Bi Rut in Retan
Nai' Elimelek sin nanain ok na'kon kuan Betlehem et pah Isra'el, neun pah Moab
1
1-2 Un-unu', oras ka nmui' usif fa fe' ete, anbi pah Isra'el afeek rasi sin es re' an'ator abitan pah Isra'el.Oras naan, anmui' tuaf es kaann ee nai' Elimelek. In re' naan na'ko nonot Efrata, na'ko kuan Betlehem anbi pah Yahuda. In fee je kaann ee, bi Na'omi.a Sin aan moen ein tuaf nua, kaank ein esan re' nai Mahlon ma nai' Kilyon.
Oras naan, amnahas ma'tani' antaman anbi pah Yahuda. Es on naan ate nai' Elimelek sin annaon nasaitan sin kuan, he nnao natuan nbin pah Moab, anbi noe Yarden in pasa' neon-saet. 3 Mes anbi bare naan, nai' Elimelek anmate nporin in fee ma in aanh ein, onaim aar sin anmonin nmesen. 4 Oras ri'aan ein naan na'naen, sin ansao naan bifeen na'ko Moab. Nai' Mahlon ansao naan bifee jes, kaann ee bi Rut. Nai' Kilyon ansao naan bifee jes kaann ee bi Orpa. Mes of oni' sin natua nanan anbi naan toon bo'es, 5 bi Na'omi in aan moen ein tuaf nua' ein naan, esan re' nai' Mahlon ma nai' Kilyon, sin anmaten amsa'. Sin nmaten nporin sin ainf ee nmees—ka nmui' fa mone, ka nmui' fa anah, ma ka nmui' fa upuf.
Ain Na'omi ma bi Rut anfanin neun Betlehem
6 Oras ain Na'omi fe' natua nbi pah Moab, in anneen niit am nak, UISNENO namnau In tuaf ein abitan pah Yahuda, rarit anmu'i mnahat anbi naan antein. Es on naan ate ain Na'omi nok in aan naenf ein tuaf nua nabaarb ein he nnao nasaitan pah Moab he nfanin neun in pah aa kuun. 7 Rarit sin teun sin annao nasaitan bifee mnasi' naan in uim je abit pah Moab, natuin ranan re' nfanin neun pah Yahuda.
8 Mes oras sin antean raan atnana', ain Na'omi na'uab neu in aan naenf ein am nak, “On nai! Reko nneis hi nua ki mfain meu hi aina' sin aah. Fin hi miruru' mirair hi neek reko meu au aanh ein re' anmaten nrarin, ma meu kau msa'. Etun es au 'toit he UISNENO naruru' In nekan arekot neu ki nua ki. 9 Maut he In anfee ki nua ki, atoin fe'u he njair hi monen re' neek ein reko, ma hi bisa mmoin nok tainina' msa'.” Rarit bifee mnasi' naan anhoo ma nneek sin nua sin, ma sin nkaen nme'-meu'r ein amsa'.
10 Mes sin nua sin nak, “Kaah fa, tua! Hai he mituin ko, he mmoin mibu-bua mok ho nggwin amsa'.”
11 Mes ain Na'omi nataah am nak, “Aan hoin' ein! Amfain nai! In upan saa', karu hi mituin kau? Fin au re' ia umnais jen, ma ka bisa uhoni 'aan fa, ri'aan mone ntein re' bisa njair hi moen ein karu sin na'nae neman. Ka bisa fa, ai'? 12 Maski hi nua ki on re' au aanh aa kuuk, mes reko nneis hi mfain kiim. Fin au umnais jen, onaim hi kais mitenab mak au bisa 'sao 'tein. Au kuuk ka ufneek fa on re' naan. Maski nak mabe' ia au 'sao, ma upeni 'teni ri'aan mone, hi teenb ii on mee? 13 Hi mak he mpao ri'aan ein naan tar na'naen, rarit amsao sin? Kas-kaisa hi ka mtahan fa rarit amsao atoni 'teta'. Ma'nuka' ma ma'tani', ai'? Mes au suust ii menu' nneis na'ko hi susat, fin au 'naben ate UISNENO kuun es anpaas na'ba-bae kau. Onaim reko nneis hi kais mituin kau.”
14 Rarit sin teun sin ankaen nme'meu'r ein antenin. Ma bi Orpa anneek in ain babaf, nasee je, ma antebi nfain. Mes bi Rut anhoo naher-heran in ain babaf.
15 Ain Na'omi na'uab neu ne mnak, “Mkius kuum! Bi Orpa anfain jen neu iin naa ma in baer fuat ein amsa'. Nansaa' am es ho ka mfain mok ne fa msa'?”
16 Mes bi Rut nataah am nak,
“Kais mutoo', mes kais amreun kau he 'fain.
Ma ho kais mu'seke' kau he 'nao 'porin ko mmees.
Fin au he u'kii' 'ok ko piut.
Ho mnao meu bare mee te, au 'nao 'eu naan amsa'.
Ho mutua meu kuan mee msa' ate, au utua 'eu naan amsa'.
Ho nggwin of anjair au nggwin amsa'.
Ma ho Uisneno of anjair au Uisneon gwoa msa'.
17 Ho mmate mbi bare mee te, au 'mate 'bi naan amsa'.
Sin nsuub ko mbi bare mee msa' ate, sin of ansuub kau msa' 'bi ho aom-biam.
Maut he UISNENO es anhukun kau,
karu au 'baits ok u'ko ko.
Fin maets ee msa' of ka bisa nbatis ma nbetis naan kit fa nua kit!”
18 Onaim oras ain Na'omi ankius nak bi Rut anpasan ma na'tika' in haen ee he natuin ee te, in ka na'uab fa ntein.
19 Rarit sin nua sin annaon piut, tar sin antean kuan Betlehem.
Oras sin nua sin antean nee te, are' too mfaun ein ansanmakan. Bifeen na'kon sin kuan ee anmaktaan ein am nak, “Batuur aa, oo? Re' ia ain Omi, oo?”
20 Mes ain Na'omi natonan sin am nak,
“On nai! Hi kais amhaman kau mak bi Na'omi mtein,
fin in oetn ee nak, ‘re' neek mainoni'’.
Reko nneis hi mhaman kau mak bi Mara,
fin in oetn ee nak, ‘re neek menu'’.
Fin Uisneno re' Akuasat anmoe' au 'moink ii njair menu'.
21 Unu' oras au 'poi u'ko ia,
au unokab ma umtiis, fin au 'mui' mone, ma ri'ana' tuaf nua.
Mes oras ia Uisneno neik nafani' kau,
ruum-ruum aah.
Onaim, nansaa' am es hi mhaman kau mak bi Na'omi,
karu UISNENO paar anpaas kau?
Fin In es re' Akuasat.
Ma In es re' nasusab kau, tua!
22 Naan in retan oras ain Na'omi nfain na'ko pah Moab ma in anfain nok in aan nanef bi Rut, bifee Moapas naan. Sin nua sin antean Betlehem ate, nateef nok oras sekit ma mnonut.