2 Nateef nok atoin Yahudis sin neon onen, Nai' Yesus antaam anbi uim onen he nfee noni'. Neno naan, too mfaun ein neman he n'oen ein. Oras sin aar sin anneen In noin' ein ate, sin nsanmakan ma na'uab ein am nak, “Atoni' ia mahiin ii ma'tani'! In anmui' kuasat amsa'! Nok ranan mee m'es In bisa on re' ia? 3 Amneon ii, In suma tukan hau. Hit tahiin In ainaf bi Maria, nok are' In oirf ein, esan re': nai' Yakobus, nai' Yoses, nai' Judas nok nai' Simon. Hit tahiin In feotf ein amsa'. Hit tok Ne aar kit tatua kuan mese'!” Onaim sin nsaekn Ee ma ka nnenan ntein' Ee fa.

4 Rarit Nai' Yesus na'uab am nak, “Tebe! Atoni' anhormaat mafefa' kninu' Uisneno re' anao-amnemat, anneis na'ko mafefa kninu' kua tuaf.”^a

5-6a Too mfaun ein, sin neek manun baiseke', tar sin ka nromin fa he npirsain neun Nai' Yesus. Es naan ate, In nsanmaak, tar antea In ka nmo'e nteni' fa rais sanmakat anbi naan. In suma anreo' nareko' naan ahaa amenat fauk aah.

6b Rarit Nai' Yesus annao neu kuan-kuan re' anmapaumaakn ein anbi naan, ma nfee sin noni' anmatoom nok Uisneno In romin. 7 In no'en naan atoup noni' tuaf bo'es am nua, ma nreun sin tuaf nu-nua, he nnaon ma natoon Uisneno In Rais Reko. In nfee kuasat amsa' neu sin he nri'un niut re'uf. 8-9 In nba'an sin am nak, “Kaisa' meik brua' amfaun ambi ranan, fin Uisneno of es re' an'ator hi perluut ein. Hi kais meik beti', noni-roit, ma 'kapi'. Hi meiki haa teas, 'pein haef, ma mpaek maan ahaa baru mese'. 10 Karu sekau ntoup ki he mtaam meu in umi, mimaika' ambi naan tar antea hi mnao mkoon meu bare bian. 11 Mes karu nbi bare mee sin ka ntoup ki fa, ma sin ka natniin ki fa, ampoi mi'ko bare naan. Ma mitonan sin am mak, ‘Natuin hi ka mroim he mitniin fa, es naan ate maut he hi msutai kiim in amre'un!’”^b

12 Rarit sin nnaon ma natoon Rais Reko naan. Sin nak, “Are' mansian aar ki ro he misaitan hi sanat ma penu sin, ma mtebi mfain he mmoin mituin Uisneno In romin.” 13 Onaim sin anriu' napoitan niut reu'f ein amfaun. On naan amsa', sin naronip mina' neu atoin amenat sin a'naak ein, ma n'oen ein he nareko' sin. Onaim sin narekon.^c

14 Oras naan, too nbi bare-bare anneen anrair anmatoom nok Nai' Yesus. Reta' anmatoom nok Nai' Yesus In kuasan manena' anrair antean usif Herodes amsa'. Tuaf bian na'uab ein am nak, “Nai' Yohanis Asranit anmoni nfain et Nai' Yesus In tuan! Etun In na'bei' he nmoe' are' kanan rais sanmakat.”

15 Mes tuaf bian nak, “Kahaf! In re' ia, mafefa kninu' nai' Elia es re' anmoni nfain et In tuan.” Bian amsa' nak, “In re' naan, Uisneno In mafefa kninu' tuaf es na'ko ahuunt ein.”^d

16 Mes oras Usif Herodes anneen rasi naan ate, in nak, “Ia nai' Yohanis Asranit, re' neon gwes ii au 'reek tuaf he n'oet nafeek in a'nakan. Oras ia in nmoin anfain jen.”

17-18 Usif Herodes anreun on re' naan, natuin in nmaka'rasi' nok nai' Yohanis. Rasi naan na'uub on, on nai: usif nai' Herodes nasiik naan in orif nai' Felipus in fee, kaann ee bi Herodias. Amneon ii, nai' Felipus nok bi Herodias ka nmanpoirn ein fa fe'. Natuin rasi naan am es, nai' Yohanis nakain ee fani-fani mnak, “Aam Usi'! Ka nabei' fa he ho mait ho ori' in fee. Natuin rasi naan antanhai hit harat atoin Yahudis.” Mes nai' Herodes in nsao ru'-ruu'. Ma in nreek tuaf he nheek nai' Yohanis ma nataam ee neu bui.^e

19 Natuin nai' Yohanis nakain ee fani-fani on re' naan, es naan ate bifee naan natunu' neek menas he nroor niis ne. Mes in ka napein mainuan fa fe', fin nai' Herodes nataam anrair nai' Yohanis anbi bui, 20 ma nreek soraurs ein he npao gwe rek-reko.

Nai' Herodes anmanu'hain nai' Yohanis. In nahiin nak Uisneno es re' anreek haefan nai' Yohanis. Ma nai' Yohanis naan atoin neek reko. Nai' Herodes anroim he nneen nai' Yohanis in uaban. Mes neot es-neot es ate, in npenan nai' Yohanis in uaban.

21 Neot es, fenai Herodias napein mainuan he nateaba' in neek menas naan. Oras naan, sin nfeest ein neun nai' Herodes in neon mahonin. Sin naskau a'naet ein he nokan nbukaen anbin fesat naan. Amnookt ein, sin esan re' anaa' aprenat, a'naak sorarus, ma mnasi-mnasi' pah Galilea. 22 Oras feest ii ntainua gwen, fenai Herodias in aan feot gwe antaam neem ma nabsoo'. In absoo'n ii reokn ii kah een, tar antea nmoe' Usif Herodes nok are' taumn ein fesat naan anmariin anmaten. Es naan ate, Nai' Herodes no'en ri'feot abso'ot naan ma nak ee mnak, “Ho mroim he mtoit saa' ate, mutoon! Au ro he 'fee ko. 23 Maski ho mtoit tar antea nbait nua au preent ii msa', au 'fee ko gwe. Au 'suup 'eik Uisneno In kanan!”

24 Ri'aan feto naan annao ma nataan in ainf ee mnak, “Ain! Ho mroim he au 'toit saa' re' reko nneis na'ko ama'?”

Ma in ainf ee nataah ee nak, “Hau, oo! Reko! Amnao nai ma mtoit maan nai' Yohanis in a'nakan.”

25 Rarit ri'aan feto naan neem rabah neu nai' Herodes in matan am nak, “Aam! Au 'toit he mfee kau nai' Yohanis in a'nakan. Amtao maan ee mbi dulang es. Rabah!”

26 Oras nai' Herodes anneen haan totis naan ate, in neekn ii namneuk. In ka nabei' fa he nheer nafani' in haan supat, natuin are' too mfaun ein anneen narair haan supat naan. 27 Rarit in naprenat naan a'naak soraurs es ma nnao n'oet neik nai' Yohanis in a'nakan na'ko uim bui. 28 Rarit sin n'oet naan nai' Yohanis in a'nakan, ma ntao gwe nbi dulang es. Rarit sin annao naat ee neu ri'aan feto naan. Ri'aan feto naan antoup gwe, ma nnao nfee je neu in ainaf. 29 Oras nai' Yohanis in atoup noin' ein annenan nak, an'ote nrair nai' Yohanis in a'nakan, sin neman ma nait neik nai' Yohanis in aon, ma annaon nsuub ee.

Reta' anmatoom nok nai' Yohanis in a'maetn ii antuu' ma nheu' on re' naan.

30 Neot es, Nai' Yesus In atoup noin' ein re' In nreek haefan sin neon gwes ii, sin nfain neman ma nabuan nok Ne. Sin natoon are' kanan rasi re' sin nmo'e nrair sin, nok are' saa' re' sin nanoni' nrair sin neu too mfaun ein.

31 Oras naan, too mfaun ein annao na'onin neu-mneman he naim Nai' Yesus. Tar antea In nok In atoup noin' ein ka napenin fa mainuan he nbukaen. Nai' Yesus na'uab nok In atoup noin' ein am nak, “Iim he tnao taim baer ma'koro', he tapein mainuan he tasnaas akre'o.”

32 Onaim sin aar sin nsaen anbin kofa', ma sin nnao namin baer ma'koro', na'roo na'ko kuan.

33 Mes too mfaun ein niit kofa' naan nnao nabnoon anpeo' nefo naan in ninin. Oke te sin npoin na'kon sin kuan ein. Rarit sin natuin ein anpe'on raan meto', ma sin ntean nahunun Nai' Yesus nok atoup noin' ein. 34 Oras Nai' Yesus ansaun na'ko kofa' naan, In niit too mfaun ein anpao nain Je. Rarit In nkasian sin, natuin sin ka nahinin fa he nmo'en saa', nahuum on re' a'bib-kasen re' ka nmu'in fa atukus. Rarit In nanoni' sin Uisneno In romin^f 35-36 na'ko oras maans ii na'puup tar antea maans ii nmaeb. Onaim In atoup noin' ein na'uab neu Ne mnak, “Aam! Reko nneis Ho mreun too mfaun ein ok-oke', he nnao nsosan mnahat anbi are' kua paumaka' nbi ia. Fin maans ii he noi nmouf gwen, ma ka tiit fa mnahat et bare ia.”

37 Mes Nai' Yesus nataah sin am nak, “Anbain! Ro hi es re' he mfeen sin he nbukaen.”

Mes sin nataan Ee mnak, “Airoo! Karu hit ttuthae too mfaun ein ia, hit ro he tapoina' roit ii ko'u! Namnees nok ameupt es in kai nbi toon es!^g Hit he tapein roit amfaun naan ta'ko mee?”

38 Mes Nai' Yesus nataah sin am nak, “Hi mnao maim miit fe', sekau es amneik beti'.”

Rarit sin nnao natanan ma nfain neem natonan am nak, “Anmui' utunu' fua' niim, nok ika' fua' nua gwah.”

39 Rarit Nai' Yesus anreun too mfaun ein naan he ntokon pukan-pukan anbin huun. 40 Onaim sin ntokon puukn ok. Pukan bian nabuan nat-natun, ma pukan bian anteni' bo' nim-niim.

41 Rarit Nai' Yesus nait naan utunu' fua' niim ma ika' fua' nua. Onaim In nbaiseun neu neon gwe tunan ma ntoit makasi neu Uisneno. Rarit In nteib utunu' naan pisa'-pisa', ma anfee sin neu In atoup noin' ein, he nnao nbatin too mfaun ein naan ok-oke'. Ika' fua' nua' ein naan amsa', In nbait sin neu sin aar sin. 42 Onaim sin aar sin anbukaen tar antea namsenan. 43 Oras sin anbukae nrarin on naan ate, atoup noin' ein nabuab nafani' mnaah nesif naan, naheun a'kora' bo'es am nua.

44 Sin aar sin of oni' too nifun niim. Naan sin nsoi' naan ahaa atoin ein. Bifee ma ri'ana' ka maso'ik fa.

45 Rarit Nai' Yesus anreun In atoup noin' ein he nnao nsaen kofa' he nnao nahunun neun kuan Betsaida et neof gwe panin. Mes In namaika' nbi nana fe', he nreun too mfaun ein he nnao nfanin. 46 Oras sin aar sin nfanin ate, In nsae neu 'toe'f es ma n'onen.

47-50 Oras anmabe te, Nai' Yesus ansanu nfain. In niit atoup noin' ein sin koof' ee ntea nrair neof gwe tnanan. Mes sin anseopn ok ma'tani', natuin kofa' naan annao nraban nok ain ko'u. Oras neis noi nmeu te, Nai' Yesus annao natuin sin. Mes In nnao npe'o haa oe je fafon. Oras In he nnao nahunun kofa' naan ate, sin nkius niit Ee. Sin namtaun nmaten. Onaim sin maktaan ein es nok es am nak, “Hoe! Saa' na es re' nee? Niut goa oo?”

Mes Nai' Yesus na'uab am nak, “Hoe! Hi kaisa' mimtau! Au es re' ia.”

51 Oras Nai' Yesus antaam neu kofa' naan, anin naan nasnaas nain. In atoup noin' ein ansanmakan batuur-batuur. 52 Sin fe' niit Nai' Yesus In npaek kuasat ma ntuthae too nifu niim anneis, mes sin ka nahiin namneo fa fe' In kuasat naan, natuin sin neek manun.

53 Oras sin antean nefo naan in panin, sin nasnasan anbi kota Genesaret in ninin. 54 Oras sin nsanun na'kon kofa' naan, too mfaun ein niit sin. Ma sin anmakoa' ein am nak, “Hoe! Nai' Yesus neem een, oo!” 55-56 Sin aar sin naenan ma nmaktoon ein nfuun am nateef, tar antea sin nroi neik are' kanan ameent ein.

Teik uab para', asar sin nnenan nak Nai' Yesus et bare mee, sin aar sin nroi neik are' kanan ameent ein, ma natupa' sin anbi mnera' huu sona'. Sin nateenb ein am nak, “Asar ameent ein anreo' naan Nai' Yesus In baru mnaun ee in tuukn ee te, sin of narekon.” Sin nmo'en on naan ate, sin nareok nanin.