Fesat kabin anbi kuan Kana
2
Anmeu on naan ate, anmui' fesat kabin anbi kuan Kana et propinsi Galilea. Nai' Yesus In ainf ee nok amsa'. 2 Nai' Yesus nok In atoup noin' ein napenin haan askaut, ma sin nokan amsa'.3 Oras fesat naan annao naan een sero 'roo te, tua min-kase, he noi oke'. Rarit Nai' Yesus In ainf ee natoon Ee mnak, “Amturun maan sin fe', natuin sin tua min-kase ruman ankoon.”
4 Mes Nai' Yesus nataah am nak, “Ain. Nansaa' am es ho mroim he Au es re' a'ator? Au oors ii, ka ntea fa fe'.”
5 Mes In ainf ee na'uab neu ameupt ein naan am nak, “Hae, amneen! Karu In nreun ki he mmoe' saa' ate, mmoe' mituin ahaa.”
6 Anbi bare naan anmu'i 'huna' nee, re' anmoe' naan sin na'kon fatu. 'Huna' es ate, karu sin nakanin oe te, of oni' liter bo' hitu mniim antea liter nautn es bo'es am niim (75-115). Atoin Yahudis sin biasa npaek oe na'ko 'huna' human on re' naan, he naniun ai' nafaun sin tuak ein natuin sin atoran rais pirsait. 7 Rarit Nai' Yesus na'uab neu ameupt ein naan am nak, “Amnao mait oe he mikain meu 'huun ein naan.” Onaim sin nakanin oe tar antea nahenun batuur-batuur. 8 Rarit In nak sin am nak, “Amkui maan a'kre'o, he meik je meu feest ii in tuan!” Onaim sin nmoe' natuin ein. 9 Oras sin neik oe naan neu fesat naan in tuan, in ninu nsoba' he nnaben niit oe naan. Mes oe naan na'bani' njair tua min-kase! In nkeuk, natuin in ka nahiin fa neu sin napenin tua min-kase naan na'ko mee. (Mes ameupt ein naan nahinin.)
Rarit in nhaman naan baroit atoin ee. 10 Onaim in nak, “On nai. Biasa hit uim tuaf ii tapoitan tahunun tua min-kaes arekot anneis. Oras taumn ein nbukaen kou'-ko'u nrari te, na' in napoin tua min-kase huum es antein. Mes ho te, ho musnuab. Ho mupoin tua min-kase huum es nahuun, rarit na' tua min-kase arekot anneis ji, namuin!”
11 Rasi naan anjari nbi kuan Kana et propinsi Galilea. Naan Nai' Yesus anmoe' rais sanmakat ahunut re' atoni' nkius ma nnaben niit ee. In naruru' ma nakrira' In pinan ma krahan on naan, onaim In atoup noin' ein anpirsai Je.
12 Rarit Nai' Yesus, In ainaf, In oirf ein, ma In atoup noin' ein annaon nsanun neun kota Kapernaum. Mes sin suma natuan nbin naan, neno fauk aah.a
Usif Yesus anriu' tuaf-tuaf he npoin na'kon Uisneno In Uim Onen Uuf
13 Oras atoin Yahudis sin neon ko'u Paska npaumaak on naan ate, Nai' Yesus annao neiki nsae neu kota Yerusalem.b 14 Anbi Uim Onen Uuf in kintal, Nai' Yesus ankius atoin ein na'soos ein bijae, 'bib-kase, ma kor-kefi re' tuaf ansosan he npaek sin njarin fua'-turu'. Anbi naan, anmui' tuaf re' antoko nbi mei he ntukar roit re' tuaf anpaek je he nfeen neun Uisneno nbi Uim Onen Uuf naan. 15 Onaim In nait tani nono' fauk he nmoo' je njari 'kauboe. Rarit In nriu' napoitan sin na'kon kintal naan. In napoin bijae nggwin ma 'bib-kaesn ein naan amsa'. In npesek mein naan, ma In n'opa' nporin roit ein naan. 16 Onaim In nreun tuaf-tuaf re' na'soos ein kor-kefi mnak, “Mait mipoin baer' ein ia! Bare ia, ka 'masa' aa fa! Kais ammoe' Au Ama' In Umi njari 'masa'!”
17 Onaim In atoup noin' ein namnau Uisneno In Suur Akninu' re' ntui mnak,
“Au 'neek iis Uisneno In Umi.
Etun es au neek ii nmariin ma nbeis, he 'panat in kaan foo menin.”c
18 Rarit atoin Yahudis sin a'naet ma kaes kou'n ein anreek Nai' Yesus am nak, “Karu batuur Ho mmui' hak he muri'un, mururu' ma mukrira' rais sanmakat es meu kai, he njair bukti!”
19 Nai' Yesus nataah am nak, “Karu hi miseer mireu' bare' kninu' ia, anmeu te, of Au ufena' ufani'.”d
20 Mes sin nprotesan am nak, “On mee es re' ia? Fin atoni' nafena' Uim Onen Uuf ia toon bo' haa mnee. Nansaa' am es Ho mutenab mak, Ho suma mperluu neno teun gwah he mufena' mufain' ee?”
21 Mes sin ka nahinin fa nak, Nai' Yesus na'uab anmatoom nok In tuan, re' huma' mese' on re' bare kniun es. 22 Onaim anbi neon amunit, oras Nai' Yesus anmaet, rarit anmoni nfani te, na' In atoup noin' ein namnau saa' re' In natoon nain sin. Onaim sin npirsain saa' re' Uisneno In Suur Akninu' antui nain sin na'kon un-unu', ma saa' re' Nai' Yesus natoon nain sin.
Usif Yesus nahiin are' mansian ii sin nekak naank ein
23 Nai' Yesus natua ntahan anbi kota Yerusalem, he nok anbi neon ko'u Paska. Too mfaun ein ankius rais sanmaakt ein re' In nmoe' sin, rarit sin anpirsai Je. 24-25 Mes Nai' Yesus ka npirsai sin fa, natuin In nahiin are' mansian ii sin nekak naank ein. In ka nperluu fa he atoni' natoon Ee, natuin In kuun nahiin nain mansian ii sin a'hakek ma sin a'naok ein.