Usif Yesus In Rais Reko
natuin
Nai' Mateos in tuis
Usif Yesus In beif-nai'f ein
1
1-2 Surat re' ia, nareta' anmatoom nok Yesus Kristus, Tuaf re' Uisneno nba'an nain je na'ko afi unu' he nsoun Ee neem. In re' naan, usif nai' Daut in sufan, ma ka'o Abraham in sufan-ka'un.Anmurai na'ko ka'o Abraham tar antea usif nai' Daut, anmui' naan batan bo'es am haa. Na'ko batan neu batan sin, on nai:
Nai' Abraham nahonis nai' Isak,
nai' Isak nahonis nai' Yakop,
nai' Yakop nahonis nai' Yahuda nok in orif-tataf sin,
3 nai' Yahuda nahonis nai' Peres ma nai' Sera (sin nua sin, sin ainf ee, kaann ee bi Tamar),
nai' Peres nahonis nai' Herson,
nai' Herson nahonis nai' Ram,
4 nai' Ram nahonis nai' Aminadap,
nai' Aminadap nahonis nai' Nahason,
nai' Nahason nahonis nai' Soleman,
5 nai' Soleman nahonis nai' Bo'as (in ainf ee, kaann ee bi Rahap),
nai' Bo'as nahonis nai' Obet (in ainf ee, kaann ee bi Rut),
nai' Obet nahonis nai' Isai,
6a nai' Isai nahonis nai' Daut.
6b-11 Na'ko nai' Daut tar antea too Isra'el nmoufun nbin Babel, sin ar-arsin naan, batan bo'es am haa ntein. Sin esan re':
nai' Daut nahonis nai' Soleman (in ainf ee, nahunu te, nai' Uria in fee).
Nai' Soleman nahonis nai' Rahabeam,
nai' Rahabeam nahonis nai' Abia,
nai' Abia nahonis nai' Asaf,a
nai' Asaf nahonis nai' Yosafat,
nai' Yosafat nahonis nai' Yoram,
nai' Yoram nahonis nai' Usia,
nai' Usia nahonis nai' Yotam,
nai' Yotam nahonis nai' Ahas,
nai' Ahas nahonis nai' Heskia,
nai' Heskia nahonis nai' Manase,
nai' Manase nahonis nai' Amos,b
nai' Amos nahonis nai' Yosias,
nai' Yosias nahonis nai' Yekonya ma in oirf ein oras sin nmoufun nbin Babel.c
12-16 Na'ko oras sin nmoufun nbin Babel antean nai' Yesus, sin ar-arsin batan bo'es am haa. Sin esan re':
Nai' Yekonya nahonis nai' Saltiel,
nai' Saltiel nahonis nai' Serubabel,
nai' Serubabel nahonis nai' Abihut,
nai' Abihut nahonis nai' Elyakim,
nai' Elyakim nahonis nai' Asor,
nai' Asor nahonis nai' Sadok,
nai' Sadok nahonis nai' Akim,
nai' Akim nahonis nai' Eliut,
nai' Eliut nahonis nai' Eliaser,
nai' Eliaser nahonis nai' Matan,
nai' Matan nahonis nai' Yakop,
rarit nai' Yakop nahonis nai' Yusuf.
Nai' Yusuf ansao bi Maria. Bi Maria re' naan, es re' nahonis Yesus Kristus.
17 Onaim anmurai na'ko nai' Abraham antean nai' Daut batan bo'es am haa; na'ko nai' Daut antean oras sin nmoufun nbin Babel, batan bo'es am haa; ma na'ko Babel antean oras nahonis Kristus, batan bo'es am haa msa'.
Bi Maria nahonis Usif Yesus
18 Oras bi Maria nahonis Nai' Yesus naan, in reetn ii on nai:
Bi Maria anmana'an nok nai' Yusuf. Sin nua sin ka ntuup-tuup nitan fa fe' on re' fee-mone. Mes bi Maria na'apu' na'ko Uisneno In Asmaan Akninu'.d 19 Oras nai' Yusuf nahiin on naan ate, in he nafetin bi Maria. Mes in ka nroim fa he ntao namaeb ee nbi too mfaun ein sin maatk ein, natuin nai' Yusuf in neekn ee kninu' ma namnoon. Es naan ate, in he nafeitn ee mninu'-mninu'.
20 Onaim in natenab he naim ranan neu-mneem. Fai jes, in namnei. Anbi mneit naan, in niit Uisneno In ameput es neem na'ko sonaf neno tunan, ma natoon ne mnak, “Yusuf! Ho re' ia usif nai' Daut in sufan. Ho neek maan kais na'oni' he ho msao bi Maria. Fin ri'ana' re' et bi Maria in apun, naan Uisneno In Asmaan Akninu' es antao. 21 Bi Maria of nahonis naan ri'aan moen jes. Rarit ho ro he mukaanb ee, Nai' Yesus, fin In es re' of ansoi nafetin Uisneno Iin na na'kon sin sanat ma penu sin.”e f
22 Rasi re' ia of anjair on naan, natuin Uisneno natoon nain na'ko afi unu'. In npaek niit In mafefa kninu' nai' Yesaya he ntui mnak,
23 “Hi mneen, oo! Of anmui' bi non ao-'temef es, re' ka ntuup-tuup niit fa fe' nok atoni',
mes nok askeken ate, in na'apu'.
Rarit in nahonis Ri'aan moen jes.
Sin nakaanb ee, Imanuel.”
(Anbi uab Ibrani, ‘Imanuel’ in oetn ii:
Uisneno nok kit.)g