Lamatua Yesus paraga dènge dhèu roro bea èci, ngara na Sakeos
19
Ka Yesus si maso re kota Jeriko, ho neo lasi taruu. 2 Ètu ne'e, abhu ca dhèu kapala roro bea dhu roro doi hia dhèu paredha Roma. Ngara na Sakeos, aa nèngu ne dhèu kaja. 3 Ropa na tadèngi Yesus kako re èèna, ka nèngu neo nèdhi. Te ngaa bisa boe nèdhi dènge be'a, lula katitu na bab'a d'ai seli, aa dhèu ae dhu kalibhu rare Yesus. 4 Nèti èèna ka, na rai uru, ka na ca'e asa kolo aj'u ca kapua ètu sebhe j'ara, dhu Yesus neo re èèna.a5 Ropa d'ai kapua aj'u ne, Yesus ladhe asa dedha. Hèia Na paroa, peka na, “Sakeos! Puru ka! Karohe, te deo ne'e kahèi, Ja'a neo manubha ètu d'ara èmu èu.”
6 Ka Sakeos malaa. Hèia na puru pamèri-pamèri, la'e dènge Yesus asa èmu na. D'ara na karej'e-karae. 7 Te ngaa dhèu ae dhu ka'ugu, peka na, “Hmm! Sakeos ne, dhèu karehe! Nga tao ka Yesus manubha ètu d'ara èmu na?! Dhèu aa'i-aa'i dhu re'a le!”
8 D'ai d'ara èmu, Sakeos titu ètu madha Yesus, ka lii, peka na, “Ama Mese! Nèti deo ne'e ne, ja'a bagi mèdha-panyau ja'a mi dua, capala hia mi dhèu dhu dènge boe ngaa-ngaa. Ladhe ja'a roro bea parisi, ja'a b'ae hari mi rèngu èpa kali lipat.”
9 Ka Yesus b'ala ne, peka na, “Be'a. Deo ne'e kahèi, Ama Lamatua pala-bagi sod'a-mole mi èu dènge isi èmu èu aa'i-aa'i, lula èu parcaya Lamatua kahèi, nuka sèmi baki Abraham. 10 Te Ama Lamatua pua Ja'a mai j'aj'i Dhèu Rai-haha Tare'a-re'a ètu rai-haha ne. Mamai Ja'a ne, sèna ka tenge dhèu dhu sero nèti j'ara Lamatua, ho hia si sod'a-mole.”b
Lii pakasame nèti ènu dhu pab'unge doi-dhari lamatua na
11 Lod'o èèna, dhèu ae nanene lii padhai Yesus. Rèngu oe dètu dènge kota Yerusalem. Rèngu pangee, na, Yesus neo pakako paredha Ama Lamatua ètu èèna, nuka sèmi dhèu aae. Hèia Yesus lolo dènge si lii pakasame èci. 12 Na peka na, “Abhu dhèu kapai èci. Neo la'e asa rai kaj'èu, ho dhèu ded'e ne j'aj'i dhèu aae ètu nèi. Ladhe èle, nèngu neo lèpa hari mai ho j'aj'i dhèu aae ètu d'ara kabarai na. 13 Lod'o nèngu pa'èra neo pakèd'i, paroa nare dhèu sab'a na canguru dhèu, ka na bagi hia si ca dhèu, juru cue.c Na paredha si, peka na, ‘Miu pake doi se j'aj'i mi poko. Te lod'o d'ai ja'a lèpa, miu hud'i peka ku leto na ca ngaa.’ Èle èèna ka, na pakèd'i.
14 Te ngaa kabarai na d'èi boe ne. Ka ra hia dhèu lasi peka, na, ‘Ji'i ngo'o boe dhèu ne paredha ji'i.’
15 Masi ka sèmi èèna, ra ded'e ne j'aj'i dhèu aae. Hèia na lèpa hari ka. D'ai èmu na, ka na paroa dhèu sab'a na, dhèu canguru sèra, ka karèi si, peka na, ‘Miu se leto ca ngaa nèti juru dhu ja'a hia miu sèra?’
16 Dhèu sab'a dhu uru, peka na, ‘Ama dhèu aae! Ja'a leto juru canguru bua nèti poko dhu ja'a abhu!’
17 Ka dhèu aae peka dènge ne, ‘Be'a! Èu ne dhèu sab'a dhu maj'èni. Lula ja'a bisa lèka èu nèti j'ara dhu ana iiki, nèti èèna ka karèi nèti deo ne'e, ja'a ded'e èu ho paredha canguru kota.’
18 Èle ka dhèu sab'a ka dua, peka na, ‘Ama dhèu aae! Ja'a abhu leto juru lèmi bua nèti poko dhu ja'a sèmi.’
19 Ka dhèu aae peka, na, ‘Be'a! Ladhe sèmi èèna, ja'a ded'e èu ho paredha lèmi kota.’
20 Te ngaa dhèu sab'a ka tèlu nèti hari juru na. Ka na peka, ‘Doi ama ka ne'e! Ja'a rapi ka pahuni ne, mage ele. 21 Ja'a tao sèmi èèna, lula madha'u. Ja'a ke'a ama, dhèu nasa. Te ama d'èi more ngaa dhu unu boe ama, aa d'èi puu hua dhu ama sèle boe!’
22 Ropa dhèu aae tadèngi sèmi èèna, ka na jèke ne, ‘Èu ne, dhèu goa d'ara! Lii padhai èu ne pabia ngi'u èu mesa mu. Èu me'a, na, ja'a dhèu nasa, ho kore ngaa dhu unu boe ja'a, aa puu ngaa dhu ja'a sèle boe. 23 De ladhe sèmi èèna, nga tao ka lamu boe tèke ne asa bank? Ho sèna ka lod'o ja'a lèpa, ja'a bisa abhu leto. Masi ka ciki di.’
24 Hèia dhèu aae ne pua dhèu leo ètu sèra, peka na, ‘Mere doi nèngu ne, sèna ka hia mi dhèu sab'a dhu abhu leto canguru deo na.’
25 Te ngaa ra pasisu, peka na, ‘Ama! Dhèu ne abhu ae le. Nga tao ka neo more nèti dhèu dhu unu ciki, ho patabha sa nèngu hari?’
26 Te ngaa dhèu aae b'ala, peka na, ‘Pangee paie-iie ku! Ladhe dhèu dhu mèu uri ngaa dhu dhèu hia ne, èèna na nèngu abhu tabha hari. Te ngaa dhèu dhu bai-eed'a, èèna na rare aa'i ngaa dhu na unu.d 27 De lami kèpe mere musu ja'a, dhu ro'o boe ja'a j'aj'i dhèu aae. Mèti si mai sa ne'e, sèna ka pamadhe si ètu madha ja'a. Lami ka!”’e
Lamatua Yesus maso asa d'ara kota Yerusalem
28 Ropa Yesus lolo èle, hèia lasi taruu ka asa Yerusalem. Yesus dhu kako uru. 29 Ropa oe dètu dènge dua rae, nuka Betfage dènge Betania, dhu ètu karasa ledhe Saitun, ka Na pua ana madhutu Na dhèu dua lasi uru. 30 Na pua si peka na, “Miu dua mi lami asa rae dhu ètu madha nèi. Pe miu mèdhi keled'ei ngèru ci'u dhu èki tèke ètu èèna. Keled'ei ne, dhèu manya'e rèdhi mèka. Mi lècu dhari na, pakako mèti mai. 31 Te ngaa ladhe abhu dhèu dhu karèi, ‘Tasamia ka mi lècu eele dhari keled'ei èèna?’ Mi peka dènge si, na, ‘Lamatua ji'i neo pake ne.”’
32 Dua ra lasi ka, hèia ra rage keled'ei ngèru nuka sèmi dhu Yesus peka. 33 Ropa ra lècu dhari keled'ei ne, ka lamatua badha ne karèi si, na, “Nga tao ka miu patabuli badha ne?”
34 Ka ra dhaa, aku rèngu na, “Lamatua ji'i neo pake ne.” 35 Lamatua badha ne d'èi kahèi, ka dua ra nuni rèti keled'ei asa Yesus. Ra hèle sig'i-kalolo ra mi dedha kabodho keled'ei ne. Èle èèna ka, ra paca'e Yesus asa dedha na.f 36 Dhèu ae kahèi hèle sig'i-kalolo dènge salalu ra mi j'ara, ho soru Yesus nuka sèmi soru dhèu kapai. 37 Ropa Na puru nèti ledhe Saitun, ka dhèu se dènge ana-ana madhutu Na, mulai pa'oo koa-kio kolongara Ama Lamatua, lula rèngu rèdhi le tadha-tadha koasa. 38 Ra pa'oo peka na,
“Nèngu ne, Dhèu Aae dhu Ama Lamatua pua mai!
Ama Lamatua hia Ne berkat!
Dhèu rai-haha limuri ne, bisa padame le dènge Lamatua ètu sorga.
Koa-kio kolongara Lamatua dhu madhèdi nèd'u paredha ètu dedha-liru dhu dedha risi.”g
39 Te ngaa abhu kahèi dhèu-dhèu Parisi ètu talora aae dhèu ae sèra. Ka ra peka dènge Yesus, “Ama Mese! Kai ku dhèu se, ho baku ra pakii-pakèce sèmi ne'e, te seli-kolane!”
40 Te ngaa Yesus dhaa, peka na, “Ja'a pasanèd'e mema! Ladhe dhèu se'e kutu hèb'a ra, èèna na, hadhu se ka dhu koa-kio kolongara Lamatua!”
Lamatua Yesus tangi lula tatao dhèu Yerusalem
41 Ropa rèngu oe dètu Yerusalem, Yesus ladhe nèdhi kota ne, hèia Na tangi, 42 peka na, “Ira ii! Dhèu Yerusalem, ee! Dad'èi Ja'a deo ne'e, miu abhu dame dhu Ja'a kèti mai. Te ngaa lula miu pahae boe Lamatua, ka miu unu heka. Dame ne pakaj'èu le nèti miu. 43 Bèli-camèd'a musu miu mai udhu padedha rai palème li'u tedhe miu ne, hèia ra maso sa d'ara, musu dènge miu. 44 Ra dhedhe palaho kota miu, toke pamera dènge rai, hèia ra pamadhe aa'i miu dènge ana-ana mi. Ra tèke eele boe hadhu cue sa dhu titu, lula miu mo'o boe tadhe Lamatua lod'o Na mai hia miu mamuri!”
Lamatua Yesus maso asa d'ara Èmu Kapua Manèngi-Mangaj'i
45 Èle èèna ka, Yesus maso asa d'ara Èmu Kapua Manèngi-Mangaj'i. Ètu madha èmu ne, dhèu tao sèmi pasa sa, ho ra pahia badha korban. Ropa nèdhi, hèia Yesus babège si nèti era èèna. 46 Ka Na jèke si, peka na, “Dhèu nèti lii padhai Lamatua dhu suri tèke le, peka na,
‘Ja'a patitu Èmu ne,
ho dhèu aa'i-aa'i bisa mai manèngi-mangaj'i ètu era ne'e.’h
Te ngaa mi tao ne nuka sèmi era pakaboko dhèu parapo.”