2-5 Dhèu Parisi kèpe pa'èra ad'a Yahudi. Nuka sèmi, dhèu neo ra'a-rinu hud'i j'amo uuru ku kacui-aai madhutu atora ad'a. Sèmi èèna kahèi, ladhe lèpa nèti d'ara pasa, hud'i diu uuru ku èi. Toke mèdha dapu rèngu sèmi èru-pangala, pega, curu, galaa, cere, hud'i rase uuru ku madhutu atora ad'a, heka bisa pake ra'a-rinu kèna.

Ladhe dhèu Yahudi cahag'e madhutu boe ad'a rèngu sèmi èèna, dhèu Parisi nasa.

Nèti èèna ka, ra nasa ropa rèdhi ana madhutu Yesus sèra ra'a-rinu j'amo boe kacui-aai madhutu atora ad'a rèngu. Ka rèngu mai pasala Yesus, peka na, “Nga tao ka ana madhutu èu se ra'a-rinu j'amo uuru boe kacui-aai? Sèra sa, pasala dènge ad'a nèti bèi-baki èdhi!”

6-7 Te ngaa Yesus dhaa, aku Nèngu na, “Miu se mema padhai lii leo, tao leo! Nèti uru nèka mai Yesaya suri tèke le, lii padhai lii Ama Lamatua sèmi ne'e,

Miu èci èèna kahèi.^a 8-9 Miu tèke eele le paredha Ama Lamatua, ho madhutu atora dhèu rai-haha. Tatao miu ne, d'èlu-mèu bia!

10 Karèi nèti uuru èèna, Musa peka le lii paredha Ama Lamatua sèmi ne'e ka, ‘Pakab'ua ina-ama miu.’ Aa tabha hari, peka na, ‘Ladhe ana èci padhèda ama na, do ina na, hud'i ra huku pamadhe ne.’^b 11-12 Ama Lamatua aj'a sèmi èèna, te ngaa miu aj'a leo. Miu peka na, ‘Ladhe dhèu èci pamoa le neo hia ngaa èci mi Ama Lamatua, masi ka ina dènge ama na j'èra oe madhe èèna ka, te ngaa pake boe mèdha èèna ho soru-bara si, lula nèngu moa le neo hia mi Lamatua.’ 13 Nèti èèna ka, deo na Ja'a peka le, miu pake heka dad'èi Ama Lamatua, te ngaa miu gati eele dènge atora miu dhu hiu. Atora ae le dhu miu gati eele sèmi èèna.”

14 Hèia Yesus paroa hari dhèu leo ètu sèra, ka Na peka na, “Pasa dhilu ho nanene paie, sèna ka miu me'a. 15 Ngaa dhu maso asa d'ara d'èlu, pakaj'alu boe. Te ngaa dhu kalua mai nèti d'ara, èèna ka dhu pakaj'alu dhèu. 16 [Cee dènge ro'a dhilu, na, nanene.”]^c

17 Èle èèna ka, Yesus dènge ana madhutu Na tèke eele dhèu sèra, ka lasi asa d'ara èmu èci. Ka ana madhutu sèra karèi sasoa nèti lii pakasame deo na. 18-19 Hèia Yesus dhaa, peka na, “Miu me'a boe kahèi? Sasoa na sèmi ne'e ka: ngaa dhu dhèu ra'a, èèna be'a. Te ngaa dhu kalua mai, karehe. Èèna be'a boe. Ngaa dhu èdhi ta'a, maso asa d'ara d'èlu, ho èèna na kalua hari asa li'u la'e. (Lii Yesus èèna neo peka mi èdhi, nganga'a aa'i-aa'i, èci sa dhu luri boe).

20 Ngaa dhu mai nèti d'ara, èèna ka dhu pa'ele iie dhèu, nèti èèna ka, Ama Lamatua d'èi boe pa'èci dènge ne. 21 Te j'ara bhelu-katub'a ae ka dhu kalua nèti d'ara dhèu! Nuka sèmi: ngangee karehe, tao j'ara makae dènge dhèu dhu dhèu èmu boe nèngu, mana'u, pamadhe dhèu, 22 gagoo-gagehu, bersina, bhelu-katub'a, leko-monya, dhèu dhu taha nare boe d'ara, d'èi boe dhèu risi nèngu, padhai lii pamanahu dhèu, padedha iisi, tatao dhu lèke boe, dènge kètu hadhu.

23 J'ara karehe aa'i-aa'i sèra mai nèti d'ara dhèu. Sèra ka dhu pa'ele iie dhèu. Ama Lamatua d'èi boe dènge dhèu sèmi èèna.”

24 Èle ka, Yesus tèke eele era èèna, ka la'e asa kota èci, ngara na Tirus. D'ai nèi, lasi asa d'ara èmu èci, lula Yesus d'èi boe dhèu re'a Nèngu ètu èèna. Te ngaa Nèngu bisa boe pahuni ngi'u.

25-26 Ètu èèna, abhu dhèu bhèni dintiu èci dhu nèti rai Finisia ètu propensi Siria. Ropa na tadèngi Yesus ètu èèna, na mai manèngi Yesus babège eele nidhu nèti ana bhèni na.

27 Te ngaa Yesus core lii èci, peka na, “Ana-ana hud'i ra'a uuru ku, ho sisa na, ra core hia busa kèna.” [Dènge lii pacele èèna, Yesus hud'i soru-bara uuru ku dhèu Yahudi Nèngu, heka dhèu leo kèna.]

28 Te ngaa bhèni èèna b'ala, aku nèngu na, “Mema tare'a Ama. Te ngaa busa mate le ètu ro'a mei. Nèngu abhu kahèi nganga'a dhu bèbhe nèti d'ara pega ana iiki sèra.” [Madhutu bhèni èèna, lod'o ana ra'a, na, busa na'a kahèi. Masi ka Yesus soru-bara dhèu unu Na, te ngaa Nèngu hud'i soru-bara dhèu leo kahèi.]

29 Ropa Yesus tadèngi lii dhaa bhèni ne, hèia Na peka, aku Nèngu na, “Tare'a! Lii padhai lii èu èèna, mola-mola na kèna! Lèpa ka! Te nidhu rai le nèti ana èu.”

30 Hèia bhèni ne la'e ka. Na d'ai èmu, ana na dhu bhèj'i luu. Nidhu kalua le.

31 Èle èèna ka, Yesus si pakèd'i nèti kota Tirus, kako lasi madhutu nebhe dhasi re kota Sidon. Nèti era èèna, rèngu lasi taruu d'ai dano Galilea. Hèia ra lasi asa rai èci dhu dènge canguru kota, dhu ra biasa pangare na, ‘Dekapolis’. 32 Ètu èèna, abhu dhèu èci dhu lii aad'o aa katele-katipa. Angalai na lere rèti ne asa Yesus. Ra manèngi sèna ka Yesus tao ai mi kètu na, sèna ka na èle. 33 Hèia Yesus tèke eele dhèu ae sèra, ka la'e mesa Na dènge dhèu èèna. Yesus pamaso kacui-aai Na asa ro'a dhilu dhèu eèna dua-dua. Èle èèna ka, Na tao ilu ètu kacui-aai Na, ka Na g'ag'e he'o dhèu ne'e. 34 Hèia Yesus ladhe asa dedha, Na ère a'ae madhera, ka Na paredha, aku Nèngu na, “Efata.” (Sasoa na, “Bhoke ka!”)

35 Na peka dhoka sèmi èèna di, kabèdhi laa, dhilu dhèu èèna tadèngi dènge. Sèmi èèna kahèi, he'o dhu sakaa èèna, mako ka na padhai lii dènge.

36 Èle èèna ka, dua ra lasi asa era dhèu ae sèra. Ka Yesus kai si, aku Nèngu na, “Nanene, ee! Baku lolo dènge dhèu, peka na, Ja'a ka dhu pa'èle dhèu ne'e ne.” Masi ka Na kai si, te ngaa dhèu se'e lasi lolo palème d'ai mia-mia. 37 Dhèu-dhèu dhu tadèngi lii lolo èèna, malaa bia. Ra papeka isi-aanga ra, aku rèngu na, “Dhèu ne'e, dhèu di, nga! Nèngu tao pabe'a aa'i mèu-mèu. Dhèu katele bisa tadèngi, aa dhèu lii aad'o bisa padhai lii.”