4 Ladhe a'ari èu tao sala pidhu hari d'ara ca lod'o, ka na ele-ho'a, hèia na mai pidhu hari ho manèngi abho, èu hud'i pabhèlu eele sasala na pidhu hari kahèi.”

5 Ca lod'o, ana madhutu se^b mai asa Yesus, ka ra manèngi, aku rèngu na, “Ama Mese! Parcaya ji'i se èra boe. De Ama pa'èra ku parcaya ji'i.”

6 Hèia Yesus dhaa, peka na, “Ladhe miu parcaya koasa nèti Ama Lamatua, masi ka ciki oo'e èèna ka, te ngaa miu bisa paredha aj'u aae ne, ‘Tahoi eele, ho pidha asa d'ara dhasi!’ Ka aj'u ne madhutu lii paredha miu.”

7 Èle ka Yesus lii, aku Nèngu na, “Tare conto èci. Nuka sèmi ènu dhu pare rai ètu d'ara oka, do, ladhe kahib'i-kalèbho ètu d'ara pad'a sod'a. Sab'a nare, ka lèpa sa èmu. Tatu lamatua na peka boe dènge ne, ‘Mai ho dua ti ta'a sama-sama!’ 8 Aad'o, sina ma? Dhu lèke ka, lamatua paredha ne, peka na, ‘Lamu lalau mei hia ja'a. Ku'a-kinu kore ku, pe èu mu'a-minu ètu kabodho nèi!’ 9 Ladhe ènu ne lalau nare madhutu dad'èi lamatua na, miu ngee, na, lamatua ne manèngi makasi mi ènu ne, do? Aad'o! 10 Miu èci èèna kahèi. Ladhe sab'a mere aa'i dhu Lamatua paredha le, miu peka na, ‘Ji'i dhoka ana pua-paleha di. Ji'i tenge boe lii koa-kad'iri. Ji'i dhoka pakako sasab'a-la'a ji'i di.”’

11 Lod'o Yesus si lasi asa Yerusalem, rèngu d'ai too propensi Galilea dènge propensi Samaria. 12 Ropa rèngu neo maso asa d'ara rae cue ètu èèna, dhèu canguru dhu pèd'a kusta mai, neo paraga dènge Yesus. Rèngu se titu nèti kaj'èu. 13 Ka ra pa'oo palere-lere, peka na, “Yesus! Mone Kapai, ee! Sue ku ji'i laa!”

14 Ropa Yesus tadèngi lii pa'oo ra, ka Na ladhe si, hèia Na pua, aku Nèngu na, “Lami pad'elo uuru ku isi miu asa ama agama, sèna ka ra parisa papèd'a kusta miu sèra, èle le, do dhae!” Ra tadèngi sèmi èèna, ka lasi dènge. Te ngaa ropa d'ai talora j'ara, cag'ag'a laa, rèngu dhu èle le nèti kusta.^c

15 Rèngu lasi taruu dènge karej'e-karae. Te ngaa abhu ca dhèu di, dhu lèpa hari mai asa Yesus. Na pa'oo, peka na, “Koa-kio Lamatua! Te ja'a èle le nèti papèd'a!” 16 Hèia na patitu kètu urutuu na, ho manèngi makasi ae-ae mi Yesus. (Te'a boe, te nèngu ne dhèu Yahudi boe. Nèngu ne ca dhèu Samaria dhu loe boe tao lii langu dènge dhèu Yahudi.)

17 Ka Yesus karèi dhèu sèra dhu madhutu dènge Ne, aku Nèngu na, “Tasamia, ee? Deo na Ja'a pa'èle dhèu canguru si? Dhu ceo, mia lasi? 18 Tasamia ka dhoka dhèu leo kara ne'e di, dhu lèpa mai ho manèngi makasi mi Ama Lamatua, dènge koa-kio kolongara Na?”

19 Hèia Na peka mi dhèu ne, na, “Èu èle le, lula èu parcaya Ja'a tare'a-re'a. De kèd'i, lèpa ka dènge sod'a-mole!”

20-21 Ca lod'o, dhèu Parisi pèri-pèri mai karèi Yesus, peka na, “Ama Mese! Peka ku dènge ji'i, lod'o mia Ama Lamatua neo pakako paredha Na?”

Ka Yesus dhaa, “Sèmi ne'e. Mage mi pangee, na, Lamatua pakako paredha Na dènge rupa-rupa tadha ètu rai-haha ne, dhu dhèu bisa rèdhi dènge musi madha ra. Dhèu abhu boe tadha dhu peka na, ‘Ladhe ku asa ne'e mai! Te Ama Lamatua pakako paredha Na ètu ne'e!’ Do, ‘Na pakako paredha Na ètu nèi!’ Aad'o! Te Na pakako paredha Na ètu talora aae miu, ètu d'ara dhèu aa'i-aa'i ra.”

22 Hèia Yesus peka dènge ana-ana madhutu Na, “Nèbhu boe, na, Ja'a, Dhèu Rai-haha Tare'a-re'a ne, pa'èci heka dènge miu. D'ai ka lod'o j'aj'èra sèra, miu d'èi titu kèna neo mèdhi mamai hari Ja'a. Te ngaa d'ai mèka lod'o mamai Ja'a. 23 Ladhe èèna na dhèu mai peka, na, ‘Kristus ètu ne'e!’ do, ‘Kristus ètu nèi!’ Na, miu baku bhute ho patangi-tenge, te lii padhai rèngu sèra, kapod'e-kabèli. 24 Te ladhe Dhèu Rai-haha Tare'a-re'a ne, lèpa hari mai, tadha na dhu mèu aadha-aadha, nuka sèmi bela dhu heo kacèb'a ètu dedha-liru nèti suu asa suu. 25 Te ngaa Nèngu hud'i abhu uuru ku j'aj'èra rupa-rupa. Ka dhèu rai-haha taa limuri ne, ro'o boe nanene, aa neo tule eele Ne. 26 Te ngaa bèli-camèd'a, ladhe Na neo mai hari, dhèu mamuri karehe sama biasa, èci èèna ka dènge lod'o Noh mamuri era.^d 27 Taa èèna, rèngu ra'a-rinu, tao pesta kab'i toke lod'o Noh maso asa d'ara kapa na. Te ngaa rèngu ro'o boe nanene kahèi. Kaca'a laa, èi aae lala, ka pamadhe aa'i si.^e

28 Sèmi èèna kahèi, lod'o Lot mamuri era, dhèu mamuri karehe titu kèna. Taa èèna, rèngu ra'a-rinu, bad'aga, sab'a oka-tedhe, patitu èmu, aa mamuri karehe sèmi biasa. 29 Te ngaa ro'o boe nanene kahèi. Hèia mad'ae aae era, ropa Lot rai eele nèti kota Sodom, cag'ag'a laa, èj'i ai dènge èi nasu bhori mai nèti dedha-liru, aa labhu pakèpu rèngu aa'i-aa'i.^f

30 De miu baku pamud'e ku! Mage dhoka bèli-camèd'a Dhèu Rai-haha Tare'a-re'a ne, lèpa hari mai, dhèu mamuri dhoka sèmi biasa di. Te ngaa kaca'a laa, Na cèu mai. 31 Lod'o èèna, dhèu ètu madha èmu, maso ia ka asa d'ara ho lalau mèdha. Dhèu dhu sab'a ètu d'ara oka, lèpa ia ka asa èmu ho rare mèdha ra.^g 32 Sanèd'e ku ngaa dhu uru èèna j'aj'i mi dhèu èmu Lot. Na madhe, lula nèngu ngee mèdha-panyau ètu èmu na.^h

33 Dhèu dhu d'èi boe madhutu Ja'a lula sue ngi'u na, èèna na mamuri na ele iia d'ara. Te ngaa dhèu dhu madhutu Ja'a toke soro mamuri na, lula sue Ja'a, bèli-camèd'a abhu sod'a-mole, aa mamuri taa-taa dènge Ama Lamatua.ⁱ 34 Ja'a pasanèd'e mema! Ropa Dhèu Rai-haha Tare'a-re'a ne, lèpa hari mai, ladhe dhèu dua j'unu ètu era èci, kabèdhi laa Lamatua ded'e paca'e ca dhèu, aa tèke eele ca dhèu. 35 Ladhe abhu dhèu bhèni dhèu dua dhu maj'u are, èèna na Lamatua ded'e paca'e ca dhèu, aa tèke eele ca dhèu. 36 [Ladhe abhu dhèu dua dhu sab'a ètu d'ara oka, Lamatua mai ded'e nèti èci, aa tèke eele ca dhèu.]”^j

37 Ropa ana madhutu tadèngi rare, hèia ra karèi Yesus, “Ama Mese! Sèra sa bèli-camèd'a j'aj'i ètu mia?”

Ka Yesus core lii, peka na, “Sèmi ne'e! Ladhe miu mèdhi ka manu-bhui dhu tema ra'a sisi badha madhe, ra lela pa'oru ètu mia, na, miu me'a èèna j'aj'i mi tadha, dhu peka na, tatu abhu sisi hèu ètu era èèna.” [Dènge sasoa dhu pahuni, peka na, ladhe Yesus Kristus lèpa hari mai, tadha na dhu mèu aadha-aadha, sad'i dhèu re'a baca tadha sèra.]