Usif Yesus sin antaman neun Yerusalem, ma too mfaun ein anboi's Ee on re' kaes ko'u
11
Oras sin nhaumaak kota Yerusalem, sin ntean kuan Betfage ma Betania, et a'to'ef Saitun in abnapan bian.a Anbi bare naan, Nai' Yesus sin nasnasan akre'o. Rarit In nreun In atoup noin' ein tuaf nua he nnao nahunun.
Nai' Markus 11:1-14
2 In nbasan sin am nak, “Hi nua ki mnao mihuun meu kuan re' nee. Oras hi mtaam, hi of miit bikaes keledai tipu' es, re' ka masaena' fa fe', mafutu' et bare naan. Hi mnao mseif in tani ma mheer meik je neem. 3 Karu atoni' nataan ki mnak, ‘Nansaa' am es hi mheer meik bikaes keledai naan?’ On naan ate, hi mitaah am mak, ‘Hai Usi' he npaek je. Ma karu In npake nrair je te, na' hai of meik mifain' ee neem.’”
4 Rarit tua nua' ein naan sin nnaon, ma sin niit bikaes keledai tipu' naan mafutu' anbi uim jes in enon, et raan ee ninin. Sin nseif je, he nheer neik je nnao. 5 Mes atoni' fauk re' anhaken anbin naan nataan sin am nak, “Hoe! Ba'e! Nansaa' am es hi mseif atoni' in bikase'?”
6 Sin natahan am nak, “Hai Usi' he npaek je. Karu npake nrair je te, hai of meik mifain' ee neem, tua.” Onaim tuaf ein re' naan, anfeen sin mainuan he nheer neik bikase' naan. 7 Sin nheer neik je nnaon ntean Nai' Yesus. Rarit sin na'peni' bikase' naan npaken tai-muti'. Rarit Nai' Yesus ansae.
8 Oras sin he noi ntaman neu kota, too mfaun ein nait sin tai-faof ein ma sin pou'k ein, rarit na'been sin anbin ranan. Anmui' tuaf bian an'oten on re' pet-no'ob nbi raan ee ninin, ma na'been sin anbi raan ee tnanan. Anpaek mo'et naan, sin he natonan ma nakriir ein nak sin nseun Nai' Yesus nok hormaat, nahuum on re' sin nseun kaes ko'u. 9 Anmui' tuaf bian re' annao nahunun anbin Nai' Yesus In matan, ma bian namunin. Sin nmurai nsakanan am nak,
“Hosana! Hai mpures ma mbo'is Uisneno!c
Uisneno nfee tetus-athoen neu amnemat re' neem ma neik Uisneno In kanan,
natuin Uisneno es re' anrenu nrair Je!d
10 Hosana! Hai mpures ma mbo'is Uisneno!
Natuin Uisneno he nahake' nafani' usif nai' Daut in aprenat!
Hosana! Hai mpures ma mbo'is Uisneno!
Natuin Uisneno naprenat nan-nain et neno 'raat re'uf!”
11 Oras sin ntean kota naan in nanan, Nai' Yesus sin nnaon ntaman anbin Uisneno In Uim Onen Uuf ee in a'fe'on. Rarit Nai' Yesus ankius natef-tefan bare naan. Mes, natuin oors ii ka nanokab fa, es naan ate sin ntebi nfanin neun kuan Betania.
Usif Yesus naprenat hau roet uu' gwes he kais nafua nteni'
12 Kiuk ana' te, sin npoin na'kon Betania he ntaam anfanin neun kota Yerusalem. Anbin raan ee tnanan, Nai' Yesus annaben ate In namnaah. 13 In niit hau roet uu' gwes et raan ee ninin. Biasa sin naah in fuan.e Onaim Nai' Yesus anhaumaak hau roet naan he nkius niit, kar-karu in nafua, ai' kaah. Mes oras In ntea hau roet naan in uun ii te, In ka niit fa saa'-saa', natuin hau naan in oors ee ka ntea fa fe' he nafua. In fe' he nanoo. 14 Es naan ate, Nai' Yesus na'uab neu hau roet naan am nak, “Natuin ho ka mufua fa meu Kau, es naan ate anmurai na'ko oras ia, ho ka mufua mtein fa. Ma of ka tiit fa tuaf es he naah antein ho fuam.”
In atoup noin' ein annenan In uaban naan ma'fena' msa'.
Usif Yesus antaam anbi Uisneno in Uim Onen Uuf, ma nait inporin bare' sosa' anbi naan
15 Rarit sin nnaon nkonon tar antean Yerusalem, ma Nai' Yesus antaam antein anbi Uisneno in Uim Onen Uuf. Anbi Uim Onen naan in a'fe'on, too mfaun ein anmo'en a'masa' ma na'soos ein kor-kefi, re' biasa sin npaek sin he nfeen fua'-turu'. Oras Nai' Yesus niit sin on naan ate, In nnao ma nriu' napoitan sin. In nbeso nsisa'en mei nggwin re' sin npaek sin he ntuukr ein roit, ma nbeso nsiksakan hau 'been ein re' sin npaek sin he na'soos ein koron naan.
Nai' Markus 11:15-33
16 In ntaar too mfaun ein he sin kais neik ein bare' ma nnaon refin ntenin npe'on Uim Onen naan in a'fe'on. 17 Rarit In nanoni' sin am nak, “Hi mihini mrair saa'-saa' re' Uisneno In mafefa kninu' ntui nain je mnak, ‘Au ufena' Au Uim ji, he tuaf-tuaf na'ko are' pah ma uuf neman he n'oen ein nbin bare naan.’ Mes hi mmoe' Umi naan anjair baer buat neu abaakt ein!”f
18 Oras a'naak rais pirsait Yahudi sin a'naakt ein ma tunggur agaam ein annenan nak Nai' Yesus anmoe' rasi naan ate, sin nato'on ma nek-neuk niisk ein. Rarit sin namin ranan he nroor niis Ne. Mes sin namtausn Ee msa', natuin too mfaun ein nroim niis In nonin.
19 Ma oras maans ii nmaeb on naan ate, Nai' Yesus sin anpoin na'kon kota Yerusalem, ma ntebin nfanin he ntupan nbin kuan Betania.
Karu hit tpirsai batuur-batuur teu Uisneno, In of anfee saa'-saa' re' hit ttoot je
20-21 Kik-kiku te, sin nnaon nfanin neun Yerusalem. Anbi raan atnana', sin nnaon npe'on hau roet re' afi naa Nai' Yesus na'uab neu ne. In atoup noin' ein ansanmakan, natuin hau roet naan anmate nrair tar in a'baa'n ee msa' anmeto nmaet. Rarit nai' Petrus namnau niit Nai' Yesus In uaban afi naa. Rarit in na'uab am nak, “Aam! Amkius miit! Hau roet re' afi naa Ama' mtaar ee ji, nmate nrair!”
22 Onaim Nai' Yesus nataah am nak, “Namneo! Ro hi he mpirsai Uisneno on re' naan. 23 Karu hi mpirsai batuur-batuur, hi of amreun 'toe'f es he nanani' bare neu tasi. Rarit Uisneno of nanani' 'to'ef naan, asar hi kaisa' mpirsai mi'ba'-ba'e! Hi ro he mpirsai batuur-batuur meu Uisneno.g 24 Kais amnikan! Asar hi mpirsai batuur-batuur mak Uisneno bisa nfee saa'-saa' re' hi mtoot je, In of anfee ki on naan. 25 Mes karu m'onen, ma mmui' neek ma'fena' mok es fe'e te, hi ro he mnao he mmarame' mok ne. Nok ranan naan ate, na' hi Ama' abit sonaf neno tunan he nsaok nain hi saant ein. 26 [Mes karu na'ko ki, anmui' neek menas, ma ka mroim fa he msaok hi aom-bian in sanat, ro tebes hi Ama' abit sonaf neno tunan ka nsaok fa hi saant ein amsa'.]”h i
Sin nmaktaan ein anmatoom nok Usif Yesus in hak
27 Rarit sin nnaon nkonon. Oras sin ntean Yerusalem, sin ntaman ntenin anbin Uisneno In Uim Onen Uuf. Oras sin ntaman ntean in a'fe'on, a'naak rais pirsait Yahudi sin a'naakt ein, tunggur agaam ein, ma amnais harat Yahudi sin neman 28 ma nataan Nai' Yesus am nak, “Afi naa sekau es re' anreun ko he uum meik taisibu mbi bare ia? Sekau es re' anfee ko hak!?”
29 Nai' Yesus nahiin nak sin namin ranan he namouf Gwe. Rarit In nataah sin am nak, “Au he utaan ki msa'. Hi mitaah Kau fe', hena' Au 'utaah ki. 30 Au he utaan ki on nai: hi aar ki mihiin nai' Yohanis Asranit re' naan, aa oo? Sekau es re' anreek ee he nasrain? Uisneno oo, ai' mansian?”
31 Onaim sin nateenb ein neu-mneman, ma na'uab ein am nak, “Amoo! Hit tarair beti'! Karu hit tataah am tak, ‘Uisneno es re' anreun gwe te,’ In of nataah kit am nak, ‘Karu on naan ate, neu saa' am es hi ka mpirsai fa nai' Yohanis!?’ 32 Mes karu hit tataah am tak, ‘Mansian ee es re' anreun gwe.’ Of are' too mfaun ein antaisibun, natuin sin npirsain am nak, nai' Yohanis re' naan Uisneno In mafefa kninu'.”
33 Onaim sin natahan am nak, “Ma neu'! Hai ka mihiin fa, tua.”
Rarit Nai' Yesus nataah neu sin am nak, “Naa! Karu on naan ate, Au ka utoon ki fa msa', sekau es re' anreun Kau.”