4 Mes sin nfeef a'temen ok-oke'. Onaim Nai' Yesus ansai amenat naan, rarit nareok nain. Onaim Nai' Yesus anreun gwe he nfain nai. 5 Rarit Nai' Yesus nataan sin ntenin am nak, “Karu anmui' ri'aan es anmoufu ntaam neu oe hani' nateef nok neon onen, hi mnao mipoin ee oo, ai' kaah? Karu bijae je es anmoufu ntaam, hi mkoon ee oo, ai', mnao mipoin ee? Hi of amnao mheer mipoin. On nai te, naan in oetn ii nak, hi mmeup!”^a

6 Annenan Nai' Yesus In uaban on naan ate, ka tiit fa es he bisa nataah neu Ne.

7 Oras naan, Nai' Yesus ankius tuaf-tuaf re' neman nbukaen nbin umi naan. Anmui' tuaf amfaun namin bare he ntokon nbin maat. Ankius on naan ate, In na'uab am nak, 8 “Ampaant om, oo! Karu anmui' tuaf anfee haan askaut neu ki, he mnao meu fesat kabin, kais maim bare he mtoko mbi a'naet ein sin baark ein. Kais-kaisa' kabin tuaf ee anfee haan askaut neu a'naet ein. 9 Karu on naan ate, kabin tuaf naan of neem neu ko mnak, ‘Kais mutoo' goo! Au uskau he tanani' teu kotin nee, natuin au ubarab a'toko' ia 'eu a'naet re' ia.’ Onaim ho mfeen mu'ko 'toko' naan ma mumaeb om. Rarit amnao mtoko mbi koit. 10 Onaim karu ho mupein haan askaut, mnao mtook meu 'toko' abit kotin ee. Karu kabin tuaf ee niit ko te, in of neem am nak ko mnak, ‘Ee, Aam! Au uskau he tkoen ok teu matan ia.’ Nok ranan naan hi mipein hormaat anbi taumn ee ok-oke'.^b 11 Fin tuaf re' nanaib on, Uisneno of namouf gwe. Mes tuaf re' na'paarn on on re' atoin a'baut, Uisneno of nait na'raatn ee.”^c

12 Rarit Nai' Yesus na'uab nok uim tuaf naan am nak, “Neot es anteni', karu ho mmoe' fesat, kais amfee haan askaut meu ho nonot-asar ma ho partei amui't ein anmesen! Natuin sin of bisa nfeen haan askaut he nbaras ko. 13 Mes karu ho mmoe' fesat, mfee haan askaut meu ama'mu'it, hae sah-sere', abuat, ma aforot sin. 14 Sin of ka bisa nbaras naan ko fa. Mes karu ho mfee haan askaut neu sin, Uisneno es re' anbaras neu ko. Anbi oras Uisneno namonib nafani' In apirsait ein re' anmaten nrarin, In ka nnikan fa ho 'moe' reko naan.”

15 Anneen on naan ate, tuaf es re' nok antook mei mese' nok Nai' Yesus, na'uab am nak, “Ua reok re'uf, es re' karu tbukae bu'-bua' anbi Uisneno In sonaf!”

16 Nai' Yesus nataah ee mnak, “Au 'mui' reta' on nai: anmui' atoin es anmoe' fesat ko'u. Onaim in nfee haan askaut neu too mfaun ein. 17 Oras fesat naan sin naroitan anrair je te, in nreek haefan in ate ma nnao naskau tuaf-tuaf re' napenin haan askaut am nak, ‘Au uskau tua, fin acara fesat he nmurai jen.’ 18 Mes sin aar sin anmo'en kuuk rasi 'sukif huma'-huma', he sin kais nokan neun re' fesat naan. Tuaf es anfee rasi 'sukif am nak, ‘Hee'! Au fe' a'soos auf fe'u, onaim au 'nao he 'kius 'iit ee fe'. Kais muto'-too'! Au ka bisa 'uum fa, tua.’ 19 Bian nak, ‘Au fe' a'soos 'aan kuuk bijae abanit afu pasan niim. Au he 'nao 'soba' sin. Onaim au 'toit ma'af, he!’ 20 Bian anteni' nak, ‘Au 'matsao fe'u, onaim ka bisa fa, tua.’

21 Rarit ate naan antebi nfain ma natoon neu in usin. Anneen on naan ate, usif naan natoo' batuur-batuur. Rarit in naprenat in ate naan am nak, ‘Karu on naan ate, mnao rabah meu raan oopt ein, raan aan'-aan' ein anbin kota ia, he mheer meik kit atoin kasian ein, atoin hae sah-sere', atoin aforot ma abuat ein.’ 22 Anneen on naan ate, ate naan annao ma naskau tuaf-tuaf ein naan. Rarit in ntebi nfain ma natoon am nak, ‘Usi'! Sin neman nrarin, mes bare bian ruum ein fe', tua.’

23 Onaim usif naan na'uab am nak, ‘Karu on naan ate, amnao mtein meu kuan-kuan et kota in kotin, amtea reen ein. Muteef sekau-sekau te amfuir sin, he meik sin neman, asar baer fesat ia naheun. 24 Amneen, he! Tuaf-tuaf re' antorak au haan askaut naan, sin ka nnaben niit fa fesat ia in minan, maski kre'-re'o msa'!’”

25 Rarit Nai' Yesus sin annaon nkonon neun Yerusalem. Too mfaun ein natuin Ee. Rarit In nabani' n'ain sin am na'uab am nak, 26 “Atoni' re' batuur-batuur he natuin Kau, in ro he nneek Kau anneis na'ko are' kanan saa'-saa' ii barisi: anneis na'ko in ainaf-amaf, anneis na'ko in fee-anah, anneis na'ko in orif-tataf, ma anneis na'ko in tuan aan kuun. Karu kaah fa te, atoni' naan ka pantas fa he njair Au atoup noni'.^d 27 Fin atoni' re' ka nroim fa he nasaah ha'mu'it ma ma'ne'at natuin in npirsai Kau, in ka pantas fa he njair Au nggwin. Tuaf re' anroim he njair Au nggwin, maski atoni' he nroor na'maet je msa', mes in nasaah piut ha'mu'it ma ma'ne'at naan.^e

28 Onaim karu he mituin Kau, amtai mirek-reko' fe'. On re' atoni' he nafena' uim maktuta'. In ro he nsoi' nahunun uim je in oosn ii fe', tar antea namtiis. Kais-kaisa' roit ein ka nanokab fa. 29 Karu ka nsoi' sin fa tar namtiis, in of anfanderen anrari te, roit ein oek' ein. Rarit biak ein anmains ee ma namae je, 30 mnak, ‘Hi mkius miit atoni' ne fe'! In fe' anfandeern aah ate, ka saa'-saa' fa fe', mes narair roit.’

31 Uab conto bian, es re' anmatoom nok makenat. Usif re' he nnao neu makenat, ro he ntook he nsoi' narek-reko' nok in aok-bian sin. Karu in suma nmu'i ha sorarus tuaf nifu bo'es (10.000), in bisa niis anbi makenat nok musu tuaf nifu bo' nua (20.000), ai' kaah? 32 Karu anso-so'i nrari ma, nak in of ka niis fa nbi makenat naan, reko nneis, oras muusn ee fe' ka ntaman fa fe', in nreek haefan tuaf he nnao n'urus rais rame'. 33 On naan amsa', tuaf re' he natuin Kau. In ro he ntai nafan-fani' mnak, in nabarab anrair he nasaitan sin ok-oke', ai' kaah fe'? Fin karu ka on fa naan ate, tuaf re' naan ka pantas fa he njair Au nggwin.”

34-35 Nai' Yesus antuut In uaban naan anpaek uab manporin es antein am nak, “Maisk ii reko. Hit tpaek je he taminab amnahat. Mes karu maisk ii ka miin mari fa gwen, hit he tpaek je neu saa'? Hit ka bisa tpaek je fa he tmasi amnahat. He ttao pupuk amsa', ka bisa fa. Hit tait itpoirn aah ee. Onaim hi ro he mjair on re' masik amsa', he mmoin nok manekat mok are' too mfaun ein. Sekau maruki' te, amtakan mirek-reko'!”