Atoin Farisis sin he namouf Usif Yesus anpaken rais matsaos ma manporin
10
Rarit Nai' Yesus sin nnaon nfuun am nateef anbin propinsi Yudea, ma nbin bare bian antein' et noe Yarden in panin, pasa' neon-saet. Anbi mee-mee, too mfaun ein neman ma naub naan Ee. Ma Nai' Yesus nanoni' sin on re' biasa.
Nai' Markus 10:1-31
2 Atoin Farisis tuaf fauk neman he namouf Gwe. Sin natanan am nak, “Natuin hit atoran rais pirsait, atoin amatsaos es bisa nporin in fee, ai' kaah?”
3 Mes Nai' Yesus nataah sin am nak, “Mimnau miit fe'! Atoran anmatoom nok matsaos fee-mone re' ka'o Musa nba'an nain je neu ki naan, nak on mee?”
4 Sin natahan am nak, “Ka'o Musa in atoorn ii nak, atoni' bisa nporin in fee, mes ro he ntui surat manporin nahuun ma nnona' surat naan neu in fee.”a
5 Mes Nai' Yesus nataah sin am nak, “Amneen Kau fe'! Ka'o Musa antui on naan, natuin hi mi'naak-faut bainesi'! 6 Hi kaisa' mnikan reta' un-unu' oras Uisneno anmoe' neno tunan ma pah-pinan! Fin matu'i et Suur Akninu' mnak,
‘Uisneno nmoe' mansian ein, atoni' ma bifee.b
7 Es naan ate, atoin es ro he nnao nasaitan in ainaf ma in amaf,
he nmoin nabuan nekaf mese' ma ansaof mese' nok in fee,
8 henati' sin nua sin njarin mese'.’c
9 Karu Uisneno neikn On na'mese' sin, ka bole fa he mansian ii nbatis sin!”
10 Rarit Nai' Yesus nok In atoup noin' ein antaman nmesen nbin uim jes. Anbi naan, sin nataan Nai' Yesus anmatoom nok In nonin re' fe'e na.
11 Nai' Yesus nataah sin am nak, “Sekau re' anporin in fee, ma nsao nteni' bifee 'teta', naan antaam rais makaket amsa'! 12 On naan amsa' bifee! Karu in nporin in mone, rarit in nsao nteni' atoni' teta', naan antaam rais makaket amsa'!”d
Usif Yesus na'uab ma nfee tetus neu ri'aan ein
13 Anbi oors es, sin neik sin aanh ein neman neu Nai' Yesus, ma ntotin he In na'uab anfeen sin tetus. Mes Nai' Yesus In atoup noin' ein nakaina' sin.
14 Oras Nai' Yesus niit rasi naan ate, In nato'on In atoup noin' ein. In na'uab am nak, “Mifetin ri'aan' ein naan he neman ntean Kau! Kaisa' mikaina' sin! Natuin atoni' re' nahuumb on, on re' sin re' naan, es re' anjarin Uisneno Iin na. 15 Mimnau mirek-reko'! Sekau re' anroim he neem anhaumaak Uisneno, sin ro he namnau niis Ne, on re' ri'aan ein namnau sin ainaf-amaf. Karu ka on naan fa te, ka nabei' fa he tteek sin tak Uisneno Iin na.”e 16 Rarit Nai' Yesus anhoo naan ri'aan ein naan, ma ntao In a'niman neu sin mese'-mese' he na'uab anfeen sin tetus.
Atoin amu'it naim ranan he nmoin nabar-baar nok Uisneno
17 Oras Nai' Yesus sin he nnaon nkonon, anmui' atoin amui't es naen neem he nateef nok Ne. In na'ruri' anbi Nai' Yesus In matan, ma nataan Ee mnak, “Aam tungguru re' au 'hormaat 'ain je! Au he utaan akre'o. On nai, Aam. Of au he 'moe' on mee, henati' au bisa 'taam 'eu sonaf neno tunan, he 'moin ubar-baar 'ok Uisneno?”
18 Nai' Yesus nataah am nak, “Nansaa' am es ho mteek Kau mmak, ‘re' au 'hormaat 'ain je’? Ka tiit fa es re' he thormaat tain je, mes Uisneno nmees Kuun. 19 Ho muhiin murair prenat ahunut na'ko Uisneno re' nak,
‘Kais amroor atoni';
kais ammakaek;
kais mubaak;
kais amsaksii mipoi;
kais amputa-kriu atoni' in bare';
ma mhormaat meu ho aina' ma ho ama'.’”f
20 Atoni' naan nataah am nak, “Namneo, Aam tungguru! Au unaoba' are' kanan atoorn ein naan 'murai u'ko oras au fe' munif kau, tua.”
21 Nai' Yesus na'uab rais manekat neu atoni' naan am nak, “Namneo! Mes anmui' rais jes anteni'. Ho mfain nai ma mu'sosa' main are' kanan ho 'mui'm ein. Rarit meik roit ein re' ho mupein sin naan ma mnao he mbait main sin meu ama'mui't ein. Rarit ho mtebi mfain uum nai he mutuina' Kau. Uisneno of anseun baran ko npake 'mu'if neno tunan.”
22 Oras in neen Nai' Yesus In uaban naan ate, in neekn ii krati'-krati'. Ma in nfain nok neek susat ma'tani', natuin atoni' re' naan, amu'it batuur-batuur.
23 Ma Nai' Yesus ankisu nfuun am nateef ma na'uab neu In atoup noin' ein am nak, “Amneen, oo! Amui't ii na' neu gwah he ntaam neu sonaf neno tunan!”
24 Anneen rasi naan ate, In atoup noin' ein anmukekun. Ma Nai' Yesus na'uab antein am nak, “Amneen mirek-reko'! He tjair Uisneno Iin na, suust ii ka aan'-ana' fa! Kaisa' mitenab am mak ma'kaf-kafa'. 25 Atoin amui't es he ntaam neu sonaf neno tunan ma njair Uisneno In aanh ate, in suust ii huma' mese' on re' bikaes unta he ntaam neu in o'of, annao ntaam anpeo' aent es in konan.”
26 Nai' Yesus In uaban naan anmoe' sin anjarin ntaka'naan ein antein. Ma sin nmaktaan ein am nak, “Karu namneo on naan ate, sekau es re' bisa napeni 'honis nabar-baar?”
27 Nai' Yesus ankius sin mese'-mese', rarit na'uab am nak, “Natuin mahinif ma manoef mansian ii te, of ka njair fa saa' es. Mes mimnau, natuin mahinif ma manoef Uisneno, ka tiit fa saa' es, re' of ka njair fa.”
28 Rarit nai' Petrus anmurai na'uab am nak, “Aam! Hai misaina' main are' kanan saa'-saa' he mituina' Ko. Onaim hai of mipein saa', tua?”
29-30 Nai' Yesus nataah am nak, “Au he utoon ki m'ak on nai: sekau es re' natuina' Kau, ma annao nasaina' in ainaf-amaf, in orif-tataf, in aanh ein, in rene, in mepu, nok are' in uim je nanan, he nnao natoon Uisneno In Rais Reko nbi mee-mee, in of antoup nafani' no nautn es. Are' saa'-saa' re' in nasaitan sin naan, of napein nafani' sin anneisi ntein na'ko naan. In of napein ha'mu'it amsa', natuin in natuina' Kau. Mes oras pah-piin ii namsopu te, in of anmoin nabar-baar nok Uisneno. Rasi re' naan, es re' anjair seun baran neu ne! 31 Mimnau, joo! Natuin Uisneno In teenb ete, sekau na'naeba' in tuan ii te, of na'bauna'. Ma sekau na'paran in tuan ii te, natuin Uisneno In tenab, of na'raatn ee.”g
Ia haan tonas nfain era' teun anmatoom nok Usif Yesus In a'maten
32 Oras naan, Nai' Yesus sin nnaon neun Yerusalem. Anbi pukan re' naan, Nai' Yesus es re' ahunut. Ma In atoup noin' ein nok tuaf bian antein anbin In kotin. Sin namnau In uaban neon gwes ii re' nak, biak ein of na'maet Je nbi Yerusalem. Onaim sin nmukekun ma namtaun amsa'. Anneen on naan ate, Nai' Yesus no'en naan In atoup noin' ein anmesen, ma na'uab antein saa' re' biak ein of anmoo' Je nbi Yerusalem.
Nai' Markus 10:32-52
33 In na'uab am nak, “Hi mneen, oo! Oras ia, hit tnao teu Yerusalem. Au re' ia, Mansian Batuur-Batuur. Mes anbi Yerusalem sin of na'sosa' Kau neu a'naak rais pirsait Yahudi sin a'naakt ein ma tunggur agaam ein. Rarit sin of anhukun niis Kau. Ma sin nnona' Kau neu tua sona' re' ka nahiin fa Uisneno. 34 Rarit sin na'akan Kau re'uf-re'uf. Sin naroon Kau. Sin nbeos Au aok ii tar papa' oke'. Rarit sin nroor niis Kau. Namneo, Au 'maet. Ma nmeu te, Au 'moni 'fain.”h
Nai' Yakobus ma nai' Yohanis antotin he njarin kaes ko'u
35 Rarit Nai' Sebedius in aanh ein, esan re' nai' Yakobus ma nai' Yohanis, sin neman neu Nai' Yesus. Sin ntotin am nak, “Aam tungguru! Hai he mi'uab maan akre'o, tua!”
36 Nai' Yesus nataan sin am nak, “Hi he mi'uab saa'?”
37 Sin natahan am nak, “On nai, Aam! Nati' reka' Ho mtook ma mnaa' aprenat ate, hai mtoit he Ho mutoko' kai, tuaf es anbi Ho 'nimam a'rii, ma tuaf es anteni' anbi Ho 'nimam a'ne'u, he hai mnaa' mok aprenat amsa'.”
38 Nai' Yesus nataah sin am nak, “Hi nua ki ka mihiin main fa saa' re' hi mtoti. Au re' ia, of upein susat ma nana'renat amfaun. Onaim on mee? Anbi hi teenb ii te, hi mak, hi mibei' he mnaben susat ma nana'renat tar ammaet mok Kau, oo?”i
39 Sin natahan am nak, “Hai mibei', tua!”
Nai' Yesus na'uab antein sin am nak, “Namneo. Hi of amnaben susat ma nana'renat amsa' on re' Au. 40 Mes sekau es re' antoko nbi Au 'nimak a'rii ai' a'ne'u, Au ka 'seor Ok fa 'bi rasi naan. Natuin rasi naan, Uisneno es re' nafeek. Ma In nafeek anrair sekau-sekau es re' he ntoko nbin bare naan.”
41 Oras atoup noni' bian sin annenan nai' Yakobus ma nai' Yohanis sin haan totis on naan ate, sin nato'on ma'tani'. 42 Rarit Nai' Yesus no'en sin ok-oke' ma na'uab am nak, “On nai! Hi mihini mrair jen, ai' kaah? Kaes ko'u re' anna'an aprenat, sin esan re' nati' te anha'mui' too gwi. Tar antea too gwi ka nakbeor ein reko fa. Ma 'nakaf-a'nakaf anbi pah-pah re' ka nahiin fa Uisneno, sin nanaoba' atoran ma prenat huma'-huma', tar sin too gwi ka bisa nait fa sin a'naak ein. 43 Mes ka nabei' fa he hi mmoe' on re' naan! Sekau na'ko ki re' anroim he njair kaes ko'u, in ro he njair on re' a'baut he ntuthae in aok-bian ein.j 44 Ma sekau es re' anroim he njair a'nakat, in ro he nmoe' in tuan aan on re' ate ma nmeup neno-neno on re' naan.k 45 Fin Au, Mansian Batuur-Batuur, es re' ia. Au ka 'uum fa he atoni' ntuthae Kau, mes Au 'uum he 'tuthae too mfaun ein. Au 'uum he 'nona' Au 'moink ii 'teme-'teme, he 'soi 'aan too mfaun ein na'kon sin sanat ma penu sin.”
Usif Yesus nareko' atoin aforot
46 Nai' Yesus nok In atoup noin' ein ma too mfaun ein neem antean kota Yeriko. Oras sin he nnaon nkonon, sin niit atoin aforot tuaf es antook ma ntoit piut-piut anbi raan ee ninin. In kaann ee, nai' Bartimeus, nai' Timeus in anah. 47 Oras in nneen nak, akonot naan Nai' Yesus na'ko Nasaret te, in nhunun naher-heer am nak, “Yesus! Ho re' naan, sufa'-ka'uf na'ko nai' Daut! Hai mpao Ko 'roo-'roo gwen, tua! Amturun maan kau, tua!”
48 Anneen in hanan naan ate, too mfaun ein nakain ee mnak, “Hoe! Mumninu'!”
Mes in nhunun naheer antein am nak, “Yesus! Nai' Daut in sufan! Mumnau maan kau, tua!”
49 Ma Nai' Yesus anhake mnak, “Hi meik je neem!”
Rarit sin nnaon neun ee mnak, “Noo gwah nai! Aam tungguru no'en ko. Uum nai!”
50 Anneen on naan ate, nai' Bartimeus anporin nain in tai nusat, rarit anfeen ma nnao rab-raab he nateef nok Nai' Yesus.
51 Rarit Nai' Yesus nataan ee mnak, “Ho mroim saa' he Au 'moo' je 'eu ko?”
Atoin aforot naan nataah am nak, “Koi, Aam! Au 'toits ii es re' karu reko te, au 'iit, tua.”
52 Nai' Yesus na'uab antein am nak, “Natuin ho mpirsai mrair mak, Au bisa ureko' ko, es naan ate oras ia ho mureok nai! Amkoen om amfain nai!”
Rarit nai' Bartimeos in matan afoort ein naan nareok nanin. Onaim in nok annao naat Nai' Yesus.