2 Neno nee nkono te, Nai' Yesus antoit nai' Petrus, nai' Yakobus, ma nai' Yohanis, he nnaon nsaen bu'-bua' on 'to'e mnanu' es, re' ka nmui' fa tuaf. Oras sin antean in tunan, sin nkius niit Nai' Yesus na'bani'. 3 Ma In tai-pake naan anjair muti' ma nariim. Ka nmui' fa bare' anbi pah-pinan re' ia, muitn ii namnees nok In tai-pake naan. 4 Nok askeken, sin niit Nai' Yesus na'uab nok ka'o Elia ma ka'o Musa.

5-6 Nai' Peturs sin namtaun nmaten. Nai' Petrus antaka'nana', tar in na'uab tafi'-tafi'. Rarit in na'uab neu Nai' Yesus am nak, “Aam! Hit tbi ia te, na' reko nneis. Reko te, hai mmoe' ropo teun. Es neu Ko, tua. Es neu ka'o Musa, ma es atfee je neu ka'o Elia.”

7 Rarit anmui' nope re' ansaun neem ma n'aum naan sin. Onaim sin anneen hanaf es anpoi neem na'ko nope naan am nak, “Amneen nai, joo! Nai' Yesus re' ia, Au Aan neka'. Hi mneen ma mituin Ee rek-reko!”^a

8 Oras nai' Petrus sin nneen niit hanaf naan, sin ankisun nfuun am nateef, mes nok askeken sin ka niit anteni' fa tua nua' ein naan. Suma Nai' Yesus anmees.

9 Rarit Nai' Yesus nok In atoup noin' teun ein naan ansanun nfanin na'kon 'to'ef naan. Ma Nai' Yesus antaar sin am nak, “Saa' re' hi miit amrair je fe'e na, hi kaisa' mitoon meu sekau-sekau. Au re' ia, Mansian Batuur-Batuur, Au ro he 'maet fe'. Karu Au 'moni 'fain, na' hi mitoon rasi naan meu too mfaun ein.”

10 Sin nnaa' naheran Nai' Yesus In rais manba'an naan, ma sin ka natoon ee fa neu tuaf es amsa'. Mes sin teun sin anmaktaan ein es nok es am nak, “In sairt ii, on mee, es na' In nak, In he nmoni nfain na'ko In a'maten re' naan? On mee?”

11 Ma sin nataan Ee mnak, “Tunggur agaam ein nak, ka'o Elia ro he neem nahuun fe', rarit na' Kristus neem. Mes anbi Ho teenb ii te, on mee?”^b

12 Nai' Yesus nataah am nak, “Namneo on naan. Ka'o Elia ro he neem nahuun fe', he nfei ranan neu Kristus, Tuaf re' Uisneno anruur nain Je na'ko un-unu'. Mes on mee? Hi ka mihiin fa saa' re' sin ntui nain je et Uisneno In Suur Akninu' anmatoom nok Mansian Batuur-Batuur? Fin sin ntui nrair Je mnak, karu In neem antea te, atoni' of anha'mui' Je ma sin of anroor niis Ne. 13 Ma hi ro he mtakan hi ruikm ein rek-reko, joo! Ka'o Elia neem anrair jen. Ma atoni' nha'mui' je, natuin sin roimk ein. Rasi naan namnees nok saa' re' unu' te, sin na'i antui nain je.”

14 Oras Nai' Yesus nok In atoup noni' tua teun ein natefan nfanin nok atoup noni' bian, sin niit too mfaun ein nabuan. Too mfaun ein naan neman he niit atoup noni' bian sin anmatoen nok tunggur agaam ein. 15 Oras too mfaun ein niit Nai' Yesus on nai te, sin naskeken, fin sin teenb ein nak of oni' In nabaar fe' et a'toe'f ee in tunan. Ma sin naen anseun Gwe.

16 Rarit Nai' Yesus nataan sin am nak, “Hi mmatoen rais saa' mok sin?”

17 Anmui' atoin es neem na'uab am nak, “Aam, karu reko te, amneen maan kau, tua! Au 'eik au aan mone he Ho mureko' maan ee. In nmuu ma ka bisa na'uaba' fa, fin niut reu'f es ansaen ee. 18 Karu niut re'uf naan ansaen ee, in nbeosn ee neu afu. Rarit ri'ana' naan in haepn ee na'furi', ma in neuk in niisn ein. Rarit in aon aan anruur gwah on re' hau noon es. Au 'toit 'iit Ho atoup noin' ein, he sin nriu' niut re'uf naan. Mes sin ka nabei' je fa, tua.”

19 Anneen on naan ate, Nai' Yesus naskara' sin am nak, “Hoe! Ro hi bainesi' ki! Au unoni' ki fani-fani, mes hi ka mheek-heek maan fa. Ma hi ka mpirsai Kau fa batuur-batuur! Au he 'sabaar 'eu ki 'tea reka'! Meik Kau ri'ana' naan neem neu ia!” 20 Rarit sin natnaat neik ri'ana' naan neem neu Nai' Yesus. Oras niut re'uf naan nkius niit Nai' Yesus on naan ate, in nbonan ri'ana' naan ma nriut ee nbi afu, ma in haep bua-neorn ee nsae.

21 Rarit Nai' Yesus nataan ri'ana' naan in aamf ee mnak, “Ho aanh ii in meens ii na'ko rek-reek ii?”

In aamf ee nataah am nak, “Na'ko in aan'-ana' fe', tua. 22 Niut re'uf naan he na'maet au aanh ii 'roo-'roo gwen. In nbeson au aanh ii fani-fani nbi ai, ma nareem ee nbi oe. Onaim amturun maan kai, tua! Karu reko te, amneek kai, he mureko' maan au anah re' ia.”

23 Nai' Yesus nataah am nak, “Nansaa' am es ho mak ‘karu reko te’? Namneo Au bisa 'moe' are' saa'-saa', asar atoni' ro he npirsai fe'!”

24 Rarit atoni mnasi' naan nataah ma he noi nkae nok am nak, “Aam! Namneo, au 'pirsai 'rair. Mes amturun kau he au 'neek a'tebes re' ia, ma'tani' ntein!”

25 Oras naan, Nai' Yesus nkius too mfaun ein nmurain neem nauban sin. Onaim In naprenat niut re'uf naan am nak, “Hoi! Niut aburarut! Ho mpoi nai mu'ko ri'ana' re' ia, he in bisa nneen, ma in bisa na'uaba'. Ho kais amtaam amfain uum!”

26 Anneen Nai' Yesus na'uab on naan ate, niut re'uf naan anhunun naher-heer. In nmoe' ri'ana' naan antaikoib ma npaiteetk on, rarit na' anpoi nasaitn ee. Ma ri'ana' naan antuamauf on re' anmate nrair. Tar too mfaun ein re' anbin naan na'uab ein am nak, “Ooo! In nmate nrair!”

27 Mes Nai' Yesus annaa' ri'ana' naan in a'niman, ma nfiit nafeen ee. Onaim ri'ana' naan anfeen nain oras naan.

28 Rarit Nai' Yesus nok In atoup noin' ein nnao nasaitan bare naan, ma ntaman nmesen neun uim jes. Anbi naan sin nataan Nai' Yesus am nak, “Aam! Nansaa' am es fe'e na hai ka bisa mriu' maan fa niut re'uf naan?”

29 Ma Nai' Yesus na'uab neu sin am nak, “Amneen mirek-reko'! Niut reu'f ein ro amaufiunt ein. Es naan ate, karu hi ka m'onen he mtoit fa Uisneno, hi ka mibei' fa he mriu' niut re'uf on re' naan.”

30 Rarit Nai' Yesus nok In atoup noin' ein nnaon nasaitan bare naan, ma antaman neu propinsi Galilea. Oras naan, Nai' Yesus ka nroim fa he atoni' nahiin nak In et bare naan. 31 Mes In arahaa he nanoni' In atoup noin' ein anmesen. In na'uab neu sin am nak, “Ka 'roo fa heen, sin of na'sosa' Kau neu atoin sona'. Rarit sin nroor niis Kau, Mansian Batuur-Batuur re' ia. Namneo Au ro he 'maet, mes anbi nmeu te,^c Au ro 'moni 'fain.”

32 Nai' Yesus na'uab on naan, ma In atoup noin' ein naskeken ntaka'naan ein aah. Sin ka nabranin fa he nataan anteni' Nai' Yesus In teenb ii on mee.

33 Rarit Nai' Yesus sin annaon ntean Kapernaum. Oras sin antaman anbin umi, In nataan neu In atoup noin' ein am nak, “Fe'e na hi mmatoena' rais saa' anbi ranan?”

34 Mes ka tiit fa tuaf es he nataah, fin anbi raan atnana', sin nmatoen am nak, sekau es re' ko'u nneis na'ko sin.^d

35 Rarit Nai' Yesus antook ma nanoni' sin am nak, “Sekau es re' anroim he njair atoin ko'u, in a'moin ee ro he batuur-batuur on re' atoin neek a'baut, he ntuthae are' too mfaun ein.”^e

36 Rarit Nai' Yesus naskau naan ri'aan es anbi naan, ma nfain neu sin atnaank ein. Onaim In na'uab am nak, 37 “Sekau re' natuina' Kau ma ntuthae tua a'baut ein on re' ri'aan a'baut re' ia, tuaf re' naan on re' antuthae Kau msa'. Ma in ntuthae Au Ama' re' anreek haefan Kau he 'taam 'uum a'bi pah-pinan ia msa'.”^f

38 Rarit Nai' Yesus In atoup noni' nai' Yohanis, natraak am nak, “Aam! Anbi oors es, hai miit atoin es anpaek Ho kanam ma nriu' niut reu'f ein. Mes hai mtaar ee, natuin hit ka hit ja fa.”

39 Mes Nai' Yesus nataah am nak, “Hoe! Hi kaisa' mikain ee. Fin sekau es anpaek Au kanak he nmoe' rais sanmakat, in of ka neu na'uab na're'uf fa Au kanak. 40 Karu in ka nraban kit fa, on naan ate in re' naan hit ja amsa'.^g 41 Es naan ate, mimnau mirek-reko'! Karu anmui' tuaf re' nahiin nak hi mituina' Kristus, rarit in nturun ki, Uisneno ka neu nnikan fa in haet naan. Maski in suma na'inu' ki neik oe ruman kraas es amsa', Uisneno ka neu nniikn ee fa.”^h

42 Rarit Nai' Yesus na'uab nteni' neu sin am nak, “Karu atoin es anmo'e ri'aan es nasanab, tar in ka npirsai nteni' Kau fa, ampaant om, oo! Reko nneis, nait faut kou' gwes,ⁱ ma nfuut nakfiirt ee neu atoni' naan in neon, ma nporin nataam ee neu tais je tnanan.

43 Karu ho musanab meik ho 'nimam, mketu mporin ho 'nimam naan! Fin reko neis ho mtaam meu sonaf neno tunan meik ho 'nimam mese', na'ko sin anporin nataam ko neu ai maputu' ma ai marara' abar-barat meik ho 'nimam nua.^j 44 [Ai marara' naan, namneo-namneo baer nana'renat. In ai ji ka nmaet niit fa. Ma are' kauna' soe' ji nsoe nareu' ka nasnaas fa.]^k 45 Karu ho musanab meik ho haem, mketu mporin ho haem aan. Fin reko neis ho mtaam meu sonaf neno tunan meik ho haem mese', na'ko sin anporin nataam ko neu ai maputu' ma ai marara' abar-barat meik ho haem nua. 46 [Ai marara' naan, namneo-namneo baer nana'renat. In ai ji ka nmaet niit fa. Ma are' kauna' soe' ji nsoe nareu' ka nasnaas fa.]^l 47 Ma karu ho musanab meik ho matam, mro'i mporin ho matam naan. Fin reko neis ho mtaam meu sonaf neno tunan meik ho matam fua' mese', na'ko sin anporin nataam ko neu ai maputu' ma ai marara' abar-barat meik ho matam fua' nua.^m

49 Au 'fee noni' re' ia, ro ma'fena'. Es naan ate, sekau es re' he natuina' Kau te, ro in he ntahan he nok Kau piut, on re' siis se'ik ro he npaek masik, hena' sisi naan antahan a'roo.

50 Masik naan, ro reko. Hit tpaek je he taminab amnahat. Mes karu masik naan ka miin masik fa heen ate, he tpaek je neu saa' antein? Ro hit tait itpoirn aah ee. Hi ro he mjair on re' masik amsa', he mmoni mbi manekat mok are' too mfaun ein.

[Onaim hi kais ammatoe mtein nai, mak sekau es re' kou' gwi, ma sekau es aan ii.]”^o