Usif Yesus nareta' anmatoom nok ameup poo' anggur
12
Rarit Nai' Yesus na'uab anteni' nok a'naak rais pirsait Yahudi sin a'naakt ein, tunggur agaam ein, ma atoni mnais harat Yahudi sin. In nareta' am nak, “Anmui' atoin es ankaun nais fe'u he nroe anggur anbi naan. Rarit in nbaik po'on naan anfuun am nateef. Ma in nmoe' bak he ntoro' fua anggur in oen. In nmoe' tobe msa'. Rarit in na'seba' po'on naan neu tuaf bian, he sin nmeup po'on naan, he napein in aafn ee te, anbatin. Rarit in nnao neu pah a'teta'.a 
Nai' Markus 12:1-17
2 Antea oras he nseib anggur in fuan, auf tuaf naan anreun in ameput tuaf es, he nnao neu ameup po'on naan he nait in sapaan. 3 Mes oras in ntea te, ameup poo'n ein naan anheek ma nbeos gwe. Rarit sin nreun gwe he nfain ruum-ruum.
4 Rarit auf tuaf naan anrenu nteni' in ameupt es. Mes ameup poo'n ein naan na'tutu' in a'naak ne tar papa'-papa'. Rarit sin namae je, ma nriu' na'aenb ee. 5 Rarit auf tuaf naan anrenu nteni' in ameput tuaf es a'teta'. Mes sin anroor niis ne. Maski sin nmoe' on mee-on mee msa', mes auf tuaf naan anreun in ameupt ein piut. Mes ameup poo'n ein naan anbeos bian, ma nroor niis bian. 6 Namuni te, auf tuaf ee anmu'i haa tuaf mese'. Tua mese' naan, es re' auf tuaf ee in aan moen mese' re' in neek niis ne. Natuin ka tiit attein fa ranan bian, es na' in nreun in aan mone naan. In natenab am nak, ‘Karu au 'reek au aan moen ji neikn on, sin of antoup gwe nok rek-reko, ma sin of natniin ee msa'.’
7 Onaim in anreek haefan in aan mone naan he nnao. Mes oras ameup poo'n ein naan niit ri'ana' naan neem ate, sin na'uab ein am nak, ‘Hoe! Hi mkius miit fe'! A'naef ee anreek haefan in aan hoin ee neikn on neem! Karu 'naef ee nmate te, in re' ia of es re' antoup are' baer pusaak ein. Onaim iim he troor tiis ne, he hit tpaar tain are' kanan in a'mui'n ein!’ 8 Rarit sin aar sin anheek je, ma anroor niis ne. Ma sin nporin in aon amates naan anbi poo'n ee in kotin. Reta' naan antuu' ma namsoup on re' naan, tua.”
9 Rarit Nai' Yesus nataan are' kaes ko'un naan am nak, “Natuin hi teenb ein ate, of auf tuaf naan anmoe' saa' neu ameup poo'n ein naan? Natuin Au teenb ii te, in of neem ma nroor niis are' ameupt ein naan ok-oke'. Rarit in na'seba' poo' anggur naan neu atoin sona'.
10 Hit aar kit atrees tiit atbi Uisneno in Suur Akninu' mnak,
‘Anmui' faut gwes re' nahunu te tuukn ein nait inporin.
Mes oras ia, fatu naan anjair fatu 'sukif neu nii ainaf.
11 Uisneno es re' anpiir nain Kuun ee, ma nateek fatu naan.
Onaim hit tiit atrair in masan arekon!’”b
12 Kaes ko'un naan nahinin nak, Nai' Yesus ansair sin neik reta' re' naan. Sin huma' mese' nok atoin ameup poo' anggur sin. Es naan ate, sin nmurai namin ranan he nheek Je. Mes sin namtausan too mfaun ein re' anromin he natniin Nai' Yesus In nonin. Onaim sin nnaon nasaitn aah Ee.
Atoni' namin ranan he nakreo Usif Yesus neik rasi baen beo
13 Rarit atoin Yahudis sin a'naakt ein anreun tuaf fauk na'kon partei pirsait Farisi ma na'kon partei purtik Herodes neman he nataan Nai' Yesus he namouf Gwe. 14 Sin neman ntean ate, sin nataan Ee mnak, “Aam tungguru! Hai aar kai mihini mmak, Ho neek maan ro amneot, ma ka mputa-kriu miit fa. Ho mkisu haa atoni' in nekan. Ho mutoon munoon Uisneno In romin, natuin Ho ka mpiir fa humaf. Onaim oras ia, hai he mitaan uab es. Tatuin hit atoran pirsait Yahudi te, of hit he tbaena' beo teu uis ko'u pah Roma,c ai' kaah?”
15 Mes Nai' Yesus nahini nrair nak, sin namin ranan he nkoop Ee, he nraban aprenat pah Roma. Onaim Nai' Yesus nataah neik haan ma'fena' am nak, “Nansaa' am es hi he mkopo' Kau meik rasi naan? Mikrira' miit Kau roit fua es!”
16 Rarit sin nnona' roit fua' es neu Nai' Yesus. In ntoup ma ntae roit naan. Rarit In nataan sin am nak, “Sekau in huumn ii es re' ia? Sekau kaann ee es re' matu'i re' ia?”
Sin natahan am nak, “Re' naan uis ko'u pah Roma.”
17 Rarit Nai' Yesus na'uab am nak, “Karu on naan ate, mnona' ma mfee meu prenat saa' re' anjair preent ii in hak. Ma mnona' ma mfee meu Uisneno saa' re' anjair Uisneno In hak.”
Anneen In haan tahas on naan ate, sin aar sin ansanmakan, natuin In uaban naan namneo. Onaim sin ka bisa namouf Gwe fa.
Anmatoom nok amates anmoni nfain, ma anmui' rais matsaos anbi neno tunan, ai' kaah?
18 Anmui' partei rais pirsait bian, re' atoni nteek ee nak, pukan Saduki. Sin nanoin' ein am nak, amaets ii ka nmonin nfanin fa. Neot es ate, atoni' fauk na'kon pukan Saduki neman he namouf Nai' Yesus. Sin na'uab ein nok Nai' Yesus am nak,d
Nai' Markus 12:18-44
19 “Aam tungguru! Ka'o Musa antui hit atoran harat es am nak: karu atoin es nmaet nasaitan in fee, ma ka nmui' fa anah, atoin amates naan in orif ro he nsao bifee banu' naan, maut he nahoni nfee sufa'-ka'uf neu in tataf re' anmate nrair naan.e 20 Namneo, ka'o Musa nanoni' kit on re' naan. Onaim hai he mitaan miit Ko, tua. Anmui' atoni' hiut anma'ori-taatn ein. Moen unu, ansao nahuun, rarit in nmaet, mes ka nahoni' fa. 21 Onaim in orif re' natuin ee ji ansao bifee banu' naan. Mes ka 'roo fa te, in nmaet ma ka nahoni' fa. On naan amsa', in orif re' natuin ee ji, ansao bifee banu' naan, ma in nmate msa', mes ka nahoni' fa. 22 Ma rasi naan anjari msa' neu amuint ein, tar antea aheit suus gwe nmate msa'. Rarit banu' naan anmate msa'.
23 Onaim oras ia, hai he mitaan on nai: bifee naan ansao niit atoni' hiut! Karu pah-piin ii namsopu te, ma Uisneno namonib nafani' amaets ein, of sekau es re' anjair mone neu bifee naan?”
24 Ma Nai' Yesus nataah sin am nak, “Karu hi mitaan on naan, hi ka mihiin namneo fa Uisneno In Suur Akniun ii in afan. Ma hi ka mihiin fa Uisneno In kuasat amsa'. Onaim hi msaan amrair!
25 Amneen! Ka tiit fa rais matsaos et sonaf neno tunan. Are' amates re' Uisneno namonib nafani' sin, ka nmatsaon ntenin fa. On naan amsa' Uisneno In ameupt ein na'kon sonaf neno tunan ka nmatsaon fa. 26 Onaim anmatoom nok are' amates he nmoni nfain, ai' kaah, Au he utoon ki on nai: of oni' hi fe' ka mitenab maan fa reta' anmatoom nok ai re' nout hau uu' aan es, mes ka npuut fa. Reta' naan nak, Uisneno na'uab neu ka'o Musa mnak, ‘Ho nai'-ka'o sin Uisneon gwe es re' Au. Sin esan re' ka'o Abraham, ka'o Isak, ma ka'o Yakop. Sin aar sin na'ruir ein ma na'besan piut neu Kau, tar antea oras ia.’f 27 Onaim hit tahini mtak sin nai'-ka'o sin anmaten nrarin oras ahunut. Mes, natuin Uisneno nak, In anjair sin Uisneon goa fe', es naan ate hit tahiin tak, sin nmonin nfanin. Onaim maski sin anmaten nrarin, mes sin nmonin nfanin amsa'. Namneo, amoint ii es re' na'ruri' ma na'bees neu Uisneno. Mes atoin amaets ii, kaah fa ai'? Onaim karu hi mnaa' miheran noni' re' nak, amaets ein ka nmonin nfanin fa, ro hi msaan teb-tebe!”
Atneek Uisneno ma hit aok-bian amsa'
28 Anbi oras naan, anmui' naan tunggur agama tuaf es neem ma nneen Nai' Yesus na'uab nok atoni' pukan Saduki sin. Tunggur agama naan natenab nak, Nai' Yesus nataah sin haan tanas sin nok reko. Rarit in nataan Nai' Yesus am nak, “Aam! Au he utaan Ko on nai: hit atoran harat ma prenat rais pirsait ein amfau re'uf. Na'ko are' kanan prenat ka'o Musa, prenat mee es re' pentiing anneis ji?”
29 Nai' Yesus nataah am nak, “Prenat re' pentiing anneis anbi Uisneno In Suur Akninu' nak on nai:
‘Are' kanan atoin Israelas ki, amneen mirek-reko'!
Uisneno ro hit Usif,
ma hit A'nakat.
Ka tiit fa bian anteni', In nmees Kuun!
30 Onaim hi ro he mneek Ee anneis na'ko are' bian sin.
Es naan ate, hi ro he mimnau Gwe piut-piut,
mihiin Je batuur-batuur,
ma mmeup ma'tani' he mituin In romin.’g
31 Ma prenat no nua ii nak:
‘Ho ro he mneek ho aok-bian, namnees on re' ho mneek ho tuam aan kuum.’
Prenat noon nua' ein re' ia, esan re' pentiing anneis. Ka nmui' fa prenat bian re' pentiing anneis na'kon preen nua' ein re' ia.”h
32 Rarit tunggur agama naan na'uab antein neu Nai' Yesus am nak, “Namneo! Re' Ho mu'uab ee naan, namneo. Uisneno anjair hit Usif, ma ka tiit fa Uisneno 'teta'.i 33 Hit ro he tneek Ee anneis na'ko are' kanan saa'-saa', ma tamnau Gwe piut, tahiin Je, ma tmeup ma'tani' he tatuin In romin, ma hit ro he tneek hit aok-bian ein namnees on re' hit tneek hit tuak. Nok ranan naan ate, na' Uisneno anmariin anneis, na'ko hit arahaa he tatuin atoran rais pirsait anmees. Naan reko nneis na'ko hit arahaa he troor mu'it he ta'turu' ma ttuun, ai' atfee bare' bian neu Ne.”j
34 Anneen in haan tahas naan ate, Nai' Yesus natenab nak tunggur agama naan nahiin In sarit naan nok reko. Onaim Nai' Yesus nak, “Aar akre'o te, ho he noi mjair Uisneno Iin na.”
Rarit, ka nmui' fa tuaf es anteni' re' nabrain he nataan Nai' Yesus, fin ka tiit fa es re' nabei' Je te.k
Kristus naan, usif nai' Daut in sufan, mes in njair nai' Daut in Usin amsa'
35 Rarit Nai' Yesus nanoni' too mfaun ein anbi Uisneno In Uim Onen Uuf. In nataan sin am nak, “Natuin hi teenb ii te, on mee? Tunggur agaam ein nanoin ein am nak, Kristus re' naan es re' Tuaf re' Uisneno nruur nain Je na'ko afi unu. Ma sin natenab nak, In suma sufaf na'ko usif nai' Daut. Mes tenab naan ka nanokab fa, tua. 36 Natuin afi unu' Uisneno In Asmaan Akninu' anpaek nai' Daut he ntui mnak,
‘Uisneno natoon anrair au usi' mnak,
“Uum he mtook meu baer amasat et Au 'nimak a'ne'u.
Au of a'moe' are' ho muusn ein, tar sin na'ruir ein neu ko.’”l
37a Na'ko naan ate, hit tahiin tak usif nai' Daut anteek Kristus nak ‘Usif’. In a'moufn ii nak, karu sin nteek ee nak Kristus naan suma usif nai' Daut in sufan-ka'un, naan ka nanokab fa fe'. Fin In anjair usif nai' Daut in Usin amsa'.”
Usif Yesus nak, ampaant om mi'ko tunggur agaam ein sin puta-kriuk ein
37b Oras Nai' Yesus na'uab on naan ate, too mfaun ein anromin he nneen Ee. 38 Rarit In na'uab antein neu sin am nak, “Hi ro he mpaant om mi'ko tunggur agaam ein. Sin nromin he npairiurs ok neik sin baru mnaun ein, he nnao nateef nok too mfaun ein, he sin niit sin am nak, ‘Hoe! Sin ro kaes ko'u batuur!’ 39 Karu sin antaman anbin uim onen, ai' nokan nbin fesat, sin namin a'took arekot he too mfaun ein niit sin. 40 Mes mpaant om! Fin sin re' naan nputa-kriu bifee baun ein, he nasiik ma ntoup naan sin uimn ein. Mes anbi too mfaun ein sin maatk ein, sin na'koro' sin 'moe' reu'f ein naan nok sin onen amnanu-mnanu'. Sin nromin he biak ein nahinin nak sin neek ein kniun' ein. Mes Uisneno of anfee kasat ma'fena' neu sin.”
Bifee banu' ama'mu'it na'turu' roi kolekte nneis-neis
41 Rarit Nai' Yesus antoko nbani' neu peti 'turu', anbi Uisneno In Uim Onen Uuf. In niit tuaf amfaun neman ma ntao sin roi kolekte nbin peti 'turu' naan. In niit atoin amu'it sin neman ma nataam sin roit ko'u nbin naan. 42 Rarit bifee banu' ama'mu'it tuaf es neem ma n'onen nok. In nataam roit sen nua nbi peti naan. Roit naan in oosn ii aan'-ana'.
43 Onaim Nai' Yesus annapen In atoup noin' ein ma na'uab neu sin am nak, “Hi mkius mirek-reko' meu bifee banu' ama'mu'it nee. In nataam roit suma sen nua gwah, mes in nfee nneis na'ko are' kanan afeet ein. 44 Sin aar sin anfeen kolekte na'ko roi nesif. Mes bifee banu' ia, anfee nain in roit ein oke' neu Uisneno.”