia fe'! Umi ia reokn ii kaah! Sin nbakin in faut kou'n ii reko 'maten!”
Nai' Markus 13:1-27
2 Mes Nai' Yesus nataah ee mnak “Uim Onen ia, ro namaas! Mes ka 'roo fa te, sin of anpukai natserab are' fatun re' ia.”
Neon amsoupt ein sin taanr ein
3 Rarit Nai' Yesus sin nnaon neun a'to'ef Saitun, ma ntokon nbain ein an'anin Uisneno In Uim Onen Uuf. Rarit In atoup noin' ein tuaf haa, neman nmesen ma na'uab nok Ne. Sin esan re' nai' Petrus, nai' Yakobus, nai' Yohanis, ma nai' Anderias. 4 Sin nataan Ee mnak, “Aam! Bait Ho mutoon mufani' miit kai Ho uabam fe'e na. Reka' te in oors ii ntea? Ma in taanr ein, onan re' mee?”
5 Rarit Nai' Yesus nataah am nak, “Asar hi mpanat mirek-reko', he kais napoi naan ki. 6 Natuin of anmui' tuaf amfaun re' neman ma npaas sin a'baask ein am nak, ‘Au re' ia, Kristus, Atoni' re' Uisneno nba'an nain Je na'ko unu'.’ Onaim sin napoi naan tuaf amfaun. 7 Karu hi miit atoni' anmakenan, ai' hi mneen uab anin nak anmui' makenat et mee-mee, hi kais mimtau. Natuin are' rasin naan ro he nboran, mes neon amsoupt ein ka ntea fa fe'. 8 Fin uuf es of anfeen ma nmaraban uuf es. Ma pah es of anmakeen nok pah es. Tainuuns ii anhasu' anbi mee-mee. Amnaahs ii of ma'tani' msa'. Are' rasin re' ia anjarin tanar namnees on re' bifee ma'apu' re' nnaben meen mahoni'.
9 Onaim hi aar ki ro he mpanat mirek-reko'. Sin of neman ma nheek ki, rarit anheer neik ki neu umi feek rais pirsait. Ma sin of anbeos ki nbi uim oen ein sin naank ein. Ma sin of anfuut neik ki neu are' anaa' apreent ein, natuin hi mituina' Kau. Mes rasin naan amsa', anjarin asraak he hi mitonan sin are' rasi anmatoom nok Kau. 10 Fin Uisneno In aanh ein ro he nnaon ma natoon nahunun Au Rais Reko neun are' uuf-uuf anbin pah-pinan ia, rarit na' neon amsoupt ein antean. 11 Mimnau! Karu sin nfuut neik ki neu umi feek rasi, hi kais mimtau ma mitenab am mak, ‘Au he u'uab 'ak saa'? Ai' au he utaah 'ak saa'?’ Karu in oors ii antea, hi mi'uab mituina' saa' re' Uisneno In Asmaan Akninu' natoon ee neu ki.a
12 Anbi uim jes in nanan, karu tuaf es anpirsai neu Kau, of in orif-tataf sin es re' namin ranan he nroor niis ne. Karu aanh ee es re' anpirsai, of in aamf ee kuun es re' neikn on anroor niis ne. Ma karu in ainaf-amaf anpirsai Kau, of sin aanh ein es re' anroor niis sin. 13 Onaim of biak ein nsaken niis ki, natuin hi mpirsai meu Kau. Mes sekau es re' naran tar antea namsoup, Uisneno ro nafeitn ee ma nfee ne 'honis.”b
Ampanat mirek-reko' natuin neon amsoupt ein anpaumaakn een
14 Nai' Yesus na'uab ankono mnak, “Tuaf es re' anmaufiun re'uf of he neem. In ntaam ma nhake nbi baer nuni nbi Uisneno In Uim Onen Uuf, re' ka pantas fa neu ne, tar in nhai'niis bare naan. Es naan ate, Uisneno annao nasaitan bare naan. Karu hi miit rasi naan, hi mpanat mirek-reko'! (Sekau es re' anrees re' ia te, ro he npaant on!) Naan anjair tanar nak neon suust ein anpaumakan re'-reu'f een. Karu hi miit on naan ate, abitan propinsi Yudea amfeen maen nai meu 'toe'f ein.c 15 Ma hi ro he maen rab-raab, he kais amsiraak om. Karu tuaf mee npoi nrair na'ko in umi, kais antebi nfain he nait bare' bian antein. 16 Ma tuaf re' anbi rene, kais antebi nfain he nait tai nusat antein. Ro in naen ankoon!d 17 Re' ansuus anneis-neis ji, es re' bifee ma'apu', ma bifee re' nasuus ri'ana'. Fin sin ka bisa naen nanan fa. 18 Onaim reko nneis hi m'onen ma amtoit he rais amre'ut naan kais neem nateef nok oras uran-anin. 19 Fin oras naan, ma'nuuk ii kou' re'uf! Anmurai na'ko Uisneno nmoe' pah-pinan ia tar antea neno ia, ka tiit fa suust es kou'n ii on re' naan. Ma atoni' of ka niit anteni' fa susat nahuum on re' naan.e 20 Karu Uisneno ka na'paran fa neon suust ein naan, ka tiit fa tuaf he nmoni nkoon. Mes natuin Uisneno nneek niis In aan piir ein, es naan ate In na'paran neon suust ein naan.
21 Karu nenon naan antean ate, hi of amneen biak ein na'uab ein am nak, ‘Amkius nai! Kristus es ia!’ Mes tuaf bian nak, ‘Kristus et nee!’ Mes nati' hi kais amneen, oo! 22 Ma of anmui' atoni' re' anpoi ma npaas in a'basan am nak, ‘Au re' ia, Kristus!’ Bian anteni' nak, ‘Au re' ia, Uisneno In mafefa kninu'.’ Sin of anmo'en rais sanmakat huma'-huma' neik kuasat na'kon niut re'uf he nputa-kriu. Sin namin ranan huma'-huma' he karu reko te, sin nasekeb Uisneno Iin na. 23 Hi ro he mpanat mirek-reko'! Neon suust ein naan ka ntean fa fe', mes Au umnaub 'ain ki sin!”
Mansian Batuur-Batuur In amneman
24 Rarit Nai' Yesus antaru ntein In uaban neu In atoup noin' ein am nak, “Karu neon suust ein ankonon ate,
‘Maans ii of nameis'ook,
ma fuun ii of nasab-saab amsa'.f
25 Akfuun ein of anbamoufun na'kon neon gwe tnanan,
ma are' kuasat abitan neon gwe tnanan anrikraakn ok.’g
26 Rarit na' are' mansian of niit Kau, Mansian Batuur-Batuur re' ia. Of Au 'uum u'ko neon gwe tunan. Ma are' too mfaun ein of niit Au kuasak, ma Au pinak ma krahak ok-oke'.h 27 Rarit Au of a'reun Uisneno In ameupt ein na'kon sonaf neno tunan, he nnaon nabuaba' are' tuaf ein re' Au 'piri 'rair sin, na'kon pah-piin ii tuuk am tuuk, na'kon pasa' neon-saet tar antea pasa' neon-teas, na'kon pasa' ponain tar antea pasa' haa'-nua.”
Neon suust ein anjarin tanar neu Usif Yesus In amneman
28 Nai' Yesus antaru ntein In uaban am nak, “Au 'ait reta' u'ko hau. Karu hau naan in nook ein nmurai namnatun, naan anjair tanar nak oras fauk-nais ii anpaumaak een.
Nai' Markus 13:28-37
29 On naan amsa', karu hi miit neon suust ein naan neman, on re' saa' re' Au utoon a'rair ki naan, naan anjarin tanar nak anpaumaak he Au 'uum een. 30 Oras ia, amneen mirek-reko'! Na'ko batan re' ia, of anmui' tuaf re' anmoin fe', oras neon suust ein naan antean. 31 Maski neno tunan ma pah-pinan namneuk, mes Au uabk ii of antahan nabar-baar.”
Usif Yesus In amneman naan ma'nifa'
32 Nai' Yesus antaru ntein am nak, “Ka tiit fa tuaf es, re' nahiin neno mee, ai' anreuk fauk ate, of Au 'fain 'uum. Uisneno In ameupt ein sonaf neno tunan amsa' ka nahinin fa. Au Tuak ii msa', ka uhiin fa. Suma Au Ama' anmees nahiin.i 33 Natuin rasi naan ate, hi ro he mpanat mirek-reko', natuin hi ka mihiin maan fa reka' te in oors ii ntea.
34 Ka 'roo fa te, Au 'nao usaitan ki. Mes of Au 'fain 'uum. Namnees on re' tuaf re' annao nporin in umi neu bare 'roo-'roo. In nreun in ameupt ein he npao in umi naan rek-reko. Ma in nbati nfeen sin es am es ate nok in mepu. In naprenat apao eno' he npanat narek-reko' tar antea in nfain neem.j 35 Hi ro he mpao fai-manas amsa', natuin hi ka mihiin fa oras mee te, uim tuaf naan of anfain neem. He maans ii nmabe, oo, fai tnana', oo, maans ii na'pupu', oo, ai' maans ii fe'e nsae. Hi ka mihiin maan fa neu he reka'. 36 Kais-kaisa' in neem nok askeken ate, in napein ki amtuup amfiin ma mikoon fe'.
37 Onaim saa' re' Au utoon 'eu ki ia, Au utoon 'eu bian sin amsa' am 'ak, ‘Hi ro he mpanat mirek-reko' he mseun Kau.’”
[Nok rasi naan ate, Usif Yesus na'tu'ub In uaban nok In atoup noin' ein nbin a'to'ef Saitun.]