Usif Yesus antaam neu kota Yerusalem on re' Usif
21
Rarit Nai' Yesus sin nnaon nkonon tar antean kuan es, kaann ee Betfage, et a'to'ef Saitun in ninin.a Kuan naan he npaumak-maak nok kota Yerusalem. Anbi naan sin nasnasan ntaahn ein. Onaim In nreek In atoup noni' tuaf nua he nnaon nahunun. 2 In naprenat sin im nak, “Hi nua ki mnao meu kuan nee. Karu hi mtaam, hi of miit bikaes keledai ainf es nok in aan ee mafutu' et naan. Hi mnao mseif sin ma mheer meik Kau sin neman. 3 Mes karu nmui' tuaf re' nataan ki mnak, ‘Nansaa' am es hi mheer meik biak ein sin bikaes keledai?’ Hi mitaah am mak, ‘Usi' he npake. Karu In npake nrair je te, In of ansoun ee nfain neem.’4 Rasin re' naan ok-oke' ro he njarin, natuin saa' re' Uisneno In mafefa kniun' ein antui nain sin im nak,
5 ‘Hoe, hi atoin Yerusalemas aar ki!b
Amkoen om iim he mkius ma miit kiim!
Fin hi Uisf ee, es re' ankoen On antaam neem.
In ntaam neem nok neek a'parat ma ba-baun.
In ntaam neem ansae ma na'tuut On nbi bikaes keledai ana'.’”c
6 Rarit In atoup noin' ein annaon ma nmoe' natuin sin ok-oke', on re' Nai' Yesus anba'an sin. 7 Sin nheer neik bikaes keledai ainf ee nok in aan ee neu Nai' Yesus. Rarit sin ntaon tai-muti' njarin a'peni', onaim In nsae nbi bikaes keledai naan, he ntaam neu kota. 8 Oras sin ntaman neun kota nanan, too mfaun ein nait sin tai-muit ein, ma sin pouk ein, he na'been sin anbin ranan. Anmui' tuaf re' nnaon n'oten hau noo peta msa'd he sin na'benan nbin raan ee tnanan. Nok ranan naan, sin nmoe' tanar am nak, sin nseun Nai' Yesus on re' kaes ko'u. 9 Ma nmui' tuaf annaon nahunun anbin Nai' Yesus In matan, ma bian namunin. Sin nsakanan ok-oke' mnak,
“Hosana! Hai mpures ma mbo'is meu Uisneno!e
Natuin usif Daut in sufa'-ka'uf neem anrair!
Hosana! Hai mpures ma mbo'is meu Uisneno!
Natuin Uisneno nruur ma nreek haefan Atoni' ia.
Hosana! Hai mpures ma mbo'is meu Uisneno!
Natuin Uisneno ntuun On ma naprenat et neno a'raat re'uf!”f
10 Oras Nai' Yesus antaam neu Yerusalem sin nkoa' ma nhunun on naan, kota naan in naan ee npoin ok-oke' ma nmaktaan ein am nak, “Sekau es re' amnemat re' ia?”
11 Too mfaun ii natahan am nak, “In re' naan Uisneno In mafefa kninu'. In kaann ee Nai' Yesus, atoin Nasaretas, na'ko propinsi Galilea.”
Usif Yesus antaam neu Uim Onen Uuf ma npukai nani 'masa' nbi naan
12 Rarit Nai' Yesus sin nnaon nkonon, onaim sin ntaman nbin Uisneno In Uim Onen Uuf. Anbi Uim Onen naan in kintal, atoin ein nmoo' je njari 'masa' he sin na'soos ein kor-kefi re' atoni' npaek je he nfee fua'-turu' anbi onen. Ankius on naan ate, Nai' Yesus nnao nriu' napoitan sin. In npesek anporin mein re' sin npaek sin he tukar roit, ma nabani' a'been ein re' sin npaek sin he na'soos ein koro. 13 Onaim In natoon neu sin im nak, “Uisneno In mafefa kninu' antui mnak,
‘Au uhake' ma ufena' Umi ia,
he sekau-sekau gwah bisa neman n'oen ein neun ia.’
Uisneno In sairt ee on re' naan, mes hi mmoo' je njair apaikaurt ein sin baer ekut-tefas!”g
14 Rarit afoort ein ma abuat ein neman neun Nai' Yesus anbi Uisneno In Uim Onen naan. Onaim In nareko' nain sin ok-oke'. 15 Anbi naan, a'naak rais pirsait Yahudi sin a'naakt ein, ma tunggur agaam ein anhaek nokan amsa'. Oras sin nkius Nai' Yesus anmoe' rais sanmakat, sin nato'on. Anneis-neisi nteni', oras sin nnenan ri'aan ein ankoa' ein ma nsakanan ok-oke' nbin Uim Onen naan am nak,
“Hosana! Hai mpures ma mbo'is meu Uisneno!
Natuin usif nai' Daut in sufan-ka'un ankoen on neem anrair!”
16 Rarit a'naakt ein natonan Nai' Yesus am nak, “Ho mneen ri'aan ein sin uabk ein? Re' naan ka batuur fa!”
Mes Nai' Yesus nataah sin im nak, “Reko, Au 'neen. On nai te, hi teenb ee on mee? Hi ka mrees miit fa et Uisneno In Suur Akninu' anmatoom nok anah-anah re' npures ma nbo'is neun Uisneno, ai'? Fin anbi naan matu'i mnak,
‘Uisneno nabarab nain ri'ana kru'uf ma ri'aan ana' ma a'baut,
he sin npures ma nboi's Ee.’”h
17 Rarit Nai' Yesus sin annaon nasaitan kota naan, he nnaon ntupan nbin kuan Betania.
Usif Yesus naprenat hau uu' gwes he kais nafua ntein
18 Noka' kiuk ana' te, Nai' Yesus sin ntebi nfanin neun kota Yerusalem. Anbi raan atnana' In annaben ate namnaah. 19 In nkius niit hau uu' gwes anbi raan ee ninin re' tuaf biasa neuk in fuan.i Onaim In nnao npaumak-maak hau naan, he nkius niit ee nafua, ai' kaah. Mes oras In ntea hau naan, In ka niit fa fuaf fua' mese' msa', natuin hau naan fe' he nanoo. Onaim In na'uab neu hau naan am nak, “Natuin ho ka mufua fa meu Kau, es naan ate ho ka mufua mtein fa!” In na'uab anrair on naan ate, hau naan anmeot nain.
20 In atoup noin' ein ankius nitan on naan ate, sin naskeken. Sin natanan am nak, “Nansaa' am es nok askeken ate hau ia nmeot nain?”
21 Onaim In nataah am nak, “Amneen mirek-reko' joo! Karu hi mpirsai batuur-batuur meu Uisneno, ma hi neekm ein ka na'oin ein fa kre'o msa', hi bisa mmoe' on re' Au 'moo' je naan. Hi bisa mmo'e nneis na'ko naan. On re': hi bisa miprenat a'toe'f es nanani' neu tasi. Uisneno of nanani' nain a'to'ef naan, asar hi mpirsai batuur-batuur meu Ne!j 22 Fin are' kanan rasi re' hi mtoit sin mi'ko Uisneno, hi of amtoup sin, asar hi mpirsai batuur-batuur meu Ne.”
A'naakt ein anmaktaan ein anmatoom nok Usif Yesus In hak
23 Rarit Nai' Yesus sin nnaon nkonon. Antean Yerusalem ate, sin ntaman nfanin nbin Uim Onen Uuf ee in kintal. Oras In nanoni' tuaf anmatoom nok Uisneno In raan a'honis on nai te, a'naak rais pirsait Yahudi sin a'naakt ein, ma atoni mnais haart ein neman ma nataan Ee mnak, “Sekau es re' anreun ko he ho mtao taisibu mbi ia afi naa? Sekau es re' anfee ko hak naan?”
24 Mes In nahiin neu sin namin ranan he namouf Gwe. Rarit In nataah am nak, “Au he utaan ki msa'. Hi mitaah Kau fe', hena' Au utaah ki. 25 Au he utaan ki on nai: hi ok-oke' mihiin nai' Yohanis asranit, ai'? Sekau es re' anfee ne hak he nasrain? Uisneno, ai' mansian?”
Rarit sin nateenb ein neu-mneman, ma na'uab ein am nak, “Kreot ii naan kit ein, karu hit tak, ‘Uisneno es re' anfee hak’, In of nataah am nak, ‘Karu on naan ate, nansaa' am es hi ka mpirsai fa nai' Yohanis?’ 26 Mes hit ka bisa fa he tak, ‘Mansian es re' anfee hak’, natuin too mfaun ein of anmaheek kit. Natuin sin npirsain am nak, nai' Yohanis naan, Uisneno In mafefa kninu'.” 27 Es naan ate, sin natahan neun Nai' Yesus am nak, “Hai ka mihiin fa, tua.”
Onaim Nai' Yesus nataah neu sin im nak, “Karu on naan ate, Au ka 'perluu fa he utoon ki 'ak sekau es re' anfee Kau hak.”
Usif Yesus nareta' anmatoom nok a'naef es ma in aan mone tuaf nua
28 Nai' Yesus na'uab nok a'naakt ein am nak, “Hi mitenab on mee nok uab manporin ia? Anmui' atoni mnais es nok in aan mone tuaf nua. In naprenat in aan moen unu mnak, ‘Neno ia ho mnao mmeup on reen je fe'.’
29 Mes aan moen unu naan nataah am nak, ‘Au ka 'nao fa.’ Mes ka 'roo fa te, in nmei' jon, rarit in nnao.k
30 Rarit atoni mnasi' naan anreun in aan mone es antein am nak, ‘Neno ia, ho mnao mmeup on reen je fe'.’
Onaim anah naan nataah am nak, ‘Reko, tua. Au of a'nao’. Mes in ka nnao fa.”
31 Nareta' nrair on naan ate, Nai' Yesus nataan sin im nak, “Au he utaan ki on nai: na'ko ri'aan nua' ein naan, re' mee es re' nmoe' natuin in aamf ee prenat?”
Onaim sin nataahn am nak, “Aan moen unu!”
Rarit In na'uab am nak, “Reko, mes amneen mirek-reko', fin Au u'uab batuur. Tuaf re' hi mtanar nahuum on re' sin ka mapaek ein fa, on re' ahoik beo, ma bifee a'hake', sin of antaman njarin Uisneno In tuaf ein re' nahunun na'ko ki. Hi suma mitaah ‘reko’ meu Uisneno gwah, mes ka mmoe' mituin fa In romin. 32 Unu', Nai' Yohanis asranit nanoni' ma natoon anrair ki nok ranan on mee he hi bisa mmoin mimnoon ma mimneo. Mes hi ka mroim fa he mpirsai Je. Te kaah, oras tuaf re' ka mapake' fa sin nneen nai' Yohanis, sin nasaitan sin sanat ma penu sin he natuin in noin' ein naan. Hi mihini mrair sin ok-oke'. Mes hi ka misnaas fa mi'ko hi sanat ma penu sin, he mituin Uisneno In romin.”l
Usif Yesus nareta' anmatoom nok atoin maufinu re' anseeb poo' anggur
33 Rarit Nai' Yesus nareta' reet es antein am nak, “Anmui' naan auf tuaf es antao rene, he nseen hau anggur. Rarit in nbaah naan rene naan nfuun am nateef. Onaim in ntao baak he naes hau fua anggur oef. Ma in nmoe' tobe. Rarit in na'seba' rene naan neu aseebt ein he sin npairori, ma rene naan in afan sin nbatin nfeen auf tuaf naan. Onaim in nnao nasaitan sin neu pah a'pen-pene bian.m
34 Oras he nseun hau fua anggur te, poo' tuaf naan anreek in haef ein he neman neu aseebt ein naan, he ntoup in sapaan. 35 Mes aseebt ein naan sin ka nfairoir fa haef ein naan. Bian napenin besot, anroor bian, ma npoir bian nok fatu. 36 Mes poo' tuaf naan anrenu nteni' in haef ein puukn es, re' namfau nneis na'ko ahuunt ein. Mes aseebt ein naan nmo'en maufinu neu sin ok-oke' msa'.
37 A'roo-'roo te, poo' tuaf naan anreun in aan honi'. In natenab am nak, ‘Karu au 'reek haefan 'eu au aan honi', sin of anseun gwe rek-reko, ma sin of natniin ee.’
38 Mes oras aseebt ein niit ri'ana' naan, sin na'uab ein am nak, ‘Hae, amkius miit! A'naef ee nreek haefan neu in aan honi', in of es re' ntoupu 'naef ee in pusaak ein ok-oke'. Onaim iim he theek je ma troor tiis ne nai, maut he hit es atpaar kuuk po'on ia.’ 39 Onaim sin nheek ri'ana' naan, rarit sin nheer neik je, ma npoirn ee neu po'on naan in kotin ma sin nroor niis ne.”
40 Nai' Yesus nareta' nrair on naan ate, In nataan sin im nak, “Au utaan ki on nai: karu poo' tuaf naan anfain neem, in of he nmoe' saa' neu aseebt ein naan?”
41 Rarit atoin Yahudis sin a'naakt ein natahan am nak, “In ro he nroor na'maet atoin maufinun sin ok-oke'. Rarit in na'seba' po'on naan neu tuaf bian antein. On naan ate, of nateef in oors ate, sin nbait po'on naan in afan.”
42 Rarit Nai' Yesus na'uab neu sin im nak, “Oni' hi ka mrees miit fa saa' re' matu'i et Uisneno In Suur Akninu' mnak,
‘Anmui' naan faut gwes re' tuukn ein nait inporin,
mes oras ia, fatu naan anjair fatu 'suki' neu umi'!
Uisneno kuun es re' anpiir ma nbetis nain je, he natoko' fatu naan.
Es naan ate, hit tahiin ma tiit in masan arekot!’”n
43 Rarit Nai' Yesus na'uab anteni' mnak, “Onaim mitenab mirek-reko'. Unu' te Uisneno npiir kit atoin Yahudis, he tjair Iin na. Mes natuin hi ka mituina' Kau fa, Uisneno of anpiir tua sona'. Fin tuaf re' nmoin natuin Uisneno In romin es re' bisa ntaam anjair Iin na. 44 [Au utoon unoon. Au re' ia, es re' fatu 'suki' naan. Tuaf re' nastuun ma ntaikobi nbi fatu ia, of namreu'. Ma karu fatu naan anmouf ma ntoom tuaf es, tuaf naan of namreu' nain.]”o
45 Oras a'naak rais pirsait Yahudi sin a'naakt ein, ma atoin Farisi sin nneen Nai' Yesus In reta' naan, sin nahinin am nak, In nseer sin. Sin aar sin re' naan natai nok re' aseeb poo' anggur naan, ma tukan fatu re' nait inporin fatu 'suki' naan. 46 Onaim sin nato'on nmat-maten. Rarit sin n'ator asraak he nheek Nai' Yesus. Mes sin natiun gok neu too mfaun ein re' naan Nai' Yesus nak, Uisneno In mafefa kninu'. Onaim sin ka bisa nmo'en fa saa'-saa' neu Ne.