Sin nmaktaan ein anmatoom nok Usif Yesus In hak am kuasa
20
Neon gwes, Nai' Yesus annao ntaam anbi Uim Onen Uuf, rarit nanoni' Uisneno In Rais Reko nbi kintal. Onaim a'naak rais pirsait Yahudi sin a'naakt ein, tunggur agaam ein, ma atoni mnais haart ein neman ma nataan Ee. 2 Sin nataan Ee mnak, “Sekau es anfee Ko hak, he ho mtao taisibu mbi ia afi naa? Mutoon miit kai!”3 Onaim Nai' Yesus nataah am nak, “Au he utaan aan rais jes amsa', rarit na' Au utaah ki. 4 On nai: hi mihiin nai' Yohanis Asranit, ai'? Sekau es re' anfee ne kuasa he in nasrain atoni'? Uisneno oo, ai', mansian?”
5 Onaim sin nabuan ma na'uab ein neu-mneman am nak, “Ha'a! Kreot ii naan kit ein. Karu hit tak, ‘Uisneno es arenut’, of In nak, ‘On naan ate, hi ka mpirsai fa nai' Yohanis neu saa'?’ 6 Mes hit ka bisa fa he tak, ‘mansian es arenut’, natuin too mfaun ein of naitin fatu ma npoir na'maet kit. Natuin sin npirsain nak nai' Yohanis naan, Uisneno In mafefa kninu'.”
7 Rarit sin nataah Nai' Yesus am nak, “Hai ka mihiin fa.”
8 Onaim Nai' Yesus nataah neu sin am nak, “Karu on naan ate, Au ka 'roim fa he utoon amsa', 'ak sekau es anreun Kau.”
Reta' anmatoom nok tuaf re' anseeb poo' anggur
9 Rarit Nai' Yesus nareta' sin reet es antein. Reta' naan nak, “Anmui' naan atoin es anroe hau anggur. In na'seba' poo' anggur naan neu tuaf asebat, he sin nbatin oras sin napenin po'on naan in afan. Rarit in nfoo' neu pah a'pen-pene 'teta' ma natua sero 'roo nbi naan.a 10 Oras he nseun hau fua anggur ate, poo' tuaf naan anreun in ameput tuaf es he neem antoup neik in sapaan na'ko aseebt ein naan. Mes aseebt ein anbeos ameput naan, ma nriu' gwe nfain ruum aah. 11 Rarit poo' tuaf naan anreek haefan tuaf es antein. Mes aseebt ein naan anbeos gwe, ma namae. Rarit anriu' gwe nfain ruum aah. 12 Onaim poo' tuaf naan anreek haefan ameupt es anteni', mes sin nbeos napaap ee, rarit antokar napoin ee.
13 Poo' tuaf naan antoko ma natenab am nak, ‘Au he 'moe' on mee 'tein? Reko nneis Au 'reek haefan au aan neka'. Sin of anhormaat ma nseun gwe rek-reko.’ Onaim in nreek haefan in aan hoin ee nnao neu bare naan.
14 Mes oras aseebt ein niit ri'ana' naan, sin na'uab ein am nak, ‘Amkius miit! A'naef ee nreek haefan neu in aan honi'. In es re' of antoup a'naef ee in pusaak ein ok-oke'. Onaim iim he theek je ma troor tiis ne nai! Maut he hit es atpaar kuuk po'on ia.’ 15 Oras ri'ana' naan neem antea te, sin nheer anfoont ee npoi na'ko po'on naan, rarit anroor nisan.
Onaim Au he utaan ki. Hi mitenab saa' neu poo' tuaf naan. In he nmoe' saa' neu aseebt ein naan? 16 Anbi Au teenb ii te, in ro he neem ma nroor niis sin ok-oke', rarit na'seba' po'on naan neu tuaf bian antein.”
Oras too mfaun ein annenan Nai' Yesus na'uab on naan ate, sin natahan am nak, “Karu reko te, Uisneno kais anhukun kai on naan!”
17 Rarit Nai' Yesus an'eer sin, ma nataan sin am nak, “Karu ka njair fa he nhukun sin on naan ate, nansaa' am es Uisneno In mafefa kniun' ein antuin am nak on nai:
‘Anmui' naan faut gwes re' tuukn ein nait inporin,
mes oras ia, fatu naan anjair fatu 'sukif neu nii ainaf?’b
18 Tuaf re' nastuun anbi fatu naan, of namreu', natuin in napein hukun. Ma karu fatu naan anmouf ma ntoom tuaf es, in of namre'u msa', natuin in napein hukun.”
19 Oras tunggur agaam ein ma a'naak rais pirsait Yahudi sin a'naakt ein annenan reta' naan, sin nahinin nak Nai' Yesus anseer sin npaek uab manporin fe'e na. Natuin sin natai nok re' aseeb poo' anggur sin naan. Onaim sin nato'on nmat-maten. Onaim sin n'aotr ein asraak he nheek Nai' Yesus. Mes sin natiun gok neu too mfaun ein re' anroim Nai' Yesus In nonin. Onaim sin nnaon nasaitn Ee on ahaa re' naan.
“Amfee meu Uisneno saa' re' Uisneno In hak”
20 Rarit Nai' Yesus In musun annuu' Gwe ma nsuntiur Gwe piut. Sin namin asuntirus, re' bisa nmoe' jon on re' atoin reko, he nnao na'uab nakreo Nai' Yesus. Sin nhar-haarp ein he on mee te, Nai' Yesus na'uab namouf anaa' aprenat pah Roma, rarit sin natrakan neu gubernur, he in nreek tuaf he nheek Nai' Yesus. 21 Onaim sin nreek haefan asuntirus naan he nnao nataan Nai' Yesus am nak, “Aam Tungguru! Hai mihiin mak Ho nekam naan amne'o. Ho ka mputa-kriu muhiin fa, ma ka mpiir fa humaf. Ho munoni' Uisneno In Kabin ma Prenat namneo ma namnoon gwah. 22 Oras ia, hai he mitaan maan Ko, rais jes: tatuin hit atoran rais pirsait Yahudi, of hit he tbeos beo neu prenat Roma in uis kou' gwe, ai' kaah?”
23 Mes Nai' Yesus nahiin nain sin sarit re' he nakreo Gwe. Onaim In nataah am nak, 24 “Mikrira' miit Kau roi muti' fua es fe'!” Onaim sin nakrira' roit naan neu Ne. Rarit In nataan am nak, “Sekau in human ma in kanan es re' maruna' re' ia?”
Onaim sin natahan am nak, “Uis ko'u keser, tua.”
25 Onaim Nai' Yesus nak, “Karu on naan ate, amfee meu preent ii saa' re' preent ii in hak. Ma mfee meu Uisneno saa' re' Uisneno In hak.”
26 Annenan on naan ate, sin nmasahun, natuin sin ka bisa nakreo naan Ee fa nbi too mfaun ein sin maatk ein. Onaim sin nfeef a'temen nai.
Usif Yesus nanoni' anmatoom nok amates anmoni nfain
27 Rarit anmui' tuaf fauk na'kon partei pirsait Saduki neman he na'uab na'kreo Nai' Yesus. Atoin Sadukis sin nanoin ein am nak, atoin amaets ein ka bisa nmonin nfanin fa oras neon amsoupt ii ntea. Sin neman ma nataan Nai' Yesus am nak,c 28 “Aam Tungguru! Ka'o Musa antui nain kit atoran am nak: karu anmui' atoni' nmaet, mes ka nahoni' fa, ro atoni' naan in oirf ee ansao bifee banu' naan, he nfee sufa' neu in tataf amates naan.d 29 Batuur unu' te ka'o Musa nanoni' on naan. Mes oras ia hai he mitaan on nai: anmui' naan atoni' tuaf hiut sin nma'ori-taatn ein. Aan moen unu ansao, mes anmaet, ma ka nahoni' fa. 30 Rarit in orif re' natuin ee ji nsao bifee banu' naan. Ka 'roo fa te, in nmaet, mes ka nahoni' fa. 31 On naan amsa', in orif es anteni'. In ansao bifee banu' naan, mes anmate msa', ma ka nahoni' fa. Matsaos naan nanaob on piut tar namsopu ntea aheit suus gwe, mes in nmate msa'. 32 Namuni te, bifee banu' naan anmate msa'. 33 Onaim oras ia, hai he mitaan on nai: bifee naan ansao niit atoni' hiut. Karu pah-pinan ia namsopu te, Uisneno namonib nafani amates sin, bifee naan in moen je, es re' mee?”
34 Onaim Nai' Yesus nataah am nak, “Mansian ii anmatsaon anbin pah-pinan ia gwah. 35-36 Mes anbi sonaf neno tunan, ka tiit fa matsaos antein. Ma anbi nee msa' ka tiit fa 'maten antein. Sin huma' mese' on re' Uisneno In ameupt ein sonaf neno tunan. Fin oras Uisneno namonib nafani' amaets ein, In npiir naan sin anjarin In aanh ein. 37 Anbi ka'o Musa in surat, anmui' reta' nak hau uu' aan es anpiin mes ka nputuf. Na'ko reta' naan hit tahiin tak, amates bisa nmoni nfain. Anbi naan Uisneno na'uab neu ka'o Musa mnak, ‘Au re' ia, sin ho ka'o sin Uisneno. Es re' ka'o Abraham, ka'o Isak, ma ka'o Yakop. Sin aar sin ok-oke' na'ruir ein ma na'besan piut-piut neu Kau ntean neno ia.’e 38 Te kaah, a'naef ein naan anmaten nrarin et neno unu'. Mes natuin Uisneno na'uab anrari mnak, In anjair sin Uisneon goa fe', es naan ate, hit tahiin tak sin nmonin fe'. Onaim maski atoni' nmate nrari msa', sin nmoni nfanin. Fin suma atoin amonit es re' na'ruri' ma na'bees neu Uisneno. Ka tiit fa amates na'bees neu Uisneno!”
39 Anneen Nai' Yesus nataah on naan ate, anmui' tunggur agama bian na'uab ein am nak, “Aam Tungguru. Ho haan tahas naan, reko 'maten.” 40 Anmurai na'ko oras naan, ka tiit fa tuaf antein nabrain he nataan Nai' Yesus, natuin ka bisa nakreo naan Ee fa.
Kristus naan, usif nai' Daut in sufan, ma in Usin amsa'
41 Rarit Nai' Yesus nanoni' fe' nbi Uim Onen Uuf. Onaim In nataan nafani' sin am nak, “Natuin hi teenb ein ate, on mee? Tunggur agaam ein nanoni' ki mnak Kristus naan, es re' Tuaf re' Uisneno anruur nain Je na'ko un-unu'. Tatuin sin, In re' naan suma usif nai' Daut in sufan. Mes naan, ka nanokab fa fe'. 42 Natuin unu' te, usif nai' Daut neikn on antui nbi in suur Siit Pures-Bo'is sin am nak,
‘Uisneno n'eut ma natoon neu au usi' mnak,
“Uum he mtoko mbi maat, ambi Au aok-bian a'ne'u.
43 Fin Au of a'moe' ho muusn ee,
tar antea sin na'ruir ein neu ko.’”f
44 Onaim na'ko surat naan, hit tahiin tak usif nai' Daut amsa' in neikn on anteek Kristus nak, ‘Usi'’. In oetn ii, karu anmui' tuaf nak Kristus naan, suma usif nai' Daut in sufan, naan ka nanokab fa fe'! Natuin In anjair usif nai' Daut in Usin amsa'.”
Ampaant om mi'ko tunggur agaam ein re' na'kuba' sin saant ein
45 Oras too mfaun ein antakan sin ruik ein he nnenan Nai' Yesus ate, In na'uab neu In atoup noin' ein am nak, 46 “Hi ro he mpanat mirek-reko' hi tuam ein mi'ko tunggur agaam ein. Natuin sin nroim re' he nnaon pasiar ein npaken baru mnaun pirore, he nateef nok too mfaun ein, he biak ein nak, ‘Hoe! Sin re' naan kaes ko'u!’ Sin nromin he namin bare 'toko' nbi maat, oras antaman neu uim oen ein, ai' nbin fesat kabin, ai' bare-bare re' biasa too mfaun ein nabuan. 47 Mes ampanat hi tuam ein naan, natuin sin nputa-kriu bifee baun ein ma ntetak naan sin umin. Mes anbi too mfaun ein sin maatk ein, sin na'kuba' rais maufinu naan anpaek ranan, an'onen amnanu-mnanu'. Sin nromin he biak ein nak, sin re' naan tuaf re' anmakoe nbi Uisneno In rasin. Mes Uisneno nahiin nain sin saant ein, onaim In of nasanut hukun neu sin ma'fena' anneis-neis.”